Danɛl 5
5
Bɛlshaaza be kejigboŋ be asheŋ
1Kumo be kaman nɛ ewura Bɛlshaaza malɛ ki Babilɔn be ewura. Kachako nɛ e wora kejigboŋ n tre mbe bewurbi, nɛ mo nɛ bumo kikɛ chena a nuu nsa. 2Saŋɛ nɛ baa nuu nsa na, nɛ Bɛlshaaza ponte ŋ kaŋɛ fanɛ b ya ta shuwa nɛ gbiti be asɔnuunchu nɛ ntishaŋ nɛ mo tuto Nebukadneeza ta ashi Jerusalɛm be bɔrɛlambu to m ba na m ba, saŋɛ na so mo nɛ mbe bewurbi nɛ mbe beche nɛ mo jipoana beeŋ ta amo n nuu nsa. 3Epul to nɛ b ya bar shuwa be asɔnuunchu nɛ ntishaŋ na, nɛ bumo kikɛ ta amo n nuu nsa, 4nsaa di bumo be agbir nɛ b ta shuwa nɛ gbiti nɛ danyaŋ nɛ abɛlso nɛ ndibi nɛ ajembu n lɔŋɛ na epaŋ. 5Epul to nɛ dimɛdi be enɔ lar m ba kaa sibɛ kusɔ ko a deŋi ewura be lambu na be egbal na be kakpa nɛ b la nɛ efitila bee fulto a yuu kumo so na so. Ewura na gbagba daŋ wu enɔ na ka bee sibɛ. 6Nɛ kufu pɛ mo alegaiso nɛ mbe anishito ki foleebi nɛ mbe amuli kikɛ fara a chicha nɛ e niŋi to ŋ gben. 7Nɛ e ponte n shuŋi n tre ŋkilgiwuraana nɛ begba nɛ benyiashempoana. B ka ba na, nɛ ewura na kaŋɛ bumo le: “Ekama nɛ e tiŋ ŋ kraŋ kasibɛ ere nseŋ kaŋɛ ma kumo be kifito, meeŋ shin nɛ b ta awurpiŋi peper kunɔkunɔ m mɛa mo to nseŋ ta shuwa be jaagba n di mbe kubɔ to nɛ e ki esa nɛ e bɛ ma so esasopo ashi ma kuwura to.” 8Nɛ Ewura na be benyiashempo na kikɛ lar m ba kraŋ kasibɛ na ŋ gben. Amoso b maŋ tiŋ m pin kumo be kifito. 9Nɛ ewura Bɛlshaaza be kagbene naŋ jija mo ga n ti so nɛ mbe anishito ki foleebi nɛ mo kikɛ kilgi n fuli. Mbe bewurbi gba maŋ naa nyi kusɔ nɛ baaŋ wora. 10Ewurche na ka nu ewura nɛ mbe beyaasepo ka bee cha awɔr nɛ e yɔ kakpa nɛ baa wora kejigboŋ na n ya kaŋɛ ewura na le: “Yiramu, Ebɔrɛ e teŋi fo kuwurji ere so! Jande sa maŋ shin nɛ fo kagbene a jija fo nɛ fo baa foleeto loŋ. 11Kanyɛn ko wɔ fo kasawule ere so a kɔ agbir cheembi na be kiyoyu mo to. Saŋɛ nɛ fo tuto daa la ewura na, nɛ loŋ be kanyɛn na ŋini fanɛ e kɔ kenyi nɛ nfɛra nɛ kanyiasheŋ fanɛ kananɛ agbirana na kɔ na. Ndoŋ nna nɛ fo tuto ewura Nebukadneeza shin nɛ e ki belejipoana nɛ begba nɛ benyiashempoana kikɛ be ewura. 12E kɔ kenyi nɛ nfɛra ga nsaa kɔ kanyiasheŋ a tiŋ a kute edareana be afito, nsaa sa asheŋ bishiso kpakpaso gba be atuwebi. E bee tiŋ a bugi alemaŋkarsheŋ be ewulo to. Amoso shuŋi n tre le be kanyɛn ere. Mo e la Danɛl nɛ ewura na daŋ sa mo ketre Bɛlteshaaza na. E beeŋ kaŋɛ fo le be asheŋ ere kikɛ be afito.”
Danɛl ka kute edare na be kifito be asheŋ
13Ndoŋ nna nɛ b bar Danɛl ewura na be anishito epul na to nɛ ewura na bishi mo le: “Fo e la Danɛl nɛ fo la Juwebi b basa nɛ b pɛ kena to nɛ n tuto keta n shi Juda m ba na be eko na a? 14N nu fanɛ agbir cheembiana na be kiyoyu wɔ fo to, nɛ fee tiŋ a wora asheŋ manaŋ manaŋ nseŋ naa kɔ nfɛra nɛ kanyiasheŋ. 15B daŋ bar benyiashempo nɛ ŋkilgiwuraana kikɛ nna fanɛ b ba kraŋ kasibɛ ere nseŋ kute kumo be kifito n sa ma, ama b maŋ tiŋ m pin kumo be kifito ŋ kute. 16Naniere nɛ n nu fanɛ fee tiŋ a pin ewulosheŋ to nsaa tiŋ a bugi alemaŋkarsheŋ be ewulo to. Fo baaŋ tiŋ ŋ kraŋ kasibɛ ere nseŋ kaŋɛ ma kumo be kifito, meeŋ shin nɛ b ta awurpiŋi peper kunɔkunɔ m mɛa fo to nseŋ ta shuwa be jaagba n di fo kubɔ to, nɛ fo ki esa nɛ e bɛ ma so esasopo ashi ma kuwura to.” 17Ndoŋ nna nɛ Danɛl kaŋɛ le: “Yiramu, meeŋ kraŋ kasibɛ na nseŋ kaŋɛ fo kumo be kifito, ama baa kɔ fo ŋkɛ. Feeŋ tiŋ n ta amo ŋ kɛ esa ko. 18Enyɛnpetale Ebɔrɛ na so nɛ fo tuto Nebukadneeza ki ewurgboŋ nseŋ nya bunyaŋ nɛ kemankuragboŋ. 19E daŋ ji eleŋ ga nɛ efuli kama so ebi nɛ yiri kikɛ daa ŋana mo ga. E baaŋ kaŋɛ fanɛ b mɔ esa, baa mɔ mo nna. Mo alɛ naŋ kaŋɛ fanɛ b shin nɛ esa e ji efute e bee ji efute nna. E beeŋ tiŋ n shin nɛ esa e nya bunyaŋ ŋko ŋaba. 20Ama ŋkpal e ka maa wu kuwɔr nsaa kɔ kumu kpakpaso nɛ kamoowu nɛ ŋkpensheŋ so, b daŋ gboŋi mo kuwura nna nɛ e paŋ mbe bunyaŋ be eyilikpa. 21Mbe nfɛra daŋ ba ki fanɛ kusɔbɔya peya nna nɛ b ju mo n lar edimɛdi to. Mo nɛ kupuŋ to be ekurma e daa wɔtɔ, nɛ e daa we afitiri fanɛ kena nsaa dese kowu nɛ bunyaŋ bee tɔr mo so ŋkpal shɛŋ shɛŋ ka maŋ buu mo so so. Nɛ e wu fanɛ Enyɛnpetale Ebɔrɛ na kɔ eleŋ dimɛdi be kuwurji kikɛ so, nsaa kɔ ekpa nɛ e ta kuwurji na n sa esa kama nɛ e bee sha.
22Fo mo pibinyɛn, Bɛlshaaza ere nyi asheŋ ere kikɛ nseŋ kini kebar fo kumu kaseto. 23Fo wora n da Enyɛnpe Ebɔrɛ nɛ e wɔ ebɔrɛso na so nna, ŋkpal fo ka ta shuwa be asɔnuunchu nɛ ntishaŋ nɛ fo tuto ta ashi Ebɔrɛ be bɔrɛlambu nɛ k wɔ Jerusalɛm na to nɛ fo nɛ bewurbiana nɛ fo beche, nɛ fo jipoana kikɛ ta amo a nuu nsa nsaa di agbirana nɛ b ta shuwa nɛ gbiti nɛ danyaŋ nɛ abɛlso, nɛ ndibi nɛ ajembu n lɔŋɛ na epaŋ so. Le be agbir ere maa wu ŋko a nu, amo alɛ maŋ nyi shɛŋ. Ama fo kini kebunyaŋ Ebɔrɛ nɛ kusɔ kama bɔɔ mo enɔ nɛ e kɔ eleŋ nɛ e tiŋ n shin nɛ fo ji efute ŋko n wu na bre. 24Amoso nɛ Ebɔrɛ shuŋi enɔ na fanɛ k sibɛ le be mmalga ere egbal so na. 25Kusɔ nɛ enɔ na daŋ sibɛ na nde: ‘Lamba, Lamba, nɛ egbɛ nɛ kebarga to.’ 26Kumo be kifito malɛ nde: Lamba na bee ŋini nna fanɛ, Ebɔrɛ karga nchɛ nɛ feeŋ ji kuwura ere nna m ba fo kumo be ekar. 27Egbɛ, na malɛ be kifito bee ŋini nna fanɛ b ta fo aworbi m ber Ebɔrɛ be alelasheŋ n wu fanɛ fo aworbi maŋ walɛ kuraa. 28Kebarga to na malɛ bee ŋini nna fanɛ b barga fo kuwurji na to n sa Mɛdiebi nɛ Pɛshiyaebi.” 29Epul na to nɛ ewura Bɛlshaaza ponte ŋ kaŋɛ mbe nyɛrbi fanɛ b ta awurpiŋi peper kunɔkunɔ m ba mɛa Danɛl to, nseŋ ta shuwa be jaagba n di mbe kubɔto. Nseŋ ta mo ŋ ki esa sasopo nɛ e bɛ mo so ashi mbe kuwura to. 30Loŋ be kanyɛso gbagba nɛ b mɔ Babilɔn be ewura Bɛlshaaza na. 31Ndoŋ nna nɛ Dairus nɛ e shi Mɛdi be efuli so nseŋ ji nfɛ adeshe nɛ anyɔ na ki Babilɔn be ewura.
Currently Selected:
Danɛl 5: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
Danɛl 5
5
Bɛlshaaza be kejigboŋ be asheŋ
1Kumo be kaman nɛ ewura Bɛlshaaza malɛ ki Babilɔn be ewura. Kachako nɛ e wora kejigboŋ n tre mbe bewurbi, nɛ mo nɛ bumo kikɛ chena a nuu nsa. 2Saŋɛ nɛ baa nuu nsa na, nɛ Bɛlshaaza ponte ŋ kaŋɛ fanɛ b ya ta shuwa nɛ gbiti be asɔnuunchu nɛ ntishaŋ nɛ mo tuto Nebukadneeza ta ashi Jerusalɛm be bɔrɛlambu to m ba na m ba, saŋɛ na so mo nɛ mbe bewurbi nɛ mbe beche nɛ mo jipoana beeŋ ta amo n nuu nsa. 3Epul to nɛ b ya bar shuwa be asɔnuunchu nɛ ntishaŋ na, nɛ bumo kikɛ ta amo n nuu nsa, 4nsaa di bumo be agbir nɛ b ta shuwa nɛ gbiti nɛ danyaŋ nɛ abɛlso nɛ ndibi nɛ ajembu n lɔŋɛ na epaŋ. 5Epul to nɛ dimɛdi be enɔ lar m ba kaa sibɛ kusɔ ko a deŋi ewura be lambu na be egbal na be kakpa nɛ b la nɛ efitila bee fulto a yuu kumo so na so. Ewura na gbagba daŋ wu enɔ na ka bee sibɛ. 6Nɛ kufu pɛ mo alegaiso nɛ mbe anishito ki foleebi nɛ mbe amuli kikɛ fara a chicha nɛ e niŋi to ŋ gben. 7Nɛ e ponte n shuŋi n tre ŋkilgiwuraana nɛ begba nɛ benyiashempoana. B ka ba na, nɛ ewura na kaŋɛ bumo le: “Ekama nɛ e tiŋ ŋ kraŋ kasibɛ ere nseŋ kaŋɛ ma kumo be kifito, meeŋ shin nɛ b ta awurpiŋi peper kunɔkunɔ m mɛa mo to nseŋ ta shuwa be jaagba n di mbe kubɔ to nɛ e ki esa nɛ e bɛ ma so esasopo ashi ma kuwura to.” 8Nɛ Ewura na be benyiashempo na kikɛ lar m ba kraŋ kasibɛ na ŋ gben. Amoso b maŋ tiŋ m pin kumo be kifito. 9Nɛ ewura Bɛlshaaza be kagbene naŋ jija mo ga n ti so nɛ mbe anishito ki foleebi nɛ mo kikɛ kilgi n fuli. Mbe bewurbi gba maŋ naa nyi kusɔ nɛ baaŋ wora. 10Ewurche na ka nu ewura nɛ mbe beyaasepo ka bee cha awɔr nɛ e yɔ kakpa nɛ baa wora kejigboŋ na n ya kaŋɛ ewura na le: “Yiramu, Ebɔrɛ e teŋi fo kuwurji ere so! Jande sa maŋ shin nɛ fo kagbene a jija fo nɛ fo baa foleeto loŋ. 11Kanyɛn ko wɔ fo kasawule ere so a kɔ agbir cheembi na be kiyoyu mo to. Saŋɛ nɛ fo tuto daa la ewura na, nɛ loŋ be kanyɛn na ŋini fanɛ e kɔ kenyi nɛ nfɛra nɛ kanyiasheŋ fanɛ kananɛ agbirana na kɔ na. Ndoŋ nna nɛ fo tuto ewura Nebukadneeza shin nɛ e ki belejipoana nɛ begba nɛ benyiashempoana kikɛ be ewura. 12E kɔ kenyi nɛ nfɛra ga nsaa kɔ kanyiasheŋ a tiŋ a kute edareana be afito, nsaa sa asheŋ bishiso kpakpaso gba be atuwebi. E bee tiŋ a bugi alemaŋkarsheŋ be ewulo to. Amoso shuŋi n tre le be kanyɛn ere. Mo e la Danɛl nɛ ewura na daŋ sa mo ketre Bɛlteshaaza na. E beeŋ kaŋɛ fo le be asheŋ ere kikɛ be afito.”
Danɛl ka kute edare na be kifito be asheŋ
13Ndoŋ nna nɛ b bar Danɛl ewura na be anishito epul na to nɛ ewura na bishi mo le: “Fo e la Danɛl nɛ fo la Juwebi b basa nɛ b pɛ kena to nɛ n tuto keta n shi Juda m ba na be eko na a? 14N nu fanɛ agbir cheembiana na be kiyoyu wɔ fo to, nɛ fee tiŋ a wora asheŋ manaŋ manaŋ nseŋ naa kɔ nfɛra nɛ kanyiasheŋ. 15B daŋ bar benyiashempo nɛ ŋkilgiwuraana kikɛ nna fanɛ b ba kraŋ kasibɛ ere nseŋ kute kumo be kifito n sa ma, ama b maŋ tiŋ m pin kumo be kifito ŋ kute. 16Naniere nɛ n nu fanɛ fee tiŋ a pin ewulosheŋ to nsaa tiŋ a bugi alemaŋkarsheŋ be ewulo to. Fo baaŋ tiŋ ŋ kraŋ kasibɛ ere nseŋ kaŋɛ ma kumo be kifito, meeŋ shin nɛ b ta awurpiŋi peper kunɔkunɔ m mɛa fo to nseŋ ta shuwa be jaagba n di fo kubɔ to, nɛ fo ki esa nɛ e bɛ ma so esasopo ashi ma kuwura to.” 17Ndoŋ nna nɛ Danɛl kaŋɛ le: “Yiramu, meeŋ kraŋ kasibɛ na nseŋ kaŋɛ fo kumo be kifito, ama baa kɔ fo ŋkɛ. Feeŋ tiŋ n ta amo ŋ kɛ esa ko. 18Enyɛnpetale Ebɔrɛ na so nɛ fo tuto Nebukadneeza ki ewurgboŋ nseŋ nya bunyaŋ nɛ kemankuragboŋ. 19E daŋ ji eleŋ ga nɛ efuli kama so ebi nɛ yiri kikɛ daa ŋana mo ga. E baaŋ kaŋɛ fanɛ b mɔ esa, baa mɔ mo nna. Mo alɛ naŋ kaŋɛ fanɛ b shin nɛ esa e ji efute e bee ji efute nna. E beeŋ tiŋ n shin nɛ esa e nya bunyaŋ ŋko ŋaba. 20Ama ŋkpal e ka maa wu kuwɔr nsaa kɔ kumu kpakpaso nɛ kamoowu nɛ ŋkpensheŋ so, b daŋ gboŋi mo kuwura nna nɛ e paŋ mbe bunyaŋ be eyilikpa. 21Mbe nfɛra daŋ ba ki fanɛ kusɔbɔya peya nna nɛ b ju mo n lar edimɛdi to. Mo nɛ kupuŋ to be ekurma e daa wɔtɔ, nɛ e daa we afitiri fanɛ kena nsaa dese kowu nɛ bunyaŋ bee tɔr mo so ŋkpal shɛŋ shɛŋ ka maŋ buu mo so so. Nɛ e wu fanɛ Enyɛnpetale Ebɔrɛ na kɔ eleŋ dimɛdi be kuwurji kikɛ so, nsaa kɔ ekpa nɛ e ta kuwurji na n sa esa kama nɛ e bee sha.
22Fo mo pibinyɛn, Bɛlshaaza ere nyi asheŋ ere kikɛ nseŋ kini kebar fo kumu kaseto. 23Fo wora n da Enyɛnpe Ebɔrɛ nɛ e wɔ ebɔrɛso na so nna, ŋkpal fo ka ta shuwa be asɔnuunchu nɛ ntishaŋ nɛ fo tuto ta ashi Ebɔrɛ be bɔrɛlambu nɛ k wɔ Jerusalɛm na to nɛ fo nɛ bewurbiana nɛ fo beche, nɛ fo jipoana kikɛ ta amo a nuu nsa nsaa di agbirana nɛ b ta shuwa nɛ gbiti nɛ danyaŋ nɛ abɛlso, nɛ ndibi nɛ ajembu n lɔŋɛ na epaŋ so. Le be agbir ere maa wu ŋko a nu, amo alɛ maŋ nyi shɛŋ. Ama fo kini kebunyaŋ Ebɔrɛ nɛ kusɔ kama bɔɔ mo enɔ nɛ e kɔ eleŋ nɛ e tiŋ n shin nɛ fo ji efute ŋko n wu na bre. 24Amoso nɛ Ebɔrɛ shuŋi enɔ na fanɛ k sibɛ le be mmalga ere egbal so na. 25Kusɔ nɛ enɔ na daŋ sibɛ na nde: ‘Lamba, Lamba, nɛ egbɛ nɛ kebarga to.’ 26Kumo be kifito malɛ nde: Lamba na bee ŋini nna fanɛ, Ebɔrɛ karga nchɛ nɛ feeŋ ji kuwura ere nna m ba fo kumo be ekar. 27Egbɛ, na malɛ be kifito bee ŋini nna fanɛ b ta fo aworbi m ber Ebɔrɛ be alelasheŋ n wu fanɛ fo aworbi maŋ walɛ kuraa. 28Kebarga to na malɛ bee ŋini nna fanɛ b barga fo kuwurji na to n sa Mɛdiebi nɛ Pɛshiyaebi.” 29Epul na to nɛ ewura Bɛlshaaza ponte ŋ kaŋɛ mbe nyɛrbi fanɛ b ta awurpiŋi peper kunɔkunɔ m ba mɛa Danɛl to, nseŋ ta shuwa be jaagba n di mbe kubɔto. Nseŋ ta mo ŋ ki esa sasopo nɛ e bɛ mo so ashi mbe kuwura to. 30Loŋ be kanyɛso gbagba nɛ b mɔ Babilɔn be ewura Bɛlshaaza na. 31Ndoŋ nna nɛ Dairus nɛ e shi Mɛdi be efuli so nseŋ ji nfɛ adeshe nɛ anyɔ na ki Babilɔn be ewura.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation