Loos 4

Anplahaas Ua Yaamntxwv

1Yogle ntawd, peb yuav has lecaag txug peb yawmkoob Anplahaas? Nwg ua nwg lub neej lecaag? 2Yog Vaajtswv suav has tas Anplahaas ncaajnceeg lug ntawm tej kws nwg ua, tes nwg yeej muaj lug khaav tau xwb, tabsis nwg yuav tsi muaj dlaabtsi khaav nyob ntawm Vaajtswv lub xubndlag. 3Vaajtswv Txujlug has tas, “Anplahaas ntseeg Vaajtswv, hab vim nwg txuj kev ntseeg ntawd, Vaajtswv txhaj suav has tas nwg yog tuabneeg ncaajnceeg.” #Chiv 15:6; Kalat 3:6

4Tug tuabneeg kws ua num nwg yeej tau nqezug, tabsis tej nqezug ntawd yuav suav tsi tau has tas yog khoomplig, ruaqhov tej ntawd yog nwg khwv nwg txhaj tau. 5Tug kws casab rua txuj kev ntseeg es tsi casab rua tegnum, hab tug kws ntseeg Vaajtswv tug kws paab tau tug tuabneeg txhum kuas ua tau tuabneeg ncaajnceeg, txuj kev ntseeg zoole nuav yog txuj kws Vaajtswv txaussab hab suav has tas nwg yog tug ncaajnceeg. 6Daviv kuj has ib yaam le ntawd, thaus nwg has txug tug kws muaj kev kaajsab vim Vaajtswv suav has tas nwg ncaajnceeg, tsi yog vim teg dlejnum kws nwg ua:

7“Cov tuabneeg kws Vaajtswv zaam puab tej kev phem,

hab zaam puab lub txim, yog cov kws tau zoo nyob kaajsab lug. #Nnkauj 32:1-2

8Tug kws Vaajtswv tsi suav nwg lub txim, tug ntawd tau zoo nyob kaajsab lug!”

9Txujkev kaajsab kws Daviv has nuav tsuas yog muaj rua cov tuabneeg kws ua kevcai txav xwb lov? Tsi yog le ntawd! Nwg muaj rua cov tuabneeg kws tsi ua kevcai txav hab. Peb tub txeev has tas, “Anplahaas ntseeg Vaajtswv, Vaajtswv txhaj suav has tas Anplahaas yog tuabneeg ncaajnceeg.” 10Thaus twg Vaajtswv suav has tas Anplahaas yog tuabneeg ncaajnceeg? Yog thaus uantej lossis tomqaab kws Anplahaas ua kevcai txav? Yog thaus uantej, tsi yog tomqaab.

11Qhov kws Anplahaas ua kevcai txav ntawd yog lub cim kws qha has tas vim nwg txuj kev ntseeg, Vaajtswv txhaj suav has tas nwg yog tuabneeg ncaajnceeg uantej kws nwg ua kevcai txav. Yogle ntawd, Anplahaas txhaj yog leejtxiv ntawm saab kev ntseeg rua txhua tug kws ntseeg Vaajtswv, txawm yog puab tsi tau ua kevcai txav los xij, Vaajtswv yeej suav has tas puab yog tuabneeg ncaajnceeg. #Chiv 17:10 12Anplahaas kuj yog leejtxiv rua cov tuabneeg kws ua kevcai txav lawd hab, qhov ntawd, tsi yog vim puab ua kevcai txav xwb, tabsis vim puab kuj ua lub neej ntseeg Vaajtswv ib yaam le peb txiv Anplahaas ua nwg lub neej uantej kws nwg ua kevcai txav hab.

Vaajtswv Coglug Rua Cov Kws Ntseeg Nwg

13Qhov kws Vaajtswv coglug rua Anplahaas hab nwg le caajceg has tas lub nplajteb nuav yuav yog nwg tug, qhov ntawd tsi yog vim nwg coj lawvle txuj Kevcai, tabsis yog vim nwg ntseeg, Vaajtswv txhaj suav has tas nwg yog tug ncaajnceeg. #Chiv 17:4-6; 22:17-18; Kalat 3:29 14Ruaqhov yog tas Vaajtswv muab tej kws Nwg coglug tseg ntawd rua cov tuabneeg kws coj lawvle txuj Kevcai, tes txuj kev ntseeg yeej tsi tseemceeb hab Vaajtswv tej lug cogtseg yeej tsi muaj qaabhau dlaabtsi le. #Kalat 3:18 15Vim muaj txuj kevcai txhajle ua rua Vaajtswv chim; tabsis yog ho tsi muaj txuj kevcai, yeej tsi muaj tuabneeg ua txhum kevcai.

16Yogle ntawd, txuj kev coglug yog lug ntawm txuj kev ntseeg, Vaajtswv yuav muab Nwg txuj moovhlub kws Nwg tau coglug lawm pub rua txhua tug kws yog Anplahaas caajceg, tsi yog pub rua cov kws coj lawvle txuj kevcai xwb, tabsis pub rua cov kws ntseeg ib yaam le Anplahaas ntseeg; ruaqhov Anplahaas yog peb suavdlawg leejtxiv ntawm saab kev ntseeg. #Kalat 3:7 17Lawvle Vaajtswv Txujlug has tas, “Kuv tau tsaa koj ua leejtxiv rua ntau tsaav tuabneeg.” Tej lug cogtseg ntawd yog has timntsej timmuag ntawm Vaajtswv tug kws Anplahaas ntseeg; Nwg yog tug Vaajtswv kws tsaa tau cov tuabneeg kws tuag lawm sawv rov lug muaj txujsa hab yog tug kws has kuas yaam kws ibtxwm tsi tau muaj dlua cale muaj, tes txawm muaj lawvle ntawd. #Chiv 17:5

18Txawm yog tub tsi muaj ib yaam dlaabtsi kws yuav txaus casab rua, los Anplahaas yeej tseem ntseeg hab casab, vimle ntawd nwg txhaj dlhau moog ua “leejtxiv rua ntau tsaav tuabneeg.” Lawvle Vaajtswv Txujlug has tas, “Koj le caajceg yuav ntau npaum le tej nubqub sau nruabntug.” #Chiv 15:5 19Thaus ntawd nwg noobnyoog tub yuav muaj 100 xyoo; nwg lub cev tes tub zoole lub cev kws tuag lawm, hab Xalas los tub xeeb tsi taug tub lawm; txawm le ntawd los nwg txuj kev ntseeg yeej tseem ruaj-khov rua ntawm Vaajtswv. #Chiv 17:17

20Nwg yeej tsi tso nwg txuj kev ntseeg tseg hab yeej tsi ua ywjfaab ywjfwj txug Vaajtswv tej lug cogtseg; nwg txuj kev ntseeg tseem hajyam ua rua nwg ruaj-khov ntxiv, hab nwg hajyam ua Vaajtswv tsaug xwb. 21Nwg yeej paub tseeb has tas Vaajtswv yeej ua tau lawvle Vaajtswv tau coglug tseg lawm. 22Tub yog vim nwg txuj kev ntseeg ntawd, “Vaajtswv txhaj suav has tas nwg yog tuabneeg ncaajnceeg.” 23Lulug kws has tas “Vaajtswv txhaj suav has tas nwg yog tuabneeg ncaajnceeg,” tsi yog sau rua Anplahaas tuableeg xwb, 24tabsis yog sau rua peb txhua tug kws Vaajtswv suav has tas ncaajnceeg nua hab, kws ntseeg tug Vaajtswv kws tau tsaa peb tug Tswv Yexus sawv huv qhovtuag rovqaab lug. 25Vim peb tej kev txhum es Yexus Khetos txhajle raug txuj kev tuag, tabsis Nwg tau sawv huv qhovtuag rov lug muaj txujsa, kuas peb ua tau tuabneeg ncaajnceeg. #Yaxaya 53:4-5

Currently Selected:

Loos 4: HNJ2022

Highlight

Copy