Ɛksodɔs 40

Wajɛbu na be kananɛ k daga k ka yili be asheŋ

1Ndoŋ nna nɛ Enyɛnpe Ebɔrɛ kaŋɛ Mosis le: 2“Yuu Enyɛnpe Ebɔrɛ be wajɛbu na kufɔl juŋkparso be kachɛ sososo 3nseŋ ta kɔnɔkoŋwule be ŋkre be deka nɛ mbra kudu na wɔtɔ na n yili kumo to n ta patisa kuŋso na ŋ kuŋ kumo so. 4Kumo be kaman nɛ fo ta teebɔl na n yili wajɛbu na to nseŋ ta asɔ nɛ a daga a baa wɔ kumo so na n deŋi kumo so. Kede be kaman nɛ fo ta kefitilatɔl na n yili kumo to m bela efitila na m bɛ m bɛ kumo so. 5Kumo be kaman nɛ fo ta shuwa be bɔrɛsure nɛ baa chɔɔ duwu kumo so na m ba yili kɔnɔkoŋwule be ŋkre be deka na be anishito nseŋ ta patisa ŋ kuŋ Ebɔrɛ be wajɛbu na be kabuna. 6Kumo alɛ be kaman nɛ fo ta bɔrɛsure nɛ baa chɔɔ sarga kumo so na n yili Enyɛnpe Ebɔrɛ be wajɛbu na be kabuna to be anishito. 7Kede be kaman nɛ fo ta katishaŋgboŋ na n yili wajɛbu na nɛ bɔrɛsure na be kefɛato nseŋ wɔtɔ kumo nchu. 8Kumo alɛ be kaman nɛ fo yuu kelɔnɛ na be ndibi yuuso na nseŋ kre epatisa na ŋ kulti kumo, nseŋ chɛ kumo be kabuna to be patisa na n shiga. 9Kede be kaman nɛ fo ta ŋku nɛfaso na ŋ ŋmenyaŋ Ebɔrɛ be wajɛbu na nɛ kusɔ kama nɛ k wɔ kumo to so n ta amo m bɔɔ ma, Ebɔrɛ enɔ nɛ a ki asɔ cheembi. 10Kumo be kaman nɛ fo ta ŋku nɛfaso na ŋ ŋmenyaŋ bɔrɛsure nɛ baa chɔɔ sarga kumo so na nɛ kumo be asɔwurbi kikɛ nyam so n ta kumo m bɔɔ ma Ebɔrɛ enɔ nɛ k ki kusɔ cheembi. 11Kede malɛ be kaman nɛ fo ta ŋku nɛfaso na ŋ ŋmenyaŋ katishaŋgboŋ na nɛ kumo be ketɔl gba so n ta amo m bɔɔ ma, Ebɔrɛ enɔ.

12Shin nɛ Ɛɛrɔn nɛ mbe bibinyɛn e ba Enyɛnpe be wajɛbu na be kabuna m ba fɔr bumo amu so daŋkare be ekpa so. 13Kumo be kaman nɛ fo ta asɔbuuso cheembi na m buu Ɛɛrɔn n ta ŋku na n do mo so n ta mo m bɔɔ ma, Ebɔrɛ enɔ nɛ e baa shuŋ ma fanɛ bɔrɛmatapo. 14Shin nɛ mbe bibinyɛn na gba e ba nɛ fo buu bumo kabɔrɛmata be asɔbuuso 15nseŋ ta ŋku nɛfaso na n do bumo so fanɛ kananɛ fo wora bumo tuto na, saŋɛ na so bumo nɛ bumo be kaman to ebi beeŋ baa shuŋ ma fanɛ bɔrɛmatapoana mbaanaayɔ. 16Nɛ Mosis wora kusɔ kama nɛ Enyɛnpe Ebɔrɛ kaŋɛ mo na kikɛ.”

17B ka lar Ijipt be kasawule so na be kafɛ nyɔsopo na to be kufɔl juŋkparso be kachɛ sososo na nɛ b daŋ yuu Ebɔrɛ be wajɛbu na. 18Mosis daŋ shin nna nɛ b ta wajɛbu na be atɔl na n wɔtɔ amo be mboŋ nseŋ ta ndibi yuuso na n yuu amo to, nseŋ ta ndibi blɔmbi deŋiso na n deŋi ndibi yuuso na so nɛ a pɛ amo to n yili. 19Kede be kaman nɛ e shin nɛ b ta patisagboŋ na m parga m buu Ebɔrɛ be wajɛbu na so nseŋ naŋ ta asɔbɔya be nwɔl nɛ b gbiti nɛnɛ na malɛ n deŋi patisagboŋ na so fanɛ kananɛ Enyɛnpe Ebɔrɛ daŋ kaŋɛ mo na. 20Ade be kaman nɛ e ta mbra be ajembu anyɔ na n wɔtɔ kɔnɔkoŋwule be ŋkre be deka na to nseŋ ta buuso nɛ baa tre kuwɔr be kakpa na m buu kumo so nseŋ shin nɛ b nyisi ndibi nɛ baa pɛ to a maŋ kumo so na n wɔtɔ amo be mpinibi na be amaŋ to. 21Kumo be kaman nɛ e shin nɛ b ta kɔnɔkoŋwule be ŋkre be deka na m ba yili Ebɔrɛ be wajɛbu na to n shin nɛ b chɛ patisa kuŋso na ŋ kuŋ kumo so fanɛ kananɛ Enyɛnpe Ebɔrɛ kaŋɛ mo na. 22Kede malɛ be kaman nɛ Mosis shin nɛ b ta teebɔl nɛ baa ta sarga be bodobodo a deŋi so na n ya yili patisa kuŋso na be anishito ashi, Ebɔrɛ be wajɛbu na be kabunato be patisa be kaman a laŋɛ kelargato be esoso be kaba so. 23Kumo alɛ be kaman nɛ b ta bodobodo na m ba deŋi teebɔl na so n lara sarga n sa Enyɛnpe Ebɔrɛ na fanɛ kananɛ e kaŋɛ Mosis na. 24Kede be kaman nɛ e ta kefitiliatɔl nɛ efitila na n yili Ebɔrɛ be wajɛbu na be kelargato be kaseto be kaba so ashi teebɔl na be anishito 25nseŋ chɔɔ efitila na so fanɛ kananɛ Enyɛnpe Ebɔrɛ kaŋɛ mo na gbagba. 26Mosis daŋ shin nna nɛ b ta shuwa be bɔrɛsure na n yili patisa kuŋso na be anishito ashi Enyɛnpe be wajɛbu na to 27nseŋ chɔɔ efɛa belbelso be duwu kumo so fanɛ kananɛ Enyɛnpe Ebɔrɛ kaŋɛ mo na. 28Kumo be kaman nɛ e ta Ebɔrɛ be wajɛbu na be kabunato be patisa na n chɛ ŋ kuŋ kabuna to. 29E daŋ ta bɔrɛsure nɛ baa chɔɔ sarga kumo so na nna n yili Enyɛnpe Ebɔrɛ be wajɛbu na be kabuna to be anishito to nseŋ lara esarga chɔɔso nɛ ajibi be esarga kumo so fanɛ kananɛ Enyɛnpe Ebɔrɛ kaŋɛ mo na. 30E daŋ ta katishaŋgboŋ na nna n yili Enyɛnpe be wajɛbu na nɛ bɔrɛsure na be kefɛato nseŋ ta nchu n wɔtɔ kumo to 31nɛ mo nɛ Ɛɛrɔn nɛ Ɛɛrɔn be bibinyɛn e ta amo a fɔr bumo be enɔ nɛ aya so. 32Saŋkama nɛ baa luri Enyɛnpe be wajɛbu na to ŋko a yɔ bɔrɛsure na ase, baa fɔr bumo be aya nɛ enɔana so nna fanɛ kananɛ Enyɛnpe Ebɔrɛ kaŋɛ Mosis na. 33Ade kikɛ be kaman nɛ Mosis shin nɛ b yuu kelɔnɛ ŋ kulti Ebɔrɛ be wajɛbu na nɛ bɔrɛsure na nseŋ chɛ kelɔnɛ na be kabunato be patisa na n shiga. Ndoŋ nna nɛ Mosis be kushuŋ loge.

Enyɛnpe Ebɔrɛ be kemaŋkura be asheŋ

34Nɛ kuwɔlpa ba buu Enyɛnpe be wajɛbu na so nɛ Enyɛnpe Ebɔrɛ be kemaŋkura ba bɔlɔ kumo to. 35Mosis daa maŋ tiŋ n luri Enyɛnpe be wajɛbu na to, ŋkpal kuwɔlpa na ka daŋ buu kumo so nɛ Enyɛnpe Ebɔrɛ be kemaŋkura bɔlɔ kumo to so.

36Israɛlebi na ka wɔ enite to na, saŋkama nɛ kuwɔlpa na baŋ tia ashi Ebɔrɛ be wajɛbu na so, bumo alɛ bee kaa nna. 37Nɛ kuwɔlpa na baa maŋ tia bre, b maa kaa. 38Amoso saŋɛ nɛ Israɛlebi na daa wɔ bumo be enite to na, Ebɔrɛ be kuwɔlpa na daa buu Ebɔrɛ be wajɛbu na so kapaso kikɛ nna nsaa fulto edɛ kanyɛso malɛ kikɛ.

Currently Selected:

Ɛksodɔs 40: GJNb

Highlight

Copy

Compare