1 Kɔrintian 9

Faŋ ŋkə kɔlə kùꞌnə laa vɨ kɨ kɔ fa tɨ́ vɨɨ məfɨꞌtə nu Nwi, nshɨ-tɔ Pɔɔl kee bɨbitə fa me

1Faŋ mə kɔlə gì nɨniŋ nə, mə kee lùu buꞌ tɨ́ nu me. Mə luu ŋkee wuu ntɔŋ Yeso Kristo. Maa mə nə yè Yeso Kristo faŋ lùu Tii ŋwaa-nsiŋ nə yisɨ. Nshɨ-tɔ wiŋ luu shwenə faꞌ ghɔ́ faŋ mə faꞌ tɨ́ tɨta Yeso Kristo nə. 2Kɨ ghaŋ laa mə kee lùu wuu ntɔŋ Kristo tɨ́ vɨɨ mɔ́ꞌ me, mə nə luu wuu ntɔŋ Kristo tɨ́ viŋ ŋkee maa yinsəŋ. Nshɨ-tɔ wiŋ faŋ viŋ lùu vɨɨ Kristo buꞌ mə nə, lùu shwenə laa mə lùu wuu ntɔŋ wi maa yinsəŋ. 3Lùu nu ŋkɨə faŋ mə bə̀ŋsə tɨ́ vɨɨ mbɨə faŋ vəŋ kəə shìa nsɔꞌ tɔ mə. 4Maa ŋkə kùꞌnə tɨ́ kaꞌ vɨ kɔ̀ fazɨ nə məluꞌ maa faꞌ wia faŋ yia faꞌ nə. 5Ŋkə nə kee yikuꞌnə laa yia ndaa vəki, kɨ toꞌ yia vɨ vəŋ mɔ́ꞌ yimu? Maa ŋkə nə kùꞌnə tɨ́ yia sheꞌ yuu ŋkə kùꞌnə tɨ́ Pita ghɔ vɨɨ ntɔŋ Yeso vəmɔ́ꞌ, baa nə vaŋ-nshwi Yeso, faŋ vəŋ yɨsə nɨniŋ. 6Luu sheꞌ yia Barnabas faŋ kaꞌ yia kee fì fazɨ fɨ ghɔ vɨɨ yimu? Luu sheꞌ yia maa məfaꞌ nə ghɔ ghia buu taa kii fazɨ zɨ mu? 7Maa vəsogeꞌ faŋ vəŋ tùŋ yighaw, vəŋ kee yaa kɨ ndɨ luu ka vəŋ, ywaŋ fazɨ shɔ me. Vɨɨ mbɨə faŋ vəŋ ndɨɨ məndɨɨ, kee zɨ fɨ taa biisə vəŋ yimu? Maa vɨɨ mbɨə faŋ vəŋ shii nyaasə, yaa kɨ nu məməŋ faŋ mbə ndɔ̀ fɨ maa nyaasə sɔ́. 8Faŋ mə naysə vənu və̀, mə kee naysə sheꞌ nu faŋ ŋkə ndɔ̀ fɨ taa yigisə vɨɨ me. Nə nyɔ̀ꞌ Mose taa ŋwaꞌlə Nwi sheꞌ nɨniŋ. 9Ŋwə nə ŋwàꞌlə laa, «Kɨ wə ka shuu nyaa yighee njyə faŋ nyaa yɔ́ faꞌ tɨ́ ŋwə me.» #Diteronimi 25.4. Nwi nə gi yigi yɔ́ sheꞌ buꞌ nyaasə mu? 10Bey, Nwi nə gì yigi yɔ́ buꞌ nsiŋ. Maa vɨ baa nyɔ̀ꞌ buꞌ nsiŋ laa, «Wə faŋ ŋwə jìa soo, fàꞌ taa biisə, baa nə wuu məshwi, yaa kɨ faꞌ, tə sɨ laa vɨ taa kɔ vəŋ fɨ maa vətɔ mbɨə faŋ mbə fuu fɨ taa biisə yɔ́.» 11Yia nə fɨ̀ꞌtə nu Nwi tɨ́ viŋ, sheꞌ yuu wə faŋ ŋwə mɔ̀ꞌ ŋɨꞌsə taa biisə ŋwə. Ŋkə kee yikuꞌnə laa viŋ, faŋ viŋ kìi sey fɨ maa faꞌ wia nə, laa viŋ kɔ fɨ maa vətɔ mbɨə faŋ viŋ kìi tɨ́ yia yimu? 12Viŋ biŋ laa vɨɨ mɔ́ꞌ faŋ vəŋ deesə nu Nwi tɨ́ viŋ, fi vətɔ fɨ ghɔ viŋ. Faŋ ŋkə lùu nɨniŋ nə, buu yia luu ŋkee vɨɨ mbɨə faŋ kaꞌ viŋ kɔ̀ vətɔ vɔ́ nə. Luu nə, faŋ ŋkə kɔlə lùu nɨniŋ, yia kee ndwàŋ viŋ laa viŋ gaŋtə yia me. Yia duꞌtə yia biŋ ŋɨꞌ tɨ̀ me ŋɨꞌ, laa kɨ yia fəŋ jɨɨ fɨ ghɔ ntɔŋ yijəə Nwi kɔ̀ŋ Yeso Kristo me.

13Maa viŋ kɨɨ laa vɨɨ mbɨə faŋ vəŋ faꞌ taa ŋii Nwi yikwalə, yaa kɨ kii fazɨ fɨ maa vətɔ mbɨə faŋ mbə fuu fɨ taa ŋii Nwi yɔ́, faŋ kɔ̀ vɨɨ nə. Vɨɨ mbɨə faŋ vəŋ faꞌ shəŋ faŋ vɨ feꞌ Nwi shɔ, vəŋ yaa kɨ kii fɨ maa mbasə ghɔ́ nɨzi, faŋ vɨ ndɨ̀, fèꞌ ndey Nwi shɔ nə. 14Ŋkə luu sheꞌ nɨndɨŋ nə vɨɨ mbɨə faŋ vəŋ fɨꞌtə nu Nwi. Tɨta Yeso nə shìa laa vɨ kɨ kɔ vətɔ mbɨə faŋ mbə kùꞌnə tɨ́ vəŋ, tɨ́ kaꞌ vəŋ kɨ zɨ, kii məbwey buꞌ faꞌ vəŋ. 15Faŋ mə kɔlə kìi wutə maa məbitə vətɔ nə, mə nə kee ta bìtə tɨ́ wə me. Faŋ mə nyɔ̀ꞌ nu kɔ́ tɨ́ viŋ nə, kɨ mə kee kəə laa viŋ kɨ kɔ vətɔ shee me. Ŋkə nə bàw shee maa məku fɨ ghɔ mə kɨ ndwaŋ vətɔ. Viŋ kɨ meꞌtə mə shɔ, tɨ́ kaꞌ mə kìi məbəŋsə ŋwaa ghɔ́. 16Faŋ mə kɔlə fɨꞌtə yigisə Nwi tɨ́ vɨɨ nə, mə kee kìi nu tɨ́ kaꞌ mə kɨ buꞌ dɨŋ ŋwaa shɔ me. Nə kɔ Nwi kɔ̀ faꞌ ghɔ́ shee. Kaꞌ mə kee mèꞌtə me. Kɨ luu laa mə nə kee fɨꞌtə nu Nwi tɨ́ vɨɨ me, buu ŋkə taa luu ŋkee kəbwə shee. 17Nii toꞌ lùu ŋkɨɨ nyaa maa məfɨꞌtə nu Nwi tɨ́ vɨɨ, buu kaꞌ ŋkə kùꞌ laa mə bitə fa yaa vəkeynə fɨ ghɔ vɨɨ. Luu nə, kee lùu ŋkitə nyaa me, ŋkə ndɔ̀ fɨ ghɔ Nwi, Nwi nə kɔ̀ faꞌ ŋwə̀ taa ghɔ mə, laa mə kɨ faꞌ tɨ́ ŋwə. 18Mə sii yè sey fə ndwə? Sey ŋwaa lùu laa mə kɨ fɨꞌtə nu Nwi tɨ́ vɨɨ dayday, laa mə kee kɨ bitə fa ŋkɨə faŋ ŋkə kùꞌnə shee fɨ ghɔ vɨɨ me.

19Mə lùu wə faŋ mə toꞌ fɨ tɔ mə, wə kee sɔꞌ mə me. Luu nə, faŋ ŋkə kɔlə lùu nɨniŋ, mə gù buꞌ tɨ́ vɨɨ vənshə, tɨ́ kaꞌ mə yɨ̀sə laa vɨɨ vəyaŋ jwi bèꞌsə Yeso Kristo. 20Yighee njyə faŋ mə lùu yia vɨɨ Jus, mə beꞌsə nshinə vɨɨ Jus, tɨ́ kaꞌ mə ndi vəŋ, vəŋ beꞌsə Yeso Kristo. Faŋ ntɨsə nsɨə faŋ Nwi nə kɔ̀ tɨ́ Mose kee kɔlə kà mə me, yighee njyə faŋ mə lùu yia vɨ vɨɨ faŋ ntɨsə sɔ́ kà vəŋ, mə dùꞌ taa ŋwaa vəŋ sheꞌ yaa wə faŋ ntɨsə sɔ́ kà mə nɨzi, tɨ́ kaꞌ mə ndi vəŋ, vəŋ beꞌsə Kristo. 21Yighee njyə faŋ mə lùu yia vɨ vɨɨ faŋ kee lùu vɨɨ Jus me, faŋ ntɨsə sɔ́ kee kà vəŋ me, mə beꞌsə nshinə vəŋ, tɨ́ kaꞌ mə ndɨ vəŋ, vəŋ beꞌsə Yeso Kristo. Ŋkə kee də̀ laa mə kee zɔ̀nə Nwi me, lùu ntɨsə Yeso Kristo faŋ mə zɔnə. 22Yighee njyə faŋ mə lùu yia vɨ vɨɨ faŋ fwisə vəŋ kee ta wèꞌ maa nu Nwi me, mə lùu yaa vəŋ, tɨ́ kaꞌ mə yɨsə vəŋ beꞌsə Kristo. Wə kɔlə lùu kɨkə, mə lùu yaa ŋwə, tɨ́ kaꞌ mə tòꞌ fɨ maa jɨɨsə sənshə maa məjwi nə vɨɨ, tɨ́ kaꞌ vəŋ kìi məbwey vəlwaŋ fɨ ghɔ Nwi. 23Mə yɨsə vənu vənshə buꞌ nu Nwi, tɨ́ kaꞌ mə ndɔ kii fɨ maa jəə ŋgwə faŋ ŋwə jwi fiiba nu Nwi.

Viŋ kɨ toꞌ maa jɨɨ Nwi yaa vɨɨ faŋ vəŋ sɨ̀ɨnə ghuu

24Yighee njyə faŋ vɨɨ yaa kɨ sɨɨnə ghuu, vɨɨ vəyaŋ nyɨ̀ŋ, luu nə, taa kii sheꞌ wə muꞌ kìi vəkeynə. Nu mətoꞌ yaa wuu Nwi luu sheꞌ yuu məsɨɨnə ghuu ghɔ́. Nɨniŋ, viŋ nyɨŋ nəŋay, baa nyɨŋ jəə, laa viŋ ndɔ kii vəkeynə vɔ́. 25Wə tɨ̀ me wə faŋ ŋwə gì laa yi taa sɨɨnə ghuu, lootə ŋwaa wi ŋkee jəə, mèꞌtə vənu vəyaŋ, tɨ́ kaꞌ ŋwaa wi weꞌ. Ŋwə yɨ̀sə nɨniŋ laa ŋwə kìi vəkeynə. Vəkeynə mbɨə faŋ ŋwə kəə mbə nə, lùu fa faŋ kaꞌ ŋkə bɨ. Luu nə, vəkeynə mbɨə faŋ nsiŋ tə̀ sɨ shɔ laa nsiŋ taa kii nə, lùu məbwey vəlwaŋ faŋ kaꞌ ŋwə kee ndɔ bɨ me. 26Gə fɨ maa mə, mə nyɨŋ gə neꞌtə laa mə ndɔ nyɨŋ, gə̀ zìꞌ maa vəndwə. Mə kee lùu yuu wə faŋ ŋwə nywenə ghɔ fɨɨ me. 27Mə saŋ ŋwaa ŋwaa, tɨ́ kaꞌ mə sɔ̀ꞌ ŋwaa ŋwaa maa vənu vənshə, laa mə faŋ mə fɨꞌtə nu Nwi tɨ́ vɨɨ nə, kee gu jɨɨ me.

Currently Selected:

1 Kɔrintian 9: bav

Highlight

Copy

Compare