Ashuŋ Shunso 6

Bechɛtopo ashunu na be asheŋ

1Saŋko kananɛ bebɛsopoana na daŋ baa wora keshi a ti so na nɛ kɔnɔgberge tɔr Juwebi nɛ b daa malga Griik to na nɛ bumo nɛ b daa la ndetobia gbagba na so. Juwebi nɛ b daa malga Griik to na e daa kaŋɛ fanɛ bumo na daa gal bumo be bekulpocheana nna a lɛ a maa sa bumo karechɛ kama be kasɔchige be kechɛto na. 2Nɛ beshuŋipo kuduanyɔ na tre bebɛsopoana na kikɛ nyam m ba kaŋɛ bumo: “A maŋ daga an ka yige kebaabɔ Ebɔrɛ be kubɔya na nsaa wɔtɔ a wora keji be kasɔchige be asheŋ. 3Amoso, bekurgepoana, men lara menyi to be basa ashunu nɛ ekama nyi Kiyoyu Cheeŋ na nɛ kanyiasheŋ ka bɔlɔ bumo to nɛ an shin nɛ b baa keni le be kushuŋ na so 4nɛ anyi alɛ e baa wɔ kabɔrɛkule kpakpaso to nseŋ naa bɔ kubɔya na.” 5Kusɔ nɛ beshuŋipo na daŋ kaŋɛ na daŋ par beyirdapoana na kikɛ ga nɛ b lara Stiven. E daa la esa nɛ yirda nɛ Kiyoyu Cheeŋ na daŋ bɔlɔ mo to nna. B daŋ lara Filip nɛ Prɔkɔres nɛ Nikeenɔɔ nɛ Taimɔn nɛ Paamɛnas nɛ Nikolaws nɛ e daŋ shi Antiɔk n daa la kanyamase nseŋ daŋ ba tuba a bɛ Juwebi be kabɔrɛbɛso so pɔɛŋ m ba ki eyirdapo na. 6Bumo nɛ beyirdapoana na daŋ lara m bɔɔ beshuŋipo na enɔ nɛ b ta bumo be enɔana n deŋi n deŋi bumo nɛ b lara na so ŋ kule Ebɔrɛ n sa bumo.

7Ebɔrɛ be kubɔya daŋ baa sɔ kakpa kikɛ nna nɛ Jerusalɛm be bebɛsopoana baa wora keshi a ti so nɛ bɔrɛmatapoana na be bedamta ba yirda.

8Stiven daa la esa nɛ Ebɔrɛ daŋ nɛfa nna ga nɛ Kiyoyu Cheeŋ na luri m bɔlɔ mo kikɛ to nɛ e wora emamachisheŋ nɛ kashenteŋ be etɔɔnɛsheŋ damta basa na to. 9Ama nshɛrbu nɛ b daa tre “Basa nɛ b sɔ bumo be amu n yige be Nshɛrbu na” to ebi be beko daŋ ba ji Stiven emɔrɔ. Bumo be beko daŋ shi Sairini nɛ Alɛkzaandria nna. Bumo nɛ Silisia nɛ Eeshia be Juwebi ko e daŋ ba fara a ji Stiven emɔrɔ. 10Ama b daa maŋ tiŋ n ji m bri mo ŋkpal eleŋgboŋ nɛ Kiyoyu Cheeŋ na daŋ sa mo nɛ e malga so. 11Nɛ b kpal loŋ so n sa basa ko amansherbi nseŋ we n wɔtɔ bumo fanɛ b kaŋɛ le: “An nu e ka bee malga a da Mosis nɛ Ebɔrɛ so.” 12Le nɛ b daŋ wora n nyaŋɛ basa na nɛ benimuana na nɛ mbraŋinipoana na to nɛ b ba nyaŋ Stiven n yɔ nshɛrwuraana na kutɔ 13nseŋ shin nɛ basa ko ba ku efɛ n deŋi mo ŋ kaŋɛ: “Saŋkama kanyɛn ere bee malga a gbiti anyi be bɔrɛlambu cheembi na nɛ Mosis be mbra nna. 14An nu e ka bee kaŋɛ fanɛ Nazarɛt be Yesu na beeŋ bure bɔrɛlambu na nseŋ chɛrga edaŋkaresheŋ nɛ Mosis sa anyi na kikɛ.” 15Nshɛrwuraana nɛ b daa tase nshɛr na to na kikɛ daŋ ta bumo be anishi nna n yuu Stiven so n wu mbe anishiakpa ka du fanɛ malaika peya.

Currently Selected:

Ashuŋ Shunso 6: GJNb

Highlight

Copy

Compare