Ashuŋ Shunso 2

Kiyoyu Cheeŋ na be asheŋ

1Kachɛgboŋ nɛ baa tre Pɛntekɔst na ka fo nɛ beyirdapoana na kikɛ shɛr kakpa koŋwule. 2Epul to nɛ awɔr shi ebɔrɛso ŋ gbri m ba bɔla ebu nɛ b daa tase to na kikɛ to fanɛ afugboŋ ko na. 3Ndoŋ nna nɛ b wu adonduloŋ fanɛ edɛ be adondulombi nɛ a ba barga to nɛ amo be kekama yɔ beyirdapoana na be ekama so. 4Nɛ Kiyoyu Cheeŋ na ba bɔlɔ bumo kikɛ to nɛ b fara a gbar ŋgbar nɛ bumo gbagba maa nu kanaŋkamaso nɛ Kiyoyu na daŋ shin nɛ b malga.

5Saŋɛ na so nɛ Juwebi nɛ b daa bɔla bumo be daŋkare so a bɛ Ebɔrɛ so na be bedamta shi durnya to kikɛ be efuliana so m ba Jerusalɛm be kade na to. 6B ka nu awɔr na nɛ jimaŋ damta ko shɛr ndoŋ. K daŋ chinchiŋ bumo kikɛ ga ŋkpal bumo be ekama ka nu beyirdapoana na ka bee gbar bumo be ŋgbar so. 7K daŋ wul bumo to nseŋ chinchiŋ bumo ga nɛ b bishi abar: “Mannɛ Galili nɛ basa nɛ baa malga le ere kikɛ shi a? 8Nɛ manɛ e ba nɛ anyi be ekama bee nu basa ere ka bee gbar anyi be efuli so be ŋgbar? 9To, Paatia nɛ Midia nɛ Ilam nɛ Mɛsopoteemia nɛ Judiya nɛ Kapadosia nɛ Pɔntes nɛ Eeshia, 10Frijia nɛ Pamfilia nɛ Ijipt nɛ Libiya be mba nɛ a mata Sairini be efuli so na nɛ an shi. 11Anyi be beko malɛ shi Rom nna a la Juwebi nɛ nnyamase nɛ b tuba a bɛ Juwebi be kabɔrɛbɛso na so na. Anyi be beko malɛ shi Kriit nɛ Areebia nna ŋkeshin nɛ anyi alɛ kikɛ bee nu b ka bee malga anyi be ŋgbarana to a kaŋɛ asheŋgboŋ nɛ Ebɔrɛ wora.” 12K daŋ wul bumo kikɛ to ga nɛ b wɔtɔ a bishi abar: “Kede be kifito e la nuso?” 13Nɛ basa na be beko wora beyirdapoana na eyurto ŋ kaŋɛ: “Basa ere boo nna na.”

Pita be kamalga be asheŋ

14Ndoŋ nna nɛ Pita nɛ beshuŋipo kudukako na niŋi to n yili nɛ Pita fara a kaŋɛ jimaŋ na awɔrso: “M peebi Juwebi nɛ menyi nɛ men wɔ Jerusalɛm to ere kikɛ, men kaŋ kusoe n nu asɔ nɛ a wora na kikɛ be kifito. 15Men sa maa fɛ fanɛ basa ere boo nna. B maŋ boo, ŋkpal manɛ so, chipurso, kerfi akpanu e kraa la nna. 16Ama men baa nyi fanɛ asheŋ nɛ a wora ere be asheŋ nɛ anebi Jowɛl daŋ sibɛ fanɛ Ebɔrɛ kaŋɛ:

17‘Le nɛ meeŋ wora lalaloge be nchɛ na to:

Meeŋ shin nɛ ma Kiyoyu e ba basa kikɛ to.

Menyi be mbrantiɛbi beeŋ ku bɔrɛdareana

nɛ menyi be benyɛnnimu

e ku abɔrɛsheŋ be edareana

nɛ menyi be mbinyɛnbi nɛ mbichebi

e wu abɔrɛsheŋ ŋ kaŋɛ.

18Kashenteŋto, saŋɛ na so meeŋ shin nɛ ma Kiyoyu na

e ba ma nyɛrbi nɛ ma mbita gba kikɛ to

nɛ b wu abɔrɛsheŋ ŋ kaŋɛ.

19Meeŋ wora emamachisheŋ ebɔrɛso

nɛ Ebɔrɛ be asheŋ ŋiniso kasawule so.

Baaŋ wu ŋklaŋ nɛ edɛ nɛ edishi damta.

20Nɛ epeŋi e biri to gbrum,

nɛ kufɔl malɛ e pere to kpaiŋ

fanɛ ŋklaŋ. Amo kikɛ beeŋ wora nna pɔɛŋ

nɛ Enyɛnpe be kachɛgboŋ na e fo.

21Saŋɛ na so ekama nɛ e tre Enyɛnpe na beeŋ nya kumɔlga.’

22Israɛlebi, men nu nfe, Ebɔrɛ ŋini menyi fanɛ Nazarɛt be Yesu na shi mo kutɔ nna, ŋkpal e ka bɔla Yesu na so n wora emamachisheŋ nɛ Ebɔrɛ be etɔɔnɛsheŋ nɛ asheŋ ŋiniso damta menyi be anishito nfe so. Menyi gbagba baa nyi amo be asheŋ. 23Ebɔrɛ gbagba be kasha nɛ kashennyi so nɛ e daŋ yili kumo saŋɛ na kikɛ fanɛ baaŋ ta Yesu m bɔɔ menyi enɔ. Menyi shin nɛ basa lubi gbir mo m mata kedibi largato so m mɔ. 24Ama Ebɔrɛ naŋ shin nɛ e tiŋi luwu na to n sɔ mo luwu be ebesa to n yige, ŋkpal manɛ so, luwu daa maŋ tiŋ n shin nɛ e ka kumo be enɔ to kikɛ.

25Ŋkpal manɛ so le nɛ Deevid daŋ malga mbe asheŋ ŋ kaŋɛ:

‘Mee wu Enyɛnpe saŋkama ma anishito,

ŋkpal manɛ so, e wɔ ma kutɔ nna a chɛ ma to

nɛ basa e sa maŋ tiŋ n tɔrɔ ma.

26Amoso, ma kagbene kikɛ fuli ma nna

nɛ ma mmalga gba la kagbenefuli be mmalga.

Nɛ ma alɛ bomin e tiŋ a kɔ kusɔ

nɛ Ebɔrɛ beeŋ wora n sa ma be tama.

27Ŋkpal manɛ so, fo Ebɔrɛ maaŋ shin

nɛ n wu nɛ ma kiyoyu e yɔ luwu to.

Fo maaŋ shin nɛ fo kenya nɛ e bee bɛ fo so

nɛ kagbene koŋwule e wu m bɛ.

28Fo ŋini ma ekpaana nɛ meeŋ bɔla so n nya Ebɔrɛ be ŋkpa.

Fo alɛ ka wɔ ma kutɔ so, ma kagbene fuli ma ga.’

29Ŋ kurgepoana, men shin nɛ m bugi to ŋ kaŋɛ menyi an nana Deevid be asheŋ. E daŋ wu nna nɛ b puli mo, hale mbre an kraa wu mbe nchaŋ kade ere to. 30E daa la anebi nna a nyi Ebɔrɛ be kɔnɔ nɛ e nase n sa mo fanɛ e beeŋ shin nɛ mo ere Deevid be kanaŋ to ebi be eko e ki ewura fanɛ Deevid gbagba. 31Deevid malɛ ka daa nyi kusɔ nɛ Ebɔrɛ daa sha kewora na so nɛ e daŋ malga Kristo na be ketiŋi luwu to be asheŋ saŋɛ nɛ e daŋ kaŋɛ: ‘Ebɔrɛ daa maŋ shin nɛ e ka luwu to, e daa maŋ shin nɛ e wu m bɛ.’ 32Ebɔrɛ shin nɛ Yesu koŋwule ere tiŋi luwu to nɛ anyi wu kumo be loŋ be kashenteŋ. 33Ebɔrɛ shin nɛ e tiŋi luwu to n ya chena mbe jisoso, ebunyampo be kakpa nseŋ shin nɛ e nya Kiyoyu Cheeŋ nɛ Etuto na nase kɔnɔ fanɛ e beeŋ sa na. Asɔ nɛ menyee wu nsaa nu naniere malɛ kikɛ la mbe kakɛ nna. 34Deevid gbagba daa maŋ yɔ ebɔrɛso fanɛ Yesu, ama le nɛ e daŋ kaŋɛ:

‘Enyɛnpe na kaŋɛ n Nyɛnpe le:

Chena ma jisoso nfe

35hale nɛ n ya ta fo doŋana m bɔɔ fo enɔ.’

36To, menyi, Israɛlebi kikɛ men baa nyi geeŋ fanɛ Yesu koŋwule nɛ men gbir m mata kedibi largato so na nɛ Ebɔrɛ shin nɛ e ki Enyɛnpe nɛ Kristo na.”

37Basa na ka nu asɔ nɛ Pita malga na kikɛ nɛ bumo be ŋgbene kaa nɛ b bishi Pita nɛ mo braana beshuŋipoana na: “An kurgepoana, nuso nɛ anyeeŋ wora?” 38Nɛ Pita kaŋɛ bumo: “Men be ekama e lar mbe alubi to, kumo be kaman nɛ e shin nɛ b bɛr mo kabɔrɛbɛr Yesu Kristo be ketre to nɛ Ebɔrɛ e ta mbe alubi m paŋ mo nseŋ sa mo Kiyoyu Cheeŋ na. 39Ŋkpal manɛ so, kumo be loŋ be kɔnɔ nɛ Enyɛnpe Ebɔrɛ daŋ nase n sa menyi nɛ menyi be mmantoebi nɛ basa pɔtɛ nɛ b maŋ taga to nfe ere na kikɛ, bumo e la bumo nɛ Enyɛnpe Ebɔrɛ bee tre a ba mo kutɔ na.” 40Kesheŋ ere nɛ Pita daŋ kaŋɛ bumo nseŋ ta le be mmalga ŋ kaŋɛ bumo kenishipereso: “Men mɔlga menyi be amu ashi kasogberge nɛ k bee ba le be basa lubi ere so na to.”

41Basa na be bedamta daŋ yirda Pita be kamalga na nɛ b bɛr bumo kabɔrɛbɛr. Kumo be kachɛ na basa fanɛ ŋgboŋ asa e ba ti beyirdapoana na so. 42Bumo nɛ beshuŋipo na e daa la saŋkama nɛ baa koya asɔ ashi beshuŋipo na kutɔ nsaa ba bumo be nshɛrbuana to nɛ bumo kikɛ ba kaa bɔ enɔ kɔnɔkoŋwuleso a wɔtɔ kawie koŋwule to nsaa kule Ebɔrɛ kɔnɔkoŋwuleso.

Beyirdapoana be kebaawɔtɔ be asheŋ

43Beshuŋipoana na daŋ wora emamachisheŋ nɛ Ebɔrɛ be asheŋ ŋiniso damta n shin nɛ ekama kooba kufuso ga. 44Beyirdapoana na kikɛ daŋ baa wɔ abar so nna kɔnɔkoŋwuleso nsaa bar bumo be asɔ kakpa koŋwule m ba kaa chɛ abar to. 45Saŋko baa fa bumo be ekpanjawu to be asɔ nna a ta amo be amansherbi a chige a sa bumo to be ekama kanaŋkamaso nɛ a daga ekama ka nya. 46Karechɛ kama malɛ b daa shɛr bɔrɛlambu na to nna kɔnɔkoŋwuleso nseŋ naa shɛr abarana pe nchɛ nchɛ a ji ajibi kagbenewushiso nɛ kɔnɔkoŋwuleso nsaa di Ebɔrɛ epaŋ. 47Bumo be asheŋ daŋ bɔlɔ kade na to ebi kikɛ kenishi ga. Karechɛ kama malɛ Enyɛnpe Yesu daa mɔlga basa pɔtɛ nna a ti bumo so.

Currently Selected:

Ashuŋ Shunso 2: GJNb

Highlight

Copy

Compare