1 Kɔrintian 13

Ŋkawnə kwàlə shɔ̀ɔ vənu vənshə

1Mə nii kɔlə kìi wutə faŋ ŋkə yɨsə laa mə kɨ gisə təghaŋ faŋ vɨɨ gisə, nə ntɨə faŋ nshiisə-ŋiisə Nwi gisə, luu nə, kee kii ŋkawnə maa vɨɨ me, buu yigisə nyaa lùu yaa fəŋgəŋ faŋ vɨ buꞌ, mfə gisə, wə kee zɨzɔ me, baa lùu yuu mbɨŋlə faŋ nyə gisə tɨnsee tɨnsee. 2Mə kɔlə kìi wutə faŋ kaꞌ mə kɨ twelə yigisə shuu Nwi, tɨꞌnə me kɨɨ nə vənu vənshə faŋ mbə ndènə fɨ ghɔ vɨɨ, tɨꞌnə me kɨɨ nə nu Nwi laylay, tɨꞌnə me nùŋ fwi nyaa maa Nwi ŋkee dɨdɨꞌ, tɨ́ kaꞌ mə yɨ̀sə laa ŋkee baŋsə kwalə muꞌnə, mə nəə toꞌ kɨ̀ɨ nə vənu vɔ́ vənshə, luu nə, kee kìi ŋkawnə maa vɨɨ me, buu lùu nu dayday. 3Faŋ mə kɔlə ndɨ̀ vətɔ vaŋ vənshə, kɔ̀ tɨ́ mbəəsə, baa biŋ laa vɨ twaŋ ŋwaa ŋwaa taa wi, luu nə, kee kii ŋkawnə maa vɨɨ me, buu kaꞌ vənu vɔ́ vənshə kee gàŋtə mə nə nu me.

4Ŋkawnə yaa kɨ yɨsə wə kɨ jia fwi yi, baa kii njyoꞌ yijəə; ŋwə kee ghɨꞌ vɨɨ me, kee gisə yigi shuu yaŋnə me, kee koꞌsə ŋwaa me. 5Wə faŋ ŋwə kaw vɨɨ, kee yaa kɨ yɨ nu maa jɨɨ faŋ nyə kee yikuꞌnə me, kee ndeynə sheꞌ ŋwaa wi me; fwi yi kee yaa kɨ shə me; ŋwə kee yaa kɨ lumə nu bwə faŋ wə yɨ maa ŋwə me. 6Wə faŋ ŋwə kaw vɨɨ, kee yuu kɨ ŋaytə yighee njyə faŋ vɨɨ yɨsə nu bwə me; ŋwə yaa kɨ ŋaytə faŋ vɨɨ yɨsə nu yinsəŋ. 7Wə faŋ ŋwə kaw vɨɨ, kee yuu kɨ gisə kɔ̀ŋ bwə faŋ vɨɨ yɨsə me; ŋwə bee kii nuŋsə vənu vənshə sheꞌ ghɔ Nwi, bɨꞌtə laa Nwi taa yɨsə vənu vənshə fuu vəjəə. Fwi yi kee bwà maa nu tɨ̀ me nu me.

8Ŋkawnə kee yaa kɨ me me. Yighee jɨjwi faŋ vɨɨ kee taa baa twelə yigisə shuu Nwi me. Yighee jɨjwi faŋ vɨɨ taa kee baa kɨ gisə təghaŋ nɨŋkwiŋ nɨŋkwiŋ me. Yitɔfə vɨɨ taa mè nɨzi. 9Vənu vɔ́ ndɔ mè, buꞌ laa yitɔfə nyaa-nsiŋ kee yikuꞌ maa yitɔfə Nwi me. Yigisə shuu Nwi faŋ nsiŋ gisə nə, kee lùu yibɔŋsə me. 10Yighee njyə faŋ Nwi ndɔ yɨsə vənu vənshə fuu ntee sɨ vɨɨ, buu vənu vɔ́ faŋ mbə kee yikuꞌnə nə me, ndɔ mè. 11Faŋ mə nəə kɨ bii wee, mə nəə gisə ghaŋ vaŋmbwaa, mbɨꞌtə nyaa nə luu mbɨꞌtə vaŋmbwaa; mə nəə ye vənu yaa wee yaa kɨ ye. Luu nə, faŋ mə nə gù wə, mə meꞌ vənu və vaŋmbwaa vɔ́ vənshə. 12Vənu faŋ nsiŋ ye ndwə, nsiŋ kee ye vəley me. Nsiŋ ye sheꞌ yaa vɨ ye taa ŋwaꞌlə məye sɨ, faŋ ŋwə kee lùu ley me. Ndɔ luu shi mɔ́ꞌ, nsiŋ ye Nwi nə sɨ nə sɨ. Ndwə yitɔfə nyaa-nsiŋ kee ta yikuꞌnə me. Ndɔ luu shi kɔ́, vənu vənshə luu vəley tɨ́ nsiŋ, sheꞌ faŋ Nwi kɨ̀ɨ nə nsiŋ maa vənu vənshə. 13Vənu lùu shɔ vətia faŋ kaꞌ mbə kee ndɔ mè me. Nu kəmuꞌ lùu laa nsiŋ kɨ nuŋ fwi saŋ-nsiŋ maa Nwi. Nu mɔ́ꞌ lùu məbwey vəlwaŋ faŋ nsiŋ kɨꞌ fɨ ghɔ Nwi nə. Nu lwesə vətia luu ŋkawnə. Fɨ maa vənu və̀ vətia nə, nu ŋkawnə kwàlə shɔ̀ɔ vənu vɔ́ vənshə.

Currently Selected:

1 Kɔrintian 13: bav

Highlight

Copy

Compare