Matiu 14
14
Jɔn kabɔrɛbɛrpo be luwu be asheŋ
(Maak 6:14-29; Luuk 9:7-9)
1Jemanɛ na so nɛ Hɛrɔd, Galili be ewura nu Yesu be asheŋ nseŋ kaŋɛ mbe nyɛrbi: 2“Jɔn kabɔrɛbɛrpo e naŋ tiŋi luwu to m ba na, amoso nɛ e kɔ le be eleŋ mo to a wora asheŋ loŋ na.”
3Mo, Hɛrɔd gbagba e daŋ shin nɛ b pɛ Jɔn ŋ kre nseŋ ta mo n wɔtɔ kabuti to. Hɛrɔd daŋ wora loŋ nna ŋkpal Hɛrodias mo sipo Filip be eche so. 4Le nɛ Jɔn kabɔrɛbɛrpo daa kaŋɛ Hɛrɔd: “K maŋ daga fo ka ta fo sipo Filip be eche.” 5Hɛrɔd daa sha kemɔ Jɔn nna, ama mo alɛ daa ŋana Juwebi na nna, ŋkpal manɛ so, Jɔn daa la anebi nna bumo be anishito. 6Ama Hɛrɔd be kakurgeachɛ ko nɛ Hɛrodias pibiche lar m ba cha basa damta nɛ b daŋ shɛr ndoŋ na be anishito, nɛ k par Hɛrɔd ga 7nɛ e nase kɔnɔ n sa kebichebi na ŋ kaŋɛ: “M bɔ fanɛ kusɔ kama nɛ fo kule ma, meeŋ sa fo kumo.” 8Ndoŋ nna nɛ kebichebi na mo nio Hɛrodias ŋini mo kusɔ nɛ e beeŋ kule nɛ e ba kaŋɛ Ewura Hɛrɔd le: “Mee sha fo ka bar ma epul ere to Jɔn kabɔrɛbɛrpo be kumu kelɛfa so.” 9Ndoŋ nna nɛ Ewura na be kagbene jija mo, ama ŋkpal ntaŋana nɛ e bɔ mbe befɔ na be anishito na so nɛ e gben n sa ekpa fanɛ b wora kusɔ nɛ kebichebi na daŋ kule na. 10Ndoŋ nna nɛ e shin nɛ b yɔ kabuti to n ya ku Jɔn be kumu 11n deŋi kelɛfa so m ba sa kebichebi na nɛ e ta kumo n sa mo nio. 12Kumo be kaman nɛ Jɔn be bebɛsopo ya ta mo n ya puli nseŋ ya kaŋɛ Yesu.
Yesu ka sa benyɛn ŋgboŋ anu ajibi be asheŋ
(Maak 6:30-44; Luuk 9:10-17; Jɔn 6:1-14)
13Yesu ka nu baru na nɛ e luri ekuloŋ to n yɔ kakpa nɛ basa maŋ wɔtɔ mo nawule. Ama basa daŋ nu kumo be asheŋ nseŋ lar bumo be ndeana to n nite aya so m bɛ mo so.
14Yesu ka lar ekuloŋ na to nɛ e wu jimaŋ damta na nɛ bumo be asheŋ pɛ mo kuwɔr nɛ e chɛ bumo be belɔpo. 15Kaboŋ ka ba wushito nɛ mbe bebɛsopo ba kaŋɛ mo le: “Kaboŋ teŋ wushito n loge, kakpa ere malɛ maŋ la basa to. Amoso, to bumo aya nɛ b yɔ ndebi ere to n ya tɔ ajibi n ji.” 16Nɛ Yesu kaŋɛ bumo le: “A maŋ daga b ka yɔ ai, men gbagba e sa bumo kusɔ ko nɛ b ji.” 17Nɛ bebɛsopo na kaŋɛ mo: “Ebodobodo anu nɛ ekɔrɔtɔ anyɔ nawule nɛ an baa kɔ nfe.” 18Ndoŋ nna nɛ e kaŋɛ bumo: “Men ta amo m bar ma nfe.” 19Kumo be kaman nɛ e shin nɛ basa na chena afitiri so nɛ e ta ebodobodo anu na nɛ ekɔrɔtɔ anyɔ na nseŋ keni esoso n nɛfa amo nseŋ fara a buri ebodobodo na to a sa bebɛsopo na nɛ bumo alɛ bee ta amo a sa jimaŋ na. 20Nɛ ekama we m moɛ nɛ bebɛsopo na tise ejiŋka na m bɔlɔ nlantaŋɛ kuduanyɔ. 21Nɛ esa maŋ ber beche nɛ mbia n wɔtɔ bumo nɛ b daŋ ji ajibi na to, benyɛn nawule daa sa fanɛ basa ŋgboŋ anu.
Yesu ka nite nchu so be asheŋ
(Maak 6:45-52; Jɔn 6:15-21)
22Nɛ Yesu shin nɛ bebɛsopo na luri ekuloŋ to n juŋkpar mo n yɔ kepagboŋ na be kaba ndoŋ nɛ mo alɛ shin nɛ jimaŋ na yɔ epe. 23E ka shin nɛ basa na yɔ n loge nɛ mo nawule yɔ kebeebi ko so nɛ e ya kule Ebɔrɛ. 24Kanyɛ ka ya biri nɛ Yesu nawule e ka ndoŋ. Saŋɛ na so malɛ nɛ ekuloŋ na wɔ kufɔ kepa na be nferinto nɛ afu bee kpata kumo nɛ atili kaa nchu na so a shin nɛ ekuloŋ na bee laŋkpaŋ to a yɔ a ba. 25Koshinyɛn juŋkparso nɛ Yesu nite nchu na so m ba bumo kutɔ. 26Bebɛsopo na ka wu e ka bee nite nchu na so nɛ kufu pɛ bumo ga nɛ b fɛɛto kufuso ŋ kaŋɛ abar: “Kebuniyoyu!” 27Epul na to nɛ Yesu malga bumo kutɔ ŋ kaŋɛ: “Men keta kagbene, ma nna. Men sa maa lɔ kufu.” 28Ndoŋ nna nɛ Pita kaŋɛ le: “Enyɛnpe, nɛ fo gbagba e baa la, fo shin nɛ n nite nchu ere so m ba fo kutɔ.” 29Nɛ Yesu kaŋɛ mo: “Baa ba.” Ndoŋ nna nɛ Pita lar ekuloŋ na to n fara a nite nchu na so a yɔ Yesu kutɔ. 30Ama e ka naŋ wu kananɛ afu na bee ber na nɛ kufu pɛ mo nɛ e fara a muni. E ka wu loŋ nɛ e boŋ to ŋ kaŋɛ: “Enyɛnpe, mɔlga ma.” 31Epul na to nɛ Yesu teŋi enɔ to m pɛ mo to nseŋ kaŋɛ mo le: “Ama fo yirda du fimbi pasaa. Manɛ e ba nɛ fo maŋ yirda?” 32Kumo be kaman nɛ bumo benyɔ kikɛ luri ekuloŋ na to nɛ afu na yɔɔ. 33Nɛ bumo nɛ b daa wɔ ekuloŋ na to na bunyaŋ Yesu ŋ kaŋɛ: “Kashenteŋto fo e la Ebɔrɛ Pibinyɛn na.”
Yesu ka chɛ belɔpo ashi Gɛnɛsarɛt be asheŋ
(Maak 6:53-56)
34B ka dii kepagboŋ na m ba kedeŋi so ashi Gɛnɛsarɛt be kasawule so 35nɛ ndoŋebi pin Yesu nseŋ shoŋi ebɔl n sa nde nɛ a taga to ndoŋ na kikɛ to ebi nɛ b bar bumo be belɔpoana mo kutɔ 36m ba kule Yesu fanɛ e baŋ wora ania n shin nɛ belɔpo na e nya mbe kusɔbuuso be kɔnɔ so gba m beta. Bekama malɛ kikɛ nɛ b beta kumo nya alenfia.
Currently Selected:
Matiu 14: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
Matiu 14
14
Jɔn kabɔrɛbɛrpo be luwu be asheŋ
(Maak 6:14-29; Luuk 9:7-9)
1Jemanɛ na so nɛ Hɛrɔd, Galili be ewura nu Yesu be asheŋ nseŋ kaŋɛ mbe nyɛrbi: 2“Jɔn kabɔrɛbɛrpo e naŋ tiŋi luwu to m ba na, amoso nɛ e kɔ le be eleŋ mo to a wora asheŋ loŋ na.”
3Mo, Hɛrɔd gbagba e daŋ shin nɛ b pɛ Jɔn ŋ kre nseŋ ta mo n wɔtɔ kabuti to. Hɛrɔd daŋ wora loŋ nna ŋkpal Hɛrodias mo sipo Filip be eche so. 4Le nɛ Jɔn kabɔrɛbɛrpo daa kaŋɛ Hɛrɔd: “K maŋ daga fo ka ta fo sipo Filip be eche.” 5Hɛrɔd daa sha kemɔ Jɔn nna, ama mo alɛ daa ŋana Juwebi na nna, ŋkpal manɛ so, Jɔn daa la anebi nna bumo be anishito. 6Ama Hɛrɔd be kakurgeachɛ ko nɛ Hɛrodias pibiche lar m ba cha basa damta nɛ b daŋ shɛr ndoŋ na be anishito, nɛ k par Hɛrɔd ga 7nɛ e nase kɔnɔ n sa kebichebi na ŋ kaŋɛ: “M bɔ fanɛ kusɔ kama nɛ fo kule ma, meeŋ sa fo kumo.” 8Ndoŋ nna nɛ kebichebi na mo nio Hɛrodias ŋini mo kusɔ nɛ e beeŋ kule nɛ e ba kaŋɛ Ewura Hɛrɔd le: “Mee sha fo ka bar ma epul ere to Jɔn kabɔrɛbɛrpo be kumu kelɛfa so.” 9Ndoŋ nna nɛ Ewura na be kagbene jija mo, ama ŋkpal ntaŋana nɛ e bɔ mbe befɔ na be anishito na so nɛ e gben n sa ekpa fanɛ b wora kusɔ nɛ kebichebi na daŋ kule na. 10Ndoŋ nna nɛ e shin nɛ b yɔ kabuti to n ya ku Jɔn be kumu 11n deŋi kelɛfa so m ba sa kebichebi na nɛ e ta kumo n sa mo nio. 12Kumo be kaman nɛ Jɔn be bebɛsopo ya ta mo n ya puli nseŋ ya kaŋɛ Yesu.
Yesu ka sa benyɛn ŋgboŋ anu ajibi be asheŋ
(Maak 6:30-44; Luuk 9:10-17; Jɔn 6:1-14)
13Yesu ka nu baru na nɛ e luri ekuloŋ to n yɔ kakpa nɛ basa maŋ wɔtɔ mo nawule. Ama basa daŋ nu kumo be asheŋ nseŋ lar bumo be ndeana to n nite aya so m bɛ mo so.
14Yesu ka lar ekuloŋ na to nɛ e wu jimaŋ damta na nɛ bumo be asheŋ pɛ mo kuwɔr nɛ e chɛ bumo be belɔpo. 15Kaboŋ ka ba wushito nɛ mbe bebɛsopo ba kaŋɛ mo le: “Kaboŋ teŋ wushito n loge, kakpa ere malɛ maŋ la basa to. Amoso, to bumo aya nɛ b yɔ ndebi ere to n ya tɔ ajibi n ji.” 16Nɛ Yesu kaŋɛ bumo le: “A maŋ daga b ka yɔ ai, men gbagba e sa bumo kusɔ ko nɛ b ji.” 17Nɛ bebɛsopo na kaŋɛ mo: “Ebodobodo anu nɛ ekɔrɔtɔ anyɔ nawule nɛ an baa kɔ nfe.” 18Ndoŋ nna nɛ e kaŋɛ bumo: “Men ta amo m bar ma nfe.” 19Kumo be kaman nɛ e shin nɛ basa na chena afitiri so nɛ e ta ebodobodo anu na nɛ ekɔrɔtɔ anyɔ na nseŋ keni esoso n nɛfa amo nseŋ fara a buri ebodobodo na to a sa bebɛsopo na nɛ bumo alɛ bee ta amo a sa jimaŋ na. 20Nɛ ekama we m moɛ nɛ bebɛsopo na tise ejiŋka na m bɔlɔ nlantaŋɛ kuduanyɔ. 21Nɛ esa maŋ ber beche nɛ mbia n wɔtɔ bumo nɛ b daŋ ji ajibi na to, benyɛn nawule daa sa fanɛ basa ŋgboŋ anu.
Yesu ka nite nchu so be asheŋ
(Maak 6:45-52; Jɔn 6:15-21)
22Nɛ Yesu shin nɛ bebɛsopo na luri ekuloŋ to n juŋkpar mo n yɔ kepagboŋ na be kaba ndoŋ nɛ mo alɛ shin nɛ jimaŋ na yɔ epe. 23E ka shin nɛ basa na yɔ n loge nɛ mo nawule yɔ kebeebi ko so nɛ e ya kule Ebɔrɛ. 24Kanyɛ ka ya biri nɛ Yesu nawule e ka ndoŋ. Saŋɛ na so malɛ nɛ ekuloŋ na wɔ kufɔ kepa na be nferinto nɛ afu bee kpata kumo nɛ atili kaa nchu na so a shin nɛ ekuloŋ na bee laŋkpaŋ to a yɔ a ba. 25Koshinyɛn juŋkparso nɛ Yesu nite nchu na so m ba bumo kutɔ. 26Bebɛsopo na ka wu e ka bee nite nchu na so nɛ kufu pɛ bumo ga nɛ b fɛɛto kufuso ŋ kaŋɛ abar: “Kebuniyoyu!” 27Epul na to nɛ Yesu malga bumo kutɔ ŋ kaŋɛ: “Men keta kagbene, ma nna. Men sa maa lɔ kufu.” 28Ndoŋ nna nɛ Pita kaŋɛ le: “Enyɛnpe, nɛ fo gbagba e baa la, fo shin nɛ n nite nchu ere so m ba fo kutɔ.” 29Nɛ Yesu kaŋɛ mo: “Baa ba.” Ndoŋ nna nɛ Pita lar ekuloŋ na to n fara a nite nchu na so a yɔ Yesu kutɔ. 30Ama e ka naŋ wu kananɛ afu na bee ber na nɛ kufu pɛ mo nɛ e fara a muni. E ka wu loŋ nɛ e boŋ to ŋ kaŋɛ: “Enyɛnpe, mɔlga ma.” 31Epul na to nɛ Yesu teŋi enɔ to m pɛ mo to nseŋ kaŋɛ mo le: “Ama fo yirda du fimbi pasaa. Manɛ e ba nɛ fo maŋ yirda?” 32Kumo be kaman nɛ bumo benyɔ kikɛ luri ekuloŋ na to nɛ afu na yɔɔ. 33Nɛ bumo nɛ b daa wɔ ekuloŋ na to na bunyaŋ Yesu ŋ kaŋɛ: “Kashenteŋto fo e la Ebɔrɛ Pibinyɛn na.”
Yesu ka chɛ belɔpo ashi Gɛnɛsarɛt be asheŋ
(Maak 6:53-56)
34B ka dii kepagboŋ na m ba kedeŋi so ashi Gɛnɛsarɛt be kasawule so 35nɛ ndoŋebi pin Yesu nseŋ shoŋi ebɔl n sa nde nɛ a taga to ndoŋ na kikɛ to ebi nɛ b bar bumo be belɔpoana mo kutɔ 36m ba kule Yesu fanɛ e baŋ wora ania n shin nɛ belɔpo na e nya mbe kusɔbuuso be kɔnɔ so gba m beta. Bekama malɛ kikɛ nɛ b beta kumo nya alenfia.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation