Ɛksodɔs 15

Mosis be kashɛ be asheŋ

1Ade kikɛ be kaman nɛ Mosis nɛ Israɛlebi na kikɛ boŋ le be kashɛ ere n sa Enyɛnpe Ebɔrɛ a kaŋɛ: “Meeŋ boŋ kashɛ n sa Enyɛnpe Ebɔrɛ na, ŋkpal manɛ so e kɔ m pɔɔ so kemaŋkuragboŋ so. Mo e shin nɛ egbaŋɛ nɛ bumo be bediipoana mur ashi teku to na. 2Enyɛnpe Ebɔrɛ na e la ma elempo nɛ ma emɔlgapo. Meeŋ boŋ kashɛ ŋ dele mo. Mo e la ma Ebɔrɛ, amoso meeŋ di mo epaŋ. N tuto be Ebɔrɛ e la mo, amoso meeŋ fur mo. 3Mbe ketre e la Enyɛnpe Ebɔrɛ na. Mo e la enakɔpo na. 4Mo e shin nɛ Fɛɛro be egbaŋɛturkoana nɛ mbe benapo kikɛ mur ashi teku to na. E shin nɛ Fɛɛro be benapo be benimu nɛ e yirda ga na kikɛ mur ashi Teku Peper na to. 5Teku na ka bee baga to a buu so a ba na nɛ k muni bumo so nɛ b chul n yɔ kumo be kaseto fanɛ kejembu na. 6O, Enyɛnpe Ebɔrɛ, fo enɔ jisa so nɛ kumo be eleŋ kɔ kufu ga na nɛ fo ta m buri fo doŋana to cheche. 7Fo kemaŋkura nɛ eleŋgboŋ wɔ kumo to na nɛ fo ta m pɔɔ bumo nɛ b kishi fo na so. Fo agbogboŋ nɛ k bee ji fanɛ edɛ be kuwuloŋ na a chɔɔ bumo burburbi fanɛ atuweklaŋ na m mur. 8Fo kamuna to be efutegboŋ nawule e shin nɛ nchu nɛ a daŋ ber abar so na kikɛ barga to n niŋi to n yili fanɛ egbal na, nɛ teku na be kechimbi to ki kasawule wɔlso. 9Edompo na daŋ ji njɔŋ nna ŋ kaŋɛ: ‘Meeŋ ju m buu bumo so n ya pɛ bumo nseŋ barga bumo be asɔ to n ta amo nɛ mee sha kikɛ. Meeŋ pee ma tokobi m mɔ bumo.’ 10Ama Enyɛnpe Ebɔrɛ, fo efute nawule e shin nɛ teku na ba buu bumo kikɛ nyam so nɛ b chul n yɔ nchu damta na be kaseto fanɛ epal na. 11O Enyɛnpe Ebɔrɛ, wanɛ e du fanɛ fo ashi ebɔrɛana kikɛ to? Fo kecheembiya bee mɔ kɔnɔ nna nɛ fo kemaŋkura shi. Wanɛ e du fanɛ fo? Wanɛ e naaŋ tiŋ n wora emamachisheŋ nɛ ashuŋgboŋ nɛ a baa du fanɛ feya ere? 12Fo e teŋi fo enɔ jisa nɛ kasawule ta fo doŋana kikɛ m min na. 13Feeŋ bɔla fo kasha nɛ k maa chɛrga na so n juŋkpar basa mo nɛ fo sɔ n yige na, nsaa ta fo eleŋ na a juŋkpar ŋ ŋini bumo ekpa nɛ b ya fo kakpa cheembi nɛ fo wɔ na. 14Efuli pɔtɛana so ebi gba kaŋ nu kesheŋ ere, kufu beeŋ pɛ bumo nɛ Filistiebi gba e fara a chicha kufuso ga. 15Kufu beeŋ pɛ Edɔm be bewuraana nɛ Mowab be bejuŋkparpoana ga ŋkpal loŋ so. Keenan be basa kikɛ beeŋ pɔ aba, 16nɛ kufu nɛ kechichachicha e tɔr bumo so. Ŋkpal eleŋ nɛ k beeŋ lar fo enɔ to na so, baaŋ wora shruum fanɛ kejembu na n ya fo saŋɛ nɛ fo basa nɛ fo lara ashi kenyaya to na choŋ na pɔɛŋ. 17Fo e naaŋ yɛr fo basa n ya chena fo gbagba be kebee so, kaboŋ nɛ fo, Enyɛnpe lara fanɛ k baa la fo pe nsaa la ebu cheembi nɛ fo gbagba pɔr na. 18Fo Enyɛnpe Ebɔrɛ e naaŋ baa ji kuwura hale mbaanaayɔ.”

Miriam be kashɛ be asheŋ

19Israɛlebi na daŋ bɔla teku na to nna n nite kasawule wɔlso so n choŋ. Ama Fɛɛro be egbaŋɛturkoana nɛ egbaŋɛdiipoana na bre ka bɔla teku na to nɛ b choŋ nɛ Enyɛnpe Ebɔrɛ shin nɛ nchu na bɛta m ba mur bumo kikɛ. 20Ndoŋ nna nɛ anebi cheso Miriam, nɛ e la Ɛɛrɔn mo da cheso na, ta mbe chakachaka, nɛ beche nɛ b ka na malɛ ta echakachaka m bɛ mo so nɛ baa laŋ nsaa cha. 21Nɛ Miriam bee boŋ kashɛ a wɔtɔ bumo to a kaŋɛ: “Men boŋ kashɛ n sa Enyɛnpe Ebɔrɛ na, ŋkpal mbe kekɔmpɔɔso be eleŋ nɛ kemaŋkura ka shi ga so. Mo e shin nɛ egbaŋɛturko nɛ amo be bediipo mur teku to na.”

Nchu kekra na be asheŋ

22Ade kikɛ be kaman nɛ Mosis juŋkpar Israɛlebi na ŋ koso teku peper na ase n nite n ya luri Shur be keshishɛrsawule so. B daŋ nite keshishɛrsawule na so nchɛ asa nɛ b maŋ nya nchu nɛ b nuu. 23B ka ya fo kaboŋ ko nɛ baa tre Mara, b daa maŋ tiŋ nɛ b nuu ndoŋ be nchu na, ŋkpal a ka daa du kekra so, amoso nɛ b daŋ nase ndoŋ Mara nna. 24Nɛ basa na naŋ fara a fubel a kaŋɛ Mosis le: “To, nnɛ nɛ anyeeŋ nya nchu n nuu?” 25Ndoŋ nna nɛ Mosis shu n tre Enyɛnpe Ebɔrɛ nɛ Enyɛnpe Ebɔrɛ na ŋini mo kedibi ko nɛ e ta kumo n lɛ nchu na to, nɛ a kilgi nchu belbelso. Enyɛnpe Ebɔrɛ ka wora bumo ŋ keni na nɛ e sa bumo mbra 26nseŋ ŋini bumo ŋ kaŋɛ le: “Men baŋ bugi asoe nɛnɛ n nu ma, men Nyɛnpe Ebɔrɛ na be ebɔl nseŋ wora kusɔ nɛ k niŋi ashi ma anishito, nseŋ bɛ ma mbraana so bre, menyeeŋ baa kɔ eleŋ. Ma alɛ maaŋ ta alɔ wurbi be aleblawu nɛ n daŋ ta n lɛ ljiptebi so na n lɛ menyi so.” 27Kumo be ŋklade nɛ b ba Elim. Ndoŋ nɛ abuye kudu anyɔ nɛ ŋkubadibi adushunu daa wɔ na, m ba yuu bumo be ewajɛbu nchu na ase.

Currently Selected:

Ɛksodɔs 15: GJNb

Highlight

Copy

Compare