1ซามูเอง 18
18
โยนาทาง อ ทเอิ้งล้าง ดี๊ ดาเว
1พี่ ดาเว โล้ แบ ซาอู ฌ้อง เย้า นอ, โยนาทาง อ เซิง อ ซ้ะ แบ โละอซ้ะ ดี๊ ดาเว, ดี๊ โยนาทาง เอ ดาเว, ด้องซุ้ เอ ล้างไท้ อ กแช่ อ ซ้ะ 2ดี๊ ล นี้ง แย๊ นอ, ซาอู ย้ะทะ ดาเว, ล ญ่อง เกม๊า เว๊ อ ไท้ ลู่ง อ แพ่ อ เด้า อ ล่าง แบ 3ฌ้อง นอ, โยนาทาง แม้ ทเอิ้งล้าง ดี๊ ดาเว, เมะเว๊, เอ เว๊ ด้องซุ้ เอ ล้างไท้ อ กแช่ อ ซ้ะ ล้อ 4โยนาทาง เบ้าะล้างนี่ อ ไช๊แค่ พ้ะโท๊ ล ท๊า, พี่ อ ซุ้ เว๊, เลา ดี๊ อ นางดึ้นางชาง, ทึเมะ อ น้ะ, อ คลีง บ้อง, ดี๊ อ ย่างเด้งพลี้ง ฌี้, เกล๊าง เอะ ดาเว 5ดี๊ ดาเว นอ, ไจทาง ลี้ เท่อ กุ้ จอง พี่ ซาอู เจ่-อ้ะ, อ เว๊ แม้ เท่อ ชิ้เทา กุ้เม้ง, อ กย้อง บี่นอ, ซาอู ต๊างทาง-อ้ะ, ม๊า โอ โท๊เละ โพล้งดึ้ซึ้เท่อพู ซีงลแพ นอ ล้อ, ทแม้ บี่อี้ง นอ, เก เท่อ ลู่ง แบ โพล้งเฌงพูฆ๊างพู อ ซ้ะ, ดี๊ แบ ซาอู อ กดูกแซย่ ซีงลแพ นอ อ ซ้ะ ปะ
6พี่ อ ซื๊งเว๊ซีง เฌ๊ไท้ นอ, ดาเว โอ ลู่ง ทล่าง แม้ซี๊ง โพล้ง ฟีลีเตีย ล แฌ้ นอ เฌ๊ไท้, โพล้ง มืง ซีง, พี่ อ โอ ลู่ง กเย่ โพล้ง อีซลาเอง อ เว่ง พ้า เลาพะ นอ, ไจทาง ซ้ะอวีง แท๊, ดี๊ เฌ้เทิงลี่ง ตองช๊าฮะช๊า กจุ้แฆว้ ซาอู, ดี๊ รางมานา ดี๊ แม้ แท๊ เซิงฆวี๊งซ้ะโย้, ดี๊ ทโพะเซ๊ เด้งเซ๊ 7ดี๊ โพล้ง มืง ซีงลแพ นอ, เฌ้เทิงลี่ง ดี๊ ซ้ะอวีง แท๊ พาง โละอซ้ะ ไจ้ะเว๊
“ซาอู แม้ซี๊ง โพล้ง อ แฌ้ อ ม๊า พ้า
เมะ ดาเว นอ แม้ซี๊ง โพล้ง อ แฌ้ อ ไซ พ้า”#1ซมอ.21:11; 29:5
8ซาอู อ ซ้ะ เฌ๊ทาง น้ะมะ, ทไคล้ พี่ โพล้ง ซ้ะอวีง แท๊ นอ, ล แบ อ ซ้ะ แบ เฆาะ, อ เว๊ ไจ้ะเว๊, “โพล้ง อางปฆ้า ดาเว, ไจ้ะเว๊ แม้ซี๊ง โพล้ง อ แฌ้ อ ไซ พ้า, เมะ ยี๊แด นอ, อ ซื๊งเว๊ ไจ้ะเว๊ แม้ซี๊ง โพล้ง อ แฌ้ อ ม๊า พ้า เฆาะ, โอก้ะที่ มื่งบ้าง ล เม้ง ล้อ, พี่ ดาเว ล นี่ เว๊ ได้ะ แบ” 9ท๊อง ล นี้ง แย๊ นอ, ซาอู คุ้ แคว่ฌูงดุ้ ดาเว ครึๆ
10โอ ลู่ง ไค๊ ล นี้ง นอ, วีงแล้ ลู่ง อ อ้า, พี่ เฌ๊นี่ ดี๊ กแช่แยว้ นอ เฌ๊ โอ ดี๊ ซาอู, ซาอู นอ ไคล้พลื่งไคล้มวี๊ง เท่อ, โอ ลู่ง อ บลาง พ้า, ดาเว นอ เด้ง ทแน่, ด้องซุ้ อ เด้ง เอะ เว๊ อ พ้องไฆวะ กุ้ นี้งๆ, นอ, ซาอู นอ โชะ ดี๊ พ้าง คระ 11ดี๊ ซาอู ซยุ้ฆ้าง อ พ้าง, ช๊องมอง เว๊ บี่อี้ง, “จ ม ซยุ้ ดาเว, เกม๊า อ แบชุ้เท่ง ดี๊ พี๊แด้ดอง”, แบเด้าะ ดาเว ไจซยู๊ไฆวะ นี่ คี๊ง พ๊า
12ซาอู ซ้ะเม ดาเว, เมะเว๊ กแช่ยาเว โอ ดี๊-อ้ะ, แบเด้าะ ไจแดไฆวะ ซาอู เย้า 13ทบี่นอ, ซาอู เกม๊า แญ่ ดาเว ไจแดไฆวะ-อ้ะ, ม๊า เว๊ เกก้ะ ซึ้พู น๊างมู๊ง อ คู ดู, ดี๊ ดาเว ไจทาง ลี้ ดึ้ซึ้ เท่อ, เฌ๊ไท้ ลู่ง ซึ้พู ซีงลแพ นอ อ เมะแซ พ้า 14ดาเว แม้ เท่อ ชิ้เทา กุ้ อ เม้ง, เมะเว๊ กแช่ยาเว โอ ดี๊-อ้ะ 15ซาอู ซ้ะเม เท่อ, พี่ อ แด เว๊ ดาเว แม้ เท่อ, ฌ้องทางเกทาง แอมะ นอ 16แบเด้าะ โพล้ง อีซลาเอง, ดี๊ โพล้ง ยูดา กุ้ อ แฌ้ นอ เอ ดาเว, เมะเว๊ ดาเว ไจทาง, ดี๊ เฌ๊ไท้ ลู่ง อ ซื๊งเว๊ อ เมะแซ พ้า
17ซาอู โล้ เอะ ดาเว ไจ้ะเว๊, “แคว่เซ้อ, อ อี้ง นอ, เก จ พูมืงน้าง วี่แซย่ อ เม้ง น่าง เมร้ะ, จ ม เกล๊าง เอะ แน้ เก น แม๊, แบเด้าะ น แบ เก โพล้ง พี่ อ ซ้ะน้า ลู่ง จ ฌ่าง, ดี๊ ดึ้ เท่อ ลู่ง กแช่ยาเว อ ทดึ้ซึ้ พ้า”, อ ไฌ่ บี่อี้ง, ซาอู ช๊องมอง เว๊, “เกม๊า จ จูง ดึ้ซึ้-อ้ะ ล ฌี้, แบเด้าะ เกม๊า โพล้ง ฟีลีเตีย อ จูง ดึ้ซึ้-อ้ะ นอ ล้อ” 18ดาเว ไคล้ ดี๊ ซาอู ไจ้ะเว๊, “ลู่ง โพล้ง อีซลาเอง อ แกล้ นอ, แย้ จ เก โพล้ง เล้?, จ มื่ง จ แคว๊, เมะเว๊ จ แพ่ อ ชื้อ อ ดอง นอ, เก ชี่ โพล้ง เล้, พี่ จ ม เกิ้ง เก กจุ้แฆว้ อ มะ?” 19แบเด้าะ ท่อง แบ อ มื่ง, พี่ ซาอู ม เกม๊า อ พูมืง น่าง เมร้ะ เอะ ดาเว นอ, กมืง นอ แบ ทเกล๊าง, ม๊า เกก้ะ อ้ะรีเอง โพล้ง เมโฮลา ล แฌ้ นอ อ แม๊ เฆาะ
20ซาอู อ พูมืง น่าง มีคาง นอ เอ ดาเว, พี่ โพล้ง โล้ แบ ซาอู, แบฆ้ะ ดี๊ ท ล ไฌ่ อี้ง นอ, แบ อ เว๊ อ ซ้ะ ฌี้ มะ ล้อ 21ซาอู ช๊องมอง เว๊, “จ ม เกม๊า น่าง มีคาง เอะ-อ้ะ, บี่ซุ้ ม เก ทดุ้นี่ บล้ะนี่-อ้ะ, ดี๊ โพล้ง ฟีลีเตีย อ จูง ม ดึ้-อ้ะ”, ทบี่นอ, ซาอู โล้ เอะ ดาเว คี๊ง พ๊า ล พ๊า ไจ้ะเว๊, “ล พ๊า แย๊ อี้ง, น ม เก จ มะ ล้อ” 22ซาอู อางแบเลา อ เพล่ดู ไจ้ะเว๊, “เกม๊า น ไคล้ ดี๊ ดาเว แฌ้ โต้ แฌ้ บี่อี้ง, ‘แคว่เซ้อ, กจุ้แฆว้ แบ อ ซ้ะ ดี๊ แน้, ดี๊ กเย่ อ เพล่ดู ลแพ นอ เอ แน้, เก กจุ้แฆว้ อ มะ แดเทา’, ” 23ท่อง ซาอู อ เพล่ดู อางโล๊ไท้ เอะ ดาเว, แบฆ้ะ ดี๊ ทไคล้ ลแพ อี้ง นอ, ดาเว อางจ้ะ-อ้ะ ไจ้ะเว๊, “น ซื๊ง แคว่-อ้ะ, เท่อ พี่ ม เก กจุ้แฆว้ อ มะ นอ, เก ท ล ปี๊ ล คี่ โบ่?, อ ไฌ่ บี่อี้ง, ยี๊แด จ เก โพล้ง ซยาง พู ล้อ, ดี๊ จ เม้ง จ แซ ล โอ น่าง เม้ง แบ” 24ดี๊ ซาอู อ เพล่ดู โล้ เอะ-อ้ะ ไจ้ะเว๊, “อ อี้ง นอ, เก ดาเว อ ทไคล้” 25ฌ้อง ซาอู โล้ เว๊, “เกม๊า น ไคล้ ดี๊ ดาเว บี่อี้ง, ‘กจุ้แฆว้ ล แบซ้ะ นี่ ทอโน้งอช้า น่าง เม้ง แบ, ม แม้ เว๊ ที่ โพล้ง ฟีลีเตีย อ ที คู ไพ้ะ เมาะ ล แย้ ล้อ, บี่ซุ้ กจุ้แฆว้ ม แม้แกไท้ แบ อดีงอแด’, ”, ซาอู ช๊องมอง เว๊, ม เกม๊า ดาเว ซี๊ง ดี๊ โพล้ง ฟีลีเตีย อ จูง 26ท่อง ซาอู อ เพล่ดู อางโล๊ไท้ ทไคล้ อี้ง เอะ ดาเว นอ, ท ล ไฌ่ อี้ง นอ, แบ ดาเว อ ซ้ะ, พี่ ม เก กจุ้แฆว้ อ มะ, ลู่ง ทอช๊าอโท่ อางกีล้าง ล คลึ้ เลาไฆวะ ได้ะ แบ อ แค๊ 27ดาเว เฌ้เทิงทาง ล พ๊า ฆ่าง ดี๊ อ ซึ้พู, อ ซื๊งเว๊ แม้ซี๊ง โพล้ง ฟีลีเตีย คี๊ง แย้ แฌ้, ดี๊ ดาเว เก้า นี่ โพล้ง ลแพ นอ อ ที คู ไพ้ะ, เฌ๊ไท้ โชะ เอะ กจุ้แฆว้ กู้งทาง เมาะ, บี่ซุ้ อ เว๊ ม เก กจุ้แฆว้ อ มะ, ซาอู เกม๊า อ พูมืง น่าง มีคาง เก ดาเว อ แม๊ 28ซาอู แด เว๊, ดี๊ ซีงแฌ๊ เว๊ กแช่ยาเว โอ ดี๊ ดาเว, ดี๊ ซาอู อ พูมืง น่าง มีคาง นอ เอ ดาเว 29ซาอู ซ้ะเม ดาเว แอทาง, ซาอู เก ดาเว อดีงอแด้ เพล้า อ ชู้ ล้อ
30กเย่ โพล้ง ฟีลีเตีย อ กดูกแซย่ ลแพ นอ, ไจทาง เฌ๊ ดึ้ซึ้ เท่อ, อ ซื๊งเว๊ ม เฌ๊ ฆวี่ พ๊า เล้ ฌี้ นอ, ดาเว แม้ เท่อ ฌ้องทางเกทาง, แอเละ ซาอู อ กดูกแซย่ ลแพ นอ ได้ะ, อ กย้อง บี่นอ, ดาเว อ เม้งลื้อแซท้อง ฌี้ มะ ล้อ
Currently Selected:
1ซามูเอง 18: NPKTH
Highlight
Copy
Compare
Share
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.
