Ɛksodɔs 16

Manna nɛ mbuibi nɛ baa tre kweels na be asheŋ

1B ka lar ljipt be kasawule so na be kufɔl nyɔsopo be kachɛ kuduanusopo na nɛ b lar Elim m pɛ kebee nɛ baa tre Sainai na be ekpa m ba fo Sin be keshishɛrsawule na so. 2Ndoŋ nna nɛ Israɛlebi na kikɛ naŋ fara a fubel a malga a gbiti Mosis nɛ Ɛɛrɔn 3a kaŋɛ le: “Enyɛnpe Ebɔrɛ daŋ shin nɛ an wu ashi ljipt be kasawule so gba, k daa bɔ, ŋkpal manɛ so, an ka daa wɔ ndoŋ, an daa nya eblaŋ nɛ ajibi kanaŋkamaso nɛ anyee sha a ji. Ama kumo nɛ men bar anyi keshishɛrsawule ere so m ba ka shin nɛ men ta akoŋ m mɔ anyi kikɛ na.” 4Ndoŋ nna nɛ Enyɛnpe Ebɔrɛ kaŋɛ Mosis: “Keni meeŋ shin nɛ ajibi e shi esoso n wurge fanɛ bɔrɛ na n sa menyi nɛ basa na e baa lar n ya kaa muu amo kananɛ baaŋ tiŋ n ji karechɛ kama. Loŋ nɛ meeŋ wora bumo ŋ keni baa bɛ ma keŋini so a? 5Ama kachɛ shesopo na bre, b muu nchɛnnyɔ be ajibi n daŋɛ amo m barga amo to ntuŋ anyɔ ŋkpal b ka maaŋ muu amo kachɛ shunusopo na so.” 6Ndoŋ nna nɛ Mosis nɛ Ɛɛrɔn kaŋɛ Israɛlebi na kikɛ le: “Ta a ba kaaseso menyeeŋ pin fanɛ Enyɛnpe Ebɔrɛ na gbagba e lara menyi ashi ljipt be kasawule so. 7Echefo chipurso menyeeŋ wu Enyɛnpe Ebɔrɛ na be kemaŋkura, ŋkpal manɛ so, e nu menyi be mmalga nɛ menyee malga a gbiti mo na kikɛ. Mo nɛ men daa malga ŋ gbiti na, mannɛ anyi.” 8Ade kikɛ be kaman nɛ Mosis naŋ kaŋɛ bumo le: “Enyɛnpe Ebɔrɛ na e la esa mo nɛ e beeŋ baa sa menyi eblaŋ kaaseso nɛ men baa we, nseŋ naa sa menyi ajibi malɛ chipurso kanaŋkamaso nɛ k daga. Ŋkpal manɛ so, Enyɛnpe Ebɔrɛ na nu menyi be nfubel, manɛ e la anyi nɛ menyee malga gbiti anyi? Enyɛnpe Ebɔrɛ nɛ menyee malga a gbiti, mannɛ anyi.” 9Kumo be kaman nɛ Mosis kaŋɛ Ɛɛrɔn: “Kaŋɛ Israɛlebi na kikɛ fanɛ b ba Enyɛnpe Ebɔrɛ na be anishito, ŋkpal manɛ so, e nu bumo be nfubel.” 10Ɛɛrɔn ka bee malga a sa Israɛlebi na nɛ b keni keshishɛrsawule na be kaba so n wu Enyɛnpe be kemaŋkura ka bee nyaŋɛ kuwɔlpa to epul na to. 11Nɛ Enyɛnpe Ebɔrɛ kaŋɛ Mosis: 12“N nu nfubel damta ashi Israɛlebi na kutɔ, amoso kaŋɛ bumo le: ‘Ta a ba kaaseso saŋɛ nɛ kaboŋ bee jija to na menyeeŋ we eblaŋ. Kachipurso malɛ nɛ men nya ajibi n ji kananɛ menyee sha nseŋ pin fanɛ ma e la Enyɛnpe, menyi be Ebɔrɛ na.’ ” 13Kaase ka fo nɛ mbuibi nɛ baa tre kweels na baŋ ba chase bumo be echenakpa na kikɛ. Kachipurso malɛ nɛ bunyaŋ tɔr ŋ kulti bumo be echenakpa na kikɛ. 14Bunyaŋ na ka yɔ nɛ asɔ fufulbi patapatabi ko malɛ ba keshishɛrsawule kikɛ nyam so. 15Israɛlebi na ka wu amo nɛ b bishi abar: “Manɛ nna?” Ŋkpal manɛ so, b daa maŋ nyi kusɔ nɛ k daa la asɔ na. Ndoŋ nna nɛ Mosis kaŋɛ bumo le: “Ajibi nɛ Enyɛnpe Ebɔrɛ sa menyi fanɛ men baa ji nna na. 16Ama mbra nɛ Enyɛnpe Ebɔrɛ sa e la fanɛ ekama e muu kanaŋkamaso nɛ e beeŋ tiŋ n ji nseŋ muu kurwa kurwa n sa esa kama nɛ e wɔ mbe wajɛbu to.” 17Ndoŋ nna nɛ Israɛlebi na wora kusɔ nɛ Mosis kaŋɛ bumo na, beko daŋ muu ga ga nna nɛ beko malɛ muu gbrɛgbrɛ. 18Ama b ka daŋ ber amo, bumo nɛ b daŋ muu ga ga na nɛ bumo nɛ b muu gbrɛgbrɛbi na kikɛ daŋ nya nna ŋ kukwe. 19Kumo be kaman nɛ Mosis naŋ kaŋɛ bumo: “Ekama e sa maŋ kaŋ shin nɛ amo be ako e yili mo kutɔ ŋklade.” 20Ama bumo be beko daa maŋ wora kasonu n sa Mosis nseŋ ta amo be ako n yili ŋklade. Kare ka chɛ nɛ a bɛ a dufɛ nɛ ashushombi bɔlɔ amo to nɛ Mosis nya agbo n wora Israɛlebi na. 21Kare baŋ naŋ chɛ kachipurso esa kama bee muu kananɛ e beeŋ tiŋ n ji nna. Epeŋi baŋ bel na nɛ amo nɛ a ka kasawule so na kikɛ e ŋalga. 22Kachɛ shesopo na bre ekama daa muu kananɛ e bee muu karechɛ kikɛ be ntuŋnyɔso nna. Kumo be kaman nɛ Israɛlebi na be bejuŋkparpo kikɛ e yɔ Mosis kutɔ n ya kaa kaŋɛ mo amo be asheŋ. 23Nɛ Mosis kaŋɛ bumo: “Enyɛnpe Ebɔrɛ nase mbra nna fanɛ echefo la mo gbagba be kachɛ cheembi nɛ e lara nɛ k baa la ewushi be kachɛ nna. Amoso, men tɔ amo nɛ menyee sha ketɔ edɛ to n ji nseŋ daŋɛ amo nɛ menyee sha kedaŋɛ n ji malɛ nseŋ ta amo nɛ a ka na n yili echefo.” 24Ndoŋ nna nɛ b ta amo nɛ a ka na n yili ŋklade fanɛ kananɛ Mosis kaŋɛ bumo na. Amo alɛ daa maŋ bure ashushombi ŋko m bɛ a dufɛ. 25Nɛ Mosis kaŋɛ bumo: “Men ji ade kabre, ŋkpal kabre ka la Enyɛnpe Ebɔrɛ be kewushiachɛ so, men maaŋ nya ako m muu kasawule. 26Nchɛnshe she nɛ menyeeŋ baa muu amo, ama kachɛ shunusopo nɛ k la kewushiachɛ na bre men maaŋ nya amo m muu.” 27Amo nɛ amo kikɛ basa na be beko daŋ naŋ yɔ nna nɛ b ya muu amo kachɛ shunusopo na, bumo alɛ maŋ wu amo. 28Ndoŋ nna nɛ Enyɛnpe Ebɔrɛ bishi Mosis: “Manɛ nna nɛ men wɔtɔ a kini kebɛ ma mbraana so? 29Keni! Men nyiŋi fanɛ ma, Enyɛnpe Ebɔrɛ na e sa menyi kewushiachɛ na, amoso nɛ kachɛ shesopo na mee sa menyi be ekama nchɛnnyɔ be ajibi na. Kachɛ shunusopo na, ekama e shir a wɔ mbe laŋ to. Esa kama e sa maŋ lar kowu kikɛ.” 30Amoso basa na daa wushi kachɛ shunusopo na nna. 31Israɛl be basa daa tre loŋ be ajibi na ‘manna’ nna. Amo alɛ daa du wurwurbi n fuli fanɛ ateebi nsaa du belbel fanɛ mushoŋ nna. 32Ndoŋ nna nɛ Mosis kaŋɛ bumo le: “To, kusɔ nɛ Enyɛnpe Ebɔrɛ ta n sa anyi a yɔ ajibi na be kaplɛa so nde. E yɛ: ‘Men ta manna na fanɛ kurwa n yili menyi be kaman to ebi, saŋɛ na so baaŋ ba wu ajibi nɛ ma, Enyɛnpe Ebɔrɛ na daa sa menyi keshishɛrsawule so, saŋɛ nɛ n lara menyi ashi ljipt be kasawule so na.’ ” 33Kumo be kaman nɛ Mosis kaŋɛ Ɛɛrɔn le: “Jɔ manna na be kurwa be bɔlɔ n wɔtɔ kɔlba to n yili kakpa nɛ menyee bunyaŋ Enyɛnpe Ebɔrɛ na nɛ a baa yil anyi be kaman to ebi kikɛ.” 34Enyɛnpe Ebɔrɛ ka baŋ kaŋɛ Mosis na, nɛ e shin nɛ Ɛɛrɔn ta amo n yili kɔnɔkoŋwule be ŋkre be deka na be anishito, nɛ a baa yil ndoŋ. 35Israɛlebi na daŋ ji manna na nfɛ adena nna. B ji amo hale n ya fo Keenan be kasawule so nseŋ chena ndoŋ. 36Bumo be kusɔ karga asɔ nɛ b daa tre omɛr na daa sa fanɛ kurwa nna.

Currently Selected:

Ɛksodɔs 16: GJNb

Highlight

Copy

Compare