Xekhaliyas 12
12
Yaav tomntej Yuav Tso Kuas Yeluxalees Dlim
1Ntawm nuav yog tug TSWV tej lug kws has txug cov Yixalayees, tug TSWV kws nthuav lub ntuj, kws tsim lub nplajteb, hab tug kws rau sav rau paa rua tuabneeg nplajteb. Nwg has tas, 2“Kuv yuav ua kuas Yeluxalees zoo yaam le khob cawv; txhua tsaav tuabneeg kws nyob puagncig nwg yuav haus hab qaug pujpoog zoo le qaugcawv. Thaus luas tuaj vij lub nroog Yeluxalees, tej nroog kws nyob huv tebchaws Yudas yuav raug vij ib yaam nkaus. 3Tabsis thaus txug lub sijhawm ntawd, Kuv yuav ua kuas Yeluxalees zoo le lub pobzeb kws nyaav heev, tsaav tuabneeg twg kws tuaj tsaws lub pobzeb ntawd yuav raug mob. Txhua tsaav tuabneeg kws nyob huv nplajteb nuav yuav sau nthwv tuaj tawmtsaam nwg. 4Lub sijhawm ntawd Kuv yuav ua kuas puab tej neeg ceebsob hab ua kuas cov tuabneeg caij neeg txhua tug vwm taagnrho. Kuv yuav tsomkwm cov Yudais, tabsis Kuv yuav ua kuas puab cov yeebncuab tej neeg dligmuag taag huvsi. 5Tes xeem Yudas yuav rov has rua puab tugkheej tas, ‘Tug TSWV kws yog Vaajtswv tug kws muaj Fwjchim Luj Kawg Nkaus yog tug pub dlaagzug rua Nwg tsaav tuabneeg kws nyob huv Yeluxalees.’
6“Lub sijhawm ntawd, Kuv yuav ua kuas xeem Yudas zoo yaam le cub suavtawg kws nyob huv ib thaaj haavzoov lossis ib thaaj teb kws nplej sav heev lawm. Puab yuav muab txhua tsaav tuabneeg kws nyob puagncig puab hlawv kuas puamtsuaj taag, tabsis cov tuabneeg kws nyob huv Yeluxalees yuav nyob tsosab lug.
7“Kuv, kws yog tug TSWV, yuav xub muab txuj kev muajyeej rua Yudas cov tubrog, sub lub meejmom kws Daviv caajceg hab cov tuabneeg kws nyob huv Yeluxalees tau txais ntawd txhaj tsi luj tshaaj lub meejmom kws lwmpaab Yudas tau txais. 8Lub sijhawm ntawd tug TSWV yuav tivthaiv cov kws nyob huv Yeluxalees, txawm yog cov tuabneeg qaugzug kws nrug puab nyob huv los yuav muajzug ib yaam le Daviv. Daviv caajceg yuav coj puab kev ib yaam le tug TSWV tug timtswv, hab ib yaam le Vaajtswv ntaag. 9Lub sijhawm ntawd Kuv yuav rhuav tshem txhua tsaav tuabneeg kws nrhav kev tawmtsaam lub nroog Yeluxalees.
10“Kuv yuav pub kuas Daviv caajceg hab cov tuabneeg kws nyob huv lub nroog Yeluxalees muaj lub sab puvnpo txuj kev hlub hab kev thov Vaajtswv. Puab yuav saibntsoov tug kws puab muab nkaug tuag lawm, hab puab yuav quaj nwg ib yaam le cov kws muaj tuabtug mivnyuas xwb tabsis tuag lawm. Puab yuav quaj tusab nrho ib yaam le cov kws quaj puab thawjtug tub hlub kws tuag lawm.#Yauh 19:37; Tshwm 1:7 11Thaus txug lub sijhawm ntawd, cov tuabneeg kws taabtom quajntsuag huv lub nroog Yeluxalees yuav coob ib yaam le cov tuabneeg kws quaj-nyav Hadas Limoos#12:11: Hadas Limoos: Tejzag yog Npa-aas lub npe, tug nyuas vaajtswv kws kaav tej zaub huv tebchaws Kana-aas hab Xilias. Txhua xyoo thaus tej zaub tuag, cov tuabneeg kws pe Npa-aas xaav tas puab tug nyuas vaajtswv tau tuag lawm, mas puab txhaj quaj-nyav nwg. kws nyob huv lub taj Menkidaus. 12-14Txhua tsev tuabneeg kws nyob huv lub tebchaws ntawd, nyag quajntsuag nyob huv nyag tsev: tsev tuabneeg kws yog Daviv caajceg, tsev tuabneeg kws yog Nathaas caajceg, tsev tuabneeg kws yog Levis caajceg, tsev tuabneeg kws yog Sime-is caajceg, hab taagnrho lwm tsev tuabneeg huv tuabsi. Txhua tsev tuabneeg nyag yuav quajntsuag nyob huv nyag tsev, hab txhua tsev tuabneeg cov txivneej nyag yuav moog quaj nyag nyob rua ib qho tsi nrug cov quaspuj.”#Math 24:20; Tshwm 1:7
Currently Selected:
Xekhaliyas 12: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
