Ɛksodɔs 33

Israɛlebi ka lar Sainai be kebee na ase be asheŋ

1Kachako nɛ Enyɛnpe Ebɔrɛ kaŋɛ Mosis: “Fo nɛ basa nɛ fo juŋkpar n lar Ijipt be kasawule so na e koso nfe n yɔ efuli nɛ n nase kɔnɔ fanɛ meeŋ ta n sa Eebraham nɛ Aizek nɛ Jeekɔb nɛ bumo be kaman to ebi kikɛ na so. 2Loŋ be kasawule na e kɔ kanya alegaiso nsaa wora ajibi nɛnɛ na. Meeŋ shin nɛ ma malaika e juŋkpar menyi nɛ men ju Keenanebi nɛ Amɔriebi nɛ Hitebi nɛ Pɛrizebi nɛ Hivebi nɛ Jebusiebi na kikɛ ashi loŋ be kasawule na so. 3Ama ma ere gbagba bre maaŋ naŋ tu menyi n yɔ, nɛ mannɛ aloŋ meeŋ mur menyi ekpa to n loge, ŋkpal men be amukpakpaso so.” 4Basa na ka nu loŋ be baru lubi na nɛ b fara a shu keeli nsaa lara bumo be shuwa be abitasɔ nɛ b daŋ wɔtɔ na a lɛ. 5B daŋ wora ade kikɛ nna ŋkpal Enyɛnpe Ebɔrɛ na ka daŋ kaŋɛ Mosis le so: “Men la amukpakpasowuraana nna. M baŋ tu menyi n yɔ anishito gbrɛ kama gba, meeŋ mur menyi kuraa, amoso ekama e lara mbe abitasɔ mo so pɔɛŋ nɛ n yili kusɔ nɛ meeŋ wora menyi na.” 6Amoso b ka baŋ lar Sainai be kebee na ase n yɔ anishito, Israɛlebi na maŋ naŋ wɔtɔ shuwa ŋko gbiti be abitasɔ.

Enyɛnpe Ebɔrɛ be wajɛbu na be asheŋ

7Saŋkama nɛ Israɛlebi na baŋ ya yuu bumo be keeyi, Mosis daa ta wajɛbu ko nna n lar ekarso m barga n yuu ŋ kɔr nsaa tre kumo, ‘nshɛr be wajɛbu.’ Ekama nɛ e daa sha kekule Ebɔrɛ daa yɔ nshɛr be wajɛbu na ase nna n ya kule. 8Saŋkama malɛ nɛ Mosis lar a yɔ nshɛr be wajɛbu na ase, basa na kikɛ bee lar nna n yili bumo be ewajɛbuana be mbuna to a keni mo loŋ hale nɛ e ya luri kumo to. 9Mosis malɛ baŋ luri nshɛr be wajɛbu na to, kuwɔlpa nɛ k niŋi serr fanɛ shabɔrɛ na bee ba nna m ba yili wajɛbu na be kabuna to nɛ Enyɛnpe Ebɔrɛ e bɔla kuwɔlpa na to nɛ mo nɛ Mosis e malga. 10Saŋkama nɛ basa na baŋ wu kuwɔlpa na ka yili nshɛr be wajɛbu na be kabuna to, bumo kikɛ bee gbir bumo be wajɛbu be kabuna to nna a bunyaŋ. 11Enyɛnpe Ebɔrɛ na nɛ Mosis daa malga abar kutɔ nna fanɛ esa nɛ mo teri na. Kumo be kaman nɛ Mosis e bɛta m ba keeyi to. Mbe kayɛrbi, nɛ baa tre Joshuwa nɛ e la Nun pibinyɛn na bre daa shir a wɔ nshɛr be wajɛbu na to nna.

Enyɛnpe Ebɔrɛ ka nase kɔnɔ fanɛ e beeŋ baa wɔ mbe basa kutɔ be asheŋ

12Ade kikɛ be kaman nɛ Mosis kaŋɛ Enyɛnpe Ebɔrɛ le: “Kashenteŋ nna fanɛ fo e kaŋɛ ma fanɛ n ya keta basa ere n yɔ kɔnɔ naseso be kasawule na so, ama fo alɛ maŋ ŋini ma esa nɛ e beeŋ ba chɛ ma to. Fo baŋ kaŋɛ ma nna fanɛ: ‘N nyi fo nɛnɛ nɛ fo asheŋ bee par ma.’ 13To, nɛ ma shɛŋ bee par fo bre, ŋini ma fo ekpaana nɛ m pin fo nfɛra, nsaa shuŋ fo a wora fo aparsheŋ. Baa nyiŋi fanɛ fo gbagba e lara basa ere nɛ b la feya.” 14Ndoŋ nna nɛ Enyɛnpe Ebɔrɛ kaŋɛ: “Meeŋ tu fo n yɔ, nɛ fo kagbene e wushi.” 15Nɛ Mosis malɛ kaŋɛ mo: “Nɛ fo baa maaŋ tu anyi n yɔ, kumo ere, fo sa maŋ kaŋ shin nɛ an lar nfe. 16Nɛ fo maŋ tu anyi n yɔ, nuso nɛ esa beeŋ wora m pin ma nɛ fo basa be asheŋ ka bee par fo? Fo kebaawɔ anyi kutɔ e naaŋ shin nɛ an baa kɔr bomin kikɛ to ashi durnya ere to.” 17Ndoŋ nna nɛ Enyɛnpe Ebɔrɛ kaŋɛ Mosis: “Ŋkpal ŋ ka nyi fo nɛnɛ nɛ fo asheŋ malɛ bee par ma so, meeŋ wora kusɔ nɛ fo kaŋɛ na gbagba chap.” 18Kede be kaman nɛ Mosis kaŋɛ: “Kumo ere, jande, shin nɛ n wu fo kemaŋkura.” 19Nɛ e kaŋɛ Mosis: “Meeŋ shin nɛ ma kemankura kikɛ e bɔla fo anishito n choŋ nɛ n ti ma ketre ŋ ŋini fo. Ma e la Enyɛnpe Ebɔrɛ nɛ mee wu kuwɔr nsaa lara ma kasha a ŋini bekama nɛ n lara na. 20Ama m maaŋ shin nɛ fo wu ma anishito bre, ŋkpal manɛ so, esa kama maaŋ tiŋ n wu ma anishito nseŋ ji efute. 21Amoso yili kefalta ere ase, 22saŋɛ na so nɛ ma kemaŋkura na ba kaa choŋ, meeŋ ta fo n wɔtɔ kefalta laŋ to n ta ma enɔ m buu fo so pɔɛŋ nseŋ choŋ. 23Kumo be kaman nɛ m bugi ma enɔ ashi fo so nɛ fo wu ma kaman, ama fo maaŋ wu ma anishito bre.”

Currently Selected:

Ɛksodɔs 33: GJNb

Highlight

Copy

Compare