ເພງ^ສັນລະເສີນ 77
77
ໄດ້ຮັບຄວາມໜູນໃຈໃນຄາວລຳບາກ
1ຂ້ານ້ອຍຮ້ອງທຸກຕໍ່ພຣະເຈົ້າດ້ວຍສຽງອັນດັງ,
ຂ້ານ້ອຍຮ້ອງຫາຕໍ່ພຣະເຈົ້າດ້ວຍສຽງອັນດັງ ພຣະອົງໄດ້ຍິນສຽງຂອງຂ້ານ້ອຍ.
2ເມື່ອຢູ່ໃນຄາວລຳບາກເດືອດຮ້ອນຂັດສົນ
ຂ້ານ້ອຍກໍໄດ້ພາວັນນາອະທິຖານຕໍ່ອົງພຣະຜູ້ເປັນເຈົ້າ
ຂ້ານ້ອຍຍົກມືຂຶ້ນພາວັນນາອະທິຖານຫາພຣະອົງທັງຄືນ
ແຕ່ຄວາມເລົ້າໂລມໃຈກໍບໍ່ເຫັນມາປານນີ້.
3ເມື່ອຂ້ານ້ອຍຄິດເຖິງພຣະເຈົ້າກໍຖອນຫາຍໃຈ
ເມື່ອຄິດຕຶກຕອງກໍອ່ອນກຳລັງໃຈໄປດ້ວຍ.
4ພຣະອົງເຮັດໃຫ້ຂ້ານ້ອຍນອນບໍ່ຫລັບທັງຄືນ
ຂ້ານ້ອຍທຸກໃຈຫລາຍຈົນເວົ້າຈາຫຍັງບໍ່ໄດ້.
5ຂ້ານ້ອຍຫວນຄິດເຖິງເມື່ອວັນຄືນທີ່ຜ່ານໄປ
ແລະຈື່ຈຳເດືອນປີທີ່ຜ່ານມານັ້ນ.
6ຂ້ານ້ອຍນອນໃຊ້ຄວາມຄິດຢ່າງໜັກ ທັງຄືນ
ຂ້ານ້ອຍຄິດຕຶກຕອງແລະຖາມຕົນເອງດັ່ງນີ້:
7“ອົງພຣະຜູ້ເປັນເຈົ້າຈະປະພວກເຮົາເລື້ອຍໆຊັ້ນບໍ?
ພຣະອົງຈະບໍ່ພໍໃຈນຳອີກຕໍ່ໄປຫລືນີ້?
8ພຣະອົງເຊົາຮັກພວກເຮົາແລ້ວຊັ້ນບໍ?
ຄຳສັນຍາຂອງພຣະອົງບໍ່ຢັ້ງຢືນຕໍ່ໄປອີກຫລືນີ້?
9ພຣະເຈົ້າຫລົງລືມພຣະຄຸນທີ່ມີຕໍ່ພວກເຮົາແລ້ວຫລືນີ້?
ຄວາມໂກດຮ້າຍແທນຄວາມເມດຕາແລ້ວຫລືນີ້?”
10ແລ້ວຂ້ານ້ອຍເວົ້າວ່າ, “ສິ່ງທີ່ເຮັດໃຫ້ປວດລ້າວທີ່ສຸດ
ຄືວ່າພຣະເຈົ້າບໍ່ມີຣິດອຳນາດຕໍ່ໄປແລ້ວ.”
11ຂ້ານ້ອຍຈະຈົດຈຳພຣະເຈົ້າຢາເວ
ສິ່ງອັນຍິ່ງໃຫຍ່ທີ່ພຣະອົງໄດ້ກະທຳນັ້ນ.
ຂ້ານ້ອຍຈະຄິດເຖິງການອັດສະຈັນ
ທີ່ພຣະອົງໄດ້ເຮັດຜ່ານມານັ້ນ.
12ຂ້ານ້ອຍຈະຄິດເຖິງທຸກສິ່ງທີ່ຊົງໄດ້ກະທຳ
ຄິດຄຳນຶງເຖິງທຸກສິ່ງທີ່ປ່ຽມດ້ວຍຣິດທານຸພາບຂອງພຣະອົງ.
13ຂ້າແດ່ພຣະເຈົ້າ ທຸກສິ່ງທີ່ພຣະອົງເຮັດກໍບໍຣິສຸດ
ບໍ່ມີພະຕົນໃດທີ່ຍິ່ງໃຫຍ່ເໜືອກວ່າພຣະເຈົ້າຂອງພວກເຮົາໄດ້.
14ພຣະອົງເປັນພຣະເຈົ້າທີ່ເຮັດການອັດສະຈັນທັງຫຼາຍ
ບັນດາຊົນຊາດກໍໄດ້ເຫັນຣິດທານຸພາບອັນຍິ່ງໃຫຍ່ຂອງພຣະອົງ.
15ດ້ວຍພຣະກຳລັງ ພຣະອົງໄດ້ຊົງໄຖ່ປະຊາຊົນຂອງພຣະອົງ
ຄືບັນດາເຊື້ອສາຍຂອງຢາໂຄບແລະຂອງໂຢເຊັບ.
16ຂ້າແດ່ພຣະເຈົ້າ ເມື່ອນໍ້າເຫັນພຣະອົງແລ້ວກໍເກີດຢ້ານກົວ
ບ່ອນເລິກໃນທ້ອງທະເລກໍສັ່ນສະເທືອນດ້ວຍ.
17ເມກໝອກໄດ້ຖອກເທຫ່າຝົນລົງມາ
ຟ້າກໍຮ້ອງສຽງດັງກ້ອງກັງວານໄປ
ທົ່ວທ້ອງຟ້ານະພາ
ແລະຟ້າກໍແມບເຫລື້ອມໂດຍສົ່ງແສງໄປທົ່ວທຸກທິດ.
18ຟ້າຜ່າໄດ້ສົ່ງສຽງຮ້ອງດັງກຶກກ້ອງອອກໄປ
ແລະແສງຟ້າແມບເຫຼື້ອມເຮັດໃຫ້ໂລກຮຸ່ງສະຫວ່າງສະໄຫວ ແຜ່ນດິນໂລກກໍຫວັ່ນໄຫວສະທ້ານສະເທືອນ.
19ພຣະອົງຍ່າງເທິງຄື້ນນໍ້າຂ້າມທ້ອງທະເລໄປ
ແຕ່ບໍ່ມີຮອຍບາດຍ່າງຂອງພຣະອົງໃຫ້ປາກົດເປັນທີ່ເຫັນໄດ້.
20ດັ່ງຄົນລ້ຽງແກະຜູ້ໜຶ່ງທີ່ນຳປະຊາຊົນຂອງຕົນ
ໂດຍມີໂມເຊແລະອາໂຣນເປັນຜູ້ຮັບຜິດຊອບ.
Currently Selected:
ເພງ^ສັນລະເສີນ 77: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.