1กจุ้แฆว้ 21
21
นาโบ อ โซ๊ง ซไบ้ะ แซ
1ดี๊ พี่ ทกึทาง อ ซ้ะ พ้องไฆวะ อ ล่างไค๊ เย้า นอ, นาโบ โพล้ง ยีซเรเอง อ โซ๊ง ซไบ้ะ แซ โอ ลู่ง ยีซเรเอง พ้า, โอ เบ้า ดี๊ อาฮะ กจุ้แฆว้ ค่าง ซมาเรีย อ เด้า ฌ๊างไท้ะ 2อาฮะ ไคล้ ดี๊ นาโบ ไจ้ะเว๊, “น โซ๊ง ซไบ้ะ แซ นอ เกล๊างก้ะ เอะ แย้ แดเทา, จ ม แม้ เก โซ๊ง เซิง ทดุ้, เมะเว๊ โอ เบ้า ดี๊ จ เด้า, จ ม เกล๊าง แน้ ซไบ้ะ โซ๊ง, พี่ อ ฌี้เละ อี้ง อางเล๊ ดี๊ โซ๊ง อี้ง, เมะ ล เมะ แบ โค๊ น เมะ แด ฆึ นอ, จ ม เกม๊า แน้ จี้ ท่อง อ เกิ้ง ดี๊ โซ๊ง นอ อ ฆวี้” 3แบเด้าะ นาโบ ไคล้ช๊า-อ้ะ ไจ้ะเว๊, “ลู่ง กแช่ยาเว อ กย้อง นอ, เกม๊า ท ล ไฌ่ อี้ง โอ ไย้ ดี๊ แย้ แดเทา, เมะเว๊ พี่ ม เกล๊าง เอะ แน้ จ พี๊ง จ พู๊ง ลู่ง แย๊ อคองอแซย้” 4อาฮะ ไท้ นึฆ้าง บลาง พ้า ดี๊ ทเซิงทางซ้ะไฌ๊, ดี๊ ท ล มึ อ ซ้ะ แบ น้ะ มะ, เป๊งนี่ นาโบ โพล้ง ยีซเรเอง ไคล้ช๊า-อ้ะ เมะเว๊ อ ไจ้ะเว๊, “จ พี๊ง จ พู๊ง ลู่ง แย๊ อคองอแซย้, จ ล เกล๊าง เอะ แน้ แบ”, อ เว๊ บุ้ล้าง อ ซ้ะ ลู่ง อ ทล่าง คู วีงไฆวะ อ เมะ ล อาง เท่อ แบ
5แบเด้าะ อ แม๊ น่าง เยเซเบง ลี้ฆ้าง โอ-อ้ะ, อางจ้ะ-อ้ะ ไจ้ะเว๊, “น แบทเล้?, น เซิง น ซ้ะ ล มึ แบ, ท่องท๊อง น ล อาง เท่อ แบ” 6อ เว๊ ไคล้ช๊า น่าง เยเซเบง ไจ้ะเว๊, “เมะเว๊ จ ไคล้ ดี๊ นาโบ โพล้ง ยีซเรเอง บี่อี้ง, ‘ม๊า น อางแช๊ เอะ แย้ น ซไบ้ะ โซ๊ง นอ, เมะ แบ โค๊ เมะ แบ น ซ้ะ นอ, จ ม เกล๊าง เอะ แน้ ซไบ้ะ โซ๊ง ล จอง แด เด้าะ บี่ซุ้ อางเล๊ โละซ้ะ’, แบเด้าะ อ เว๊ ไคล้ช๊า แย้ ไจ้ะเว๊, ‘จ โซ๊ง นอ จ ล เกล๊าง เอะ แน้ แบ’, ” 7ฌ้อง อ แม๊ น่าง เยเซเบง โล้ เอะ-อ้ะ ไจ้ะเว๊, “แน้ น เก โพล้ง โพะคอง โพล้ง อีซลาเอง ได้ะ เมะ-อ้า?, เฌ้เทิงทาง อาง เท่อ แดเทา, แม้ น ซ้ะ มึๆ, นาโบ โพล้ง ยีซเรเอง อ โซ๊ง นอ, แย้ จ ม เก โพล้ง เกล๊าง เอะ แน้”
8ฌ้อง น่าง เยเซเบง กวิ้ทาง ไละ, กวิ้ยื่ง ลู่ง อาฮะ อ เม้ง, แม้ไน เว๊ ดี๊ ทอแท๊ กจุ้แฆว้ เว๊, ฌ้อง โซ๊ง เอะ กดูกแซย่, ดี๊ โพล้งเม้งโพล้งแซย่ พี่ อ โอ ลู่ง เว่ง ยีซเรเอง พ้า ดี๊ นาโบ 9ไละ นอ กวิ้ล้าง เว๊ บี่อี้ง, ม๊า น ซื๊ง โล้ล้าง เท่อ เกม๊า โก้ง อาง เท่อ, ดี๊ เกม๊า นาโบ ชี๊น้าง ลู่ง ทล่าง ชี๊น้าง คู, พี่ โอ ดี๊ อฆี๊งอแล้ ลู่ง โพล้งเฌงพูฆ๊างพู อ แกล้ 10ดี๊ เกม๊า โพล้ง ลกลุ้ลจ้ะ แบ คี๊ง แฌ้, ชี๊น้าง โอกแท้ โละซ้ะ ดี๊-อ้ะ, เกม๊า อ ฟ่อง นาโบ บี่อี้ง, ‘แน้ นอ น ชู แบ กแช่แยว้ ดี๊ กจุ้แฆว้’, ฌ้อง ไจทางฌ้าไฆวะ-อ้ะ, ดี๊ แม้นี่ โล่ง ไควะ ซี๊ง-อ้ะ” 11ดี๊ โพล้ง ลู่ง เว่ง พ้า, เมะเว๊ โพล้งเม้งโพล้งแซย่, ดี๊ กดูกแซย่ พี่ อ โอ เว่ง พ้า นอ, แม้ เว๊ บี่ซุ้ ดี๊ น่าง เยเซเบง อ ไละ กวิ้ยื่ง, พี่ อางแบเลา เอะ อ ซื๊งเว๊ ดี๊ อ กแช่ อ จูง ล่าง, พี่ อ โซ๊ง เอะ อ ซื๊งเว๊ซีง นอ 12อ ซื๊งเว๊ โล้ล้าง เท่อ เกม๊า โพล้ง ดืง อาง เท่อ, ดี๊ เกม๊า นาโบ ชี๊น้าง ลู่ง ทล่าง ชี๊น้าง คู, พี่ โอ ดี๊ อฆี๊งอแล้, ลู่ง โพล้งเฌงพูฆ๊างพู อ แกล้ 13ดี๊ โพล้ง ลกลุ้ลจ้ะ แบ คี๊ง แฌ้ นอ, เฌ๊ฆ้าง ชี๊น้าง ดุ้กแท้ โละซ้ะ ดี๊-อ้ะ, ฌ้อง โพล้ง ได้ นอ, อางฆื๊งนี่ เท่อ ดี๊ นาโบ, ลู่ง โพล้งเฌงพูฆ๊างพู อ เมะแซ พ้า ไจ้ะเว๊, “นาโบ นอ ชู แบ กแช่แยว้ ดี๊ กจุ้แฆว้”, ฌ้อง โพล้ง ลแพ นอ, ไจทางฌ้าไฆวะ นาโบ ลู่ง เว่ง ฆ้อง, ดี๊ แม้นี่ โล่ง ไควะ เว๊ ท่อง อ ซี๊ง ล้อ 14ฌ้อง อ ซื๊งเว๊ ลี้ โล้ แบ น่าง เยเซเบง ไจ้ะเว๊, “นาโบ แบ ทไควะ ซี๊ง-อ้ะ ดี๊ โล่ง เย้า”
15ท่อง น่าง เยเซเบง แน่ฌ๊า เว๊ นาโบ แบ ทไควะ ซี๊ง-อ้ะ ดี๊ โล่ง เย้า นอ, น่าง เยเซเบง โล้ เอะ อาฮะ ไจ้ะเว๊, “เกม๊า ลี้ แม้นี่ก้ะ นาโบ โพล้ง ยีซเรเอง อ โซ๊ง, พี่ อ ซม๊า เว๊ ล อางแช๊ เอะ แน้ แบ นอ, เมะเว๊ นาโบ ล โอม๊า ล้าแบ อ เว๊ ซี๊ง เย้า” 16ดี๊ ลู่ง ไค๊ พี่ อาฮะ แน่ฌ๊า เว๊ นาโบ ซี๊ง เย้า นอ, อาฮะ เฌ้เทิงทาง, ลี้ล้าง ลู่ง นาโบ โพล้ง ยีซเรเอง ล แฌ้ นอ อ โซ๊ง พ้า, บี่ซุ้ แม้นี่ เว๊ เกก้ะ อ เท่อ
เอลียา โล้ล้าง กแช่แยว้ อ ทต้ะเซ๊ง เท่อ
17ฌ้อง กแช่แยว้ อลู่งอแท๊ เฌ๊ ท้อง เอลียา, โพล้ง ทิ้บี อ โอ ไจ้ะเว๊ 18“เฌ้เทิงทาง ลี้ฌูง อาฮะ กจุ้แฆว้ ค่าง อีซลาเอง, พี่ อ โอ ลู่ง เว่ง ซมาเรีย พ้า อู้ง, แคว่เซ้อ, อ เว๊ โอ ลู่ง นาโบ อ โซ๊ง พ้า, พี่ อ ลี้ล้าง แม้นี่ก้ะ เว๊ เก อ เท่อ นอ 19เกม๊า น ไคล้ ดี๊-อ้ะ บี่อี้ง, ‘กแช่ยาเว ไจ้ะเว๊, “น แม้ซี๊ง ดี๊ แม้นี่ก้ะ เท่อ เก น กแช่ อ เท่อ ปะ-อ้า?’, ”, ดี๊ เกม๊า น ไคล้ ดี๊-อ้ะ บี่อี้ง, ‘กแช่แยว้ ไจ้ะเว๊, “ลู่ง ทล่าง พี่ ทวีง อางไล นาโบ อ ซวีง นอ, ทวีง ม อางไล แน้ น ซวีง ปะ ล้อ’, ”, ”
20อาฮะ ไคล้ ดี๊ เอลียา ไจ้ะเว๊, “โอ้, จ ดีง จ แด้-เอ้อ, น แด แย้ เย้า โบ่?”, เอลียา ไคล้ช๊า-อ้ะ ไจ้ะเว๊, “จ แด แน้ เย้า, เมะเว๊ น ญ่อง อางแช๊ล้าง น ซ้ะ, นึฆ้าง แม้ ทอ้าทซ๊าง ลู่ง กแช่ยาเว อ เมะแซ พ้า 21แคว่เซ้อ, จ ม เกม๊า ทอ้าทซ๊าง เฌ๊ แบ แน้, จ ม กว้ะทางไฆวะ แน้ ท่อง อ เลา, จ ม แม้ไฆวะ อาฮะ อ โพล้ง แคว๊ กุ้ แฌ้ ลู่ง อีซลาเอง พ้า, ทอฆ่อง ฌี้, ล เมะ ทอฆ่อง แบ ฌี้ 22ก ม เกม๊า นชื้อนชะ บี่ซุ้ดี๊ เนบ้ะ อ พู เยโรโบอาง อชื้ออชะ, ดี๊ บี่ซุ้ดี๊ อาฮียา อ พู บาอาชา อชื้ออชะ, เป๊งนี่ น แม้ ซ้ะทาง เฆ้อ, ดี๊ เป๊งนี่ น ดึ้ เกม๊า อีซลาเอง แม้ ทเด้บ้ะ ปะ 23เมะ น่าง เยเซเบง นอ กแช่ยาเว ไจ้ะเว๊, ‘ทวีง ม อาง น่าง เยเซเบง ลู่ง ค่างช๊า ยีซเรเอง’#2กจฆ.9:36 24โพล้ง พี่ แฌ้ เล้ ลู่ง อาฮะ อชื้ออชะ พ้า, พี่ อ ซี๊ง ลู่ง เว่ง มื่ง พ้า นอ, ทวีง ม อาง-อ้ะ, ดี๊ โพล้ง พี่ แฌ้ เล้ ลู่ง อชื้ออชะ นอ, ซี๊ง ลู่ง ญ้าง พ้า นอ, ทู ทพุ้พ๊าง ม อาง-อ้ะ” 25โพล้ง ล โอ น่าง แฌ้ แบ, อางแช๊ล้าง ซ้ะ บี่ซุ้ ม แม้ ทอ้าทซ๊าง ลู่ง กแช่ยาเว อ เมะแซ พ้า, ด้องซุ้ อาฮะ พี่ อ แม๊ น่าง เยเซเบง เนฌ้า-อ้ะ แม้ เว๊ นอ 26อ เว๊ แม้ เท่อ พี่ ล้างแช๊เมะไฌ๊ซ้ะ เต้ๆ, เมะเว๊ ลี้ โพะ ทเค่งทฌ้าง อ ไค๊, บี่ซุ้ดี๊ โพล้ง อาโมไร พี่ กแช่ยาเว เว่งว๊างไฆวะ-อ้ะ, เกม๊า พ้องไฆวะ ดี๊ โพล้ง อีซลาเอง อ เมะ อ แน๊ นอ อไฌะอไฌ่ กุ้เม้ง
27ดี๊ ลู่ง ไค๊ พี่ อาฮะ แน่ฌ๊า กแช่แยว้ อลู่งอแท๊ ลแพ อี้ง นอ, อ เว๊ ซย๊างยะล้าง อ ไช๊, ซุ้ทางก้ะ ตไก้ยะ กเซ้าะ, ดืง อาง เท่อ, มี๊ง ลู่ง ตไก้ยะ กเซ้าะ พ้า, ดี๊ ไจ ลี้ ไจ ไท้ ดี๊ นางแบล้างไท้ ซ้ะ, แม้ เท่อ ไพ้ะ 28ดี๊ กแช่ยาเว อลู่งอแท๊ เฌ๊ ท้อง เอลียา โพล้ง ทิ้บี นอ ไจ้ะเว๊ 29“น แด อาฮะ ชางล้าง อ ซ้ะ ลู่ง จ เมะแซ พ้า เย้า-อ้า?, พี่ อ เว๊ ชางล้าง ซ้ะ ลู่ง จ เมะแซ พ้า อ กย้อง นอ, จ ล เกม๊า ทอ้าทซ๊าง เฌ๊ แบ-อ้ะ ลู่ง อ เว๊ อ ชู้ แค๊ อี้ง ได้ะ แบ, แบเด้าะ จ ม เกม๊า ทอ้าทซ๊าง เฌ๊ แบ อชื้ออชะ ลู่ง อ พู อ ชู้ แค๊ โฆะ”
Currently Selected:
1กจุ้แฆว้ 21: NPKTH
Highlight
Copy
Compare
Share
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.
