ໂຣມ 2
2
ພຣະເຈົ້າຊົງພິພາກສາຢ່າງຍຸດຕິທຳ
1ເຫດສະນັ້ນ ມະນຸດເອີຍ ບໍ່ວ່າເຈົ້າຈະເປັນຜູ້ໃດກໍຕາມ ເມື່ອເຈົ້າກ່າວໂທດໃສ່ຜູ້ອື່ນ, ເຈົ້າບໍ່ມີຂໍ້ທີ່ຈະແກ້ຕົວໄດ້. ດ້ວຍວ່າ, ເມື່ອເຈົ້າກ່າວໂທດໃສ່ຜູ້ອື່ນ ແລະຍັງເຮັດຢ່າງດຽວກັບພວກເຂົາ ເຈົ້າກໍກ່າວໂທດໃສ່ຕົນເອງ. 2ພວກເຮົາຮູ້ຢູ່ວ່າ ການທີ່ພຣະເຈົ້າຊົງພິພາກສາລົງໂທດຄົນທັງຫລາຍທີ່ກະທຳຢ່າງນັ້ນ ກໍຖືກຕ້ອງຢູ່ແລ້ວ. 3ແຕ່ມະນຸດເອີຍ ໃນເມື່ອເຈົ້າຍັງເຮັດສິ່ງນັ້ນຢູ່ ແລະກ່າວໂທດໃສ່ຜູ້ອື່ນ ເຈົ້າຄິດວ່າເຈົ້າຈະໜີພົ້ນຈາກການພິພາກສາຂອງພຣະເຈົ້າໄດ້ຊັ້ນບໍ? 4ຫລືວ່າ ເຈົ້າໝິ່ນປະໝາດພຣະກະລຸນາຄຸນອັນບໍຣິບູນ ແລະຄວາມອົດກັ້ນພຣະໄທກັບຄວາມອົດທົນຂອງພຣະອົງ, ເຈົ້າບໍ່ຮູ້ຫລືວ່າ ພຣະກະລຸນາຄຸນຂອງພຣະເຈົ້ານັ້ນ ກໍເພື່ອນຳເຈົ້າໃຫ້ກັບໃຈເສຍໃໝ່. 5ແຕ່ດ້ວຍໃຈຂອງເຈົ້າແຂງກະດ້າງ ແລະບໍ່ຍອມທີ່ຈະກັບຕົວ ເຈົ້າຈຶ່ງກຳລັງສະສົມຄວາມໂກດຮ້າຍໄວ້ໃຫ້ຕົນເອງ ໃນວັນຂອງຄວາມຮ້າຍກາດນັ້ນ, ຄືວັນທີ່ພຣະເຈົ້າຈະຊົງພິພາກສາລົງໂທດ ຢ່າງຍຸດຕິທຳໃຫ້ປາກົດແຈ້ງນັ້ນ. 6ເພາະພຣະອົງຈະຊົງໂຜດຕອບແທນຕາມການກະທຳຂອງພວກເຂົາທຸກຄົນ. 7ສຳລັບຄົນທີ່ມີຄວາມພຽນພະຍາຍາມກະທຳດີ, ສະແຫວງຫາສະຫງ່າຣາສີ ກຽດຕິຍົດ ແລະຊີວິດທີ່ຕາຍບໍ່ເປັນນັ້ນ ພຣະອົງຈະຊົງປະທານຊີວິດນິຣັນດອນໃຫ້ແກ່ພວກເຂົາ. 8ແຕ່ພຣະອົງຈະຊົງສຳແດງຄວາມໂກດຮ້າຍອັນເຜັດຮ້ອນແກ່ຄົນທັງຫລາຍທີ່ຄິດໃຫຍ່ໃຝ່ສູງ ແລະແກ່ຜູ້ທີ່ບໍ່ເຊື່ອວາງໃຈໃນຄວາມຈິງ ແຕ່ຍອມເຮັດຕາມຄວາມຊົ່ວ. 9ຄວາມທຸກເວດທະນາ ແລະຄວາມເຈັບປວດຈະເກີດມີແກ່ມະນຸດທຸກຄົນທີ່ເຮັດການຊົ່ວ ຄືແກ່ຄົນຢິວກ່ອນ ແລະແກ່ຄົນຕ່າງຊາດດ້ວຍ. 10ແຕ່ສະຫງ່າຣາສີ ແລະກຽດຕິຍົດກັບສັນຕິສຸກຈະເກີດມີແກ່ທຸກຄົນທີ່ເຮັດຄວາມດີ ຄືແກ່ຄົນຢິວກ່ອນ ແລະແກ່ຄົນຕ່າງຊາດດ້ວຍ. 11ເພາະວ່າພຣະເຈົ້າບໍ່ໄດ້ເຫັນແກ່ໜ້າຜູ້ໃດເລີຍ.
12ຄົນບາບທັງຫລາຍທີ່ບໍ່ມີກົດບັນຍັດ ແລະເຮັດຜິດບາບ ຈະຕ້ອງຈິບຫາຍໄປໂດຍບໍ່ອ້າງກົດບັນຍັດ, ແຕ່ຄົນບາບທັງຫລາຍທີ່ມີກົດບັນຍັດ ແລະເຮັດຜິດບາບ ກໍຈະຖືກໂທດຕາມກົດບັນຍັດນັ້ນ. 13ດ້ວຍວ່າ, ບໍ່ແມ່ນພວກຄົນທີ່ຟັງກົດບັນຍັດຈະເປັນຜູ້ຊອບທຳຕໍ່ພຣະພັກພຣະເຈົ້າ, ແຕ່ແມ່ນຜູ້ທີ່ໄດ້ເຮັດຕາມກົດບັນຍັດເທົ່ານັ້ນ ທີ່ຈະໄດ້ຊົງຖືວ່າເປັນຄົນຊອບທຳ. 14ຄົນຕ່າງຊາດທີ່ບໍ່ມີກົດບັນຍັດ, ແຕ່ເມື່ອພວກເຂົາປະຕິບັດຕາມກົດບັນຍັດ ໂດຍນິໄສປົກກະຕິແລ້ວ ເຖິງແມ່ນພວກເຂົາບໍ່ມີກົດບັນຍັດນັ້ນກໍຕາມ, ແຕ່ກໍຍັງເປັນກົດບັນຍັດໃນຕົວພວກເຂົາເອງ. 15ການປະພຶດຂອງພວກເຂົາ ໄດ້ຊີ້ໃຫ້ເຫັນວ່າ ສິ່ງທີ່ກົດບັນຍັດສັ່ງນັ້ນ ກໍຈາລຶກໄວ້ໃນຫົວໃຈຂອງພວກເຂົາແລ້ວ, ຈິດສຳນຶກຜິດແລະຊອບຂອງພວກເຂົາ ກໍເປັນພະຍານເໝືອນກັນ ແມ່ນຄວາມຄິດຂອງພວກເຂົານັ້ນແຫຼະ ທີ່ກ່າວໂທດພວກເຂົາເອງ ຫລືອາດຈະແກ້ຕົວໃຫ້ພວກເຂົາ. 16ໃນວັນທີ່ພຣະເຈົ້າຈະຊົງໃຫ້ພຣະເຢຊູຄຣິດເຈົ້າ ພິພາກສາຄວາມເລິກລັບໃນໃຈຂອງມະນຸດທັງຫລາຍ ຕາມຂ່າວປະເສີດທີ່ເຮົາໄດ້ປະກາດແລ້ວນັ້ນ.
ຊາວຢິວ ແລະ ກົດບັນຍັດ
17ແຕ່ຖ້າເຈົ້າໄດ້ຊື່ວ່າເປັນຢິວ ເຈົ້າເພິ່ງອາໄສກົດບັນຍັດ ແລະອວດວ່າມີພຣະເຈົ້າ, 18ແລະເຈົ້າຮູ້ຈັກນໍ້າພຣະໄທຂອງພຣະອົງ, ທັງເຫັນຊອບໃນສິ່ງປະເສີດ ເພາະເຈົ້າໄດ້ຮຽນຮູ້ໃນກົດບັນຍັດ, 19ແລະຖ້າເຈົ້າໝັ້ນໃຈວ່າ ເຈົ້າເປັນຜູ້ນຳທາງຄົນຕາບອດ, ເປັນຄວາມສະຫວ່າງໃຫ້ແກ່ຄົນເຫຼົ່ານັ້ນ ທີ່ຢູ່ໃນຄວາມມືດ, 20ເປັນຜູ້ສຶກສາອົບຮົມແກ່ຄົນໂງ່ຈ້າ ແລະເປັນຄູສອນເດັກນ້ອຍ ເປັນຜູ້ມີແບບແຜນອັນສົມບູນຂອງຄວາມຮູ້ ແລະຄວາມຈິງໃນກົດບັນຍັດ. 21ເມື່ອເຈົ້າສອນຄົນອື່ນ ເປັນຫຍັງເຈົ້າຈຶ່ງບໍ່ສອນຕົນເອງກ່ອນ? ເຈົ້າເທດສະໜາວ່າ, “ຢ່າລັກ” ແຕ່ເຈົ້າຍັງລັກຢູ່ຊັ້ນບໍ? 22ເຈົ້າບອກວ່າ, “ຢ່າຫລິ້ນຊູ້” ແຕ່ເຈົ້າຍັງຫລິ້ນຊູ້ຢູ່ຫລືບໍ່? ເຈົ້າກຽດຊັງຮູບເຄົາຣົບ ແຕ່ເຈົ້າຍັງປຸ້ນວິຫານຢູ່ຫລືບໍ່? 23ເຈົ້າກ່າວອ້າງເຖິງກົດບັນຍັດຂອງພຣະເຈົ້າ ແຕ່ເຈົ້າເຮັດໃຫ້ພຣະເຈົ້າເສຍກຽດ ໂດຍຝ່າຝືນກົດບັນຍັດຂອງພຣະອົງຢູ່ຊັ້ນບໍ? 24ເພາະມີຄຳຂຽນໄວ້ໃນພຣະຄຳພີວ່າ, “ພຣະນາມຂອງພຣະເຈົ້າຖືກໝິ່ນປະໝາດໃນທ່າມກາງຄົນຕ່າງຊາດ ກໍເພາະເຈົ້າທັງຫລາຍ.”
25ຖ້າເຈົ້າເຮັດຕາມກົດບັນຍັດ ພິທີຕັດນັ້ນກໍເປັນປະໂຫຍດແທ້, ແຕ່ຖ້າເຈົ້າລ່ວງລະເມີດກົດບັນຍັດ ການທີ່ເຈົ້າຮັບພິທີຕັດນັ້ນກໍບໍ່ມີປະໂຫຍດຫຍັງເລີຍ. 26ດັ່ງນັ້ນ ຖ້າຜູ້ທີ່ບໍ່ໄດ້ຮັບພິທີຕັດ ແຕ່ໄດ້ປະຕິບັດຕາມກົດບັນຍັດ ແລະການທີ່ພວກເຂົາບໍ່ໄດ້ຮັບພິທີຕັດນັ້ນ ຈະຖືເໝືອນວ່າຜູ້ນັ້ນໄດ້ຮັບພິທີຕັດແລ້ວບໍ່ແມ່ນບໍ? 27ເຖິງແມ່ນວ່າ ເຈົ້າທັງຫລາຍມີກົດບັນຍັດທີ່ຈາລຶກໄວ້ ແລະໄດ້ຮັບພິທີຕັດແລ້ວ ກໍຍັງລ່ວງລະເມີດຕໍ່ກົດບັນຍັດນັ້ນ ຝ່າຍຄົນທຳມະດາສາມັນທີ່ບໍ່ໄດ້ຮັບພິທີຕັດ, ພວກເຂົາກໍຍັງຖືຮັກສາກົດບັນຍັດຢູ່ ພວກເຂົານັ້ນແຫຼະ ຈະກ່າວໂທດໃສ່ເຈົ້າ. 28ເພາະວ່າຄົນຢິວແທ້ ບໍ່ແມ່ນເປັນຢິວແຕ່ພາຍນອກ ບໍ່ແມ່ນຮັບພິທີຕັດພຽງພາຍນອກ ແລະຝ່າຍເນື້ອກາຍເທົ່ານັ້ນ. 29ຄົນຢິວແທ້ຄືເປັນຢິວພາຍໃນ ແລະການຮັບພິທີຕັດແທ້ນັ້ນ ຄືການຮັບທາງຈິດໃຈ ຊຶ່ງເປັນຜົນແຫ່ງພຣະວິນຍານຂອງພຣະເຈົ້າ ບໍ່ແມ່ນເປັນໄປຕາມຕົວອັກສອນໃນກົດບັນຍັດ, ຄົນຢ່າງນັ້ນ ໄດ້ຮັບຄຳສັນລະເສີນຈາກພຣະເຈົ້າ ບໍ່ແມ່ນຈາກມະນຸດ.
Currently Selected:
ໂຣມ 2: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.