Kaŋinichiŋgeliŋ 8

1Enyiashempo nawule e kɔ nfɛra a pin asheŋ be afito to. Kanyiasheŋ e naa sa mo kagbenefuli nsaa shin nɛ e bee mushe.

Kebaanu a sa ewura be asheŋ

2Fo baŋ nase kɔnɔ Ebɔrɛ be anishito fanɛ feeŋ baa nu a sa ewura, kumo ere a daga fanɛ fo baa wora loŋ. 3Sa maa kuse a lar ewura be anishito ŋko a ji mo emɔrɔ ŋkpal manɛ so e beeŋ tiŋ n wora kusɔ kama nɛ e bee sha. 4Ewura be kamalga du fanɛ b ka nase mbra nna, amoso esa kama maaŋ tiŋ n ji mbe kamalga emɔrɔ. 5Fo baa nu a sa ewura, asheŋ maa pɔɔ fo so. Enyiashempo malɛ kikɛ nyi kananɛ daga fanɛ e nu n sa ewura nɛ saŋɛ nɛ k daga e ka wora loŋ. 6Kebaawɔtɔ du kpakpa, ama kusɔ kama kɔ kumo be saŋɛ nɛ kakpa nɛ k daga k ka wora. 7Ŋkpal manɛ so, esa kikɛ maaŋ tiŋ m pin kusɔ nɛ k beeŋ wora echefoso. Esa kama malɛ maŋ wɔtɔ nɛ e kaŋɛ mo. 8Esa kama maŋ kɔ eleŋ luwu so ŋko nɛ e tiŋ n chɛrga mbe kaluwuachɛ. Luwu la kena nɛ esa kama maaŋ tiŋ n shile kumo nna, loŋ koŋwule na e la esa nɛ e bee wora alubi. Mbe alubi beeŋ ba dii efuli kachɛ ko.

Kumukpakpasowura nɛ esa nɛ e niŋi be asheŋ

9N wu kananɛ asheŋ bee nite durnya ere to kikɛ, beko bee tɔrɔ bumo braana nna ŋkpal b ka kɔ eleŋ a chɔ bumo so. 10N wu amukpakpaso wuraana ka wu nɛ b puli bumo bunyaŋ so, ama Ebɔrɛ bre be basa ka lar kade cheembi na to, epul to nɛ b teŋ bumo so. Kanyiasheŋ maŋ wɔ ade be kekama to. 11Kulubi be kasogberge baa maa ba manaŋ manaŋ, k bee shin nɛ basa be ŋgbene bee laŋɛ kulubi be kewora so nna. 12Kumukpakpasowura beeŋ tiŋ n wora alubi kalfa nseŋ kraŋ ji efute n chɛr, ama n nyi fanɛ asheŋ beeŋ nite nɛnɛ n sa esa nɛ e bee ŋana Ebɔrɛ nsaa wora mo kasonu na. 13Ama ŋkpal kumukpakpasowuraana ka maa ŋana Ebɔrɛ nsaa maa wora mo kasonu so, asheŋ maaŋ nite nɛnɛ n sa bumo; bumo alɛ be nchɛ maaŋ teŋi so fanɛ kiyoyul nɛ k maa yili kakpa koŋwule a chɛr na.

14Kusɔ ko nɛ kumo be kepin to du kpakpa kraa wora kasawule so. Kumo e la fanɛ basa niŋiso ka bee nya kasogberge nɛ k daga kumukpakpasowuraana, nɛ kumukpakpasowuraana bee nya kemaŋkura nɛ k daga basa niŋiso. Ma ere kutɔ kede gba maŋ kɔ kifito. 15Ma ere so an baa ji anyi be amu, ŋkpal manɛ so, anyi be kebaawɔtɔ to be kagbenefuli kikɛ baa wɔ kebaaji a nuu nsaa ji eyur to nna. Kusɔ nɛ anyeeŋ tiŋ n wora kikɛ ashi kegben kama nɛ anyee gben kebaawɔtɔ nɛ Ebɔrɛ sa anyi durnya ere to e baa la na.

16Kapa nɛ kanyɛ mee gal edi nna a wora ania nɛ m pin kusɔ nɛ k bee wora durnya ere to. 17Ndoŋ nna nɛ n wu kusɔ kama nɛ Ebɔrɛ wora nseŋ pin to fanɛ esa kikɛ maaŋ tiŋ m pin asheŋ nɛ a bee wora ere to. Dimɛdi wora ania kanaŋkama, e maaŋ tiŋ m pin amo be afito. Hale enyiashempo kaŋɛ fanɛ e nyi asheŋ kanaŋkama gba, e maaŋ tiŋ m pin amo to.

Currently Selected:

Kaŋinichiŋgeliŋ 8: GJNb

Highlight

Compare

Copy