2ซามูเอง 3
3
อะเนอ แกยไท้ อ ซ้ะ, โอ ลแพ้ฆ่าง ดี๊ ดาเว
1โพล้ง พี่ อ โอ ดี๊ ซาอู ลแพ้, ดี๊ โพล้ง พี่ อ โอ ดี๊ ดาเว ลแพ้ นอ, ดึ้ซึ้ โละอซ้ะ พ้ะไยะ, แบเด้าะ, โพล้ง ลู่ง ดาเว ลแพ้ นอ, ชองทางไคล๊ทาง ครึๆ, เมะ โพล้ง ลู่ง ซาอู เว๊ ลแพ้ นอ, อ ไฌ่ อ แบ้ ล้างแช่ ทาง ล โค๊ ครึๆ, ล้อ
2ดาเว อ พูแคว๊ กึทาง ลู่ง เว่ง เฮโบรง พ้า ตบลึ้ แฌ้, อ พูแคว๊ วี่แซย่ นอ, อ เม้ง อางโนง, กึทางนี่ ดี๊ น่าง อาฮีโนอาง, โพล้ง ยีซเรเอง 3คี๊ง แฌ้ ล แฌ้ นอ อ เม้ง คีเลอะ, กึทางนี่ ดี๊ น่าง อาบีกายี นาบาง อ แม๊ มืงเม๊, เก โพล้ง คาราเมง, ซ๊า แฌ้ ล แฌ้ นอ อ เม้ง อะซาโลง, กึทางนี่ ดี๊ น่าง มาอาคา, เก กจุ้แฆว้ ทางไม อ พูมืง, อ เว๊ โอ ลู่ง เว่ง เกชู 4ลี่ง แฌ้ ล แฌ้ นอ อ เม้ง อาโดนียา, กึทางนี่ ดี๊ น่าง ฮะกี, เย่ แฌ้ ล แฌ้ นอ อ เม้ง เชฟาทียา, กึทางนี่ ดี๊ น่าง อาบีทาง 5ฆู๊ง แฌ้ ล แฌ้ นอ อ เม้ง อิ้เรอาง, กึทางนี่ ดี๊ น่าง เอะลา ดาเว อ แม๊, ดาเว อ พูแคว๊ ลแพ อี้ง นอ, กึทาง ลู่ง เว่ง เฮโบรง พ้า นอ ล้อ
6ลู่ง ไค๊ พี่ โพล้ง ลู่ง ซาอู เว๊ ลแพ้, ดี๊ ดาเว เว๊ ลแพ้ ดึ้ซึ้ โละอซ้ะ ได้ะ นอ, อะเนอ แม้ เฌิ่งทาง ค๊าทาง อ ซ้ะ, เก ลแพ้ ฆ่าง ดี๊ ซาอู 7ซาอู นอ อ แม๊ พู โอ ล แฌ้, อ เม้ง น่าง รีซาปา, เก ไอยา อ พูมืง, ดี๊ อีโบเช ไคล้ ดี๊ อะเนอ ไจ้ะเว๊, “แม้ทเล้?, น ลี้ฆ้างฌูง จ แพ่ อ แม๊ พู?” 8อะเนอ อ ซ้ะทาง ลู่ง อีโบเช อ ทไคล้ อี้ง อ กย้อง เต้ๆ, อะเนอ ไจ้ะ เอะ-อ้ะ, “แย้ โย้ จ เก โพล้ง ยูดา อ ทวีง คูฆีง โบ่, กุ้ นี้งๆ, อี้ง นอ, จ เนโพลทาง ทเซิงเท่งซ้ะโต้, เอะ น แพ่ ซาอู อชื้ออชะ, ดี๊ อ พื่ง อ วี่, ดี๊ อ ซกุ้ ฌุ้พาง, จ ล อางกีล้าง แน้ ลู่ง ดาเว อ จูง พ้า แบ, ล นี้ง แย๊ อี้ง, น ไจ้ะ มะ จ แม้ ไพ้ะ แบ เท่อ ดี๊ กมืง ล แฌ้ อี้ง เด้าะ 9เกม๊าเต้ กแช่แยว้ แม้ เอะ อะเนอ, ดี๊ แอทาง ได้ะ, เมะ ลู่ง จ ล แม้ เท่อ ลู่ง ดาเว อ ฌ่าง, บี่ซุ้ ดี๊ กแช่ยาเว อืงล้าง เว้ เอะ แน้ แบ นอ 10เมะเว๊ จ ม แญ่ไฆวะ ซาอู อชื้ออชะ นอ อ มื่ง อ บ้าง#1ซมอ.15:28 ดี๊ ม ไต้ทางต๊างทาง ดาเว อ ล่าง ชี๊น้าง, โพะคอง โพล้ง อีซลาเอง ดี๊ ยูดา, โอนี่ ลู่ง ดาง ลี้ ท้อง ลู่ง เบเออเชบา” 11อีโบเช ไคล้ช๊า ไท้ อะเนอ ล ซี น่าง ทีง ล้าแบ เฆาะ, เป๊งนี่ อ เว๊ ซ้ะเม อะเนอ 12อะเนอ เจ่ทาง โพล้งไคล้เดิงเท่อ, ลี้ คิ้-อ้ะ ลี้ ฌูง ดาเว, อางจ้ะ เว๊ ที๊งล่างค่างพ้า อี้ง นอ, เก โพล้ง เล้ เว๊”, ดี๊ โล้ เอะ เว๊ เด้าะ ไจ้ะเว๊, “เกม๊า น แม้ ทเอิ้งล้าง โละซ้ะ ดี๊ แย้, แคว่เซ้อ, จ จูง ม โอ ลแพ้ ฆ่าง ดี๊ แน้, บี่ซุ้ ลี้ฌ้า โพล้ง อีซลาเอง เลาพะ นอ, แกย ไท้ อ ซ้ะ เฌ๊ไท้ โอก้ะ ลแพ้ ฆ่าง ดี๊ แน้” 13ดาเว ไคล้ช๊า-อ้ะ ไจ้ะเว๊, “ฌี้ เย้า, จ ม แม้ ทเอิ้งล้าง โละซ้ะ ดี๊ แน้, แบเด้าะ จ ม อางท่าง แน้ เท่อ ล เม้ง บี่อี้ง, น เมะ เฌ๊ ฌูงแย้ โฆะ นอ, น แบ เฌ๊ โชะ เอะ แย้ ซาอู อ พูมืง น่าง มีคาง นอ, เมะ ล เมะ บี่นอ แบ นอ, เฌ๊ฌูง แย้ ล ฌี้” 14ฌ้อง ดาเว โซ๊ง โพล้งไคล้เดิงเท่อ, ลี้ ฌูง ซาอู อ พูแคว๊ อีโบเช โล้ แบ-อ้ะ ไจ้ะเว๊, “เกม๊า ไท้ เอะ แย้ จ แม๊ น่าง มีคาง นอ ไช้ะ, เมะเว๊ จ อางเล๊ นี่-อ้ะ, ดี๊ โพล้ง ฟีลีเตีย อ แฌ้ ล แย้ อ ท คู ไพ้ะ”#1ซมอ.18:27 15อีโบเช โซ๊ง โพล้ง, เกม๊า ลี้ แม้นี่ไท้ น่าง มีคาง ไจพ้ะแด อ แว้, เมะเว๊ ลาอิ้ อ พู ปางทีเอง 16แบเด้าะ, อ แว้ ลี้ โพะ เว๊ อ ไค๊ ดี๊ ฌาง ดี๊ ย้า, ท้อง ตางโบง บาฮูรีง, ฌ้อง อะเนอ โล้ เอะ-อ้ะ ไจ้ะเว๊, “ม๊า น ไท้ ไท้ ไวะ”, ดี๊ อ เว๊ ไท้ไท้ เว๊ ล้อ 17อะเนอ ก้างแก้ โละอซ้ะ ดี๊ โพล้ง อีซลาเอง อเม้งอแซย่ ไจ้ะเว๊, “ลู่ง อู้ง นอ, น ซื๊ง แบซ้ะ ดาเว เก กจุ้แฆว้ โพะคอง น ซื๊ง 18ค๊องเนงอี้ง, ม๊า น แม้ บี่นอ, เมะเว๊ กแช่ยาเว ไคล้ ดี๊ ดาเว ไจ้ะเว๊, ‘จ ม แม้พ้องพลิ้ จ พู จ ลี้ง โพล้ง อีซลาเอง, ดี๊ จ เพล่ ดาเว อ จูง ลู่ง โพล้ง ฟีลีเตีย อ จูง พ้า, ดี๊ อดีงอแด้ เลาพะ ซีง นอ อ จูง พ้า’, ” 19อะเนอ ไคล้ ดี๊ โพล้ง เบงยามีง ปะ, ฌ้อง ลี้ฌูง ดาเว ลู่ง เว่ง เฮโบรง พ้า, โล้ เอะ เว๊ ทกุ้เม้ง, พี่ โพล้ง อีซลาเอง ดี๊ โพล้ง เบงยามีง อชื้ออชะ แดฆึ เว๊ ฌี้ มะ, พี่ ม แม้ บี่นอ 20อะเนอ เฌ๊ฆ้าง โอ ดาเว ลู่ง เว่ง เฮโบรง พ้า, เฌ๊ ดี๊ โพล้ง อ แฌ้ คี๊ง ชี๊ง, ดาเว ลื่งอาง อะเนอ ดี๊ โพล้ง, พี่ อ โอ ดี๊-อ้ะ ลแพ นอ 21อะเนอ โล้ เอะ ดาเว ไจ้ะเว๊, “จ ม เฌ้เทิงทาง, จ ม ไท้ อางกีซยองนี่ โพล้ง อีซลาเอง เลาพะ, เกม๊า เฌ๊ ลู่ง จ เซงคู กจุ้แฆว้ อ โอ, บี่ซุ้ อ ซื๊งเว๊ซีง ม แม้ ทเอิ้งล้าง โละซ้ะ ดี๊ แน้, ดี๊ บี่ซุ้ น ม โพะคอง เท่อ เลาพะ, ท๊อง ทแบ น ซ้ะ”, ฌ้อง ดาเว โซ๊ง อะเนอ ไท้ไวะ, ดี๊ อ เว๊ ไท้ ดี๊ ทมึทพ้า นอ ล้อ
โยอะ แม้ซี๊ง อะเนอ
22แคว่แฆว่ เซ้อ, ดาเว อ ซึ้พู ดี๊ โยอะ ลี้ ตมละ เท่อ เฌ๊ไท้, เฌ๊ไท้ โชะ ดี๊ เท่อ พี่ อ ลู่นี่ เว๊ นอ แอฌ้อง, แบเด้าะ อะเนอ นอ ล โอ ดี๊ ดาเว ลู่ง เฮโบรง พ้า ล้าแบ, เมะเว๊ อ เท่อ โซ๊ง ไท้-อ้ะ ดี๊ ทมึทพ้า เย้า 23ท่อง โยอะ ดี๊ ซึ้พูมู๊ง เลาพะ, พี่ โอ ดี๊-อ้ะ เฌ๊ ท้อง นอ, โพล้ง โล้ เอะ โยอะ ไจ้ะเว๊, “เนอ อ พู เมะเว๊ อะเนอ นอ, เฌ๊ฆ้าง โอ กจุ้แฆว้, ฌ้อง กจุ้แฆว้ โซ๊ง ไท้-อ้ะ, ดี๊ อ เว๊ ไท้ ดี๊ ทมึทพ้า ล้อ 24ฌ้อง โยอะ ลี้ฆ้าง โอ กจุ้แฆว้, โล้ เอะ เว๊ ไจ้ะเว๊, “น แม้ ทเม้งเล้ นอ?, แคว่เซ้อ, อะเนอ เฌ๊ฆ้าง โอ แน้, แม้ ทเม้งเล้ น โซ๊ง ไท้-อ้ะ บี่นอ?, อ เว๊ ไจคุ้ซูงไฆวะ เย้า เต้ๆ, ล้อ 25น ซีงแฌ๊ เย้า, เนอ อ พู เมะเว๊ อะเนอ นอ, เฌ๊ โล๊ไละล้าง แน้, บี่ซุ้ แบซ้ะ ซีงแฌ๊ น ทไจทาง ไจล้าง, ดี๊ บี่ซุ้ ม ซีงแฌ๊ ทกุ้เม้ง กุ้เจ้ง พี่ น แม้-อ้ะ” 26ท่อง โยอะ ลี้ฆ้าง โอ ดาเว ไจทาง เย้า นอ, อ เว๊ โซ๊ง โพล้งไคล้เดิงเท่อ, ม๊า ลี้ช่องนี่ อะเนอ, ฌ้อง อ ซื๊งเว๊ ลี้ แม้นี่ เว๊ ลู่ง ที๊งน๊างโบ้ ลู่ง ซีรา พ้า, แบเด้าะ ดาเว ล ซีงแฌ๊ เว๊ แบ 27ดี๊ ท่อง อะเนอ เฌ๊ไท้ ไท้ ท้อง เว่ง เฮโบรง พ้า เย้า นอ, โยอะ ลี้ฌ้า-อ้ะ ลู่ง เว่ง อ ป้ะตู๊ง พ้า, บี่ซุ้ ม ไคล้ เว๊ ดี๊-อ้ะ คี๊ง แฌ้ เฆาะ, แบเด้าะ, โยอะ นอ ชิ้ อะเนอ อ ฌู่โพ๊ง, ดี๊ อ เท่อ ซี๊ง เว๊, โยอะ แม้แกไท้ อ พื่ง อาซาเฮง อ ซวีง อ กย้อง นอ ล้อ 28โอ ลู่ง ไค๊, ท่อง ดาเว ซีงแฌ๊ แบฆ้ะ ดี๊ ท ล ไฌ่ อี้ง นอ, ไจ้ะเว๊, “แย้ จ กแช่ แด เว๊ ดี๊ จ มื่ง จ บ้าง นอ, ล โอ ดี๊ ทไพ้ะทแม ลู่ง กแช่ยาเว อ เมะแซ พ้า แบ ล้างชู้, พี่ แบฆ้ะ ดี๊ เนอ อ พู, เมะเว๊ อะเนอ อ ซวีง นอ อ กย้อง 29เกม๊า ทซวีง นอ ล้างเทะแบ โยอะ อ คู, ดี๊ อ แพ่ อชื้ออชะเลาพะ นอ อ คู, เกม๊าเต้ โพล้ง พี่ โอ ดี๊ อ ทที๊ง ไจทาง, โพล้ง แบ ทแช๊ คีงเตา, โพล้ง อล้องอย่าง โอ ล ล๊า ล ฆวี้ แบ, โพล้ง พี่ แบ ทแม้ซี๊ง แบ-อ้ะ ดี๊ น้ะ, โพล้ง ทอางทโอ้ ล โอ แบ นอ, ล้างเทาไฆวะ ดี๊ โยอะ อ ชื้อ ล ฌี้ 30ทแม้ อ ซ้ะ บี่อี้ง, โยอะ ดี๊ อ พื่ง แคว๊ อาบีไช แม้ซี๊ง อะเนอ, เป๊งนี่ อะเนอ แม้ซี๊ง อ พื่ง แคว๊ อาซาเฮง ลู่ง ทดึ้ซึ้ พ้า, ลู่ง ทล่าง กีเบโอง พ้า อู้ง 31ฌ้อง ดาเว ไคล้ ดี๊ โยอะ, ดี๊ โพล้งเฌงพูฆ๊างพู กุ้ อ แฌ้, พี่ อ โอ ดี๊ โยอะ ลแพ นอ ไจ้ะเว๊, “เกม๊า น ซื๊ง ซย๊างยะ ไช๊ช้าง, ดี๊ เราทาง ตไก้ยะ กเซ้าะ ลู่ง ย่างเด้ง ล้อง, เกม๊า น ซื๊ง พี่ น มองแบ อะเนอ นอ ลี้ วี่ง”, ดี๊ กจุ้แฆว้ ดาเว นอ, ลี้ โพะ อะเนอ อโช่ง อ ไค๊ 32อ ซื๊งเว๊ เคิงล้างบ้า อะเนอ อ จู, ลู่ง เฮโบรง พ้า, ดี๊ กจุ้แฆว้ นอ ฌาง พ้ะดู, ลู่ง ทล่าง เคิงล้างบ้า อะเนอ อ จู ไท้ะ นอ, โพล้งเฌงพูฆ๊างพู กุ้ แฌ้ ฌาง ปะ 33กจุ้แฆว้ ฌางล้างย้าล้าง เท่อ, แบฆ้ะ ดี๊ อะเนอ อ กย้อง บี่อี้ง
“เกิ้ง ชี่ ว้า พี่ อะเนอ ม ซี๊ง, แบด้อง โพล้ง เฌ๊ฌ้อง?
34อ จูง ล แบ ทจ้าทะ-อ้ะ แบ
อ คาง ล แบ ทซุ้ทะ-อ้ะ แบ
อ เว๊ ล้างเทะเค้า
แบด้อง โพล้ง ล้างเทะเค้า ลู่ง โพล้งอ้าโพล้งซ๊าง อ เมะแซ พ้า”
ดี๊ โพล้งเฌงพูฆ๊างพู กุ้ อ แฌ้, ฌาง มองแบ อะเนอ เด้าะ 35ฌ้อง โพล้งเฌงพูฆ๊างพู เฌ๊ โล้ แบ ดาเว, เกม๊า อาง มี้ พี่ มื่ง โอ ได้ะ อ แค๊ นอ, แบเด้าะ ดาเว อืงล้าง อ ซ้ะ ไจ้ะเว๊, “จ เมะ ไช่ดุ้ กู ฌี้, ทเม้ง ฌี้ๆ, ลู่ง มื่ง ล นี้ง แย๊ อี้ง ล ล้าง นึ ได้ะ แบ นอ, เกม๊าเต้ กแช่แยว้ แม้ เอะ แย้ ดี๊ แอทาง ได้ะ” 36ท่อง โพล้งเฌงพูฆ๊างพู กุ้ แฌ้, แด เว๊ ทแม้ อ ซ้ะ บี่นอ, แบ อ ซื๊งเว๊ อ ซ้ะ, ดี๊ แด เว๊ เก ทอฌี้, บี่ซุ้ ดี๊ อ ซื๊งเว๊ แบ อ ซ้ะ, ดี๊ ทกุ้ อ เม้ง พี่ กจุ้แฆว้ แม้ เว๊ นอ 37โพล้งเฌงพูฆ๊างพู เลาพะ, ดี๊ โพล้ง อีซลาเอง กุ้ แฌ้ นอ, ซีงแฌ๊ โย๊ เว๊ ล นี้ง แย๊ นอ บี่อี้ง, กจุ้แฆว้ ล แบฆ้ะ ดี๊ ทแม้ซี๊ง เนอ อ พู, เมะเว๊ อะเนอ นอ แบ 38กจุ้แฆว้ ไคล้ ดี๊ อ เพล่ดู ลแพ นอ ไจ้ะเว๊, “น ซื๊ง ล ซีงแฌ๊ แบ-อ้า, ล นี้ง แย๊ อี้ง, กดูกแซย่ ดี๊ โพล้ง ลู่ง อ ดู ล แฌ้, ล้างเทะเค้า ลู่ง ค่าง อีซลาเอง พ้า อี้ง? 39ทึเมะ แย้ จ แบ ทเท้าไน-อ้ะ, เก กจุ้แฆว้ เย้า ฌี้ นอ, จ ไฌ่ ล้างแช่ โย๊ เฆาะ ล นี้ง แย๊ อี้ง, กแคว๊ พี่ เก น่าง เซรูยา อ พู ลแพ อี้ง, เก โพล้ง แน่ลู่ อ ซ้ะ ชองโฆะ เละ แย้ ได้ะ, เกม๊าเต้ กแช่ยาเว แม้ช๊าไท้ เอะ โพล้ง, พี่ อ แม้ ทอ้าทซ๊าง, บี่ซุ้ ดี๊ อ ทอ้าทซ๊าง นอ แดเทา”
Currently Selected:
2ซามูเอง 3: NPKTH
Highlight
Copy
Compare
Share
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.
