Ɛksodɔs 9

Asɔbɔya be luwu be asheŋ

1Ade kikɛ be kaman nɛ Enyɛnpe Ebɔrɛ naŋ kaŋɛ Mosis: “Yɔ Fɛɛro kutɔ n ya kaŋɛ mo fanɛ Enyɛnpe Ebɔrɛ, Israɛlebi be Ebɔrɛ na yɛ: ‘Shin nɛ ma basa e yɔ, saŋɛ na so baaŋ ya bunyaŋ ma. 2Fo baŋ kini keshin nɛ b yɔ nseŋ kraa kɔ bumo to, 3meeŋ ta kulɔ lubi n lɛ men be asɔbɔya, fanɛ egbaŋɛ nɛ ekurma nɛ enyɔma nɛ ana nɛ mbolpɔ nɛ mboe kikɛ so. 4Ama ma, Enyɛnpe Ebɔrɛ na beeŋ barga Israɛlebi be asɔbɔya nɛ Ijiptebi be asɔbɔya to nseŋ shin nɛ Israɛl be basa bre be asɔbɔya e sa maŋ wu.’ ” 5Ade be kaman nɛ Enyɛnpe Ebɔrɛ kaŋɛ: “Echefo nɛ ma, Enyɛnpe Ebɔrɛ beeŋ wora le be kesheŋ ashi kasawule ere so.” 6Kumo be ŋklade nɛ Enyɛnpe Ebɔrɛ wora loŋ be kesheŋ na fanɛ kananɛ e kaŋɛ na nɛ Ijiptebi be asɔbɔya kikɛ kuraa wu, ama Israɛlebi na bre be kusɔbɔya koŋwule gba daa maŋ wu. 7Ndoŋ nna nɛ Fɛɛro shuŋi m bishi Israɛlebi na kusɔ nɛ k wora bumo to nɛ b kaŋɛ mo fanɛ Israɛlebi na bre be asɔbɔya be kukoŋwule gba maŋ wu. Ama amo nɛ amo kikɛ nɛ Fɛɛro kraŋ wora kagbene kpakpaso ŋ kini keshin nɛ basa na e yɔ.

Asɔ puŋiso be kasogberge be asheŋ

8Kede malɛ be kaman nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn le: “Men jɔ nsunɔ ashi kakpa nɛ edɛ gboŋ chɔɔ m bɔlɔ menyi be enɔana, nseŋ shin nɛ Mosis e ta amo ŋ kpa awɔlto ashi ewura Fɛɛro be anishito. 9Saŋɛ na so nsunɔ na beeŋ ki shishɛr mushimushibi n sɔ Ijipt be kasawule so kikɛ nɛ alɔbi e pɛ edimɛdi nɛ asɔbɔya kikɛ nyam ashi kasawule na kikɛ nyam so.” 10Ndoŋ nna nɛ b jɔ nsunɔ na n ya yili ewura Fɛɛro be anishito nɛ Mosis ta amo ŋ kpa awɔlto nɛ a kilgi alɔbi m pɛ edimɛdi nɛ asɔbɔya kikɛ nyam. 11Ŋkpal loŋ be alɔbi na ka daŋ pɛ ŋkilgiwuraana na gba so b daa maŋ naŋ tiŋ n yili Mosis be anishito. 12Ama ade kikɛ gba be kaman, Enyɛnpe Ebɔrɛ kraŋ shin nɛ ewura Fɛɛro wora kagbene kpakpaso nseŋ kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ baŋ kaŋɛ na. 13Kumo be kaman nɛ Enyɛnpe Ebɔrɛ naŋ kaŋɛ Mosis le: “Echefo kachipurdidi, fo wule ŋ koso n ya tu ewura Fɛɛro ŋ kaŋɛ mo fanɛ Enyɛnpe Ebɔrɛ Israɛlebi be Ebɔrɛ na yɛ: ‘Shin nɛ ma basa e yɔ, saŋɛ na so baaŋ ya bunyaŋ ma. 14Nɛ mannɛ aloŋ, meeŋ shin nɛ kulɔ lubi nɛ k chɔ etɔrɔana ere kikɛ e tu fo nɛ fo beyaasepo nɛ fo basa kikɛ nɛ fo pin fanɛ esa kikɛ maŋ naa wɔtɔ a du fanɛ ma ashi durnya ere to kikɛ. 15Kashenteŋto, nɛ n daa sha nna n dafanɛ n shin nɛ kulɔ lubi mo nɛ k daa beeŋ tiŋ m mur fo nɛ fo basa kikɛ ashi kasawule ere so ba menyi so n chɛr. 16Ama ŋkpal ŋ ka bee sha fanɛ ŋ ŋini fo ma eleŋ so nɛ n shin nɛ fo kraa wɔtɔ na, saŋɛ na so durnya ere be esa kama beeŋ pin esa nɛ e la ma. 17Ŋkeshin nɛ fo alɛ kraa wɔtɔ nna a ŋini ma basa fo eleŋ nsaa kini keshin nɛ b yɔ. 18Amoso echefo, saŋɛ ere so gbagba meeŋ shin nɛ abɔrɛjembubi gbɛgbɛso be bɔrɛ e tɔr kasawule ere so. Loŋ be abɔrɛjembubi na beeŋ baa la asɔ nɛ b maŋ naŋ wu amo be kaduli ashi Ijipt kikɛ yili kachɛ nɛ k jɔŋɛ m ba fo mbre. 19Amoso k daga fanɛ fo yili kumo fanɛ b pɛ asɔbɔya nɛ kusɔ kama nɛ men kɔ ashi ndɔ to kikɛ n wɔtɔ ebu to nɛ b nya kumɔlga. Nɛ mannɛ aloŋ, abɔrɛjembubi na beeŋ tɔr edimɛdi nɛ asɔbɔya nɛ b na a kilgi to kikɛ so nɛ b wu.’ ” 20Ndoŋ nna nɛ Fɛɛro be beyaasepo nɛ b daŋ yirda Enyɛnpe Ebɔrɛ be kamalga na nya manaŋ n shin nɛ bumo be anya nɛ asɔbɔya kikɛ shile n luri ebu to. 21Ama bekama nɛ b daŋ kplaŋ Enyɛnpe Ebɔrɛ be kamalga na so na bre daŋ shin nna nɛ bumo be anya nɛ asɔbɔya na a kilgi to. 22Ndoŋ nna nɛ Enyɛnpe Ebɔrɛ kaŋɛ Mosis le: “Teŋi fo enɔ ŋ ŋini awɔlto nɛ abɔrɛjembubi gbɛgbɛso na e tɔr edimɛdi nɛ asɔbɔya nɛ asɔ duuso nɛ a wɔ Ijipt be kasawule so na kikɛ so.” 23Mosis ka teŋi mbe kekpabi na ŋ ŋini awɔlto nɛ Enyɛnpe Ebɔrɛ shin nɛ bɔrɛ ponte ŋ gbri gbuŋ gbuŋ gbuŋ n nyɛkpɛ palpal nɛ abɔrɛjembubi fara a wurge kasawule waawaa. Enyɛnpe Ebɔrɛ daŋ shin nɛ abɔrɛjembubi be bɔrɛ na ba Ijipt be kasawule so kikɛ nna. 24Ijipt ka fara kikɛ loŋ be abɔrɛjembubi be bɔrɛ na be kaduli maŋ naŋ ba kumo be kasawule so kikɛ. 25Abɔrɛjembubi be bɔrɛ na daŋ bri Ijipt be efuli so be asɔ kama nɛ a daa wɔ kowu, edimɛdi nɛ asɔbɔya, nɛ asɔ duuso nɛ b duu kikɛ nna m mata kasawule nɛ a wu, nseŋ gbaŋgbaŋ ndibi malɛ kikɛ be afantaŋ. 26Kakpa nɛ Israɛlebi na daa wɔ nɛ baa tre ndoŋ Goshen na nawule nɛ abɔrɛjembubi be bɔrɛgboŋ na daa maŋ yɔ. 27Ndoŋ nna nɛ Fɛɛro naŋ shuŋi n tre Mosis nɛ Ɛɛrɔn m ba kaŋɛ bumo le: “Kede bre to, m pin fanɛ n wora kulubi. Enyɛnpe Ebɔrɛ na e kɔ akpa. Ma nɛ ma basa kikɛ wora alubi. 28Amoso kule Enyɛnpe Ebɔrɛ n sa anyi, ŋkpal manɛ so, bɔrɛ na be keponte nɛ abɔrɛjembubi na wora kebanso. Naniere bre n sa menyi ekpa fanɛ men baa yɔ. A maŋ naŋ daga fanɛ men baa kraa wɔ nfe.” 29Nɛ Mosis malɛ kaŋɛ mo: “Ŋ kaŋ baŋ lar kade ere to na nɛ meeŋ maŋ ma enɔana so ŋ kule Enyɛnpe Ebɔrɛ nɛ e shin nɛ bɔrɛ na be keponte nɛ abɔrɛjembubi gbɛgbɛso na kikɛ e ku nɛ fo pin fanɛ durnya ere la Enyɛnpe Ebɔrɛ na peya nna. 30Ama n nyi fo nɛ fo beyaasepo ka maa ŋana Enyɛnpe Ebɔrɛ na.” 31Bɔrɛ na tiŋ n jija aboyu nɛ ayu bre, ŋkpal amo ere ka bee wora manaŋ manaŋ so. 32Ama enyaŋkpaŋ nɛ adurbi bre be kekama daa maŋ jija, ŋkpal amo ere ka maa wule a wora so. 33Ade be kaman nɛ Mosis nɛ Ɛɛrɔn lar ewura Fɛɛro kutɔ nɛ kade na to nɛ Mosis maŋ mbe enɔana so ŋ kule Enyɛnpe Ebɔrɛ nɛ bɔrɛ na be keponte na nɛ abɔrɛjembubi gbɛgbɛso na kikɛ nɛ bɔrɛchu nɛ k daa chulgi kasawule na so na kikɛ ku kuraa. 34Ama Fɛɛro ka wu fanɛ bɔrɛchu na nɛ abɔrɛjembubi gbɛgbɛso na nɛ bɔrɛ be keponte na kikɛ yige nɛ mo nɛ mbe beyaasepo naaŋ wora ŋgbene kpakpaso. 35Ndoŋ nna nɛ ewura Fɛɛro naŋ kini keshin nɛ Israɛl be basa na e yɔ fanɛ kananɛ Enyɛnpe Ebɔrɛ daŋ kaŋɛ fanɛ e beeŋ shin nɛ e wora na.

Currently Selected:

Ɛksodɔs 9: GJNb

Highlight

Copy

Compare