ໂອບາດີຢາ 1
1
1ຕໍ່ໄປນີ້ແມ່ນຄຳທຳນວາຍຂອງໂອບາດີຢາ ຄືສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວເຖິງຊົນຊາດເອໂດມ.
ພຣະເຈົ້າຢາເວຈະລົງໂທດເອໂດມ
ແລະສົ່ງຜູ້ນຳຂ່າວໄປຍັງຊົນຊາດທັງຫລາຍ
ພວກເຮົາກໍໄດ້ຍິນຖ້ອຍຄຳຂອງພຣະອົງດັ່ງນີ້:
ພວກເຂົາກ່າວແກ່ກັນແລະກັນວ່າ, “ຈົ່ງຕຽມພ້ອມ
ໃຫ້ພວກເຮົາໄປເຮັດເສິກຕໍ່ສູ້ເອໂດມເທາະ.”
2“ເຮົາຈະເຮັດໃຫ້ເຈົ້າອ່ອນກຳລັງ
ທຸກໆຄົນຈະດູໝິ່ນປະໝາດເຈົ້າ.
3ຄວາມອວດອົ່ງຂອງເຈົ້າໄດ້ລໍ້ລວງເຈົ້າເອງ
ເມືອງເອກມີປ້ອມກຳແພງສ້າງດ້ວຍຫີນດານ;
ເຮືອນຂອງເຈົ້າກໍຖືກສ້າງທີ່ເທິງພູເຂົາສູງທັງຫລາຍ
ສະນັ້ນ ເຈົ້າຈຶ່ງຄິດວ່າ, ‘ໃຜຈະດຶງຂ້ອຍລົງໄດ້?’
4ເຖິງວ່າເຈົ້ານັ້ນສ້າງເຮືອນຂອງເຈົ້າຂຶ້ນມາ
ສູງເທົ່າກັບຮັງຂອງນົກອິນຊີກໍຕາມ
ເພື່ອໃຫ້ປາກົດເຫັນຄືວ່າຢູ່ທ່າມກາງດວງດາວ
ເຖິງຢ່າງນັ້ນກໍຕາມ ເຮົາຈະດືງເຈົ້າລົງໃຫ້ໄດ້.” ພຣະເຈົ້າຢາເວກ່າວດັ່ງນີ້ແຫຼະ.
5“ເມື່ອພວກຂີ້ລັກມາໃນຕອນກາງຄືນ
ພວກເຂົາກໍລັກເອົາສິ່ງທີ່ພວກເຂົາຕ້ອງການເທົ່ານັ້ນ.
ເມື່ອເກັບໝາກອະງຸ່ນຄົນກໍປະໄວ້ພຽງໜ້ອຍດຽວ
ແຕ່ສັດຕູຂອງເຈົ້າ ໄດ້ກຳຈັດເຈົ້າໃຫ້ໝົດກ້ຽງ.
6ພວກເຈົ້າຜູ້ທີ່ເປັນເຊື້ອສາຍຂອງເອຊາວເອີຍ
ຊັບສົມບັດຂອງພວກເຈົ້າຖືກປຸ້ນໄປເສຍແລ້ວ.
7ພັນທະມິດຂອງພວກເຈົ້າໄດ້ຫລອກລວງພວກເຈົ້າສາແລ້ວ;
ພວກເຂົາໄດ້ໄລ່ໃຫ້ໜີຈາກດິນແດນຂອງພວກເຈົ້າເອງແລ້ວ.
ປະຊາຊົນທີ່ເຄີຍຢູ່ຢ່າງສະຫງົບສຸກກັບພວກເຈົ້າ
ມາບັດນີ້ ພວກເຂົາກໍໄດ້ຕີຊະນະພວກເຈົ້າສາແລ້ວ.
ພວກເພື່ອນເຫຼົ່ານັ້ນທີ່ໄດ້ກິນເຂົ້າຮ່ວມກັນ
ຕ່າງກໍໄດ້ຫ້າງແຮ້ວດັກຈັບພວກເຈົ້າ;
ພວກເຂົາຕ່າງກໍໄດ້ເວົ້າກ່ຽວກັບເຈົ້າວ່າ,
‘ຄວາມຫລັກແຫລມທີ່ລາວມີນັ້ນໄປໃສໝົດ?’
8ພຣະເຈົ້າຢາເວກ່າວວ່າ ໃນມື້ນັ້ນ
ເຮົາຈະລົງໂທດທັນຄົນຫລັກແຫລມ
ໃນເອໂດມໃຫ້ໝົດສິ້ນຕາມເທິງພູຂອງພວກເຂົາ
ແລະກຳຈັດສະຕິປັນຍາທັງໝົດຂອງພວກເຂົາ.
9ພວກນັກຮົບຂອງເຕມານຈະສະທ້ານຢ້ານກົວ
ແລະທະຫານທຸກຄົນໃນເອໂດມຈະຖືກຂ້າກ້ຽງ.
ເຫດຜົນທີ່ຊາດເອໂດມຖືກລົງໂທດ
10ຍ້ອນວ່າພວກເຈົ້າໄດ້ລັກແລະສັງຫານ
ອ້າຍເອື້ອຍນ້ອງຂອງຕົນເອງ ຄືເຊື້ອສາຍຂອງຢາໂຄບ.
ພວກເຈົ້າຈຶ່ງຈະຖືກທຳລາຍເຊັ່ນກັນ
ຈະຖືກລົດກຽດສັກສີໃຫ້ສູນສິ້ນຕະຫລອດໄປ.
11ພວກເຈົ້າຢືນຢູ່ຊື່ໆໃນມື້ທີ່ສັດຕູພັງປະຕູເມືອງຂອງພວກເຂົາ
ຕ່າງກໍຊົ່ວກັນໝົດເທົ່າກັບຄົນຕ່າງຊາດເຫຼົ່ານັ້ນ
ທີ່ໄດ້ຂົນຊັບສົມບັດໜີໄປຈາກນະຄອນເຢຣູຊາເລັມ
ແລະໄດ້ແບ່ງປັນໃນທ່າມກາງພວກເຂົາເຈົ້າ.
12ພວກເຈົ້າບໍ່ຄວນສົມນໍ້າໜ້າອ້າຍເອື້ອຍນ້ອງຂອງຕົນເອງ
ຄືຊາວຢູດາທັງໝົດທີ່ໄດ້ຮັບເຄາະກຳນັ້ນ.
ພວກເຈົ້າບໍ່ຄວນຊົມຊື່ນໃນມື້ທີ່ພວກເຂົາຫຼົ້ມຈົມ
ພວກເຈົ້າບໍ່ຄວນຫຍໍ້ຫຍັນເມື່ອພວກເຂົາຖືກລຳບາກ.
13ພວກເຈົ້າບໍ່ຄວນເຂົ້າໄປໃນເມືອງຄົນຂອງເຮົາ
ເພື່ອສົມນໍ້າໜ້າຄວາມທົນທຸກຂອງພວກເຂົາເຈົ້າ
ແລະພາກັນຢຶດເອົາຄວາມຮັ່ງມີຂອງພວກເຂົາໄປ
ໃນມື້ທີ່ພວກເຂົາໄດ້ຮັບຄວາມພິນາດ.
14ພວກເຈົ້າບໍ່ຄວນຢືນຢູ່ທີ່ສີ່ແຍກຖະໜົນຫົນທາງ
ເພື່ອຈັບກຸມເອົາຜູ້ທີ່ພະຍາຍາມປົບໜີໄປນັ້ນ.
ພວກເຈົ້າບໍ່ຄວນຈັບພວກເຂົາສົ່ງໄປໃຫ້ພວກສັດຕູ
ໃນມື້ທີ່ພວກເຂົາໄດ້ຮັບຄວາມທົນທຸກ.
ພຣະເຈົ້າຈະຕັດສິນຊົນຊາດຕ່າງໆ
15ວັນຂອງພຣະເຈົ້າຢາເວກໍຫຍັບເຂົ້າມາໃກ້ແລ້ວ
ທີ່ຈະຕັດສິນໝົດທຸກຊົນຊາດ.
ເອໂດມເອີຍ ສິ່ງທີ່ເຈົ້າໄດ້ເຮັດແກ່ພວກເຂົາສັນໃດ
ກໍຈະຖືກເຮັດໃຫ້ຄືນແກ່ເຈົ້າສັນນັ້ນ.
ເຈົ້າໄດ້ໃຫ້ແກ່ພວກເຂົາສິ່ງໃດ
ພວກເຂົາກໍຈະໃຫ້ຄືນແກ່ເຈົ້າສິ່ງນັ້ນ.
16ປະຊາຊົນຂອງເຮົາໄດ້ດື່ມ ທີ່ເນີນພູສັກສິດຂອງເຮົາ
ຈາກຈອກແຫ່ງການລົງໂທດອັນຂົມຂື່ນ.
ແຕ່ໝົດທຸກຊົນຊາດທີ່ຢູ່ອ້ອມແອ້ມພວກເຂົາຄືກັນ
ກໍຈະໄດ້ດື່ມຈອກອັນຂົມຂື່ນນັ້ນໜັກກວ່າ;
ພວກເຂົາຈະພາກັນດື່ມຈາກຈອກນັ້ນຈົນໝົດ
ແລະຕ່າງກໍຈະສະຫລາຍໄປຈົນໝົດສິ້ນ.
ຊາດອິດສະຣາເອນຈະໄດ້ຮັບໄຊຊະນະ
17ແຕ່ບາງຄົນເຫຼືອຢູ່ທີ່ພູເຂົາຊີໂອນຈະໄດ້ພົ້ນໄພ
ທີ່ນັ້ນຈະໄດ້ເປັນສະຖານທີ່ສັກສິດທີ່ສຸດແທ້ໆ.
ປະຊາຊົນຂອງຢາໂຄບຈະໄດ້ເປັນກຳມະສິດ
ດິນແດນທີ່ເປັນຂອງພວກເຂົາຕາມສິດທິທີ່ພວກເຂົາມີຢູ່.
18ຄົນຂອງຢາໂຄບແລະໂຢເຊັບຈະເປັນດັ່ງໄຟ
ຈະທຳລາຍຄົນຂອງເອຊາວດັ່ງໄຟໄໝ້ເຟືອງແຫ້ງ.
ເຊື້ອສາຍເອຊາວຈະບໍ່ມີຜູ້ໃດໄດ້ລອດຊີວິດຢູ່.”
ພຣະເຈົ້າຢາເວໄດ້ກ່າວດັ່ງນີ້ແຫຼະ.
19ຄົນຈາກພາກໃຕ້ຢູດາຍຈະເຂົ້າຄອບຄອງເອໂດມ
ຄົນຈາກຕີນພູພາກຕາເວັນຕົກຈະຢຶດຟີລິດສະຕິນໄດ້
ຊາວອິດສະຣາເອນຈະໄດ້ເປັນກຳມະສິດດິນແດນ
ຂອງເອຟຣາອິມແລະຊາມາເຣຍດ້ວຍ;
ປະຊາຊົນຊາວເບັນຢາມິນກໍເຊັ່ນກັນ
ຈະຢຶດຄອງເຂດແດນກີເລອາດ.
20ຈາກທິດເໜືອກອງທັບຂອງພວກທີ່ຖືກຈັບໄປ
ຈະຕ່າວກັບຄືນມາສູ່ດິນແດນອີກ;
ພວກເຂົາຈະຕີຊະນະໂຟນີເຊຍ
ແລະພາກເໜືອສຸດຂອງຊາເຣຟັດດ້ວຍ.
ພວກທີ່ໄດ້ຖືກຈັບໄປຈາກນະຄອນເຢຣູຊາເລັມ
ຄືພວກທີ່ໄດ້ອາໄສຢູ່ໃນເມືອງຊາກດິດນັ້ນ
ພວກເຂົາຈະໂຈມຕີເມືອງເລັກເມືອງນ້ອຍທັງຫລາຍ
ທີ່ຢູ່ໃນດິນແດນຢູດາຍທາງເຂດພາກໃຕ້ຄືເນເກັບ.
21ພວກຜູ້ຊາຍທີ່ມີໄຊຊະນະຂອງເຢຣູຊາເລັມ
ພວກເຂົາຈະໂຈມຕີເອົາເອໂດມໄດ້
ແລະທັງຈະປົກຄອງພວກເຂົາຄືກັນ
ແລະອານາຈັກຈະເປັນຂອງພຣະເຈົ້າຢາເວ.
Currently Selected:
ໂອບາດີຢາ 1: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
