Kaŋinichiŋgeliŋ 1

Kebaawɔtɔ kikɛ ka la fuloŋ be asheŋ

1Ewura Deevid pibinyɛn nɛ e la eŋinipo nseŋ daa la ewura ashi Jerusalɛm to na be mmalga nde.

2Eŋinipo na yɛ, kusɔ kama na la fuloŋ nna kebaawɔtɔ ere to. Kebaawɔtɔ maŋ kɔ kifito kikɛ. 3Manɛ be tɔnɔ bre nɛ anyee nya kegben damta nɛ anyee gben ere to? 4Kenana ko beeŋ ba choŋ nɛ kenana ko malɛ e naŋ ba, ama durnya ere bre maaŋ chɛrga kikɛ. 5Epeŋi bee pete nna nsaa tɔr nseŋ naa chambɔ a yɔ kakpa nɛ k bee pete na. 6Afu bee ber a yɔ kelargato to be kaseto be kaba so nsaa ber a yɔ kelargato be esoso be kaba so, a chambɔ loŋ a kulti. 7Elɔrana bee shile e luri teku to, ama teku malɛ maa bɔlɔ kikɛ. Nchu na kraŋ naa bɛta nna a luri lɔr na be kakpa nɛ a fara na to nsaa shile a luri to a chambɔ a ba. 8Kebaawɔtɔ kikɛ baa la kabapɔ nna nɛ k maŋ walɛ k malga. Anyi be anishi ere maa wu asheŋ a moɛ nɛ asoe malɛ gba maa nu asheŋ a moɛ. 9Kusɔ kama nɛ k bee wora naniere daŋ chɛr n wora dra dra kikɛ nna. Shɛŋ shɛŋ maŋ la asheŋ popɔr ashi kasawule ere so. 10Men keni! Kusɔ ko wɔtɔ nɛ esa beeŋ tiŋ ŋ kaŋɛ fanɛ kumo alɛ naa la asheŋ popɔr a? M-m. Asheŋ ere kikɛ wora dra dra kikɛ nna pɔɛŋ nɛ b kurge anyi. 11Esa kama maŋ wɔtɔ nseŋ naa nyiŋi kusɔ nɛ k wora n choŋ dra dra na. Esa kikɛ malɛ maaŋ naŋ nyiŋi kusɔ nɛ k beeŋ wora echefoso gba.

Eŋinipo na be kusɔ nɛ e luri to nsaa nyi be asheŋ

12Ma eŋinipo ere ka malga le be asheŋ ere kikɛ nɛ n daa la Israɛl be efuli so be ewura nna nsaa wɔ Jerusalɛm to. 13N wora ania fanɛ meeŋ koya nseŋ pin kusɔ kama nɛ k bee wora durnya ere to.

Ama Ebɔrɛ shin nɛ k ki kpakpa n sa anyi edimɛdi. 14Ŋ ka wu asheŋ nɛ a bee wora durnya ere to na, nɛ n yɛ; kusɔ kama maŋ kɔ tɔnɔ. K du nna fanɛ fo ka bee ju a bɛ afu so na. 15Kusɔ kɔnto maa tiŋ a niŋi; b maa karga shɛŋ a ti asɔ nɛ e maŋ wɔtɔ so.

16Nɛ ŋ kaŋɛ ma kumu le: “Naniere bre ŋ ki bunyaŋ be esagboŋ nna nsaa nyi asheŋ malɛ a chɔ esa kama nɛ e juŋkpar ma n ji kuwura ashi Jerusalɛm to. Amoso n nyi kusɔ nɛ baa tre kanyiasheŋ nɛ kenyi.” 17N daŋ pere kenishi nna a shin nɛ m pin kebaawora asheŋ kanyiasheŋ so, mannɛ kawuliso. Ama n wu fanɛ afu nɛ mee ju a buu so. 18Fo baa nya kanyiasheŋ ga, kumo be jemanɛ malɛ nɛ fo kagbene bee jija fo ga. Kenyi be ga la tɔrɔ nna.

Currently Selected:

Kaŋinichiŋgeliŋ 1: GJNb

Highlight

Compare

Copy