Ɛsta 4

Mɔdikaya ka bee fin kechɛto ashi Ɛsta kutɔ be asheŋ

1Mɔdikaya ka nu kusɔ nɛ ewura na wora na, nɛ e kpɛa mbe asɔbuuso to kagbenejijaso, nseŋ ta kagbenejijaso be kusɔbuuso m buu n wora nsunɔ n wurge mbe kumu so nsaa shu awɔrso ebesa so a na a kulti kade na to, 2hale m ba fo ewura na be lambu be kabuna ase. Mo alɛ daa maŋ nya ekpa n luri lambu na to ŋkpal manɛ so esa kama nɛ e buu kagbenejijaso be kusɔbuuso maŋ kɔ ekpa nɛ e luri ndoŋ. 3Efuli na so be kaplɛkama malɛ nɛ b kraŋ kawɔl na jimaŋ to, Juwebi nɛ b wɔ ndoŋ bee teŋi keeli nna a boŋto a shu. B daŋ kishi nna nseŋ shu ga nɛ bumo be bedamta ta kagbenejijaso be asɔbuuso m buu nseŋ dese nsunɔ to. 4Ɛsta be mbita nɛ benyɛn nɛ b fɛl nɛ baa shuŋ mo na ka kaŋɛ mo Mɔdikaya be asheŋ, nɛ mbe kagbenejija mo ga, nɛ e ta asɔbuuso lela n sa fanɛ b ya sa Mɔdikaya, saŋɛ na so e beeŋ lara kagbenejijaso be asɔbuuso na, nɛ Mɔdikaya kini. 5Ndoŋ nna nɛ Ɛsta shin nɛ ewura na be benyɛn nɛ b fɛl e la Ɛsta be kayɛrbi, nɛ baa tre mo Hataak na, ya bishi Mɔdikaya kusɔ nɛ k kɔ mo. 6Nɛ Hataak yɔ Mɔdikaya kutɔ ashi ewurkpa be kelɔnɛ so. 7Ndoŋ nna nɛ Mɔdikaya kaŋɛ mo kusɔ nɛ k wora kikɛ nɛ kananɛ Heman nase kɔnɔ fanɛ e beeŋ ta amansherbi damta n wɔtɔ ewurkpa be kɔlgu to, nɛ b mɔ Juwebi kikɛ. 8Kumo be kaman nɛ e ta kawɔl nɛ b sibɛ ashi Susa nɛ k bee kaŋɛ fanɛ a daga b ka mɔ Juwebi kikɛ na be kuko n sa Hataak fanɛ e ta n ya ŋini Ɛsta nseŋ bugi to ŋ kaŋɛ mo kusɔ nɛ k wɔtɔ, saŋɛ na so e beeŋ kule ewura na nɛ e wu mbe basa kuwɔr. 9Nɛ Hataak wora loŋ. 10Ndoŋ nna nɛ Ɛsta sa ebɔl fanɛ e bɛta n ya kaŋɛ Mɔdikaya le: 11“Ewurkpa be mbra bee ŋini fanɛ esa kama nɛ e luri ewura kutɔ nɛ e maŋ tre mo, daga luwu. Ewura na be asoetojipoana nɛ mbe kasawule so be kaba kikɛ so ebi gba nyi kumo be loŋ. Ama ewura na baaŋ teŋi mbe shuwa be kuwurkpabi na nna ŋ shoŋi esa na. Loŋ bre, b maaŋ mɔ mo. Amoso k beeŋ baa du kpakpa n sa ma nɛ n wu ewura na ŋkpal manɛ so kufɔl lelemu nna na e ka maŋ shuŋi n tre ma.” 12Mɔdikaya ka nu Ɛsta be kubɔya na 13nɛ mo alɛ ta le be kubɔya ere n shoŋi mo: “Sa maŋ kaa fɛ fanɛ nɛ baa mɔ Juwebi kikɛ, fo ere beeŋ nya fo kumu ŋkpal fo ka wɔ ewura pe so. 14Nɛ fo baŋ maŋ wora shɛŋ le be jemanɛ ere, ashere, echɛtopo ko beeŋ shi kakpa ko m ba mɔlga anyi. Ama fo ere nɛ fo tuto be kanaŋ to ebi kikɛ beeŋ mur. Wanɛ e nyi fanɛ le bre so nɛ fo ki ewurche le be jemanɛ ere?” 15Ndoŋ nna nɛ Ɛsta shuŋi ŋ kaŋɛ Mɔdikaya le: 16“Shin nɛ Juwebi nɛ b wɔ Susa na kikɛ e ba abar so m ba kishi nchɛ asa nɛ nnyɛ asa ŋ kule Ebɔrɛ n sa ma. Ma alɛ gba nɛ ma mbita beeŋ luri loŋ be ekishi na to. Kumo be kaman, nɛ n yɔ ewura na kutɔ. Hale nɛ mbra maŋ sa ma ekpa gba, meeŋ wora loŋ. Nɛ k la luwu nɛ n wu.” 17Ndoŋ nna nɛ Mɔdikaya ya wora kusɔ kama nɛ Ɛsta kaŋɛ mo na kikɛ.

Currently Selected:

Ɛsta 4: GJNb

Highlight

Copy