อีซยา 66
66
ท โบงทางแบ้ทาง พี่ กแช่แยว้ กุ้ นี่ เว๊
1กแช่ยาเว ไจ้ะเว๊ บี่อี้ง, “ทมุ้คู เก ก ล่าง ชี๊น้าง#มท.5:34; 23:22
ดี๊ ฌางคูโคล๊งคู เก ทล่าง อางกีล้าง ก คาง#มท.5:35
น ซื๊ง ไต้ทาง เอะ เฆ้อ ก ล่างโอ พี่จองเล้ ซี?
ดี๊ ก ทล่าง โอไปว้ะ นอ, ม โอ พี่จองเล้?
2ก จูง ไต้ล้าง ท ลแพ อี้ง เลาพะ#ทม.7:49-50
ดี๊, ท ลแพ อี้ง เลาพะ นอ, กึทาง เว๊ ล้อ”#ไละ ลู่ง กรี อ คว่าง ล ปะ นอ, ไจ้ะเว๊ บี่อี้ง, อ เก ก เท่อ กแช่ยาเว ไคล้ บี่อี้ง
“แบเด้าะ อ อี้ง ล โค๊ ล้อ, พี่ ก ม แคว่-อ้ะ
เมะเว๊ โพล้ง พี่ ชางล้าง อ ซ้ะ, ดี๊ นางแบ ล้าง อ ซ้ะ ไพ้ะ ลู่ง อวีงอแล้ พ้า
ดี๊ ว้ะโทะ ลู่ง ก ทไคล้ อกย้อง
3“แบเด้าะ โพล้ง แม้ซี๊ง งู้, บี่ซุ้ดี๊ โพล้ง แม้ซี๊ง โพล้ง
โพล้ง แม้ซี๊ง แกะพู เทว๊ เว๊, บี่ซุ้ดี๊ โพล้ง บุ้แค่ ทวีง อ โคะ
โพล้ง เฌ๊โชะ ทลื่งทาง เทว๊ ทซูงทแซ, บี่ซุ้ดี๊ โพล้ง เทว๊ ทุ้ ซวีง
โพล้ง เทว๊ ทลื่งทาง นางแบไท้ เท่อ ดี๊ กางยาง#เซง น๊าม๊า อ เท้า บี่ซุ้ดี๊ โพล้ง โบงทางแบ้ทาง ทเค่งทฌ้าง
โพล้ง ลแพ อี้ง นอ, ล แฌ้ๆ, อางลึ นี่ อ กแช่ อ เกล้ โพะ แด เว๊ ล้อ
ดี๊ อ ซื๊งเว๊ อเซิงอซ้ะ ซ้ะอวีงซ้ะโทะ เท่อ, ลู่ง อ ท ล้าง ซ้ะลูซ้ะไล้ะ พ้า ล้อ
4ก เว๊ แด นอ, ก ม อางลึ นี่ ท น้ะเซิงน้ะซ้ะ เอะ อ ซื๊งเว๊ ปะ
ดี๊ ก ม เฌ๊โชะ เอะ อ ซื๊งเว๊ อ เท่อ, พี่ อ ซ้ะเมซ้ะไพล้ เว๊ นอ, เฌ๊ ลู่ง อ โอ
เป๊งนี่ พี่ ก กุ้ซย้ะ เท่อ นอ, โพล้ง ล โอ เช๊ช๊า เท่อ น่างแฌ้ แบ
พี่ ก ไคล้ นอ, อ ซื๊งเว๊ ซีง ลแพ ล คุ้ช๊องแน แบ
แบเด้าะ อ ซื๊งเว๊ นี่ แม้ ทอ้าทซ๊าง ลู่ง ก เมะแซ พ้า
ดี๊ อางลึ นี่ ท พี่ ก ล ซ้ะอวีงซ้ะโทะ-อ้ะ แบ”
กแช่แยว้ ไคล้ แก้คิ้ เอะ ซีโยง
5เกม๊า คุ้ช๊องแน กแช่ยาเว อลู่งอแท๊
น ซื๊ง พี่ ว้ะโทะ ลู่ง กแช่แยว้ อลู่งอแท๊ อกย้อง
“น ซื๊ง น๊างพื่งวี่ พี่ แช๊เมะไฌ๊ซ้ะ ดี๊ แน้
ดี๊ เว่งว๊าง ไจทางไฆวะ แน้ ลู่ง กเม้งกแซ อกย้อง นอ
นี่ ไจ้ะเว๊ บี่อี้ง, ‘เกม๊า กแช่ยาเว นี่แบ ทฆี๊งทแล้
บี่ซุ้ ก ม แด แบ น ซื๊ง ท เซิงฆวี๊งซ้ะโย้’
แบเด้าะ อ เว๊ ลแพ นอ ล้อ, ม นี่แบ ท ฌางแช้ฌางเด”
6ท อ ลู่ง เซ๊ ล้างลื่ง เฌ๊นี่ ลู่ง เว่ง พ้า
ท อ ลู่ง เซ๊ เฌ๊นี่ ลู่ง เว่งฮ๊าง
กแช่ยาเว อ ลู่ง
แม้ช๊าไท้ อดีงอแด้
7“พี่ อ ล คลึ้ แช๊ พูได้ะแบ นอ
อ เว๊ อ พู กึทาง
พี่ ทเจ้าทแช๊ เฌ๊ ล คลึ้ ท้อง-อ้ะ ได้ะแบ นอ
อ เว๊ อ พู กึทาง อ แคว๊ ล แฌ้#ทนท.12:5
8โพล้งเล้ แน่ฌ๊า แบ ท อ ไฌ่ บี่อี้ง?
โพล้งเล้ แด แบ ท พี่ อ เก บี่ซุ้ดี๊ ท ล เม้ง อี้ง?
ฌางคูโคล๊งคู ม กึทาง ล นี้ง เฆาะ ชี่-อ้า?
โพล้ง กุ้ชื้อกุ้ชะ ม กึทาง ลชู่ลล่าง ชี่-อ้า?
แบเด้าะ ท่อง ซีโยง แช๊ ทาง อ พู นอ
อ เว๊ กึทาง นี่ อ พู ลแพ นอ ล้อ
9ก เฌ๊ฌ้า ท้อง อช๊าอโท่ แบ กึทาง, ฌ้อง ม ล เกม๊า อ กึทาง ได้ะ แบ ชี่-อ้า?
กแช่ยาเว ไจ้ะเว๊ บี่อี้ง
“ดี๊ เฆ้อ ก กแช่ พี่ ดึ้ เกม๊า กึทาง นอ, ม กาไบ้ะ ทะ อ้อง พ้า, -อ้า?
น กแช่แยว้ ไจ้ะเว๊ บี่อี้ง
10“เกม๊า ซ้ะอวีงซ้ะโทะ เท่อ ดี๊ เยรูซเลง, ดี๊ เซิงมึซ้ะมึ ดี๊-อ้ะ ไช้ะ
กเย่ โพล้ง พี่ เอ เว๊-เอ้อ
เกม๊า ซ้ะอวีงซ้ะโทะ เท่อ ดี๊-อ้ะ, ดี๊ ท เซิงฆวี๊งซ้ะโย้ ไช้ะ
กเย่ โพล้ง พี่ มองแบม้ะแบ เท่อ ลู่ง อ เว๊ อ ฌ่าง-เอ้อ
11บี่ซุ้ น ซื๊ง ม นี่แบ ท ลื่งอาง ดี๊ เฆว๊เฌ้าเฆว๊ซ้ะ
ดี๊ อ ซ้ะแน๊ พี่ อางเลว๊ เท่อ
บี่ซุ้ น ม นี่ โอ้ เท่อ เมาน่าง ดี๊ ท เซิงมึซ้ะมึ
ลู่ง อ ซ้ะแน๊ พี่ อล๊าอฆวี้
12เมะเว๊ กแช่ยาเว ไจ้ะเว๊ บี่อี้ง
“อี้งเซ้อ, ก ม เฌ๊โชะ ทมึทพ้า ท้อง-อ้ะ, บี่ซุ้ดี๊ ที๊งกล้อง
ดี๊ เฌ๊โชะ โพล้ง กุ้ชื้อกุ้ชะ อคองอแซย้, บี่ซุ้ดี๊ ที๊งกล้อง พี่ แยว้ ล้าง ล้างอวีงล้างพะ
ดี๊ น ซื๊ง ม นี่แบ ท ลื่งอาง ดี๊ อ เว๊, น ม แบ ท โชะทะ ลู่ง อ เว๊ อ ย่างเด้ง ล้อง
ดี๊ ซ๊องซูง ทางล้าง แน้ ลู่ง อ เว๊ อ คางมโล่ง คู
13บี่ซุ้ดี๊ โพล้ง พี่ อ มู่ อางเลว๊-อ้ะ
เฆ้อ อี้ง ล้อ, ก ม อางเลว๊ น ซื๊ง บี่นอ
ดี๊ น ม นี่แบ ท อางเลว๊ ลู่ง เยรูซเลง พ้า
กแช่แยว้ อ ท ยู่แคว่ แฌแซ, ดี๊ อ ท ซ้ะทาง พ้ะดู
14น ซื๊ง ม แด แบ เท่อ, ฌ้อง น ม ซ้ะอวีงซ้ะโทะ เท่อ
น ฆีง ม เซิงฆวี๊งซ้ะคล้าง บี่ซุ้ดี๊ นางบาง
โพล้ง ม ซีงแฌ๊ โละซ้ะ บี่อี้ง, กแช่ยาเว อ จูง โอ ดี๊ อเพล่อบาง
ดี๊ อ ซ้ะทาง ดี๊ อดีงอแด้
15เมะเว๊ แคว่เซ้อ, กแช่ยาเว ม เฌ๊ ดี๊ มี
ดี๊ อ เลาะ ดึ้ซึ้ บี่ซุ้ดี๊ ลี้งเฌ๊ พ้ะดู
บี่ซุ้ เนโพลทาง อ ท ซ้ะทาง พ้ะดู
ดี๊ เนโพลทาง อ ท แม้น้าแม้ฆ่าง ดี๊ มี
16เมะเว๊ กแช่ยาเว ม ต้ะเซ๊ง เท่อ ดี๊ มี
เลา ดี๊ อ น้ะ ลู่ง กโพล้ง#ฮีบรู อ คว่าง ปเล๊ เว๊ ล้องๆ, บี่อี้ง, ลู่ง ไพ้ะแย อ เช๊คู กุ้แฌ้ อ เช๊คู
ดี๊ โพล้ง พี่ กแช่ยาเว แม้ซี๊ง เว๊ นอ, ม โอ แอฌี่งแอฌ้อง ล้อ
17“กเย่ โพล้ง พี่ แม้เช๊งแม้เกล้ง ล้าง อ ซ้ะ, ดี๊ ซฌ้ะ ล้าง อ ซ้ะ, บี่ซุ้ ลี้ นึฆ้าง โซ๊ง พ้า, ฌ้อง ลี้โพะ โพล้ง ล แฌ้ อ ไค๊, พี่ โอ ลู่ง โพล้ง อาง ทุ้แย ลแพ นอ อ ซุ้ อ แกล้, ดี๊ อาง ท พี่ อ ล้าง แช๊เมะไฌ๊ซ้ะ, เลา ดี๊ อาง ยู่ง นอ, ม ท้อง ท อทึอจุ้ ซกุ้ เปราะ”, กแช่ยาเว โล้ เว๊ บี่อี้ง ล้อ
18“เมะเว๊ ก ซีงแฌ๊#ปเล๊ โพะ ไละ กรี อ คว่าง ล ปะ นอ อ ไค๊, ไละ ฮีบรู ล ปะ นอ, ทไคล้ ซีงแฌ๊ ล ทีง นอ, ล โอ แบ อ ซื๊งเว๊ อ ทไพ้ะทแม้, ดี๊ อ ท ช๊องมอง, ดี๊ ก ม เฌ๊ บี่ซุ้ อางกีซยอง โพล้ง กุ้ชื้อกุ้ชะ, ดี๊ อ คว่าง, ดี๊ อ ซื๊งเว๊ ลแพ นอ ม เฌ๊, ดี๊ แด ก ทฆี๊งทแล้ 19ดี๊ ก ม ช๊างล้าง ทแม้ไน ลู่ง อ ซื๊งเว๊ อซุ้อแกล้, ดี๊ ก ม โซ๊งทาง โพล้ง ลู่ง อ ซื๊งเว๊ อ โป้ง พ้า, พี่ อ พลิ้ ซี๊ง นอ, ลี้ ลู่ง โพล้ง กุ้ชื้อกุ้ชะ อ โอ, เมะเว๊ ลี้ ลู่ง ทาราชิ้, พุ้ ดี๊ ลู, (โพล้ง พี่ อ ค้ะ คลีง ซี), ลี้ ลู่ง ทูบาง ดี๊ ยาวาง อ โอ, เลา ดี๊ ลี้ ลู่ง ที๊งล่างค่างพ้า ปางเล พ้าไท้ะ, พี่ อ ลี้ ไย้ ไว้ะ ลู่ง ทล่าง พี่ ล แน่ฌ๊า แบ ก เม้งลื้อแซท้อง-อ้า, แด แบ ก ทฆี๊งทแล้-อ้า ได้ะแบ นอ, ฌ้อง อ ซื๊งเว๊ ม โล้ล้าง กฆี๊งกแล้ ลู่ง โพล้งกุ้ชื้อกุ้ชะ อซุ้อแกล้ พ้า 20ดี๊ อ ซื๊งเว๊ ซีง ลแพ, ม ลี้ฌ้า น ซื๊ง น๊างพื่งวี่ เลาพะ, เฌ๊นี่ ดี๊ โพล้ง กุ้ชื้อกุ้ชะ, เฌ๊ เก ทลื่งทาง ทซูงทแซ เทว๊ เอะ กแช่ยาเว, เฌ๊ ดี๊ กซี, ดี๊ เลาะ ดึ้ซึ้, ดี๊ เลาะ ต้าง เท่อ, ดี๊ แลว้ ดี๊ เอ้า อ บู้ง ล โพลง, เฌ๊โชะ เว๊ ลู่ง เยรูซเลง, ก ทลู่ง พี่ อฌี้อแอว้”, กแช่ยาเว ไจ้ะเว๊ บี่อี้ง, “บี่ซุ้ดี๊ โพล้ง อีซลาเอง เฌ๊โชะ ทลื่งทาง ทซูงทแซ, ชวี๊งล้าง เว๊ ทพ้าทล่าง พี่ อเช๊งอเกล้ง พ้า, เฌ๊โชะ เว๊ ลู่ง กแช่ยาเวอล่างโอ 21ดี๊ ก ม แม้นี่ อ ซื๊งเว๊ แบ ล แฌ้ๆ, เฌ๊ เก โพล้งลื่งเท่ออคู, ดี๊ เก เลวี ปะ”
กแช่ยาเว โล้ เว๊ บี่อี้ง ล้อ
22“อไฌ่บี่อี้ง, ทมุ้คู อ ซ๊าง, ดี๊ ฌางคูโคล๊งคู อ ซ๊าง#อซย.65:17; 2ปต.3:13; ทนท.21:1
พี่ ก ม ไต้ทาง-อ้ะ นอ
ม โอเฌิ่งโอค๊า ลู่ง ก เมะแซ พ้า บี่จะเล้ นอ
น ซื๊ง อชื้ออชะ, ดี๊ น ซื๊ง อเม้งอแซ ม โอเฌิ่งโอค๊า บี่นอ”
กแช่ยาเว โล้ เว๊ บี่อี้ง ล้อ
23“โอ นี่ ลู่ง มื่งนี้ง ทางไท้ อ ซ๊าง ล แฌ, ท้อง ไท้ มื่งนี้ง ทางไท้ อ ซ๊าง ล แฌ เด้าะ
ดี๊ โอ นี่ ลู่ง มื่งดืงเท่อ ล นี้ง, ท้อง ไท้ มื่งดืงเท่อ ล นี้ง เด้าะ
กโพล้ง เลาพะ นอ, ม เฌ๊ โบงทางแบ้ทาง เท่อ ลู่ง ก เมะแซ พ้า”
กแช่ยาเว โล้ เว๊ บี่อี้ง ล้อ
24“ดี๊ อ ซื๊งเว๊ ม ไจทาง แคว่ดุ้ โพล้ง พี่ อ กไบล้ะกแบล ดี๊ เฆ้อ ลแพ นอ อ จู, อไฌ่บี่อี้ง, โลง พี่ อ อาง โพล้ง ลแพ อี้ง นอ, ม ล ซี๊งไฆวะ แบ, มี พี่ เช้า อ ซื๊งเว๊ นอ, ม ล ล้างไพะ แบ #มรก.9:48 ดี๊ อ ซื๊งเว๊ ลแพ นอ, ม เก ท ล้าง ซ้ะลูซ้ะไล้ะ แบ กโพล้ง เลาพะ ล้อ”
Currently Selected:
อีซยา 66: NPKTH
Highlight
Copy
Compare
Share
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.
