Aŋasa 20
20
1Nsa bee ta esa nna a ki elushapo,
a shin nɛ e bee nite a puchi.
Esa kama nɛ nsa wɔ mo la ewulpo nna.
2Ewura be kanya agbo du fanɛ buluŋ ka nya agbo nna.
Keshin nɛ ewura e nya agbo du fanɛ kapotɔ nna.
3Kebaa maa sha kolu bee sa esa kemaŋkura nna.
Ewulpo e naa sha kamɔrɔji.
4Edɔpo tɔlpo nɛ e maa dɔ saŋɛ nɛ k daga maa nya adɔjibi.
5Dimɛdi be nfɛra fɛso du chiŋgeliŋ nna
fanɛ ketirbu chiŋgeliŋ to be nchu na.
Enyiashempo nawule e naa tiŋ a saŋ amo.
6Basa damta bee tre bumo amu beshenteŋjipo nna,
ama kashenteŋ be beshenteŋjipo maa tiŋ a nya.
7Esa nɛ e niŋi kikɛ be kebaawɔtɔ niŋi nna.
Mbia nɛ baa koya mbe asheŋ woraso bee nya nɛfa nna.
8Ewura baa tase a ji demu mbe anishi yuu alubiworapoana so nna.
9Wanɛ e naŋ tiŋ m puchi ŋ kaŋɛ fanɛ mbe nfɛra walɛ nɛ e maŋ wora kulubi?
10Enyɛnpe Ebɔrɛ kishi kapuni be kasɔkarga
nɛ kapuni be asɔ karga asɔ ga.
11Mbia be aworbi e naa ŋini basa nɛ baaŋ ba ki echefoso.
12Enyɛnpe Ebɔrɛ e sa anyi asoe nɛ anyee ta a nu asheŋ,
nɛ anishi nɛ anyee ta a wu.
13Fo baa sha edi ga fee ki etirpo nna,
ama fo pere kenishi a shuŋ bre, fo maŋ paŋ fo kusɔ jiso.
14B baŋ ku yawujipo kikɛ asɔ be yawu e beeŋ fubel,
ama kumo be kaman nɛ e naa puchi
ŋkpal e ka nya asɔ na n tɔ pɔtɔ pɔtɔ so.
15Kanyiasheŋ be kamalga bɔ shuwa nɛ yawu kpakpaso be abitasɔ.
16Esa baŋ ta mbe kusɔbuuso
n nase tarma n ji kukɔ n sa efɔ,
nɛ efɔ na baŋ maŋ tiŋ ŋ ka kukɔ na,
fo sɔ amodoŋwura be kusɔbuuso na n tal to.
17Ajibi be kepuni n ji wɔ ebel nna,
ama amo be lalaloge du fanɛ shishɛr nna kɔnɔ to.
18Fo baa bela ase nɛ fo kɔ kena,
kumo ere fin kasotoji lela nɛ k chɛ fo to.
19Esheŋjipo kikɛ maŋ tiŋ ŋ keta ashiri,
amoso baa gelge mo.
20Esa nɛ e bee sho mo tuto nɛ mo nio kɔnɔ be ŋkpa maa teŋiso,
k du nna fanɛ fitila ka duŋ tentembiri to epul to nna.
21Fo baa maŋ gben pɔɛŋ nseŋ dii dama,
fo asɔ na maa chɛr nsaa mur.
22Sa maa kɔ a fin kewora n tal esa nɛ e wora fo kulubi to.
Shin nɛ Enyɛnpe Ebɔrɛ e bishi kuwule n sa fo.
23Enyɛnpe Ebɔrɛ kishi basa nɛ baa ta kapuni be asɔ karga asɔ a ber asɔ ga.
24Enyɛnpe Ebɔrɛ e nyi kananɛ dimɛdi be asheŋ bee nite.
Nuso nɛ esa gbagba beeŋ tiŋ m pin
kananɛ asheŋ beeŋ ba kaa du n sa mo.
25Fɛ nfɛra nɛnɛ pɔɛŋ nseŋ nase kɔnɔ n sa Ebɔrɛ.
Nɛ fo baŋ maŋ tiŋ n wora m bɔlɔ fo kɔnɔ naseso so, k maŋ walɛ.
26Ewura nyiashempo kikɛ bee gberge belubiworapo kusoe kenishipereso nna.
27Enyɛnpe Ebɔrɛ be fitila bee wu dimɛdi be nfɛra,
nɛ mbe kebaawɔtɔ to kikɛ nna.
28Kashenteŋji nɛ kasha e naa shin nɛ bewura bee ji a chɛr.
29Mbifɔlbi be kemaŋkura e la bumo be eleŋ,
nɛ benimu malɛ be kemaŋkura la bumo be emin fuful.
30Kenishipereso be kebri beeŋ tiŋ n lara esa ashi asheŋ lubi to.
Currently Selected:
Aŋasa 20: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
