ຈົດບັນຊີ 36
36
ມໍຣະດົກຂອງຍິງທີ່ແຕ່ງງານແລ້ວ
1ບັນດາຫົວໜ້າຄອບຄົວຕ່າງໆຢູ່ໃນຕະກຸນກີເລອາດ ລູກຊາຍຂອງມາກີ ແລະຫລານຊາຍຂອງມານາເຊລູກຊາຍຂອງໂຢເຊັບ ໄດ້ມາຫາໂມເຊກັບພວກຜູ້ນຳຄົນອື່ນໆ. 2ພວກເຂົາກ່າວວ່າ, “ພຣະເຈົ້າຢາເວໄດ້ສັ່ງທ່ານ ໃຫ້ແບ່ງປັນດິນແດນແກ່ປະຊາຊົນອິດສະຣາເອນ ໂດຍວິທີໃຊ້ສະຫລາກ. ພຣະເຈົ້າຢາເວຍັງໄດ້ສັ່ງທ່ານໃຫ້ຍົກດິນແດນ ທີ່ເປັນສ່ວນຂອງເຊໂລເຟຮັດພີ່ນ້ອງຂອງພວກເຮົາໃຫ້ພວກລູກສາວຂອງລາວ. 3ບັດນີ້ ຖ້າພວກເຂົາຫາກແຕ່ງງານກັບຜູ້ຊາຍຢູ່ໃນເຜົ່າອື່ນຂອງອິດສະຣາເອນ ຊັບສິນຂອງພວກເຂົາຈະເປັນຂອງເຜົ່ານັ້ນ ແລະສ່ວນແບ່ງໃນດິນແດນຂອງພວກເຮົາກໍຈະຫລຸດນ້ອຍລົງ. 4ໃນປີຄົບຮອບຫ້າສິບປີ ເມື່ອທີ່ດິນທີ່ໄດ້ຂາຍໄປນັ້ນຖືກສົ່ງຄືນໃຫ້ແກ່ເຈົ້າຂອງເດີມ ທີ່ດິນຂອງພວກເຂົາຈະຖືກເພີ່ມເຂົ້າກັບເຜົ່າຂອງຝ່າຍຊາຍ ທີ່ພວກເຂົາໄດ້ແຕ່ງງານນຳນັ້ນ ແລະເຜົ່າຂອງພວກເຮົາກໍຈະເປັນຝ່າຍສູນເສຍ.”
5ດັ່ງນັ້ນ ໂມເຊຈຶ່ງບອກປະຊາຊົນໃຫ້ເຮັດຕາມຄຳສັ່ງຂອງພຣະເຈົ້າຢາເວ ດັ່ງນີ້: “ເລື່ອງທີ່ເຜົ່າມານາເຊເວົ້າມານັ້ນແມ່ນຖືກຕ້ອງ 6ສະນັ້ນ ພຣະເຈົ້າຢາເວຈຶ່ງໄດ້ກ່າວວ່າ, ‘ພວກລູກສາວຂອງເຊໂລເຟຮັດມີສິດທີ່ຈະແຕ່ງງານກັບໃຜກໍໄດ້ ແຕ່ຕ້ອງແມ່ນຄົນໃນເຜົ່າດຽວກັນ.’ 7ທີ່ດິນຂອງຊາວອິດສະຣາເອນແຕ່ລະຄົນຈະຍັງຄົງຢູ່ໃນເຜົ່າຂອງຕົນ. 8ຍິງທຸກໆຄົນທີ່ສືບທອດມໍຣະດົກຢູ່ໃນເຜົ່າໜຶ່ງຂອງຊາດອິດສະຣາເອນ ຕ້ອງແຕ່ງງານກັບຊາຍທີ່ຢູ່ໃນເຜົ່ານັ້ນ. ໃນທຳນອງນີ້ ຊາວອິດສະຣາເອນແຕ່ລະຄົນຈະໄດ້ສືບມໍຣະດົກຂອງບັນພະບຸລຸດຂອງຕົນ 9ແລະຊັບສິນກໍຈະບໍ່ຕົກເປັນຂອງຄົນໃນເຜົ່າອື່ນ. ແຕ່ລະເຜົ່າຈະສືບຕໍ່ເປັນກຳມະສິດຊັບສິນທີ່ດິນໃນເຜົ່າຂອງຕົນເອງ.”
10-11ສະນັ້ນ ບັນດາລູກສາວຂອງເຊໂລເຟຮັດຄື: ມາຮະລາ, ຕີຣະຊາ, ໂຮກະລາ, ມີລະກາ ແລະໂນອາ ຈຶ່ງເຮັດຕາມທີ່ພຣະເຈົ້າຢາເວໄດ້ສັ່ງໂມເຊ ແລະພວກເຂົາກໍໄດ້ແຕ່ງງານກັບຊາຍໃນເຊື້ອສາຍດຽວກັນ 12ພວກເຂົາແຕ່ງງານກັບຊາຍໃນຕະກຸນຂອງເຜົ່າມານາເຊລູກຊາຍຂອງໂຢເຊັບ ແລະຊັບສິນທີ່ດິນຂອງພວກເຂົາກໍຍັງຢູ່ໃນເຜົ່າພໍ່ຂອງພວກຕົນຕໍ່ໄປ.
13ລະບຽບການຕ່າງໆເຫຼົ່ານີ້ແມ່ນພຣະເຈົ້າຢາເວ ທີ່ໄດ້ມອບໃຫ້ແກ່ຊາວອິດສະຣາເອນໂດຍຜ່ານທາງໂມເຊ ໃນທົ່ງພຽງຂອງໂມອາບ ທີ່ຟາກໜຶ່ງອີກຂອງແມ່ນໍ້າຈໍແດນຈາກເມືອງເຢຣິໂກ.
Currently Selected:
ຈົດບັນຊີ 36: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.