2ทกวิ้ไน 18
18
มีคายา โล้เว้พ้ะเว้ เท่อ แบฆ้ะ ดี๊ ท ล น้า เท่อ แบ
(1กจฆ.22:1-28)
1เยโฮชาฟา อ ทโอทช๊อง แอฌ้อง, โอ ดี๊ อฆี๊งอแล้ ดู มะ, ดี๊ อ เว๊ แม้ อกู้งอดอง โละซ้ะ ดี๊ อาฮะ 2ลู่ง พ้องไค๊ ไฆวะ ตบลึ้ เนง นอ, อ เว๊ ลี้ล้าง โอ อาฮะ ลู่ง ซมาเรีย พ้า, ดี๊ อาฮะ แม้ซี๊ง แกะ ดี๊ งู้ แอฌ้อง ลู่ง อ เว๊ อ ฌ่าง, ดี๊ ซึ้พู พี่ เฌ๊ ดี๊-อ้ะ ลแพ นอ อ ฌ่าง, ฌ้อง อ เท่อ โก้ไละ-อ้ะ ม๊า อ ลี้ทาง ลู่ง ราโมะกีเลอา 3อาฮะ กจุ้แฆว้ ค่าง อีซลาเอง, ไคล้ ดี๊ เยโฮชาฟา กจุ้แฆว้ ค่าง ยูดา พ้า ไจ้ะเว๊, “น ม ลี้ ราโมะกีเลอา พ้า นอ ดี๊ แย้ ชี่-อ้า”, อ เท่อ ไคล้ช๊า-อ้ะ ไจ้ะเว๊, “แน้ ดี๊ แย้ ก เก บี่ซุ้ ล แฌ้ ฆ่าง, จ โพล้งเฌงพูฆ๊างพู เก น โพล้งเฌงพูฆ๊างพู, จ ม ลี้ ดี๊ แน้ ลู่ง ทดึ้ซึ้ พ้า อี้ง”
4เยโฮชาฟา ไคล้ ดี๊ กจุ้แฆว้ ค่าง อีซลาเอง ไจ้ะเว๊, “ม๊า น อางจ้ะนี่ ทไคล้ ดี๊ กแช่ยาเว ท่อง อ ฌ้อง แบๆ” 5ฌ้อง กจุ้แฆว้ อีซลาเอง กุ้ แพโซง โม ลี่ง แย้ แฌ้, ดี๊ ไคล้ ดี๊ อ ซื๊งเว๊ ไจ้ะเว๊, “เกิ้ง ก ม ลี้ ดึ้ซึ้ ราโมะกีเลอา ชี่-อ้า?, ล เกิ้ง ลี้ แบ-อ้า”, อ ซื๊งเว๊ซีง ไคล้ช๊า-อ้ะ ไจ้ะเว๊, “ม๊า ลี้ทาง แดเทา, เมะเว๊ กแช่แยว้ ม อางกีล้าง เว๊ ลู่ง กจุ้แฆว้ อ จูง พ้า” 6แบเด้าะ เยโฮชาฟา ไจ้ะเว๊, “พี่ อี้ง นอ กแช่ยาเว อ โม ล โอ น่าง แฌ้ ล้าแบ-อ้า, พี่ ก ม อางจ้ะนี่ เท่อ ดี๊-อ้ะ ซี?” 7กจุ้แฆว้ อีซลาเอง โล้ เอะ เยโฮชาฟา ไจ้ะเว๊, “กแคว๊ โอ ล แฌ้ ได้ะ, พี่ ก ม เกม๊า อ อางจ้ะ กแช่แยว้ ซี, เมะ เว๊ มีคายา อีงลา อ พู, แบเด้าะ จ แช๊เมะ ดี๊-อ้ะ, เมะเว๊ อ เว๊ โล้เว้พ้ะเว้ ที่ ทอ้า อ ไฌ่ กุ้ พ๊า ซวะ, ล โล้เว้พ้ะเว้ เท่อ แบฆ้ะ ดี๊ แย้ ลู่ง อ ฌี้ น่าง พ๊า แบ เฆาะ, แบเด้าะ เยโฮชาฟา ไจ้ะเว๊, “ม๊า กจุ้แฆว้ ไคล้ เท่อ บี่นอ ล ฌี้” 8ฌ้อง กจุ้แฆว้ อีซลาเอง กุ้นี่ อ เพล่ดู ล แฌ้, เฌ๊ฆ้าง ฌูง-อ้ะ ดี๊ ไจ้ะเว๊, “ลี้ แคว่ นี่ อีงลา อ พู เมะเว๊ มีคายา นอ, เกม๊า อ เฌ๊ ลู่ง อี้ง เมะ เพล” 9กจุ้แฆว้ อีซลาเอง ดี๊ เยโฮชาฟา กจุ้แฆว้ ค่าง ยูดา, ล แฌ้ๆ, นอ ชี๊น้าง ลู่ง อ ล่าง ชี๊น้าง คู, ซุ้ ไช๊ ก้อง ช้าง กจุ้แฆว้, โอ ลู่ง ทล่าง เพา ล้าง บืง ฆ้าง ดี๊ เกล้, นึฆ้าง เว่ง ซมาเรีย อ เกล้ ป้ะตู๊งไท้ะ, ดี๊ โม กุ้ อ แฌ้ โล้เว้พ้ะเว้ กแช่แยว้ อลู่งอแท๊, ลู่ง กจุ้แฆว้ คี๊ง แฌ้ อี้ง อ เมะแซ พ้า 10ดี๊ เคนาอะนา อ พู เซเดคียา แม้นี่ ท้ะ แม้ เก ทโน้ง, ฌ้อง ไคล้ทาง ไจ้ะเว๊, “กแช่ยาเว โล้ เว๊ บี่อี้ง, ‘ดี๊ ทลแพ อี้ง นอ น ม ชางไฆวะ โพล้ง ซีเรีย, ท้อง อ ซื๊งเว๊ ม แบ ทแม้ ซี๊งทู่งอูงเล้ง-อ้ะ นอ ล้อ 11ดี๊ โม เลาพะ นอ โล้เว้พ้ะเว้ เท่อ บี่นอ ไจ้ะเว๊, “เกม๊า ลี้ ลู่ง ราโมะกีเลอา แดเทา ดี๊ น ม น้า เท่อ, เมะเว๊ กแช่ยาเว ม อางกีล้าง เว๊ ลู่ง กจุ้แฆว้ อ จูง พ้า”
12ดี๊ โพล้งไคล้เดิงเท่อ พี่ อ ลี้ กุ้นี่ มีคายา นอ, โล้ เอะ เว๊ บี่อี้ง, “แคว่เซ้อ, กเย่ โม ลแพ นอ โล้ล้าง ทอฌี้ เอะ กจุ้แฆว้, ด้องซุ้ อ นุ้ ล พ้า ฆ่าง, เกม๊าเต้ น ทโล้ นอ, เก บี่ซุ้ดี๊ โพล้ง ลแพ นอ อ ทไคล้ ล แฌ้, ดี๊ ไคล้ ที่ เท่อ พี่ อฌี้อแอว้ นอ ไช้ะ” 13แบเด้าะ มีคายา ไคล้ช๊า-อ้ะ ไจ้ะเว๊, “กแช่แยว้ โอม๊า ได้ะ บี่จะเล้ นอ, จ กแช่แยว้ โล้ เว๊ บี่จะเล้ นอ, จ ม ไคล้ บี่นอ ล้อ” 14ดี๊ ท่อง อ เว๊ เฌ๊ฆ้าง โอ กจุ้แฆว้ นอ, อ เท่อ อางจ้ะ-อ้ะ ไจ้ะเว๊, “มีคายา#มีคายา, ฮีบรู อ คว่าง นอ เมะเว๊, มีคา-เอ้อ, เกิ้ง ก ม ลี้ ดึ้ ราโมะกีเลอา ชี่-อ้า?, ล เกิ้ง ลี้ แบ-อ้า?”, ดี๊ อ เว๊ ไคล้ช๊า กจุ้แฆว้ ไจ้ะเว๊, “เกม๊า ลี้ทาง แดเทา, ดี๊ น้า เท่อ ไช้ะ, อ ซื๊งเว๊ ซีง ม แบ ทอางกีล้าง-อ้ะ ลู่ง น จูง พ้า” 15แบเด้าะ กจุ้แฆว้ ไคล้ ดี๊-อ้ะ ไจ้ะเว๊, “จ เกม๊า น เอิ้งล้าง เท่อ ฆวี่ พ๊า เย้า เล้, พี่ น ม ไคล้ ที่ ทเมะทโต้ ดี๊ แย้, ลู่ง กแช่ยาเว อ เมะแซ พ้า” 16ดี๊ อ เว๊ โล้ เว๊ จ แด โพล้ง อีซลาเอง เลาพะ นอ, ที่พ้ะที่ล้าง โอ ลู่ง ทลู่ง คู, ด้องซุ้ แกะ พี่ โพล้ง ล โอ ลื่ง-อ้ะ แบ#กทซ.27:17; อซค.34:5; มท.9:36; มรก.6:34 ดี๊ กแช่ยาเว ไจ้ะเว๊, ‘โพล้ง ลแพ อี้ง อ เซงคู ล โอ แบ, เกม๊า ล แฌ้ๆ, ไท้ ลู่ง อ กแช่ เด้า ดี๊ ทมึทพ้า แดเทา’, ” 17กจุ้แฆว้ อีซลาเอง ไคล้ ดี๊ เยโฮชาฟา ไจ้ะเว๊, “จ โล้ เอะ แน้ เย้า ล เมะ แบ-อ้า, อ เว๊ ม ล โล้เว้พ้ะเว้ เท่อ ทอฌี้ อ ไฌ่ แบฆ้ะ ดี๊ แย้ แบ เฆาะ, โอ ที่ ทอ้าทซ๊าง อ ไฌ่ ล เม้ง ล้อ” 18ดี๊ มีคายา ไจ้ะเว๊, “เมะ บี่นอ ม๊า คุ้ช๊องแน กแช่ยาเว อลู่งอแท๊, จ แด กแช่ยาเว ชี๊น้าง ลู่ง อ ล่าง ชี๊น้าง คู, ดี๊ กเย่ เท่อ พี่ อ โอ ลู่ง มุ้คู ลแพ นอ, ชี๊เทิง ลู่ง อ จูง จี ล โค๊ ดี๊ อ ฆุ้ ล โค๊ 19ดี๊ กแช่ยาเว ไจ้ะเว๊, ‘โพล้ง เล้ ม โก้ไละนี่ อาฮะ กจุ้แฆว้ ค่าง อีซลาเอง, เกม๊า ลี้ทาง ดี๊ ล้างเทะเค้า ซี๊ง ลู่ง ราโมะกีเลอา พ้า’, แบ แฌ้ๆ, โล้ เท่อ บี่อี้ง, แบ แฌ้ๆ, โล้ เท่อ บี่นอ 20ฌ้อง วีงแล้ โอ ล แฌ้, เฌ๊ ชี๊เทิง ลู่ง กแช่ยาเว อ เมะแซ พ้า ไจ้ะเว๊, ‘แย้ จ ม โก้ไละนี่-อ้ะ’, ดี๊ กแช่ยาเว ไคล้ ดี๊-อ้ะ ไจ้ะเว๊, ‘น ม แม้ บี่จะเล้?’ 21ดี๊ อ เท่อ ไจ้ะเว๊, ‘จ ม ไจทาง ดี๊ จ ม เก วีงแล้ ไคล้ คีงอูง เท่อ, โอ ลู่ง อ เว๊ อ โม กุ้ แฌ้ อ นุ้ พ้า’, ดี๊ กแช่แยว้ ไจ้ะเว๊, ‘น ลี้ โก้ไละนี่-อ้ะ ซี, ดี๊ น ม แม้-อ้ะ ชิ้เทา ล้อ, ลี้ แม้-อ้ะ บี่นอ แดเทา’ 22ทบี่นอ, แคว่เซ้อ, กแช่ยาเว ชวี๊งล้าง วีงแล้ ไคล้ คีงอูง เท่อ, ลู่ง กจุ้แฆว้ อ โม ลแพ นอ อ นุ้ พ้า, กแช่ยาเว โล้ ทอ้า อ ไฌ่ แบฆ้ะ ดี๊ อ เว๊ นอ ล้อ”
23ท่องอช๊าง นอ, เคนาอะนา อ พู เมะเว๊ เซเดคียา, เฌ๊ฆ้าง เบ้า ดี๊ เด้ มีคายา อ บุ้แพ้ ไจ้ะเว๊, “กแช่ยาเว อ วีงฌี้แล้แอว้ ไจแดไฆวะ แย้, ฌ้อง ไคล้ ดี๊ แน้ ซี บี่จะเล้” 24ดี๊ มีคายา ไคล้ช๊า-อ้ะ ไจ้ะเว๊, “แคว่เซ้อ, น ม แด ล นี้ง แย๊ พี่ น นึฆ้าง เด้า พ้า แย๊โค๊, บี่ซุ้ น ม โอคุ้ซูง โฆะ” 25ดี๊ กจุ้แฆว้ อีซลาเอง ไจ้ะเว๊, “พองนี่ มีคายา นอ ฌ้อง โซ๊งไท้ เอะ อาโมง ทอดู ยู่แคว่ เว่ง ดี๊ อ พูแคว๊ โยอ้ะ อู้ง 26ดี๊ ไจ้ะ-อ้ะ, ‘กจุ้แฆว้ โล้ เว๊ บี่อี้ง, แม้นี่ โพล้ง ล แฌ้ อี้ง ซุ้ ทะ-อ้ะ พ้อง พ้า, เกล๊าง เอะ อ ทอาง ดี๊ ที๊ง แซย้ โฆะ, ม๊า ทน้ะ แบ อ ซ้ะ, ท้อง ลู่ง จ ม เฌ๊ไท้ ดี๊ ทมึทพ้า โฆะ’ ” 27ดี๊ มีคายา ไจ้ะเว๊, “น เมะ เฌ๊ไท้ ดี๊ ทมึทพ้า ซี เต้ๆ, นอ, กแช่ยาเว ไคล้ เท่อ ล เฌ๊นี่ ดี๊ แย้ แบ”, ดี๊ อ เว๊ ไจ้ะเว๊, “โพล้งเฌงพูฆ๊างพู ซีง-เอ้อ, ม๊า ช๊องแน แดเทา”
อาฮะ ล น้า เท่อ แบ, ดี๊ ซี๊ง เว๊ ล้อ
(1กจฆ.22:29-35)
28กจุ้แฆว้ ค่าง อีซลาเอง ดี๊ กจุ้แฆว้ ค่าง ยูดา, ลี้ทาง ลู่ง ราโมะกีเลอา พ้า 29กจุ้แฆว้ ค่าง อีซลาเอง ไคล้ ดี๊ เยโฮชาฟา ไจ้ะเว๊, “จ ม แม้ ดุ้ จ ซ้ะ ม๊า โพล้ง ซีงแฌ๊ แย้ แบ, ฌ้อง จ ม นึฆ้าง ดึ้ซึ้ เท่อ, แบเด้าะ นี๊แด นอ ซุ้ น กแช่ อฆ้าอโฆ่ นอ”, ท่องอช๊าง, กจุ้แฆว้ ค่าง อีซลาเอง แม้ ดุ้ อ ซ้ะ, ล ม๊า โพล้ง ซีงแฌ๊-อ้ะ แบ, ฌ้อง นึฆ้าง ดึ้ซึ้ เท่อ 30กจุ้แฆว้ เว่ง ซีเรีย นอ, อางแบเลา อ ซึ้คู คุ้ อางแบเลา อ เลาะ ดึ้ซึ้ เท่อ นอ ไจ้ะเว๊, “ดึ้ โละซ้ะ ดี๊ ซึ้พู อ ดู อ ปี๊ ล ฌี้, แบเด้าะ เฌา ดึ้ ที่ กจุ้แฆว้ ค่าง อีซลาเอง นอ ล้อ” 31ดี๊ ท่อง ซึ้คู คุ้ อางแบเลา เลาะ ดึ้ซึ้ เท่อ แด เยโฮชาฟา นอ, อ ซื๊ง ไจ้ะเว๊, “อ นอ เมะ กจุ้แฆว้ ค่าง อีซลาเอง เย้า”, อ ซื๊งเว๊ วีงฆ้าง อ ซ้ะ ม ดึ้ซึ้ โละซ้ะ ดี๊-อ้ะ, ดี๊ เยโฮชาฟา กุ้ทาง เท่อ, ดี๊ กแช่ยาเว แม้ช้า-อ้ะ, กแช่แยว้ เกม๊า อ ซื๊งเว๊ ไจแดไฆวะ กจุ้แฆว้ นอ ล้อ 32ดี๊ ท่อง ซึ้คู คุ้ อางแบเลา เลาะ ดึ้ซึ้ เท่อ, แด เว๊ ล เมะ กจุ้แฆว้ ค่าง อีซลาเอง แบ นอ, อ แกยไฆวะ อ ซ้ะ ล ล้องช่อง เว๊ ล้าแบ 33แบเด้าะ กแคว๊ โอ ล แฌ้, เยาทาง อ คลีง ค้ะ เก้อะเร้อะ ดุ้ เท่อ, แบ กจุ้แฆว้ ค่าง อีซลาเอง อ ไช๊แค่ ปด้างทะ ซ้ะแน๊ อ เช้า พ้า, อ เว๊ อางแบเลา อ เพล่ คะ เลาะ ดึ้ซึ้ เท่อ นอ ไจ้ะเว๊, “แกยไท้ ซ้ะ แดเทา, ไจทางฌ้าไฆวะ แย้ ทดึ้ซึ้ พ้า, เมะเว๊ จ แบ แช๊ เย้า” 34ล นี้ง แย๊ นอ ทดึ้ซึ้ น้ะทาง ชองทาง, ดี๊ กจุ้แฆว้ ค่าง อีซลาเอง ปแฆ อ ซ้ะ ทาง เลาะ ดึ้ซึ้ เท่อ อ คู, อ เว๊ วีงฆ้าง อ เมะ ลู่ง โพล้ง ซีเรีย ซีงลแพ นอ อ โอ, ท้อง ลู่ง มื่งแฌล้าง โค๊, ฌ้อง เมาะ มื่ง ล้างนึ นอ, อ เว๊ ซี๊ง เว๊ แด ล้อ
Currently Selected:
2ทกวิ้ไน 18: NPKTH
Highlight
Copy
Compare
Share
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.
