Ɛsta 3

Heman ka kre Juwebi be kemɔ be asheŋ

1Asheŋ ere be kaman nɛ ewura Sɛgsis ta kenimu nɛ k bɛ ewura na so na n sa kanyɛn ko nɛ baa tre mo Heman nɛ e la Hammedaata pibinyɛn nseŋ shi Agag be kanaŋ to na. 2Ewura na daŋ tre mbe benimu nɛ baa shuŋ ewurkpa na kikɛ nna, ŋ kaŋɛ bumo fanɛ b baa bunyaŋ Heman nseŋ naa jɔŋɛ mo ase. Nɛ bumo kikɛ bɛ kusɔ nɛ e kaŋɛ na so ama Mɔdikaya nawule. 3Ndoŋ nna nɛ benimu nɛ baa shuŋ ewurkpa na bishi Mɔdikaya le: “Manɛ nna nɛ fo ere maa bɛ kusɔ nɛ ewura nase n sa anyi na so?” 4Saŋkama nɛ b baŋ kaŋɛ Mɔdikaya fanɛ e jɔŋɛ Heman ase, e bee kini nna nseŋ kaŋɛ fanɛ mo ere la Juw be esa nna, amoso e maaŋ jɔŋɛ Heman ase. Ndoŋ nna nɛ b kaŋɛ Heman kumo be asheŋ nsaa keni ŋko e beeŋ yige Mɔdikaya ŋkpal e ka la Juw so.

5Heman ka pin fanɛ Mɔdikaya kini kejɔŋɛ mo ase ŋko m bunyaŋ mo, nɛ e nya agbo ga. 6E ka pin fanɛ Mɔdikaya la Juw be esa nna nɛ e yili kumo fanɛ e maaŋ tɔrɔ Mɔdikaya nawule, nsaa kre nia fanɛ e beeŋ mɔ Juw kama nɛ e wɔ Ewura Sɛgsis be efuli so. 7Ewura Sɛgsis ka ji kuwura be kafɛ kuduanyɔsopo be kufɔl sososo nɛ baa tre Nisan na to, nɛ Heman shin nɛ b to beri a fin kachɛ nɛ k daga fanɛ e wora kusɔ nɛ e bee kre na. Nɛ beri na ya tɔr kufɔl kuduanyɔsopo nɛ baa tre Ada na be nchɛ kuduasa. 8Ndoŋ nna nɛ Heman kaŋɛ ewura Sɛgsis le: “Yiri ko ebi salga to m bɔlɔ fo efuli ere kikɛ so. Bumo alɛ be daŋkare kɔr basa kama peya to. B maa bɛ efuli ere be mbra gba so, amoso m baa nyi geeŋ fanɛ nɛ fo yige bumo, k maaŋ chɛ fo to. 9Nɛ k par fo, kumo ere, Yiramu, fo nase mbra fanɛ bumo kikɛ daga kemɔ. Nɛ fo shuli so n wora loŋ, ma alɛ beeŋ wora ania n fin amansherbi damta n wɔtɔ ewurkpa be amansherbi be kɔlgu na to nɛ ekrachi nɛ b wɔ ewurkpa na e ta amo n shuŋ.” 10Ndoŋ nna nɛ ewura na lara mbe kepinibi nɛ e kɔ a dulgi mbe nwɔl sibɛ so na n sa Hammedaata pibinyɛn Heman nɛ e la Juwebi bumo doŋ na 11nseŋ kaŋɛ mo le: “Basa na nɛ bumo be amansherbi kikɛ la fo peya nna; amoso wora bumo kusɔ kama nɛ k par fo.” 12Amoso kufɔl sososo na to be kachɛ kuduasasopo na nɛ Heman tre ewura na be nwɔlsibɛpoana na ŋ kaŋɛ bumo fanɛ b kilgi mbe mbra nɛ e nase na n wɔtɔ bumo be efuli na so be ŋgbarana nɛ nsibɛ be yiriana to n chige to n sa bewurbi nɛ benimu nɛ ekrachiana nɛ b wɔ efuli na so na kikɛ. Ewura Sɛgsis be ketre so nɛ b daŋ bɔla n sibɛ nwɔl na nseŋ ta mbe kepinibi n dulgi amo. 13Mbɔ nɛ b kɔ eleŋ a shile ga na, nɛ b ta nwɔl na n shuŋi fanɛ b chige efuli na so kikɛ. Kusɔ nɛ kawɔl na bee kaŋɛ e la fanɛ b mɔ Juwebi na kikɛ kufɔl kuduanyɔsopo nɛ baa tre Ada na be kachɛ kuduasasopo na to. Kawɔl na bee ŋini fanɛ b mɔ mbia nɛ benimu nɛ beche nɛ mbiwurbi kikɛ kumo be kamɔnchɛ na nseŋ muu bumo be asɔ nɛ b kɔ kikɛ. 14A daga fanɛ b yili jimaŋ to ŋ kraŋ kusɔ nɛ k wɔ kawɔl na to n sa efuli na so be kaba kama so ebi kikɛ. Saŋɛ na so ekama beeŋ bela ase a jo kumo be kachɛ. 15Ewura Sɛgsis e daŋ shin nɛ b yili jimaŋ to n wora mbra na manaŋ manaŋ ashi Susa be kade to. Ewura na nɛ Heman daŋ chena nna a nuu nsa, nɛ Susa be kade to ebi malɛ be nfɛra bee baga bumo to ŋkpal mbra na so.

Currently Selected:

Ɛsta 3: GJNb

Highlight

Copy