Ɛksodɔs 11

Ewurkoŋ be luwu be asheŋ

1Ade kikɛ be kaman nɛ Enyɛnpe Ebɔrɛ kaŋɛ Mosis le: “Ŋ kraa beeŋ bar aleblawu koŋwule ewura Fɛɛro nɛ Ijiptebi so. Kumo ere be kaman e beeŋ shin nɛ men yɔ. E beeŋ ju menyi gba kuraa n lar mbe efuli so. 2Amoso naniere ya malga n sa Israɛl be beche nɛ benyɛn fanɛ b kule ŋ kule bumo be bechenashapoana shuwa nɛ gbiti be abitasɔ.” 3Ndoŋ nna nɛ Enyɛnpe Ebɔrɛ shin nɛ Ijiptebi na be ŋgbene pɛ Israɛlebi na ga nɛ ewura Fɛɛro be beyaasepo gba nɛ Ijipt be basa kikɛ fara a keni Mosis a bɔlɔ kenishi.

4Kumo be kaman nɛ Mosis kaŋɛ ewura Fɛɛro le: “Enyɛnpe Ebɔrɛ kaŋɛ fanɛ ta a ba kiidiso e beeŋ nite Ijipt kikɛ to. 5Kaplɛkama malɛ nɛ e yɔ be ewurkoŋ nyɛnso beeŋ wu. Yili ewura Fɛɛro n ya fo kenyache nɛ e bee kɔr ayu be ewurkoŋ nyɛnso beeŋ wu, nɛ asɔbɔya na gba peya e wu. 6Ijipt be kaba so kikɛ nyam, basa beeŋ baa boŋ to a shu. B maŋ naŋ shu loŋ be kushu ashi Ijipt be kasawule so kikɛ, bumo alɛ maaŋ naŋ shu loŋ be kushu kikɛ. 7Ama kakpa nɛ Israɛlebi na bre wɔ, basa maaŋ shu, hale jɔnɔ gba maaŋ gbu. Saŋɛ na so menyi, Ijiptebi beeŋ pin fanɛ Israɛlebi na kɔr menyi to ashi ma, Enyɛnpe Ebɔrɛ na kutɔ. 8Ade kikɛ be kaman fo beyaasepo ere kikɛ beeŋ ba ma kutɔ m ba gbir ma anishito ŋ kule ma ŋ kaŋɛ le: ‘Fo nɛ basa nɛ baa bɛ fo so na kikɛ, e baa yɔ.’ Kumo be kaman nɛ an lar.” Mosis ka malga le n loge nɛ e nya agbo ga nseŋ lar ewura Fɛɛro kutɔ. 9Ama Enyɛnpe Ebɔrɛ teŋ kaŋɛ Mosis fanɛ ewura Fɛɛro maaŋ nu n sa mo, saŋɛ na so, mo ere Ebɔrɛ be emamachisheŋ beeŋ wora keshi Ijipt to. 10Kashenteŋ nɛ Mosis nɛ Ɛɛrɔn daŋ wora emamachisheŋ damta ere kikɛ ewura Fɛɛro be anishito, ama Enyɛnpe Ebɔrɛ daŋ shin nna nɛ Fɛɛro wora kagbene kpakpaso ŋ kini keshin nɛ Israɛl be basa na e lar mbe efuli so.

Currently Selected:

Ɛksodɔs 11: GJNb

Highlight

Copy

Compare