Xekhaliyas 14

Yeluxalees Hab Txhua Tsaav Tuabneeg

1Nub kws tug TSWV yuav lug nyob ntawm lub rooj txavtxim tub lug ze lawm. Lub nroog Yeluxalees yuav raug luas fuab, hab tej khoom kws luas fuab tau ntawd yuav muab faib taabmeeg mej. 2Tug TSWV yuav coj txhua tsaav tuabneeg tuaj uake uarog rua lub nroog Yeluxalees. Luas yuav txeeb tau lub nroog hab fuab tej vaajtse, hab tej quaspuj yuav raug luas yuam. Cov tuabneeg ibnraab yuav raug luas nteg coj moog rua lwm tebchaws, tabsis cov kws seem tuag yuav tsi raug coj tawm huv lub nroog moog. 3Tes tug TSWV yuav tawm moog uarog rua txhua tsaav tuabneeg ntawd, ib yaam le Nwg tau ua yaav taag lug lawm. 4Thaus txug lub sijhawm ntawd, Nwg yuav sawv sau lub Roob Txiv Ntoo-Roj kws nyob ntawm lub nroog Yeluxalees saab nubtuaj. Tes lub Roob Txiv Ntoo-Roj yuav raug faib ua ob saab, txij ndlua saab nubtuaj moog rua saab nubpoob, lug ntawm ib lub kwjhaa luj heev. Lub roob ntawd ib saab yuav txaav nce toj moog rua saab qaumteb, hab ib saab yuav txaav nqeg moog rua saab qaabteb. 5Mej yuav tsiv dlim huv lub haav kws muab lub roob faib ua ob saab ntawd moog.#14:5: Nqai nuav sau has tas Mej yuav tsiv … ntawd moog paub tsi meej tas lulug Henplais yog txhais lecaag tag txug qhov nuav. Mej yuav tsiv dlim ib yaam le mej cov yawmkoob tsiv thaus aav qeeg tam kws Vaajntxwv Uxiyas kaav tebchaws Yudas. Tug TSWV kws yog kuv tug Vaajtswv yuav lug, hab coj taagnrho cov timtswv ceebtsheej kws dlawbhuv nrug Nwg lug.

6Thaus txug lub sijhawm ntawd, yuav tsi muaj dluab tshaavntuj lossis yuav tsi no hab dlej yuav tsi nkoog,#14:6: Nqai nuav sau has tas dluab tshaavntuj … tsi nkoog; paub tsi meej tas lulug Henplais yog txhais lecaag tag txug qhov nuav. 7lossis tsi muaj qhov tsausntuj le. Txawm yog montuj los yuav pumkev kaajnrig. Tsuas yog tug TSWV tuableeg xwb txhaj paub tas thaus twg lub sijhawm nuav maamle lug txug.

8Thaus txug nub ntawd, yuav muaj ib tug dlej txhawv huv lub nroog Yeluxalees lug, ib ceg yuav ndlwg moog rua nraag Havtxwv Tuag hab ib ceg yuav ndlwg moog rua tom Havtxwv Meditelanees. Tug dlej ntawd yuav ndlwg thaws naj thaws xyoo, tsi has lub caij ntuj qhua lossis lub caij ntuj naag. #Exek 47:1; Yauh 7:38; Tshwm 21:1 9Tug TSWV yuav ua Vaajntxwv kaav taagnrho lub nplajteb; nub ntawd yuav muaj tuabtug Vaajtswv xwb, hab suavdlawg yuav pehawm Nwg lub npe nkaus xwb.

10Taagnrho cheebtsaam, txij ndlua ntawm Nkenpas kws nyob saab qaumteb lug txug rua ntawm Limoos kws nyob saab qaabteb, mas yuav muab meem kuas taj sistxig. Tabsis lub nroog Yeluxalees yuav raug tsaa rua lub chaw sab pib kag ntawm lub Roojloog Npeeyamees moog txug ncua ntawm lub Roojloog Cegkaum kws yeej yog ib lub roojloog thaus u lug lawm, hab txij ndlua ntawm lub chaw Tsomfaaj Hananees moog rua ntawm vaajntxwv lub chaw tsuam txivmaab. 11Cov tuabneeg yuav nyob kaajsab lug huv qhov chaw ntawd, yuav tsi muaj kev puamtsuaj lug raug puab ib zag ntxiv le lawm. #Tshwm 22:3

12Tug TSWV yuav tso ib yaam kaab mob kws txaus ntshai heev lug rua txhua tsaav tuabneeg kws tuaj uarog tawmtsaam lub nroog Yeluxalees. Puab tej nqaj yuav lwj thaus puab tseem cajsa; puab lub qhovmuag hab tug nplaig yuav lwj taag huv tuabsi.

13Lub sijhawm ntawd tug TSWV yuav ua kuas puab feeb tsi meej hab ntshai heev, puab ib leeg yuav nteg ib leeg hab ib leeg yuav ntaus ib leeg. 14Cov Yudais yuav tivthaiv lub nroog Yeluxalees. Puab yuav muab txhua tsaav tuabneeg tej khoom muajnqes: kub, nyaj, hab tsoogtsho ntau heev.

15Tej kaab mob phem kws txaus ntshai nuav yuav raug tej neeg, tej neeg zaag, tej ntxhuav, tej neegluav, hab raug txhua yaam tsaj kws nyob huv cov yeebncuab tej yeej.

16Mas cov tuabneeg kws seem tuag ntawm txhua tsaav tuabneeg kws tuaj tua lub nroog Yeluxalees, yuav naj xyoo tuaj pehawm Vaajntxwv, kws yog tug TSWV tug muaj Fwjchim Luj Kawg Nkaus, hab ua kevcai nyob Tsev Pheebsuab huv lub nroog Yeluxalees. #Levi 23:39-43 17Yog tas ib tsaav tuabneeg twg tsi kaam moog pehawm tug TSWV, kws yog tug Vaajntxwv kws muaj Fwjchim Luj Kawg Nkaus, mas yuav tsi muaj naag lug rua huv puab lub tebchaws. 18Yog cov Iziv tsi kaam tuaj ua kevcai nyob Tsev Pheebsuab, mas puab yuav raug yaam kaab mob phem kws tug TSWV tso lug rua txhua lub tebchaws kws tsi kaam moog pehawm Nwg ntawd. 19Tej nuav yog txuj kev rautxim kws yuav raug cov tuabneeg Iziv hab txhua tsaav tuabneeg kws tsi kaam moog ua kevcai nyob Tsev Pheebsuab.

20Lub sijhawm ntawd txawm yog tej tswb neeg los yuav sau ntawv rua has tas, “Raug muab fij rua tug TSWV lawm.” Tej laujkaub kws siv ua noj huv lub Tuamtsev los yuav dlawbhuv yaam nkaus le tej taig kws txawb rua ntawm lub thaaj hauvntej. 21Txhua lub laujkaub kws siv ua noj huv Yeluxalees hab huv tebchaws Yudas dlawbhuv rua tug TSWV kws muaj Fwjchim Luj Kawg Nkaus. Cov tuabneeg kws tuaj fij khoom yuav siv tej laujkaub ntawd lug hau tej nqaj kws coj tuaj tua ua khoom fij. Thaus txug lub sijhawm ntawd, yuav tsi muaj tublaag tubluam nyob huv tug TSWV tug kws muaj Fwjchim Luj Kawg Nkaus lub Tuamtsev lawm.

Currently Selected:

Xekhaliyas 14: HNJ2022

Highlight

Copy