Ɛksodɔs 20

Mbra kudu na be asheŋ

(Ditɛronɔmi 5:1-21)

1Ade kikɛ be kaman nɛ Ebɔrɛ malga le be mmalga ere kikɛ ŋ kaŋɛ: 2“Ma e la Enyɛnpe Ebɔrɛ, men be Ebɔrɛ mo nɛ e lara menyi ashi Ijipt be kasawule so, kakpa nɛ men daa wɔ kenyaya to na. 3Men sa maŋ kaŋ bunyaŋ kegbir n naŋ ti ma so. 4Men sa maŋ kaŋ lɔŋɛ kusɔ kama nɛ k wɔ ebɔrɛso ŋko kasawule so ŋko nchu to ashi kasawule be kaseto be kaduli 5nsaa jɔŋɛ amo ase ŋko a shuŋ amo, ŋkpal manɛ so, ma e la Enyɛnpe Ebɔrɛ men be Ebɔrɛ na. Ma alɛ maa sha kechamana. Ma e naa kpal betuto nɛ benio be alubi so e gberge bumo be mbia kusoe hale n ya fo bumo be kenanafofo nɛ kenana gbiramuli na. 6Ama mee ŋini basa nɛ baa sha ma nsaa bɛ ma mmalga nasesoana so na ma kasha nɛ k maa chɛrga na nna. 7Men sa maa ta Enyɛnpe Ebɔrɛ be ketre a wora asheŋ lubi. Men sa maa bɔ Enyɛnpe Ebɔrɛ be ketre na chilchil, ŋkpal manɛ so, Enyɛnpe Ebɔrɛ maaŋ yige m paŋ esa kama nɛ e kɔ mbe ketre a wora a wora asheŋ lubi kikɛ. 8Men baa ta kewushiachɛ na fanɛ ma, Enyɛnpe Ebɔrɛ be kachɛ nɛ k du cheembi. 9Nchɛnshe e daga men ka ta n shuŋ men be ashuŋ kikɛ. 10Kachɛ shunusopo na bre la ewushi be kachɛ nna n sa Enyɛnpe Ebɔrɛ men be Ebɔrɛ na. Kumo be kachɛ na bre menyi nɛ men be bibinyɛn nɛ bibiche nɛ anya nyɛnso nɛ becheso nɛ asɔbɔya dɔso nɛ befɔ nɛ b wɔ men be nde to kikɛ, maŋ daga fanɛ b shuŋ kushuŋ kikɛ. 11Ŋkpal manɛ so, nchɛ ashe nɛ ma, Enyɛnpe Ebɔrɛ na ta n to esoso nɛ kasawule nɛ teku nɛ asɔ nɛ a wɔ amo to kikɛ nseŋ wushi kachɛ shunusopo na, amoso ma, Enyɛnpe Ebɔrɛ na nɛfa kewushiachɛ na nna nseŋ ta kumo ŋ ki kachɛ cheembi. 12Men baa bunyaŋ men nioana nɛ men tutoana, saŋɛ na so men be ŋkpa beeŋ teŋi so ashi kasawule nɛ mee ta a sa menyi na so. 13Men sa maŋ kaŋ mɔ. 14Men sa maa ji kesakalea ŋko a di men braana be beche ŋko bumo kulana. 15Men sa maa yuri. 16Men sa maa ji efɛ be shɛda a gbiti men braana. 17Men sa maa yɛlga men baraana be nwu ŋko bumo be beche ŋko bumo be anya ŋko bumo be ana ŋko ekurma ŋko kusɔ kama nɛ k la men braana peya.”

Kufu ka daŋ pɛ basa na be asheŋ

(Ditɛronɔmi 5:22-33)

18Basa na ka daŋ wu bɔrɛ ka nyɛkpɛ m ponte nɛ kabel ponte awɔrso nɛ b wu edishi ka sɔ kebeegboŋ na kikɛ so na nɛ kufu pɛ bumo nɛ b chicha kufuso nseŋ bɛta n yɔ kufɔ n ya yili. 19Kumo be kaman nɛ b kaŋɛ Mosis le: “Nɛ fo ere gbagba malga anyi kutɔ, anyeeŋ nu, ama Ebɔrɛ bre malga anyi kutɔ, anyeeŋ wu.” 20Ndoŋ nna nɛ Mosis kaŋɛ basa na: “Men sa maa lɔ kufu. Ebɔrɛ ba nna nɛ e ba wora menyi ŋ keni nseŋ shin nɛ men baa wora mo kasonu nsaa maa wora alubi.” 21Basa na kikɛ daŋ ya kaa yil kufɔ kufɔ nna nɛ Mosis bre firgi n taga ketentembirigboŋ na to ashi kakpa nɛ Ebɔrɛ daa wɔ na.

Bɔrɛsure be mbraana be asheŋ

22Ndoŋ nna nɛ Enyɛnpe Ebɔrɛ kaŋɛ Mosis fanɛ e kaŋɛ Israɛlebi na le: “Menyi gbagba wu nseŋ nu kananɛ ma, Enyɛnpe Ebɔrɛ na malga n sa menyi ashi ebɔrɛso nna na. 23Men sa maŋ kaŋ ta shuwa ŋko gbiti n lɔŋɛ agbir kikɛ a shuŋ amo n ti ma so. 24Ama men baga eshishɛr m pɔr bɔrɛsure n sa ma nsaa lara men be esarga chɔɔso nɛ men be kɔnɔkoŋwule be esarga kumo so. Amo nɛ menyee ta mbolpɔ nɛ mboe nɛ ana a lara na. Kaplɛkama nɛ n ya kaa sha fanɛ men baa bunyaŋ ma ndoŋ, meeŋ ba menyi kutɔ m ba nɛfa menyi ndoŋ. 25Ama nɛ men baŋ ta ajembu nɛ men pɔr bɔrɛsure n sa ma, men sa maŋ kaŋ ta kanase n shɛl amo m pɔr kumo, ŋkpal manɛ so, nɛ men baŋ ta kanase n shɛl amo, kumo ere men maaŋ naŋ tiŋ n lara sarga kumo so n sa ma. 26Kede be kaman, men sa maŋ kaŋ pɔr bɔrɛsure nɛ menyeeŋ baa ta kasakpar a dii so. Ŋkpal manɛ so, men baa dii kasakpar na baaŋ baa wu men be mboŋ gela.”

Currently Selected:

Ɛksodɔs 20: GJNb

Highlight

Copy

Compare