1 Kɔrintebi 1

1Kawɔl ere shi ma Pɔɔl nɛ Ebɔrɛ kpal mo gbagba be keparso n tre ma fanɛ m ba ki Kristo Yesu be eshumpo na nɛ an kurgepo Sɔstenis kutɔ nna a yɔ Ebɔrɛ be asɔriebi nɛ b wɔ Kɔrint be kade to na kutɔ. 2Bumo e la basa nɛ Ebɔrɛ lara fanɛ b ba kaa la mbe basa a wɔ Kristo Yesu to na. Bumo koŋwule na nɛ basa kama nɛ b wɔ kaplɛkama a ti an Nyɛnpe Yesu Kristo be ketre na, mo e la bumo Nyɛnpe nɛ an Nyɛnpe na nɛ b tre nɛ b ba kaa la basa cheembi a wɔtɔ. 3Kuwɔr be kakɛ nɛ kagbenewushi mo nɛ a shi an Tuto kutɔ nɛ Enyɛnpe Yesu Kristo kutɔ na e baa wɔ menyi kutɔ.

Pɔɔl ka bee chɔrɔ Ebɔrɛ ŋkpal basa be yirda so be asheŋ

4Saŋkikɛ mee chɔrɔ Ebɔrɛ nna ŋkpal mbe kuwɔr be kakɛ mo nɛ e bɔla Kristo Yesu so n wu menyi na so. 5Ŋkpal manɛ so, mo so nɛ men bɔla n nya nɛfa ashi ekpa kama so a tiŋ a malga mbe mmalga nsaa nya kanyiasheŋ damta. 6Kristo be asheŋ nɛ an daŋ ji amo be shɛda na bɔlɔ menyi to naniere, 7ŋkpal manɛ so, naniere men ka bee jo saŋɛ nɛ baaŋ lara an Nyɛnpe Yesu Kristo ŋ ŋini ere, Kiyoyu to be kakɛ maŋ naa wɔtɔ nɛ menyee paŋ kumo menyi to. 8E beeŋ baa wɔtɔ menyi eleŋ to loŋ n ya fo lalaloge na, saŋɛ na so menyeeŋ ji n lar ashi Ebɔrɛ be anishito saŋɛ nɛ an Nyɛnpe Yesu Kristo beeŋ naŋ ba na. 9Ebɔrɛ mo nɛ e tre menyi fanɛ menyi nɛ mo Pibinyɛn Yesu Kristo an Nyɛnpe e baa kɔ kebaawɔtɔ koŋwule na la esa nɛ esa beeŋ tiŋ n yirda nna.

Asɔri na to be kebargato be asheŋ

10Ŋ kurgepoana, mee ta an Nyɛnpe Yesu Kristo be ketre nna a kule menyi fanɛ men kikɛ e baa kɔ kɔnɔkoŋwule a wɔ abar so, saŋɛ na so kebarga to kikɛ maaŋ baa wɔ menyi to. Men baa kɔ nfɛra koŋwule nsaa wora asheŋ ekpa koŋwuleso. 11Ŋkpal manɛ so, ŋ kurgepoana, basa ko ashi Klowe pe bugi to ŋ kaŋɛ ma fanɛ menyi to be beko wɔtɔ nna a kɔ abar nlu. 12Kusɔ nɛ mee ber e la fanɛ men wɔtɔ nna a kaŋɛ abar le: “Pɔɔl nɛ ma ere bɛ so,” nɛ ede kaŋɛ: “Apɔlɔs nɛ ma ere bɛ so,” nɛ ede malɛ e kaŋɛ: “Sifas nɛ ma ere bɛ so,” nɛ eko malɛ e kaŋɛ: “Kristo nɛ ma ere bɛ so.” 13B barga Kristo to nna a mɔ Pɔɔl kedibi largato so nna n sa menyi a? Ŋko b bɛr menyi kabɔrɛbɛr nna ashi Pɔɔl be ketre to a? Ayai, loŋ be asheŋ ere kikɛ maŋ wora. 14K par ma ga fanɛ ŋ ka maŋ bɛr men be ekama kabɔrɛbɛr she Krispes nɛ Gayes nawule, 15saŋɛ na so, men be ekama maaŋ tiŋ ŋ kaŋɛ fanɛ ma ketre to nɛ b bɛr mo kabɔrɛbɛr. 16N nyiŋi fanɛ ŋ ka bɛr Stɛfanas nɛ mbe kowu to ebi gba, ama bede be buushi m maŋ naŋ nyiŋi ŋ ka bɛr esa kama kabɔrɛbɛr n naŋ ti so. 17Ŋkpal manɛ so, Kristo maŋ shuŋi ma nna fanɛ m ba kaa bɛr basa kabɔrɛbɛr, e shuŋi ma nna fanɛ m ba kaa bɔ baru lela na a sa basa. Kumo alɛ maŋ la fanɛ m ba ta dimɛdi be kamalganyi be mmalga nna n wora loŋ, nɛ mannɛ aloŋ, Kristo be luwu nɛ e wu kedibi largato so na beeŋ paŋ kumo be eleŋ na.

Kristo ka la Ebɔrɛ be eleŋ nɛ mbe kanyiasheŋ be asheŋ

18Ŋkpal manɛ so, luwu mo nɛ Kristo wu kedibi largato so be kubɔya na la kawulisheŋ nna n sa basa nɛ b wɔ kemur be ekpa to na. Ama anyi nɛ an wɔ kumɔlga be ekpa to ere bre, loŋ be kubɔya na la Ebɔrɛ be eleŋ nna. 19Ŋkpal manɛ so, abɔrɛsibɛ na bee kaŋɛ fanɛ Ebɔrɛ bee kaŋɛ fanɛ:

“Meeŋ jija benyiashempo be kanyiasheŋ

nseŋ ta benyiashempo be kenyi ŋ ki jiga.”

20To, nɛ kenya la loŋ, nnɛ nɛ benyiashempo ŋko nwɔlnyipoana ŋko durnya ere to be kanyiashenfinpowuraana naa yil? Ebɔrɛ maŋ ŋini fanɛ durnya ere to be kanyiasheŋ la kawulisheŋ nna a? 21Ebɔrɛ daŋ bɔla mbe kanyiasheŋ so nna n yili kumo fanɛ edimɛdi e sa maŋ ta bumo gbagba be kanyiasheŋ so m ba pin mo. Ama mo ere gbagba be keparso nɛ e yili kumo fanɛ e beeŋ bɔla kubɔya mo nɛ anyeeŋ bɔ n sa basa nɛ baa tre kawulisheŋ be mmalga ere so m mɔlga bekama nɛ b yirda na. 22Juwebi bee kaa sha kewu mamachi be etɔɔnɛsheŋ nna pɔɛŋ nseŋ yirda kubɔya na nɛ Griikebi malɛ bee keni a fin kanyiasheŋ kumo to pɔɛŋ nseŋ yirda. 23Ama anyi ere, Kristo mo nɛ b daŋ gbir m mata kedibi largato so na be asheŋ be kubɔya nɛ anyee bɔ a sa basa. Loŋ be kubɔya na malɛ la kusɔ nɛ k bee kagle Juwebi ekpa nna nsaa la kawulisheŋ a sa Nnyamase malɛ. 24Ama bumo, Juwebi nɛ Griikebi nɛ Ebɔrɛ tre na bre kikɛ, kubɔya na la Kristo mo nɛ e la Ebɔrɛ be eleŋ nɛ mbe kanyiasheŋ na nna. 25Ŋkpal manɛ so, kusɔ nɛ k bee ŋini Ebɔrɛ be kawulisheŋ kɔ kanyiasheŋ a chɔ edimɛdi be kanyiasheŋ. Kusɔ nɛ kumo alɛ bee ŋini Ebɔrɛ be kapɔshi basa be anishito kɔ eleŋ a chɔ edimɛdi be eleŋ.

26Ŋ kurgepoana, men baa nyiŋi basa nɛ men daa la pɔɛŋ nɛ Ebɔrɛ tre menyi na. Edimɛdi be anishito menyi be bedamta daa maŋ la benyiashempo. Men be bedamta daa maŋ la bejuŋkparpo basa be anishito, bedamta malɛ daa maŋ shi kuwurji be kanaŋ kama to. 27Ama Ebɔrɛ lara durnya ere to be asɔ wuliso nna nɛ e ta anishinyɔr m pɛ benyiashempo. E lara durnya ere to be asɔ pɔso nna nɛ anishinyɔr e pɛ belempo. 28E lara durnya ere to be asɔ bɔlpo nna nɛ asɔ nɛ basa bee keni jiga na nna nɛ asɔ nɛ a maŋ la shɛŋ na, saŋɛ na so e beeŋ ta durnya ere to be asɔ lela na ŋ ki asɔ fuloŋ 29nɛ esa kikɛ e sa maŋ tiŋ m puchi ashi Ebɔrɛ be anishito. 30Mo nawule e shin nɛ menyi nɛ Kristo Yesu ba ki kukoŋwule, mo alɛ e shin nɛ Kristo shin nɛ an pin kanyiasheŋ gbagba. Kristo na malɛ gba so e shin nɛ Ebɔrɛ bee ta anyi fanɛ basa niŋiso nɛ basa cheembi, basa nɛ b fɔr so n nyalɛ so nɛ b nya kumɔlga. 31Loŋ malɛ nɛ abɔrɛsibɛ na kaŋɛ na fanɛ:

“Esa kama nɛ e bee sha kepuchi, e baa puchi Enyɛnpe na so.”

Currently Selected:

1 Kɔrintebi 1: GJNb

Highlight

Copy

Compare