ເຢເຣມີຢາ 32

1ໃນຣາຊການປີທີສິບຂອງກະສັດເຊເດກີຢາແຫ່ງຢູດາຍ ອັນກົງກັບຣາຊການປີທີສິບແປດຂອງກະສັດເນບູກາດເນັດຊາແຫ່ງບາບີໂລນ ພຣະເຈົ້າຢາເວໄດ້ກ່າວແກ່ຂ້າພະເຈົ້າ. 2ໃນເວລານັ້ນ ກອງທັບຂອງກະສັດແຫ່ງບາບີໂລນກຳລັງໂຈມຕີນະຄອນເຢຣູຊາເລັມ; ສ່ວນຂ້າພະເຈົ້ານັ້ນຖືກກັກຂັງໄວ້ຢູ່ໃນບໍລິເວນຂອງຣາຊວັງ. 3ກະສັດເຊເດກີຢາໄດ້ຂັງຂ້າພະເຈົ້າໄວ້ຢູ່ໃນທີ່ນັ້ນ ແລະກ່າວຫາຂ້າພະເຈົ້າວ່າ, “ດ້ວຍເຫດໃດເຈົ້າຈຶ່ງທຳນວາຍວ່າພຣະເຈົ້າຢາເວກ່າວດັ່ງນີ້ວ່າ: ‘ເຮົາກຳລັງໃຫ້ກະສັດແຫ່ງບາບີໂລນຢຶດເອົານະຄອນນີ້ 4ແລະກະສັດເຊເດກີຢາແຫ່ງຢູດາຍກໍຈະປົບໜີໄປບໍ່ໄດ້. ລາວຈະຖືກຈັບສົ່ງໄປໃຫ້ກະສັດແຫ່ງບາບີໂລນ; ລາວຈະໄດ້ເຫັນກະສັດແຫ່ງບາບີໂລນໜ້າຕໍ່ໜ້າ ທັງຈະເວົ້າກັບລາວຕົວຕໍ່ຕົວ. 5ເຊເດກີຢາຈະຖືກຈັບໄປບາບີໂລນ ແລະລາວຈະຢູ່ທີ່ນັ້ນ ຈົນກວ່າເຮົາຈະຈັດການກັບລາວ.’ ພຣະເຈົ້າຢາເວກ່າວວ່າ, ‘ເຖິງແມ່ນວ່າລາວຈະສູ້ຮົບຊາວບາບີໂລນ ແຕ່ກໍຈະບໍ່ສຳເລັດຜົນ.”’

6ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ: 7ຮານາເມນລູກຊາຍຂອງຊານລູມລູງຂອງຂ້າພະເຈົ້າ ຈະມາຂໍໃຫ້ຂ້າພະເຈົ້າຊື້ນາຂອງລາວ ທີ່ອານາທົດຢູ່ໃນເຂດແດນຂອງເບັນຢາມິນ ຍ້ອນຂ້າພະເຈົ້າເປັນພີ່ນ້ອງທີ່ໃກ້ຊິດ ແລະມີສິດຊື້ນານັ້ນສຳລັບຂ້າພະເຈົ້າເອງ. 8ແລ້ວດັ່ງທີ່ພຣະເຈົ້າຢາເວໄດ້ກ່າວ ຮານາເມນກໍມາຫາຂ້າພະເຈົ້າທີ່ບໍລິເວນຣາຊວັງ ແລະຂໍໃຫ້ຂ້າພະເຈົ້າຊື້ນາຂອງລາວ. ດັ່ງນັ້ນ ຂ້າພະເຈົ້າຈຶ່ງຮູ້ໄດ້ວ່າ ພຣະເຈົ້າຢາເວໄດ້ກ່າວແກ່ຂ້າພະເຈົ້າແທ້. 9ຂ້າພະເຈົ້າໄດ້ຊື້ນາຈາກຮານາເມນ ແລະຊັ່ງເງິນຈຳນວນສິບເຈັດຫລຽນຈ່າຍໃຫ້ລາວ. 10ຂ້າພະເຈົ້າໄດ້ເຊັນຊື່ ແລະປະທັບຕາໜັງສືໃບຕາດິນ ໂດຍມີພະຍານຮູ້ເຫັນນຳດ້ວຍແລະຊັ່ງເງິນຈ່າຍໃຫ້. 11ແລ້ວຂ້າພະເຈົ້າກໍເອົາໃບຊື້ຂາຍຕາດິນສອງສະບັບນັ້ນ ຄືສະບັບທີ່ໄດ້ປະທັບຕາໂດຍມີສັນຍາ ແລະເງື່ອນໄຂຕ່າງໆ ແລະສະບັບທີ່ບໍ່ໄດ້ປະທັບຕາ 12ແລະໄປໃຫ້ບາຣຸກລູກຊາຍຂອງເນຣີຢາ ແລະຫລານຊາຍຂອງມາຮະເຊຢາ. ຂ້າພະເຈົ້າໄດ້ມອບໃບຕາດິນນັ້ນໃຫ້ລາວ ໂດຍຊ້ອງໜ້າຮານາເມນແລະພວກພະຍານ ທີ່ໄດ້ເຊັນໜັງສືຊື້ຂາຍລວມທັງຄົນທີ່ໄດ້ນັ່ງຢູ່ໃນບໍລິເວນນັ້ນ. 13ຢູ່ຊ້ອງໜ້າພວກເຂົາທັງໝົດ ຂ້າພະເຈົ້າໄດ້ກ່າວແກ່ບາຣຸກວ່າ, 14“ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງຊາດອິດສະຣາເອນ ໄດ້ສັ່ງເຈົ້າໃຫ້ຮັບເອົາໜັງສືຊື້ຂາຍເຫຼົ່ານີ້ ຄືໜັງສືທັງສະບັບທີ່ປະທັບຕາແລະບໍ່ປະທັບຕາ ແລະໃຫ້ເອົາໄປໄວ້ໃນໄຫເພື່ອເກັບຮັກສາໄວ້ໃນພາຍຄັ້ງໜ້າ. 15ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງຊາດອິດສະຣາເອນໄດ້ກ່າວວ່າ ເຮືອນ, ທົ່ງໄຮ່ທົ່ງນາ ແລະສວນໝາກອະງຸ່ນ ຈະໄດ້ມີການຊື້ຂາຍກັນອີກໃນດິນແດນນີ້.”

16ຫລັງຈາກຂ້າພະເຈົ້າໄດ້ມອບໜັງສືຊື້ຂາຍໃຫ້ບາຣຸກລູກຊາຍຂອງເນຣີຢາແລ້ວ ຂ້າພະເຈົ້າກໍໄດ້ພາວັນນາອະທິຖານຕໍ່ພຣະເຈົ້າຢາເວວ່າ, 17“ຂ້າແດ່ອົງພຣະຜູ້ເປັນເຈົ້າ ພຣະເຈົ້າ ພຣະອົງໄດ້ສ້າງຈັກກະວານ ແລະແຜ່ນດິນໂລກ ໂດຍຣິດອຳນາດອັນຍິ່ງໃຫຍ່ຂອງພຣະອົງ; ບໍ່ມີສິ່ງໃດເລີຍຍາກສຳລັບພຣະອົງ. 18ພຣະອົງໄດ້ສະແດງຄວາມຮັກອັນໝັ້ນຄົງຕໍ່ຫລາຍພັນເຊັ່ນຄົນ ແຕ່ພຣະອົງກໍລົງໂທດປະຊາຊົນສຳລັບການບາບຂອງພໍ່ແມ່ຂອງພວກເຂົາດ້ວຍ. ພຣະອົງເປັນພຣະເຈົ້າອົງຍິ່ງໃຫຍ່ແລະຊົງຣິດເດດ; ຜູ້ມີນາມຊື່ພຣະເຈົ້າຢາເວອົງຊົງຣິດອຳນາດຍິ່ງໃຫຍ່. 19ພຣະອົງວາງແຜນໄດ້ດີເລີດ ແລະເຮັດສິ່ງຕ່າງໆດ້ວຍຣິດອຳນາດ. ພຣະອົງເຫັນທຸກໆສິ່ງທີ່ມະນຸດເຮັດ ແລະພຣະອົງໃຫ້ບຳເໜັດຕາມການກະທຳຂອງພວກເຂົາ. 20ດົນນານມາແລ້ວ ພຣະອົງໄດ້ເຮັດສິ່ງທີ່ໜ້າງຶດງໍ້ອັດສະຈັນຢູ່ໃນປະເທດເອຢິບ ແລະພຣະອົງໄດ້ສືບຕໍ່ເຮັດຈົນເຖິງວັນນີ້ ແລະໃນຊົນຊາດອິດສະຣາເອນ ແລະຊົນຊາດອື່ນດ້ວຍ ເພື່ອວ່າທຸກໆບ່ອນຈະໄດ້ຮູ້ຈັກພຣະອົງ. 21ໂດຍການອັດສະຈັນ ແລະສິ່ງທີ່ໜ້າງຶດງໍ້ຕ່າງໆ ທີ່ເຫຼົ່າສັດຕູຂອງພວກຂ້ານ້ອຍຢ້ານກົວນັ້ນ ພຣະອົງໄດ້ໃຊ້ຣິດທານຸພາບນຳປະຊາຊົນອິດສະຣາເອນອອກມາຈາກປະເທດເອຢິບ. 22ພຣະອົງໄດ້ມອບດິນແດນທີ່ອຸດົມສົມບູນ ແລະຮັ່ງມີບ່ອນນີ້ໃຫ້ພວກເຂົາ ຕາມທີ່ພຣະອົງໄດ້ສັນຍາໄວ້ກັບບັນພະບຸລຸດຂອງພວກເຂົາ. 23ແຕ່ພໍພວກເຂົາໄດ້ເຂົ້າຄອບຄອງດິນແດນນີ້ແລ້ວ ກໍບໍ່ໄດ້ເຊື່ອຟັງຂໍ້ຄຳສັ່ງຂອງພຣະອົງ ຫລືດຳເນີນຊີວິດຕາມຄຳສັ່ງສອນຂອງພຣະອົງ; ພວກເຂົາບໍ່ໄດ້ເຮັດຕາມສິ່ງທີ່ພຣະອົງໄດ້ສັ່ງໃຫ້ເຮັດ. ສະນັ້ນ ພຣະອົງຈຶ່ງໄດ້ນຳໄພພິບັດນີ້ມາສູ່ພວກເຂົາ.

24ຊາວບາບີໂລນໄດ້ສ້າງເຄື່ອງປິດລ້ອມເພື່ອຢຶດເອົາເມືອງ ແລະກໍຈະໂຈມຕີເມືອງ. ເສິກສົງຄາມ, ການຕາຍອຶດຕາຍຫິວ ແລະການເຈັບໄຂ້ໄດ້ປ່ວຍ ຈະເຮັດໃຫ້ເມືອງນີ້ຕົກຢູ່ໃນກຳມືຂອງພວກເຂົາ. ພຣະອົງເຫັນໄດ້ວ່າເຫດການທັງໝົດທີ່ພຣະອົງໄດ້ກ່າວນັ້ນຈະກາຍເປັນຈິງ. 25ຂ້າແດ່ອົງພຣະຜູ້ເປັນເຈົ້າ ພຣະເຈົ້າເອີຍ ແຕ່ເຖິງປານນັ້ນກໍຕາມ ພຣະອົງແມ່ນຜູ້ທີ່ໄດ້ສັ່ງໃຫ້ຂ້ານ້ອຍຊື້ນາທົ່ງນີ້ຊ້ອງໜ້າພະຍານທັງຫລາຍ ເຖິງແມ່ນວ່າເມືອງນີ້ກຳລັງຈະຖືກຊາວບາບີໂລນເຂົ້າຢຶດແລ້ວກໍຕາມ.”

26ແລ້ວຖ້ອຍຄຳຂອງພຣະເຈົ້າຢາເວກໍໄດ້ມາເຖິງຂ້າພະເຈົ້າວ່າ, 27“ເຮົາແມ່ນພຣະເຈົ້າຢາເວ ພຣະເຈົ້າຂອງເຊື້ອຊາດມະນຸດທັງປວງ. ບໍ່ມີຫຍັງຍາກເກີນໄປສຳລັບເຮົາ. 28ເພາະສະນັ້ນ ພຣະເຈົ້າຢາເວຈຶ່ງກ່າວວ່າ, ເຮົາກຳລັງຈະມອບເມືອງນີ້ ໃຫ້ຢູ່ໃນກຳມືຂອງກະສັດເນບູກາດເນັດຊາແຫ່ງບາບີໂລນກັບກອງທັບຂອງລາວ. 29ພວກເຂົາຈະຢຶດເມືອງແລະຈູດເຜົາເມືອງຖິ້ມ. ພວກເຂົາຈະຈູດເມືອງ ພ້ອມກັບເຮືອນຂອງປະຊາຊົນຜູ້ທີ່ເຮັດໃຫ້ເຮົາໂກດຮ້າຍ ໂດຍເຜົາເຄື່ອງຫອມໃຫ້ພະບາອານທີ່ເທິງຫລັງຄາ ແລະໂດຍເທເຫຼົ້າອະງຸ່ນຖວາຍແກ່ບັນດາພະອື່ນ. 30ຕັ້ງແຕ່ເລີ່ມຕົ້ນປະຫວັດສາດຂອງພວກເຂົາມາ ປະຊາຊົນອິດສະຣາເອນ ແລະປະຊາຊົນຢູດາບໍ່ໄດ້ເຮັດໃຫ້ເຮົາພໍໃຈນຳເລີຍ; ມີແຕ່ເຮັດໃຫ້ເຮົາໂກດຮ້າຍເທົ່ານັ້ນໃນສິ່ງທີ່ພວກເຂົາໄດ້ກະທຳ. ພຣະເຈົ້າຢາເວກ່າວວ່າ, 31ປະຊາຊົນໃນເມືອງນີ້ໄດ້ເຮັດໃຫ້ເຮົາໂກດຮ້າຍ ແລະໂມໂຫ ມາແຕ່ມື້ທີ່ໄດ້ຖືກສ້າງຂຶ້ນມາ. ເຮົາໄດ້ຕັດສິນໃຈທຳລາຍມັນສາແລ້ວ 32ຍ້ອນຄວາມຊົ່ວທັງໝົດທີ່ປະຊາຊົນຢູດາ ແລະຊາວນະຄອນເຢຣູຊາເລັມໄດ້ກະທຳຮ່ວມກັບບັນດາກະສັດ ແລະພວກເຈົ້ານາຍ ພວກປະໂຣຫິດ ແລະພວກຜູ້ທຳນວາຍ. 33ພວກເຂົາໄດ້ຫັນຫລັງໃຫ້ເຮົາ ເຖິງແມ່ນວ່າເຮົາໄດ້ສືບຕໍ່ສັ່ງສອນພວກເຂົາສໍ່າໃດກໍດີ; ແຕ່ພວກເຂົາກໍບໍ່ຍອມຟັງແລະຮຽນຮູ້ເລີຍ. 34ພວກເຂົາເອົາແມ່ນແຕ່ຮູບເຄົາຣົບອັນໜ້າລັງກຽດມາວາງໄວ້ໃນພຣະວິຫານ ທີ່ໄດ້ຖືກສ້າງໄວ້ເພື່ອນະມັດສະການເຮົາ ໂດຍໄດ້ເຮັດໃຫ້ພຣະວິຫານນັ້ນເປັນມົນທິນ. 35ພວກເຂົາໄດ້ສ້າງແທ່ນບູຊາໃຫ້ພະບາອານໃນຮ່ອມພູຮິນໂນມ ເພື່ອຖວາຍບູຊາລູກຊາຍແລະລູກສາວຂອງພວກເຂົາໃຫ້ພະໂມເລັກ. ເຮົາບໍ່ໄດ້ສັ່ງພວກເຂົາໃຫ້ເຮັດສິ່ງນີ້ ແລະແມ່ນແຕ່ໃນຄວາມນຶກຄິດຂອງເຮົາກໍບໍ່ມີສິ່ງນີ້ເລີຍ. ການກະທຳອັນໜ້າລັງກຽດຂອງພວກເຂົານີ້ຈະພາໃຫ້ຊາວຢູດາເຮັດບາບ.”

36ແລ້ວພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ກໍກ່າວແກ່ຂ້າພະເຈົ້າວ່າ, “ເຢເຣມີຢາເອີຍ ປະຊາຊົນກຳລັງເວົ້າວ່າ ສົງຄາມ, ການຕາຍອຶດຕາຍຫິວ ແລະການເຈັບໄຂ້ໄດ້ປ່ວຍ ຈະເຮັດໃຫ້ເມືອງນີ້ຕົກຢູ່ໃນກຳມືຂອງກະສັດແຫ່ງບາບີໂລນ. ບັດນີ້ ຈົ່ງຟັງສິ່ງອື່ນອີກທີ່ເຮົາຈະຕ້ອງກ່າວ. 37ເຮົາຈະເຕົ້າໂຮມປະຊາຊົນຈາກທຸກປະເທດ ບ່ອນທີ່ເຮົາໄດ້ໃຫ້ພວກເຂົາກະຈັດກະຈາຍໄປນັ້ນ ເພາະຄວາມໂກດຮ້າຍແລະໂມໂຫຂອງເຮົາ ແລະເຮົາຈະນຳພວກເຂົາກັບຄືນມາບ່ອນນີ້ອີກ ແລະເຮົາຈະໃຫ້ພວກເຂົາຢູ່ທີ່ນີ້ຢ່າງປອດໄພ. 38ແລ້ວພວກເຂົາກໍຈະໄດ້ເປັນປະຊາຊົນຂອງເຮົາ ແລະເຮົາກໍຈະເປັນພຣະເຈົ້າຂອງພວກເຂົາ. 39ເຮົາຈະໃຫ້ພວກເຂົາມີຈຸດມຸ່ງໝາຍຢ່າງດຽວໃນຊີວິດ ຄືຍ້ອງຍໍໃຫ້ກຽດເຮົາຕະຫລອດໄປເພື່ອປະໂຫຍດຂອງພວກເຂົາເອງ ແລະເຊື້ອສາຍຂອງພວກເຂົາ. 40ເຮົາຈະເຮັດພັນທະສັນຍາອັນຖາວອນກັບພວກເຂົາ. ເຮົາຈະບໍ່ຢຸດຢັ້ງທີ່ຈະເຮັດສິ່ງທີ່ດີສຳລັບພວກເຂົາ ແລະເຮົາກໍຈະເຮັດໃຫ້ພວກເຂົາຢຳເກງເຮົາດ້ວຍໝົດຈິດໝົດໃຈ ເພື່ອວ່າພວກເຂົາຈະບໍ່ໄດ້ຫັນໜີໄປຈາກເຮົາ. 41ເຮົາຈະເຮັດດີຕໍ່ພວກເຂົາດ້ວຍຄວາມເຕັມໃຈ ແລະເຮົາກໍຈະໃຫ້ພວກເຂົາຢູ່ໃນດິນແດນນີ້ຕະຫລອດໄປ.

42ພຣະເຈົ້າຢາເວກ່າວວ່າ ເຮົາໄດ້ນຳໄພພິບັດນີ້ມາສູ່ປະຊາຊົນເຫຼົ່ານີ້ສັນໃດ ເຮົາກໍຈະນຳສິ່ງທີ່ດີຕາມທີ່ເຮົາໄດ້ສັນຍາໄວ້ມາສູ່ພວກເຂົາສັນນັ້ນ. 43ປະຊາຊົນຈະເວົ້າວ່າ ‘ດິນແດນນີ້ເປັນດັ່ງຖິ່ນແຫ້ງແລ້ງກັນດານ ບ່ອນທີ່ບໍ່ມີທັງຄົນແລະສັດອາໄສຢູ່ ແລະຈະຖືກມອບໃຫ້ແກ່ຊາວບາບີໂລນ. ແຕ່ທົ່ງນາຈະມີການຊື້ຂາຍກັນອີກເທື່ອໜຶ່ງ.’ 44ປະຊາຊົນຈະຊື້ທົ່ງນາເຫຼົ່ານັ້ນ ແລະຈະເຊັນຊື່ທັງປະທັບຕາໃນໃບຕາດິນ ແລະມີຫຼັກຖານພະຍານດ້ວຍ. ເຫດການນີ້ຈະເກີດຂຶ້ນໃນເຂດແດນຂອງເບັນຢາມິນ, ໃນໝູ່ບ້ານອ້ອມແອ້ມນະຄອນເຢຣູຊາເລັມ, ໃນເມືອງຕ່າງໆຂອງຢູດາຍ ແລະໃນເມືອງຕ່າງໆຕາມເຂດເນີນພູ, ທີ່ຕີນພູຕ່າງໆ ແລະທາງພາກໃຕ້ຂອງຢູດາຍ. ເຮົາຈະປົວແປງປະຊາຊົນຂອງເຮົາຢູ່ໃນດິນແດນຂອງພວກເຂົາຂຶ້ນໃໝ່.” ພຣະເຈົ້າຢາເວກ່າວດັ່ງນັ້ນແຫຼະ.

Popular Bible Verses from
ເຢເຣມີຢາ 32

Video for ເຢເຣມີຢາ 32

Jeremiah 26-45

Bible:

ລາວ

Version: ພຣະຄຳພີສັກສິ - ພຄພ