Ɛksodɔs 18

Jetro ka yɔ Mosis kutɔ be asheŋ

1Ade kikɛ be kaman nɛ Mosis mo shanyɛn Jetro nɛ e daa la Midian be bɔrɛmatapo na daŋ nu asɔ nɛ Ebɔrɛ wora n sa Mosis nɛ Israɛlebi na nɛ kananɛ Enyɛnpe Ebɔrɛ lara mbe basa Israɛlebi na ashi Ijipt be asheŋ. 2Jemanɛ ko nɛ Mosis daŋ shin nɛ mbe eche Zipora nɛ mbe mbinyɛnsobi anyɔ ya chena Jetro kutɔ nchɛnnyɔ. 3Mbe mbinyɛnso na be eko be ketre e daa la Gɛshɔn, ŋkpal manɛ so, Mosis yɛ: “N nase mo loŋ nna ŋkpal ŋ ka la efɔ ashi kasawule pɔtɛ so so.” Emo nɛ e ka na malɛ be ketre e daa la Eliaza, 4ŋkpal manɛ so, Mosis yɛ: “N tuto be Ebɔrɛ e la ma Echɛtopo nɛ e mɔlga ma ashi Fɛɛro be enɔ to.” 5Jetro daŋ keta Mosis be eche nɛ mbe mbinyɛnsobi anyɔ na nna nɛ b yɔ Mosis kutɔ keshishɛrsawule na so, kakpa nɛ Mosis daŋ yuu mbe ewajɛbu m mata Ebɔrɛ be kebeegboŋ nɛ baa tre Sainai na. 6Ama pɔɛŋ nɛ Jetro yɛr mbia na le nɛ e daŋ kela ŋ kaŋɛ Mosis, “Fo shanyɛn kɔ fo eche nɛ mbia a ba.” 7Ndoŋ nna nɛ Mosis lar n ya shɛr mo shanyɛn Jetro to nseŋ jɔŋɛ mo ase bunyanso. B ka chɔrɔ abar n loge nɛ b keta abar n luri Mosis be wajɛbu to. 8Nɛ Mosis kaŋɛ mo shanyɛn asheŋ nɛ Enyɛnpe Ebɔrɛ wora Fɛɛro nɛ Ijipt be basa kikɛ ŋkpal Israɛlebi be kenya kumɔlga so. Kumo be kaman nɛ e naŋ kaŋɛ mo etɔrɔ nɛ a tu bumo ashi ekpa to na kikɛ nɛ kananɛ Enyɛnpe Ebɔrɛ chɛ bumo to ashi amo kikɛ to. 9Jetro ka nu asɔ lela damta nɛ Enyɛnpe Ebɔrɛ wora n sa Israɛlebi saŋɛ nɛ e daŋ sɔ bumo ashi Ijiptebi na be enɔ to na be asheŋ ere nɛ mbe kagbene fuli mo ga. 10Nɛ Jetro kaŋɛ le: “Kemaŋkura e baa la Enyɛnpe Ebɔrɛ mo nɛ e mɔlga fo nɛ basa na kikɛ ashi Ijipt be ewura Fɛɛro nɛ mbe basa Ijiptebi na be kenyaya to na peya. 11Ijiptebi na fɛl menyi Israɛlebi n chɛr. Naniere nɛ m pin fanɛ Enyɛnpe Ebɔrɛ kɔ eleŋ a chɔ agbirana kikɛ, ŋkpal kusɔ nɛ e wora basa na so.” 12Ndoŋ nna nɛ Jetro lara sarga chɔɔso nɛ esarga pɔtɛana ko n sa Ebɔrɛ. Ɛɛrɔn nɛ Israɛlebi be bejuŋkparpo na kikɛ daŋ ya tu Mosis mo shanyɛn Jetro nna n ji kejigboŋ Ebɔrɛ be anishito.

Demujipoana be kelara be asheŋ

(Ditɛronɔmi 1:9-18)

13Kumo be ŋklade nɛ Mosis nawule chena a ji basa na kikɛ demu nɛ basa na yil mo so kachipurso loŋ hale n ya fo kaaseso. 14Jetro ka wu kusɔ nɛ Mosis bee wora na nɛ kananɛ basa na shi mo so na nɛ e bishi mo le: “Manɛ nɛ fo wɔtɔ a wora basa na loŋ? Manɛ nna nɛ fo nawule baŋ chena a ji basa na demu nɛ b yil a yil ŋ kulti fo kachipurso kikɛ m ba fo kaaseso ere?” 15Nɛ Mosis kaŋɛ mo le: “Basa na bee kaa ba ma kutɔ nna m ba kaa bishi kananɛ baaŋ wora Ebɔrɛ be aparsheŋ. 16Nɛ fanɛ bumo be benyɔ malɛ baŋ wora n da abar so baa ba ma kutɔ nna nɛ n yili Ebɔrɛ be mmalga naseso nɛ mbe mbraana so n ji bumo demu m pin emo nɛ e kɔ kashenteŋ.” 17Ndoŋ nna nɛ Jetro kaŋɛ Mosis le: “Kusɔ nɛ fee wora ere maŋ walɛ. 18K beeŋ tɔrɔ fo nɛ basa nɛ b wɔ fo kutɔ ere kikɛ nɛ fo gben ga, ŋkpal manɛ so, kushuŋ na shi ga n sa fo. Fo nawule maaŋ tiŋ n wora kumo. 19To, naniere nu ma kamalga ere. Fo nu kumo, Ebɔrɛ beeŋ chɛ fo to nɛ fo baa yili basa na kikɛ be katelamu to a ta bumo be edemu a ba Ebɔrɛ be anishito. 20Baa ŋini bumo Ebɔrɛ be mmalga nasesoana na nɛ mbe mbraana na nseŋ shin nɛ b pin kebaawɔtɔ nɛ Ebɔrɛ bee sha fanɛ b baa kɔ. 21Ama a daga fanɛ fo lara benyɛn nɛ b kɔ kabɔrɛŋana nsaa la basa nɛ esa beeŋ tiŋ n yirda nɛ baaŋ tiŋ n shuŋ fo kushuŋ ere ashi basa na to. Shin nɛ b ki bejuŋkparpo a keni basa kagboŋ kagboŋ so nɛ basa kalfa kalfa so nɛ basa adununu so nɛ basa kudu kudu so. 22Shin nɛ loŋ be bejuŋkparpo na e baa ji basa na be edemu a sa bumo saŋkikɛ. Ama baaŋ tiŋ n ta demugboŋ bre m ba fo kutɔ. Saŋɛ na so, baaŋ chɛ fo to n sulɔ esulɔ na be ako nɛ asheŋ e ki pɔtɔ pɔtɔ n sa fo. 23Kananɛ Ebɔrɛ bee sha fanɛ asheŋ e baa du nna na. Saŋɛ na so fo maaŋ naa gben ga nɛ basa ere malɛ e baa ta ŋgbenefuli a yɔ epe.” 24Ndoŋ nna nɛ Mosis shuli m bɛ mo shanyɛn Jetro be kamalga na so nseŋ wora asɔ nɛ e kaŋɛ mo na kikɛ. 25Kumo be kaman nɛ Mosis lara benyɛn nɛ baaŋ tiŋ n shuŋ kushuŋ na ashi Israɛlebi na kikɛ to nseŋ shin nɛ b ki basa kagboŋ kagboŋ nɛ basa kalfa kalfa nɛ basa adununu nɛ basa kudu kudu be bekenipoana. 26Ndoŋ nna nɛ loŋ be basa na fara a ji Israɛlebi na be edemu saŋkikɛ. Ama demu kama nɛ k daa la demugboŋ bre, b daa ta kumo nna a yɔ Mosis kutɔ, amo nɛ a daa maŋ la demugboŋ na bre, bumo gbagba e daa ji amo. 27Ade kikɛ be kaman nɛ Mosis shuŋi mo shanyɛn Jetro ekpa nɛ e bɛta n yɔ mbe efuli so.

Currently Selected:

Ɛksodɔs 18: GJNb

Highlight

Copy

Compare