ເຊຟານີຢາ 1
1
1ຕໍ່ໄປນີ້ແມ່ນຖ້ອຍຄຳຂອງພຣະເຈົ້າຢາເວ ທີ່ໄດ້ມອບໃຫ້ແກ່ເຊຟານີຢາ ໃນສະໄໝຂອງໂຢສີຢາລູກຊາຍຂອງອາໂມນໄດ້ຂຶ້ນເປັນກະສັດແຫ່ງຢູດາຍ. (ເຊຟານີຢາໄດ້ສືບເຊື້ອສາຍມາຈາກກະສັດເຮເຊກີຢາ ທາງອາມາຣີຢາ, ເກດາລີຢາ ແລະກູຊີ.)
ວັນທີ່ພຣະເຈົ້າຢາເວຕັດສິນ
2ພຣະເຈົ້າຢາເວໄດ້ກ່າວວ່າ, “ເຮົາກຳລັງຈະທຳລາຍທຸກໆສິ່ງທີ່ເທິງແຜ່ນດິນໂລກ 3ຄືມະນຸດທຸກຄົນແລະສັດທຸກໂຕ, ຝູງນົກ ແລະຝູງປາ. ເຮົາຈະນຳຄວາມຈິບຫາຍມາສູ່ຄົນຊົ່ວຮ້າຍ. ເຮົາຈະທຳລາຍມະນຸດສະໂລກທັງໝົດ ແລະຈະບໍ່ມີຜູ້ໃດລອດຊີວິດເຫຼືອຢູ່ເລີຍ. ພຣະເຈົ້າຢາເວໄດ້ກ່າວດັ່ງນີ້ແຫຼະ.
4ເຮົາຈະລົງໂທດປະຊາຊົນທັງໝົດຂອງນະຄອນເຢຣູຊາເລັມ ແລະຂອງຢູດາຍ. ໃນທີ່ນັ້ນ ເຮົາຈະທຳລາຍຮ່ອງຮອຍເສດເຫລືອແຫ່ງການຂາບໄຫວ້ພະບາອານ ແລະຈະບໍ່ມີຜູ້ໃດລະນຶກເຖິງມັນ ແມ່ນແຕ່ພວກປະໂຣຫິດທີ່ຮັບໃຊ້ພະບາອານກໍຕາມ. 5ເຮົາຈະທຳລາຍທຸກຄົນ ທີ່ຂຶ້ນໄປເທິງຫລັງຄາເຮືອນເພື່ອຂາບໄຫວ້ດວງອາທິດ, ດວງເດືອນ ແລະດວງດາວຕ່າງໆ. ເຮົາຍັງຈະທຳລາຍພວກທີ່ນະມັດສະການ ແລະສາບານທີ່ຈະສັດຊື່ຕໍ່ພຣະເຈົ້າຢາເວ, ແຕ່ແລ້ວພັດສາບານໃນນາມຂອງພະມິນກົມ. 6ເຮົາຈະທຳລາຍພວກທີ່ໄດ້ຫັນໜີໄປຈາກເຮົາ ແລະບໍ່ຕິດຕາມພຣະເຈົ້າຢາເວອີກຕໍ່ໄປ ຄືພວກທີ່ບໍ່ມາຫາພຣະເຈົ້າຢາເວ ຫລືບໍ່ມາຂໍໃຫ້ເຮົານຳພາພວກເຂົາ.”
7ຈົ່ງມິດງຽບຢູ່ຊ້ອງໜ້າອົງພຣະຜູ້ເປັນເຈົ້າ ພຣະເຈົ້າ ເພາະວັນຂອງພຣະເຈົ້າຢາເວຫຍັບເຂົ້າມາໃກ້ແລ້ວ. ດັ່ງນັ້ນ ພຣະເຈົ້າຢາເວກຳລັງຕຽມທີ່ຈະຖວາຍບູຊາຂອງພຣະອົງ ແລະໄດ້ຊົງກະທຳຜູ້ໄດ້ຮັບເຊີນຂອງ ພຣະອົງໃຫ້ບໍຣິສຸດ. 8“ແລະໃນວັນຖວາຍບູຊາຂອງພຣະເຈົ້າຢາເວນັ້ນ ເຮົາຈະລົງໂທດບັນດາຂ້າຣາຊການ, ບັນດາລູກຊາຍຂອງກະສັດ ແລະທຸກຄົນທີ່ປະຕິບັດຕາມຂະໜົບທຳນຽມຕ່າງໆຂອງຊາວຕ່າງດ້າວ. 9ໃນວັນນັ້ນ ເຮົາຈະລົງໂທດທຸກຄົນທີ່ຂາບໄຫວ້ ຄ້າຍຄືກັບພວກທີ່ບໍ່ນັບຖືພຣະເຈົ້າ, ພວກທີ່ຂີ້ລັກ ແລະພວກທີ່ຂ້າເຈົ້າເອົາຂອງ ເພື່ອນຳໄປສ້າງຮັ່ງຄູນມີໃຫ້ແກ່ເຮືອນເຈົ້ານາຍຂອງຕົນ.”
10ພຣະເຈົ້າຢາເວກ່າວວ່າ, “ໃນວັນນັ້ນ ພວກເຈົ້າຈະໄດ້ຍິນສຽງຮ້ອງໄຫ້ທີ່ປະຕູປາໃນນະຄອນເຢຣູຊາເລັມ. ພວກເຈົ້າຈະໄດ້ຍິນສຽງຮ້ອງໄຫ້ໃນເຂດສ້າງໃໝ່ຂອງຕົວເມືອງ ແລະສຽງແຕກຕູ້ມຕ້າມ ຢູ່ຕາມເນີນພູທັງຫລາຍ. 11ເມື່ອໄດ້ຍິນສຽງເຫຼົ່ານີ້ແລ້ວ ພວກທີ່ຢູ່ທາງເຂດລຸ່ມຂອງຕົວເມືອງ ຈົ່ງຮ້ອງໄຫ້ຮໍ່າໄຮເພາະວ່າບັນດາພໍ່ຄ້າທຸກຄົນຈະຕາຍໝົດ.
12ໃນເວລານັ້ນ ເຮົາຈະຖືໂຄມໄຟອັນໜຶ່ງ ເຍືອງຄົ້ນຫານະຄອນເຢຣູຊາເລັມ. ເຮົາຈະລົງໂທດປະຊາຊົນທີ່ສ້າງຄວາມອີ່ມອົກອີ່ມໃຈ ແລະເຊື່ອໝັ້ນໃນຕົນເອງ ຄືຜູ້ທີ່ເວົ້າໃນຈິດໃຈວ່າ, ‘ບໍ່ວ່າຮ້າຍຫລືດີ ພຣະເຈົ້າຢາເວເຮັດຫຍັງບໍ່ໄດ້ດອກ.’ 13ຊັບສົມບັດຂອງພວກເຂົາຈະຖືກປຸ້ນ ແລະເຮືອນຂອງພວກເຂົາຈະຖືກທຳລາຍ. ພວກເຂົາຈະບໍ່ໄດ້ຢູ່ໃນເຮືອນທີ່ພວກເຂົາກໍ່ສ້າງເອງ ຫລືດື່ມເຫຼົ້າອະງຸ່ນຈາກສວນທີ່ພວກເຂົາປູກເອງ.”
14ວັນອັນຍິ່ງໃຫຍ່ຂອງພຣະເຈົ້າຢາເວຫຍັບເຂົ້າມາໃກ້ແລ້ວ ຄືຫຍັບເຂົ້າມາໃກ້ທີ່ສຸດ ແລະມາໄວທີ່ສຸດ ໃນວັນຂອງພຣະເຈົ້າຢາເວຈະເປັນວັນທີ່ຂົມຂື່ນ ແມ່ນແຕ່ ບັນດາທະຫານທີ່ເກັ່ງກ້າທີ່ສຸດ ກໍຈະຮ້ອງອອກມາດ້ວຍຄວາມໝົດຫວັງ. 15ມັນຈະເປັນວັນແຫ່ງຄວາມໂກດຮ້າຍໃຫຍ່ ວັນແຫ່ງຄວາມເດືອດຮ້ອນ ແລະເປັນທຸກໃຈຫລາຍ ມື້ແຫ່ງການຮົກຮ້າງເພພັງແລະຈິບຫາຍ ມື້ແຫ່ງຄວາມມືດຕຶບແລະໝົ່ນໝອງ ມື້ແຫ່ງເມກໝອກດຳ 16ມື້ທີ່ເຕັມໄປດ້ວຍສຽງແກລະດົມພົນເຮັດເສິກ ແລະສຽງຂອງພວກທະຫານໂຮຮ້ອງໃນສະໜາມຮົບ ເພື່ອບຸກໂຈມຕີເມືອງທັງຫລາຍ ທີ່ມີປ້ອມປ້ອງກັນ ແລະມີຫໍຄອຍສູງ.
17ອົງພຣະຜູ້ເປັນເຈົ້າກ່າວວ່າ, “ເຮົາຈະນຳໄພພິບັດດັ່ງກ່າວນັ້ນ ມາສູ່ມະນຸດສະໂລກ ຊຶ່ງທຸກຄົນຈະງົມທາວໄປມາດັ່ງຄົນຕາບອດ ເພາະວ່າພວກເຂົາໄດ້ເຮັດບາບຕໍ່ສູ້ຂອງພຣະເຈົ້າຢາເວ; ເລືອດຂອງພວກເຂົາຈະຖືກຖອກຖິ້ມດັ່ງຖອກນໍ້າ ແລະຊາກສົບຂອງຄົນຕາຍຈະແບເນົ່າເໝັນຢູ່ຕາມພື້ນດິນ.”
18ໃນມື້ນັ້ນ ເມື່ອພຣະເຈົ້າຢາເວລະບາຍຄວາມໂກດຮ້າຍອັນໃຫຍ່ຂອງພຣະອົງ ແມ່ນແຕ່ເງິນແລະຄຳທັງໝົດທີ່ພວກເຂົາມີຢູ່ ກໍຈະຊ່ວຍຫຍັງພວກເຂົາບໍ່ໄດ້. ແຜ່ນດິນໂລກທັງໝົດຈະຖືກທຳລາຍ ດ້ວຍໄຟແຫ່ງຄວາມໂກດຮ້າຍຂອງພຣະອົງ. ພຣະອົງຈະໃຫ້ເຖິງທີ່ສິ້ນສຸດ ຄືການສິ້ນສຸດຢ່າງກະທັນຫັນແກ່ທຸກໆຄົນ ທີ່ອາໄສຢູ່ເທິງແຜ່ນດິນໂລກນີ້.
Currently Selected:
ເຊຟານີຢາ 1: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
