1 Timoti 6

Nu faŋ ŋkə bàw vəbuꞌ kɨ yɨsə maa vətɨɨ vəvəŋ

1Bàw laa vəbuꞌ faŋ vəŋ faꞌ vəfaꞌ tɨ́ vətɨɨ vəvəŋ ghee nshə, kɨ zɔnə vətɨɨ və faꞌ vəvəŋ maa jɨɨsə sənshə. Nɨniŋ laa kɨ vəŋ kɨ bɨsə yizii Nwi nə nu ki faŋ nsiŋ fɨꞌtə nə me. 2Gə fɨ maa vɨɨ faꞌ mbɨə faŋ vətɨɨ vəvəŋ biŋ nu Kristo, kɨ vəŋ shiasə vətɨɨ vəvəŋ vɔ́ me, buꞌ faŋ vəŋ lùu vaŋ-nshwi vəŋ maa yizii Kristo. Bàw vəŋ bee kii faꞌ tɨ́ vəŋ jəə, buꞌ laa vətɨɨ vəvəŋ lùu vɨɨ yinsəŋ, baa lùu vɨɨ faŋ Nwi kaw vəŋ, vəŋ saŋ yiŋwaa maa məyɨsə vənu vəjəəvə. Bàw a taa kɨ fɨꞌtə, baa deesə vɨɨ nɨniŋ.

Kɨ ndɨɨnə fɨ ghɔ vɨɨ faŋ vəŋ jwi nə nu Nwi kədaykə

3Wə kɨ luu kɨ deesə nu Nwi kədaykə, kee bìŋ yigisə tɨta ŋwaa-nsiŋ Yeso Kristo, faŋ lùu nu yinsəŋ nə me, buu wə ghɔ́ koꞌsə ŋwaa wi. Wə kɨ luu kɨ deesə nu faŋ ŋkə kee kùꞌnə maa məbəŋsə Nwi shɔ me, 4buu wə ghɔ́ koꞌsə ŋwaa, kee kɨɨ tuu nə nu me, toꞌ mɔꞌlə yigi, bitə vəŋku vənu, faŋ mbə jwi nə mbeenə, baa nə ntaysə, nə məndasə Nwi, nə mbɨꞌtə yibwə. 5Vɨɨ kɨ nii gàasə yiŋwaa, tay ntaysə ghee nshə, buꞌ faŋ tɔ ley vəŋ bùulə, nu bi ndi fɨ ghɔ vəŋ, vəŋ bɨꞌtə laa nu məbəŋsə Nwi lùu nu tɨ́ kaꞌ vɨ kɨ fuꞌ ka fɨ fuŋ. 6Yinsəŋ, nu məbəŋsə Nwi jwi nə nu jəə tɨ́ wə, faŋ ŋwə suꞌsə ŋwaa wi nsi. 7Maa nsiŋ nə kee fùu mbi nə fa me, kee ndɔ gə nə fa nɨzi me. 8Nɨniŋ, fazɨ kaŋ-nsiŋ nə njwi saŋ-nsiŋ lùu ghɔ nsiŋ, buu ŋkə kùꞌnə tɨ́ nsiŋ nɨniŋ. Nsiŋ kee baa kɨ kəə fa mɔ́ꞌ me. 9Vɨɨ mbɨə faŋ vəŋ kəə fùꞌ ka, yaa kɨ gu maa nu faŋ zwitə bwə bwèꞌsə vəŋ shɔ, baa kɔ̀ꞌsə vəŋ shɔ, fwisə vəŋ ndɔ maa vətɔ vəyaŋ faŋ lùu vətɔ və mfaw, bɨsə fwisə vɨɨ, yɨsə vəŋ ŋii yiku faŋ nyə shɔ̀ɔ ki, nɨniŋ ndɔ ndi. 10Nu məkaw ka lùu nu faŋ vənu vəbwəvə fuu vəyaŋ fɨ fuŋ. Vɨɨ vəyaŋ faŋ vəŋ nə kàw ka, ndì jɨɨ, mèꞌ məbiŋ vəŋ, ndɨ́ə yiŋwaa yivəŋ ŋkee dɨdɨꞌ.

Faŋ Pɔɔl nə tɨ̀ Timoti maa məbeꞌsə nu loomə

11Gə fɨ maa ghɔ, wuu Nwi, nyɨŋ vənu vɔ́, bèꞌsə fɨ jɨŋ nu ŋkɨə faŋ lùu nu loomə, baa nə nu məbəŋsə Nwi, nə maa mənuŋ fwi maa Kristo, nə məkaw vɨɨ, nə maa məjia fwi taa ŋɨꞌ, nə nu məduꞌ bwaŋnə. 12Kɨ̀ saŋ ŋwaa maa nu ŋkɨə faŋ a nùŋ fwi yə maa Kristo nə, fi məbwey vəlwaŋ faŋ Nwi tìi ghɔ shɔ nə, faŋ a nə biŋ jəə yikəꞌ vɨɨ vənshə, vəŋ zɔ. 13Mə tɨsə ghɔ vɨsɨ Nwi faŋ ŋwə yɨsə vətɔ vənshə bwey, baa nə vɨsɨ Yeso Kristo, faŋ ŋwə nə bìŋ nu ki jəə ntee vɨsɨ goməna Pɔntiɔs Pilate. 14Nɨniŋ laa a jia nu Nwi jəə, tuu ŋkee wee-nu bwə, tɨꞌnə me wee-ndoꞌ kee lùu maa ghɔ me, gə ziꞌ maa shi ŋkɨə faŋ tɨta ŋwaa-nsiŋ Yeso Kristo ndɔ fuu mbi. 15Ŋwə ndɔ fuu maa yighee njyə faŋ Nwi mənɔŋ-bwaŋnə tə̀, Nwi lùu sheꞌ nɨnɔŋ, baa luu fwàŋ faŋ ŋwə sɔꞌ vəfwàŋ vənshə, baa lùu Tɨɨ məsɔꞌ faŋ ŋwə sɔꞌ vətɨɨ və vɨɨ vənshə. 16Luu sheꞌ ŋwə nɨnɔŋ wi, faŋ kaꞌ ŋwə kee ku me, shi maa shəŋ ley faŋ ŋkə ley shɔ̀ɔ ki. Tuu wə nə kee ta yè ŋwə me. Kaꞌ tuu wə kee ndɔ ye ŋwə me. Ŋwə kìi wutə kənshə. Nsiŋ kɨ bəŋsə ŋwə. Ŋkə gòꞌsə nɨniŋ.

Ntɨ tɨ́ vətɨɨ və ka

17Kɨ̀ tɨsə vɨɨ faŋ lùu vɨɨ təka maa yighee mbi nyə̀ laa, kɨ vəŋ kɨ koꞌsə ŋwaa me, kee kɨ nuŋ fwi vəŋ maa ka faŋ lùu fa dayday me. Bàw vəŋ nuŋ fwi vəŋ sheꞌ maa Nwi, faŋ kɔ ŋwə kɔ vətɔ vənshə tɨ́ nsiŋ, mbə yaŋ, nsiŋ zɨ nə. 18Bàw a gi vəŋ kɨ yɨsə vənu vəjəəvə, vənu vəjəəvə vɔ́ gu ka vəŋ, yaŋ. Bàw vəŋ baa kɨ kaw maa məkɔ vətɔ tɨ́ vɨɨ ŋɨꞌ, gaŋtə vəŋ nə mbə. 19Vəŋ kɨ luu kɨ yɨ nɨniŋ, buu vəŋ baytə nu jəə, faŋ vəŋ ndɔ zɨ yighee yiba, ndɔ zɨ məbwey vəlwaŋ faŋ luu ŋkee məbwey yinsəŋ.

Faŋ bàw Timoti kɨ tweꞌ maa nu ŋkɨə faŋ Nwi nùŋsə tɨ́ ŋwə

20Zɔ mɔɔ, Timoti, bàw a tweꞌ maa nu ŋkɨə faŋ Nwi nùŋsə tɨ́ ghɔ. Kɨ nyɨŋ yigisə dayday, faŋ nyə kee yikuꞌnə maa nu Nwi me, baa nyɨŋ yigi njyə faŋ vɨ tii nə yigi tɔ-ley nə, faŋ nyə kee bee lùu nu tɔ ley me. 21Vɨɨ mɔ́ꞌ duꞌtə vəŋ biŋ nu kɔ́, ndì jɨɨ Kristo, kee baa kɨ nuŋ fwi maa ŋwə me. Nwi tu mənɔŋ-bwaŋnə tɔ ghɔ!

Currently Selected:

1 Timoti 6: bav

Highlight

Copy

Compare