Ɛksodɔs 25

Wajɛbu cheembi na be asheŋ

(Ɛksodɔs 35:4-9)

1Nɛ Enyɛnpe kaŋɛ Mosis: 2“Kaŋɛ Israɛlebi na fanɛ b bar ma ŋkɛ ashi bumo be kagbene to nɛ fo sɔ amo n sa ma. 3Ŋkɛ nɛ a daga fanɛ fo sɔ bumo kutɔ e la shuwa nɛ gbiti nɛ danyaŋ 4nɛ ago lela nɛ afuibi nɛ b nyɔɔ buru ŋko kepeper kpaw nɛ wajɛchɛbi fuful nɛ wajɛ nɛ b ta kaboe be afuibi n lue 5nɛ kpakpa be kawɔl nɛ b nyɔɔ kepeper nɛ churu be kawɔl nɛ b gbiti nɛnɛ nɛ kedibi nɛ baa tre akasia na 6nɛ ɔlif be ŋku nɛ baaŋ baa ta a wɔtɔ efitila to nɛ efɛa belbelso be asɔ nɛ b kɔ a wɔtɔ ŋku nɛfaso to nɛ asɔ nɛ baa ta a wora duwu nɛ amo be efɛa wɔ ebel na 7nɛ yawu kpakpaso be awarabi nyɛkpɛso nɛ baa tre ɔniks na nɛ yawu kpakpaso be ajembu nyɛkpɛso fanɛ amaŋkanibi nɛ baa ta a mata bɔrɛmatapo nimuso be piŋi tenteŋ nɛ baa tre ɛfɔd na so na nɛ ajembu nɛ baa ta a mata demuji be kɔlgu na so. 8Ade be kaman nɛ fo shin nɛ basa na e yuu wajɛbu cheembi n sa ma, saŋɛ na so, meeŋ ba kaa wɔ bumo to. 9A daga fanɛ men yuu kumo nseŋ lɔŋɛ kumo kananɛ meeŋ ŋini fo na gbagba chap.”

Kɔnɔkoŋwule be ŋkre be deka na be asheŋ

(Ɛksodɔs 37:1-9)

10Kede be kaman nɛ fo shin nɛ b ta akasiadibi n lɔŋɛ deka, nɛ kumo be nteŋ to e baa la ayadra ana nɛ bargato nɛ kumo be mparto e baa la ayadra anyɔ nɛ kumo be jeŋgreŋ malɛ e baa la ayadra anyɔ. 11Kumo be kaman nɛ b ŋalga shuwa gbagba m mata deka na be epunto nɛ kaman kikɛ nseŋ lɔŋɛ shuwa be kekrande m mata ŋ kulti kumo 12nseŋ naŋ bɛl shuwa be mpinibi ana n wɔtɔ kumo be aya ana na to nɛ anyɔ e baa wɔ kaba ko so nɛ anyɔ malɛ e baa wɔ kaba ko so. 13B kaŋ wora loŋ n loge na nɛ b shɛl akasiadibi tenteŋ anyɔ nseŋ ŋalga shuwa m mata amo kikɛ so. 14Kumo be kaman nɛ b ta ndibi nɛ b shɛl na n yishi n wɔtɔ mpinibi nɛ a wɔ deka na be akel to na to a pɛ amo a maŋ kumo so. 15A daga fanɛ loŋ be ndibi tenteŋ na e baa wɔ mpinibi na to saŋkikɛ. 16B kaŋ lɔŋɛ deka na n loge nɛ fo ta ajembu pantraŋ pantrambi nɛ ma mbraana deŋi so nɛ meeŋ ta n sa fo ere n wɔtɔ kumo to. 17Kumo be kaman nɛ b ta shuwa nɛ a maŋ kɔ eyurpi amo to n lɔŋɛ deka na be buuso nɛ kumo be nteŋ to e baa la ayadra ana nɛ kumo be mparto malɛ e baa la ayadra anyɔ. Buuso na be ketre e la ‘kuwɔr be kakpa’. 18Shin nɛ b ta shuwa m bɛl asɔ anyɔ ko nɛ a du fanɛ emalaika nɛ baa tre chɛrubim na n yuu deka na be buuso na so. 19B ta chɛrubim na be kuko n yili buuso na be ekarso be kaba ko nseŋ ta kenyɔsopo na malɛ n yili kaba nɛ k ka na. B lɔŋɛ buuso na nɛ chɛrubim na n chɔga abar so nɛ a baa la kukoŋwule, 20nɛ chɛrubim na e parga bumo be atɛ to m buu deka na be buuso na so nseŋ kilgi anishito n shoŋi abar ŋ keni kuwɔr be kakpa. 21Ade kikɛ be kaman nɛ b ta ajembu pantraŋ pantrambi anyɔ nɛ ma mbraana deŋi so na n wɔtɔ deka na to nseŋ ta buuso nɛ baa tre kuwɔr be kakpa na m buu so. 22Ndoŋ nɛ ma nɛ menyi beeŋ baa shɛr nɛ m baa bɔla chɛrubim anyɔ na be nferinto ashi buuso na so a ta ma mbra nɛ ma mmalga a sa fo nɛ fo alɛ e baa ta amo a sa Israɛlebi na.

Sarga be bodobodo be teebɔl be asheŋ

(Ɛksodɔs 37:10-16)

23“Kumo be kaman nɛ fo shin nɛ b ta akasia be etaabodibi n lɔŋɛ teebɔl nɛ kumo be nteŋ to e baa la ayadra asa nɛ mparto e baa la keyadra koŋwule nɛ bargato, nɛ kumo be jeŋgreŋ malɛ e baa la ayadra anyɔ. 24Men ŋalga shuwa n wurge kumo kikɛ so, 25nseŋ ta shuwa n wora kekrande nɛ kumo be mpar sa fanɛ enɔ be mparto ŋ kulti kumo be ekarso kikɛ. 26-27Kumo be kaman nɛ men wora shuwa be mpinibi ana n chɔga teebɔl na be abonfu ana be aya na kikɛ so, saŋɛ na so baaŋ baa ta ndibi nɛ b shɛl na a wɔtɔ amo to a maŋ teebɔl na so. 28Men ta akasiadibi n shɛl ndibi nɛ baaŋ pɛ to a maŋ teebɔl na so a keta na nseŋ ŋalga shuwa n wurge amo kikɛ so. 29Men ta shuwa gbagba n lɔŋɛ teebɔl na so be eprete nɛ mba nɛ echeenshi nɛ kapugboŋ nɛ baa ta sarga be asɔnuuso a wɔtɔ na. 30Kumo be kaman nɛ men ta teebɔl na n yili kɔnɔkoŋwule be ŋkre be deka na be anishito nsaa ta bodobodo nɛ b kɔ a lara sarga a sa ma na a deŋi kumo so saŋkikɛ.”

Kefitilatɔl na be asheŋ

(Ɛksodɔs 37:17-24)

31“Shin nɛ b ta shuwa gbagba m bɛl kefitilatɔl, nɛ kumo be ayabi nɛ a kɔ asɔ ko fanɛ atoto be alambu na nɛ amo kikɛ e baa la kukoŋwule. 32Men wora kefitilatɔl na be ayabi na ashe nɛ amo be asa e baa yuu kekel ko so nɛ asa malɛ e baa yuu kekel nɛ k ka na so. 33Ayabi ashe na be kekama daga fanɛ k baa kɔ asɔ ko nɛ a du fanɛ atoto be alambu na be asa. 34Kefitilatɔl na be nteto na malɛ gbagba daga kebaakɔ asɔ nɛ a du fanɛ atoto be alambu na be ana. 35Ade be kaman nɛ ayabi asa na a bee barga to anyɔnyɔ na be kekama be kaseto gba e baa kɔ atoto be kelambu na be kukoŋwule. 36B ŋalga shuwa gbagba n lɔŋɛ kefitilatɔl na nɛ kumo be ayabi na, nɛ amo kikɛ e baa la kukoŋwule. 37Men ta shuwa gbagba n lɔŋɛ efitila wurbi ashunu nɛ baaŋ baa chɔɔ a yili kefitilatɔl na so nɛ k baa fulto anishito na kikɛ. 38Men ta shuwa m bɛl asɔ nɛ b kɔ a lɔŋɛ efitila na be achɛbi so nɛ eprete nɛ b kɔ a suse amo be nsunɔ na gba. 39Shuwa nɛ menyeeŋ ta n lɔŋɛ kefitilatɔl na nɛ kumo be kusɔ kama nyam be egbɛ e baa sa fanɛ kilo adesa nɛ anu. 40Shin nɛ b wora amo kananɛ ŋ ŋini fo ashi kebee na so na gbagba chap.”

Currently Selected:

Ɛksodɔs 25: GJNb

Highlight

Copy

Compare