ໂຣມ 9
9
ພຣະເຈົ້າຊົງເລືອກຕັ້ງຊົນຊາດອິດສະຣາເອນເປັນໄພ່ພົນຂອງພຣະອົງ
1ເຮົາຢູ່ໃນພຣະຄຣິດ ເຮົາເວົ້າຄວາມຈິງ ເຮົາບໍ່ໄດ້ເວົ້າຕົວະໃຈສຳນຶກຜິດແລະຊອບຂອງເຮົາ ກໍເປັນພະຍານຝ່າຍເຮົາດ້ວຍພຣະວິນຍານບໍຣິສຸດເຈົ້າ 2ວ່າ, ຈິດໃຈຂອງເຮົາເຕັມໄປດ້ວຍຄວາມເສົ້າໂສກໜັກ ແລະມີຄວາມເຈັບປວດໃນຫົວໃຈຢ່າງບໍ່ສິ້ນສຸດ 3ຖ້າເປັນປະໂຫຍດ ເຮົາປາຖະໜາຢາກໃຫ້ເຮົາເອງຖືກສາບແຊ່ງ ແລະຖືກຕັດຂາດຈາກພຣະຄຣິດ ເພາະເຫັນແກ່ພີ່ນ້ອງຂອງເຮົາ ຄືຍາດຕິພີ່ນ້ອງຂອງເຮົາຕາມເຊື້ອສາຍ. 4ພວກເຂົາເປັນຊົນຊາດອິດສະຣາເອນ ໄດ້ຮັບການຊົງໃຫ້ເປັນລູກຂອງພຣະເຈົ້າ ໃຫ້ພວກເຂົາຮັບພຣະສະຫງ່າຣາສີ ຮັບບັນດາພັນທະສັນຍາ ກັບພວກເຂົາ ແລະມອບກົດບັນຍັດ, ພິທີນະມັດສະການ ແລະບັນດາຄຳສັນຍາໃຫ້ແກ່ພວກເຂົາ. 5ພວກເຂົາໄດ້ສືບເຊື້ອສາຍມາຈາກພວກບັນພະບຸລຸດຄົນສຳຄັນ ແລະພຣະຄຣິດກໍໄດ້ບັງເກີດເປັນມະນຸດໃນເຊື້ອຊາດຂອງພວກເຂົາ ຂໍໃຫ້ພຣະເຈົ້າຜູ້ປົກຄອງເໜືອສິ່ງສາລະພັດ ຈົ່ງໄດ້ຮັບຄຳຍ້ອງຍໍສັນລະເສີນເປັນນິດເທີ້ນ ອາແມນ.
6ແຕ່ບໍ່ແມ່ນພຣະຄຳຂອງພຣະເຈົ້າໄດ້ຫລົ້ມເຫລວໄປ ເພາະວ່າເຂົາທັງຫລາຍທີ່ເກີດມາຈາກອິດສະຣາເອນນັ້ນ ກໍບໍ່ແມ່ນວ່າເປັນອິດສະຣາເອນແທ້ທຸກຄົນ. 7ແລະບໍ່ແມ່ນທຸກຄົນທີ່ເກີດຈາກເຊື້ອສາຍຂອງອັບຣາຮາມ ເປັນເຊື້ອສາຍແທ້ຂອງພຣະເຈົ້າ, ແຕ່ພຣະເຈົ້າໄດ້ກ່າວແກ່ອັບຣາຮາມວ່າ, “ແມ່ນໂດຍທາງອີຊາກ ທີ່ເຈົ້າຈະມີເຊື້ອສາຍຕາມທີ່ເຮົາໄດ້ສັນຍາ.” 8ນີ້ໝາຍຄວາມວ່າ ລູກທີ່ເກີດຕາມທຳມະຊາດ ບໍ່ເປັນລູກຂອງພຣະເຈົ້າ, ແຕ່ແມ່ນລູກທີ່ເກີດຕາມພຣະສັນຍາຂອງພຣະເຈົ້າ ຈຶ່ງຖືວ່າເປັນເຊື້ອສາຍແທ້. 9ເພາະພຣະເຈົ້າຊົງສັນຍາໄວ້ ດັ່ງນີ້ວ່າ, “ເມື່ອເຖິງເວລາກຳນົດ ເຮົາຈະກັບຄືນມາ ແລະນາງຊາຣາກໍຈະມີລູກຊາຍ.”
10ບໍ່ແມ່ນແຕ່ເທົ່ານັ້ນ, ດ້ວຍວ່າລູກຊາຍສອງຄົນໃນທ້ອງຂອງນາງເຣເບກາ ກໍມີພໍ່ຄົນດຽວກັນ ຄືອີຊາກບັນພະບຸລຸດຂອງພວກເຮົາ. 11-12ແລະ ເພື່ອພຣະປະສົງໃນການຊົງເລືອກຜູ້ໜຶ່ງໄວ້ນັ້ນຈະຕັ້ງໝັ້ນຢູ່ ພຣະອົງຈຶ່ງຊົງກ່າວແກ່ນາງວ່າ, “ອ້າຍຈະຮັບໃຊ້ນ້ອງ” ພຣະອົງຊົງກ່າວໄວ້ດັ່ງນັ້ນ ເມື່ອລູກທັງສອງນັ້ນຍັງບໍ່ທັນເກີດມາ ທັງບໍ່ໄດ້ເຮັດການດີ ຫລືຊົ່ວ, ເພື່ອການຊົງເລືອກນັ້ນ ບໍ່ໄດ້ເປັນໄປຕາມການປະຕິບັດ, ແຕ່ເປັນໄປຕາມທີ່ພຣະອົງຊົງເອີ້ນ. 13ຕາມທີ່ມີຄຳຂຽນໄວ້ໃນພຣະຄຳພີວ່າ, “ເຮົາໄດ້ຮັກຢາໂຄບ ແຕ່ເຮົາກຽດຊັງເອຊາວ.”
14ແລ້ວພວກເຮົາເດ ຈະວ່າພຣະເຈົ້າບໍ່ຍຸດຕິທຳຊັ້ນບໍ? ບໍ່ເປັນຢ່າງນັ້ນດອກ 15ເພາະພຣະອົງກ່າວແກ່ໂມເຊວ່າ ເຮົາຢາກຈະກະລຸນາຜູ້ໃດ ເຮົາກໍກະລຸນາຜູ້ນັ້ນ ເຮົາຢາກຈະເມດຕາຜູ້ໃດ ເຮົາກໍເມດຕາຜູ້ນັ້ນ. 16ດັ່ງນັ້ນ ຈຶ່ງຈະບໍ່ຂຶ້ນຢູ່ກັບຄວາມຕັ້ງໃຈຂອງຄົນເຮົາ ຫລືການກະທຳ, ແຕ່ຂຶ້ນຢູ່ກັບພຣະເມດຕາກະລຸນາຂອງພຣະເຈົ້າເທົ່ານັ້ນ. 17ເພາະພຣະຄຳພີກ່າວແກ່ກະສັດແຫ່ງເອຢິບວ່າ, “ເຮົາໄດ້ແຕ່ງຕັ້ງເຈົ້າເປັນກະສັດ ເພື່ອໃຊ້ເຈົ້າໃຫ້ສຳແດງຣິດອຳນາດຂອງເຮົາ ແລະເພື່ອນາມຂອງເຮົາຈະປະກາດແຜ່ອອກໄປທົ່ວໂລກ.” 18ດ້ວຍເຫດນັ້ນ ຖ້າພຣະເຈົ້າຊົງກະລຸນາຜູ້ໃດ ກໍຈະຊົງກະລຸນາແກ່ຜູ້ນັ້ນ ແລະພຣະອົງຢາກໃຫ້ຜູ້ໃດມີໃຈແຂງກະດ້າງ ກໍຈະຊົງໃຫ້ຜູ້ນັ້ນມີໃຈແຂງກະດ້າງ.
ພຣະເຈົ້າກ່າວໂທດ ແລະໃຫ້ຄວາມເມດຕາ
19ແລ້ວເຈົ້າຈະກ່າວຕໍ່ເຮົາວ່າ, “ຖ້າເປັນດັ່ງນັ້ນ ເປັນຫຍັງພຣະເຈົ້າຈຶ່ງຍັງຊົງຕິຕຽນຢູ່? ຜູ້ໃດຈະຂັດຂືນນໍ້າພຣະໄທຂອງພຣະເຈົ້າໄດ້?” 20ແຕ່ມະນຸດເອີຍ, ເຈົ້າເປັນຜູ້ໃດ ຈຶ່ງກ້າກ່າວໂຕ້ຕອບພຣະເຈົ້າໄດ້? ສິ່ງທີ່ຖືກປັ້ນຈະກ່າວແກ່ຜູ້ປັ້ນວ່າ, “ເປັນຫຍັງເຈົ້າຈຶ່ງປັ້ນຂ້ອຍມາແບບນີ້?” 21ຕາມທີ່ຈິງແລ້ວ ຊ່າງປັ້ນໝໍ້ມີສິດໃຊ້ດິນໜຽວຈາກກ້ອນດຽວກັນມາປັ້ນເປັນເຄື່ອງໃຊ້ ອັນໜຶ່ງສຳລັບໃຊ້ໃນງານພິເສດ ແລະອີກອັນໜຶ່ງສຳລັບໃຊ້ໃນງານທຳມະດາ.
22ດັ່ງນັ້ນ ພຣະອົງຢາກສຳແດງຄວາມໂກດຮ້າຍຂອງພຣະອົງ ແລະເຮັດໃຫ້ຣິດເດດອຳນາດຂອງພຣະອົງເປັນທີ່ປາກົດ, ພຣະອົງຈຶ່ງຊົງອົດກັ້ນໄວ້ດົນນານຕໍ່ພວກເຫຼົ່ານັ້ນ ທີ່ເປັນພາຊະນະອັນສົມຄວນແກ່ຄວາມໂກດຮ້າຍ ຄືຜູ້ທີ່ຈັດຕຽມໄວ້ສຳລັບຄວາມຈິບຫາຍ. 23ແລະເພື່ອສຳແດງສະຫງ່າຣາສີອັນອຸດົມສົມບູນຂອງພຣະອົງ ແກ່ບັນດາຜູ້ທີ່ເປັນພາຊະນະແຫ່ງຄວາມເມດຕາ ຄືຄົນເຫຼົ່ານັ້ນ ທີ່ພຣະອົງໄດ້ຊົງຈັດຕຽມໄວ້ກ່ອນ ເພື່ອຮັບສະຫງ່າຣາສີນັ້ນ. 24ລວມທັງພວກເຮົາທີ່ເປັນໄພ່ພົນ ທີ່ພຣະອົງຊົງເອີ້ນເອົານັ້ນ ບໍ່ແມ່ນຈາກຄົນຢິວເທົ່ານັ້ນ ແຕ່ຈາກຄົນຕ່າງຊາດດ້ວຍ. 25ດັ່ງທີ່ພຣະອົງໄດ້ກ່າວໄວ້ໃນພຣະທຳໂຮເສອາວ່າ,
“ເຮົາຈະເອີ້ນເຂົາເຫຼົ່ານັ້ນວ່າ
‘ເປັນພົນລະເມືອງຂອງເຮົາ.’
ຊຶ່ງເມື່ອກ່ອນບໍ່ໄດ້ເປັນ
ພົນລະເມືອງຂອງເຮົາ
ແລະເຮົາຈະເອີ້ນວ່າ, ‘ພວກທີ່ຮັກຂອງເຮົາ’ ຊຶ່ງເມື່ອກ່ອນບໍ່ໄດ້ເປັນທີ່ຮັກ.”
26 ແລະ “ໃນບ່ອນທີ່ຊົງກ່າວວ່າ
‘ເຈົ້າທັງຫລາຍບໍ່ແມ່ນ
ພົນລະເມືອງຂອງເຮົາ’
ແລະໃນບ່ອນນັ້ນແຫຼະ
ພວກເຂົາຈະໄດ້ຊື່ວ່າ,
‘ເປັນລູກຂອງພຣະເຈົ້າອົງຊົງຊີວິດຢູ່.”’
27ເອຊາຢາປະກາດກ່ຽວກັບຊາດອິດສະຣາເອນວ່າ, “ເຖິງແມ່ນລູກຂອງຊາວອິດສະຣາເອນຈະມີຫລາຍດັ່ງເມັດຊາຍທີ່ແຄມທະເລ ແຕ່ມີໜ້ອຍຄົນຈະໄດ້ພົ້ນ, 28ດ້ວຍວ່າ, ອົງພຣະຜູ້ເປັນເຈົ້າຈະຊົງດຳເນີນການເທິງແຜ່ນດິນໂລກນີ້ ຕາມການຕັດສິນຂອງພຣະອົງ ໂດຍໄວແລະຢ່າງຄົບຖ້ວນ.” 29ຕາມທີ່ເອຊາຢາໄດ້ທຳນວາຍໄວ້ລ່ວງໜ້າວ່າ, “ຖ້າອົງພຣະຜູ້ເປັນເຈົ້າ ອົງຊົງເປັນຈອມພົນ ບໍ່ໄດ້ຊົງໂຜດໃຫ້ພວກເຮົາມີເຊື້ອສາຍເຫຼືອຢູ່ ພວກເຮົາກໍຕ້ອງໄດ້ກາຍເປັນດັ່ງເມືອງໂຊໂດມ ແລະ ໂກໂມຣາ.”
ຊົນຊາດອິດສະຣາເອນ ແລະຂ່າວປະເສີດ
30ຖ້າເປັນດັ່ງນັ້ນແລ້ວ ພວກເຮົາຈະວ່າຢ່າງໃດ? ຈະວ່າຄົນຕ່າງຊາດຜູ້ທີ່ບໍ່ດິ້ນລົນຫາຄວາມຊອບທຳໃຫ້ຕົນເອງ ກໍຍັງເປັນຄົນຊອບທຳຕໍ່ໜ້າພຣະເຈົ້າ ຄືຄວາມຊອບທຳໂດຍທາງຄວາມເຊື່ອ, 31ແຕ່ພວກອິດສະຣາເອນທີ່ໄດ້ດິ້ນລົນຫາຄວາມຊອບທຳຕາມກົດບັນຍັດ ກໍບໍ່ໄດ້ບັນລຸເປົ້າໝາຍຂອງຕົນຕາມກົດບັນຍັດນັ້ນ. 32ເປັນເພາະເຫດໃດ? ເພາະຍ້ອນວ່າ ພວກເຂົາບໍ່ໄດ້ດິ້ນລົນດ້ວຍຄວາມເຊື່ອ, ແຕ່ໄດ້ຊອກຫາດ້ວຍການປະຕິບັດ. ດັ່ງນັ້ນ ພວກເຂົາຈຶ່ງໄດ້ຕຳສະດຸດກ້ອນຫີນ ທີ່ໃຫ້ສະດຸດນັ້ນ 33ຕາມທີ່ມີຄຳຂຽນໄວ້ໃນພຣະຄຳພີວ່າ,
“ນີ້ແຫຼະ ເຮົາໄດ້ວາງຫີນກ້ອນໜຶ່ງໄວ້ໃນເມືອງຊີໂອນ
ເປັນຫີນກ້ອນທີ່ໃຫ້ຄົນຕຳສະດຸດ
ຄືກ້ອນຫີນທີ່ໃຫ້ຄົນລົ້ມລົງ
ແຕ່ຜູ້ທີ່ເຊື່ອໃນພຣະອົງຈະບໍ່ໄດ້ຮັບຄວາມອັບອາຍຈັກເທື່ອ.”
Currently Selected:
ໂຣມ 9: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.