1ซามูเอง 22
22
ดาเว ดี๊ โพล้ง พี่ โพะ อ ไค๊ ลู่ง อะดูงลาง พ้า
1ดาเว ไจแดไฆวะ พี่ นอ, ลี้ โอคุ้ซูง ลู่ง ไล๊ อะดูงลาง พ้า#ทอฆ.57; 142 ท่อง อ วี่ โจ้, ดี๊ โพล้ง ลู่ง อ แพ่ อ เด้าคูล่างพ้า เลาพะ, แน่ฌ๊า เว๊ อ ไฌ่ อ กย้อง นอ, อ ซื๊งเว๊ ลี้ล้างฌูง เว๊ พี่ นอ 2ล ก้ะ ได้ะ แบ นอ, โพล้ง กุ้ อ แฌ้ พี่ โอ ดี๊ ทน้ะทโน๊ง, ดี๊ โพล้ง กุ้ อ แฌ้ พี่ โอดีงโอแม่, ดี๊ โพล้ง กุ้ อ แฌ้ พี่ อ ซ้ะ พ้า โอ ดี๊ ทไก้ะทแค นอ, เฌ๊ฌูง ซยอง ดาเว, ดี๊ ดาเว เก เอะ โพล้ง ลแพ นอ อคูอแน่, โพล้ง เฌ๊ โอซยอง ล มู๊ง ฆ่าง ดี๊-อ้ะ, เมาะ เว๊ ลี่ง แย้ แฌ้
3ดาเว ไจทางไฆวะ พี่ นอ, ลี้ ลู่ง เว่ง มีซปา ค่าง โมอา พ้า, ดี๊ อ เว๊ โล้ เอะ กจุ้แฆว้ ลู่ง เว่ง โมอา พ้า ไจ้ะเว๊, “เกม๊าเต้ จ มู่ จ แพ่ เฌ๊ โอ ดี๊ แน้ ไช้ะ, ท้อง ลู่ง จ ม ซีงแฌ๊-อ้ะ, กแช่แยว้ ม แม้ ทเม้งเล้ ลู่ง จ ฌ่าง พ้า” 4ดี๊ ดาเว เฌ๊ฌ้า อ มู่ อ แพ่, เกม๊า โอ ดี๊ กจุ้แฆว้ ลู่ง โมอา, ดี๊ อ ซื๊งเว๊ โอ ดี๊ กจุ้แฆว้ ครึๆ, พี่ ดาเว โอ ลู่ง ทล่าง ทุ้กดื้ง ซ้ะ, ลู่ง ไล๊ พ้า อ แค๊ นอ 5ฌ้อง โมไคล้คิ้กแช่แย้ว พี่ อ เก โพล้ง กะ นอ, โล้ เอะ ดาเว ไจ้ะเว๊, “ม๊า น โอ ทล่าง ทุ้กดื้ง ซ้ะ ลู่ง ไล๊ พ้า อี้ง ล ฌี้, เกม๊า น ลี้ นึฆ้าง ลู่ง ที๊งล่างค่างพ้า ยูดา นอ แดเทา”, ดาเว ลี้ เว๊ ดี๊ เฌ๊ โอ ลู่ง ทเค แกล้ เฮเร นอ ล้อ
ซาอู แม้ซี๊ง โพล้งลื่งเท่ออคู เว่ง โน้ะ
6ซาอู ซีงแฌ๊ โค เว๊ โพล้ง แด ดาเว, ดี๊ โพล้ง พี่ อ โอ ดี๊-อ้ะ ลแพ นอ, ล โท้ แย๊ นอ ซาอู โอ ลู่ง เว่ง กีเบอา ลู่ง ซย๊องทไค้ะซวี๊ง คางไท้ะ, ลู่ง ทลู่ง พ้ะโท๊ คู, โชะ ดี๊ พ้าง, ดี๊ อ เพล่ดู ซีงลแพ นอ ชี๊เทิง โอ วะ อ ฆ้อง 7ดี๊ ซาอู ไคล้ ดี๊ อ เพล่ดู, พี่ ชี๊เทิง โอ วะ อ ฆ้อง นอ ไจ้ะเว๊, “น ซื๊ง โพล้ง เบงยามีง อ พู อ ลี้ง ลแพ ซีง-เอ้อ, ม๊า น ช๊องแน, เจซี อ พู ม เกล๊าง เอะ น ซื๊ง ไชะ ดี๊ โซ๊ง ซไบ้ะ แซ-อ้า?, ม ต๊างทาง น ซื๊ง เก โพล้ง ยู่แคว่ ซึ้คู อ แฌ้ ล ม๊า อ แฌ้ ล แย้ โบ่? 8น ซื๊ง เลาพะ นอ ช๊องมอง กไบล้ะ เท่อ ดี๊ แย้, โพล้ง ล โอ โล้ เอะ แย้ น่าง แฌ้ แบ, พี่ จ พู แม้ ทเอิ้งล้าง โละซ้ะ ดี๊ เจซี อ พู นอ, โพล้ง ลู่ง น ซื๊ง แกล้, ล โท่งฆึ ทน้ะทโน๊ง ดี๊ แย้ น่าง แฌ้ แบ, ดี๊ ล โล้ เอะ แย้ แบ, พี่ จ พู ดึ้ชู้งดึ้ไอ จ เพล่, เกม๊า เว๊ อ ดึ้ ไท้ แย้, โอ คุ้ล้างคุ้ซูง แย้ ด้องซุ้ กุ้ มื่ง นี้ง อี้ง” 9โดเอะ โพล้ง เอโดง, พี่ โอ ดี๊ ซาอู อ เพล่ดู ซีงลแพ นอ, ไคล้ช๊า-อ้ะ ไจ้ะเว๊, “จ แด เจซี อ พู เฌ๊ ลู่ง เว่ง โน้ะ พ้า, เฌ๊ฌูง อาฮีทู อ พู เมะเว๊ อาฮีเมเละ 10ฌ้อง อาฮีเมเละ ชูแพ เท่อ อางจ้ะ กแช่ยาเว เอะ เว๊, ดี๊ เกล๊าง เอะ เว๊ ทอาง, ดี๊ เกม๊า เอะ เว๊ โกลีอ้ะ โพล้ง ฟีลีเตีย อ น้ะ นอ เอะ-อ้ะ#ทอฆ.52
11ฌ้อง กจุ้แฆว้ เจ่ทาง โพล้ง, ลี้ กุ้นี่ อาฮีทู อ พูแคว๊ อาฮีเมเละ โพล้งลื่งเท่ออคู นอ, ดี๊ อ แพ่ อชื้ออชะ กุ้ แฌ้, พี่ อ เก โพล้งลื่งเท่ออคู ลู่ง เว่ง โน้ะ พ้า, กุ้ อ แฌ้ นอ เฌ๊ฌูง กจุ้แฆว้ 12ดี๊ ซาอู ไจ้ะเว๊, “อาฮีทู อ พู-เอ้อ, คุ้ช๊องแน แดเทา”, อ เว๊ ไคล้ช๊า-อ้ะ ไจ้ะเว๊, “จ เซงคู-เอ้อ, จ โอ พี่ อี้ง” 13ซาอู อางจ้ะ-อ้ะ ไจ้ะเว๊, “แบทเล้, น ซื๊งซีง ฆู๊ง โละซ้ะ กไบล้ะ ดี๊ แย้, เลา ดี๊ แน้ ดี๊ เจซี อ พู พี่ น เกล๊าง เอะ-อ้ะ กู ดี๊ น้ะ, ดี๊ น อางจ้ะ กแช่แยว้ เอะ-อ้ะ?, อ เว๊ เฌ้เทิงทาง ดึ้ ไท้ แย้, ดี๊ โอคุ้ล้างคุ้ซูง จ เกล้ ด้องซุ้ กุ้ มื่ง นี้ง อี้ง” 14อาฮีเมเละ ไคล้ช๊า กจุ้แฆว้ ไจ้ะเว๊, “กเย่ น กดูกแซย่ ลแพ นอ, โอ ล แฌ้ๆ, ชี่-อ้า, พี่ อโต้อล้อง บี่ซุ้ ดี๊ ดาเว กจุ้แฆว้ อ มะ, พี่ อ เก ซึ้พูมู๊งอคูดู, ดี๊ เก โพล้ง พี่ โอ ดี๊ อ ฆี๊ง อ แล้ ลู่ง น บลาง พ้า? 15ล นี้ง แย๊ อี้ง จ นี่ อางท่าง เท่อ ดี๊ กแช่แยว้, ลู่ง อ เว๊ อ ฌ่าง อ วี่งคู พ๊า เมะ เต้ๆ, โบ่?, ล เมะ บี่นอ แบ เฆาะ, ม๊า กจุ้แฆว้ ไคล้ ชางแบ น เพล่, ดี๊ กเย่ โพล้ง ลู่ง จ แพ่ อ เด้าคูล่างพ้า น่าง เม้ง ล ฌี้, เมะเว๊ ทไฌ่ เลาพะ อี้ง นอ, น เพล่ ล ซีงแฌ๊ เว๊ แบ เฆาะ, ทึเมะ แอ ฌี้ แซย้ ฌี้” 16กจุ้แฆว้ ไจ้ะเว๊, “อาฮีเมเละ น แบ ซี๊ง เต้ๆ, ล้อ, เลา ดี๊ แน้ ดี๊ น แพ่ อชื้ออชะ ปะ” 17ดี๊ กจุ้แฆว้ อางแบเลา อ เพล่ พี่ โอ แคว่ทะ-อ้ะ, พี่ ชี๊เทิง โอคุ้ทะ-อ้ะ นอ ไจ้ะเว๊, “วีงไท้ น ซ้ะ แม้ซี๊ง ไฆวะ กแช่ยาเว อ โพล้งลื่งเท่ออคู ลแพ อี้ง, เมะเว๊ อ ซื๊งเว๊ อ จูง โอ ล แพ้ ฆ่าง ดี๊ ดาเว, ดี๊ อ ซื๊งเว๊ ซีงแฌ๊ เว๊ เย้า อ เท่อ ไจคุ้ซูงไฆวะ, แบเด้าะ ล โล้ เอะ แย้ ม๊า จ ซีงแฌ๊ แบ”, แบเด้าะ กจุ้แฆว้ อ กดูกแซย่ ลแพ นอ, ล ญ่อง แม้ซี๊ง กแช่ยาเว อ โพล้งลื่งเท่ออคู นอ แบ 18ฌ้อง กจุ้แฆว้ ไคล้ ดี๊ โดเอะ ไจ้ะเว๊, “เกม๊า น วีงไท้ซ้ะ แม้ซี๊ง โพล้งลื่งเท่ออคู ลแพ นอ”, โดเอะ โพล้ง เอโดง, วีงไท้ อ ซ้ะ กล้าง ซี๊ง โพล้งลื่งเท่ออคู ลแพ นอ, ล นี้ง แย๊ นอ, อ เว๊ แม้ซี๊ง โพล้ง แคว๊, พี่ อ ซุ้ ไช๊อเบงคูลท๊า พี่ ไต้ เว๊ ดี๊ ตไก้ยะ ลูง ไว้ะไก้ นอ, โฆะ ชี๊ง เย่ แฌ้ 19ดี๊ อ เว๊ แม้ซี๊ง โพล้ง เว่ง โน้ะ, พี่ อ เก โพล้งลื่งเท่ออคู อ เว่ง นอ ดี๊ น้ะ, แม้ซี๊ง เว๊ เลา ดี๊ โพล้ง มืง โพล้ง แคว๊, พืงแซ, ดี๊ พืงแซ พี่ อ อางนู่ง ได้ะ, งู้, แลว้, ดี๊ แกะ นอ ดี๊ น้ะ
20แบเด้าะ อาฮีทู อ พู เมะเว๊ อาฮีเมเละ นอ, อ พูแคว๊ โอ ล แฌ้ อ เม้ง อาบียาทา, พ้องพลิ้ไฆวะ ดี๊ ทแม้ซี๊ง, ดี๊ ไจคุ้ซูง โพะ ดาเว อ ไค๊ 21อาบียาทา โล้ เอะ ดาเว ไจ้ะเว๊, ซาอู แม้ซี๊ง กแช่ยาเว อ โพล้งลื่งเท่ออคู 22ดาเว ไคล้ ดี๊ อาบียาทา ไจ้ะเว๊, “ล นี้ง แย๊ พี่ โดเอะ โพล้ง เอโดง โอ พี่ นอๆ, ก ซีงแฌ๊ เย้า อ เว๊ ม โล้ เอะ ซาอู เต้ๆ, ล้อ, กเย่ โพล้ง ลู่ง น แพ่ อชื้ออชะ ซี๊ง ทาง นอ, เป๊งนี่ แย้ อี้ง ล้อ 23โอก้ะ ดี๊ แย้ อี้ง แดเทา, ซ้ะเม เท่อ ล ฌี้, เมะเว๊ โพล้ง พี่ อ อางฆื๊ง แม้ซี๊ง แย้ นอ, อางฆื๊ง แม้ซี๊ง แน้ ปะ ล้อ, แบเด้าะ น ม โอซยืงโอบ้ะ พี่ น โอ ดี๊ แย้ นอ ล้อ”
Currently Selected:
1ซามูเอง 22: NPKTH
Highlight
Copy
Compare
Share
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.
