Malakaus 1

Yauhaas Tug Kws Muab Tuabneeg Ua Kevcai Rausdlej Tej Lug Qhuabqha

(Mathais 3:1-12; Lukas 3:1-18; Yauhaas 1:19-28)

1Ntawm nuav yog Txuj Moo Zoo has txug Yexus Khetos kws yog Vaajtswv tug Tub.#1:1: Tej phoo ntawv qub kws xuas teg sau tsi muaj Vaajtswv tug Tub. 2Nwg chiv lawvle Yaxayas kws yog tug xwbfwb cev Vaajtswv lug tau sau tseg has tas:

“Vaajtswv has tas, ‘Kuv yuav khaiv kuv tug tubkhai ua koj ntej

moog khu kev tog koj.’ #Math 3:1

3Muaj ib tug has nrov-nrov tom roob mojsaab qhua has tas,

‘Cale khu kev tog tug Tswv;

khu kev kuas ncaaj rua Nwg tau taug!’ ” #Yaxaya 40:3 (LXX)

4Yauhaas tawm tom roob mojsaab qhua lug, nwg muab tuabneeg ua kevcai rausdlej hab qhuabqha#1:4: Yauhaas tawm tom roob mojsaab qhua lug, nwg muab tuabneeg ua kevcai rausdlej hab qhuabqha; tej phoo ntawv qub kws xuas teg sau, muaj Yauhaas tug kws muab tuabneeg ua kevcai rausdlej tawm tom roob mojsaab qhua lug, nwg qhuabqha. has tas, “Mej yuavtsum tso mej tej kev txhum tseg hab ua kevcai rausdlej, Vaajtswv txhajle zaam mej lub txim.” 5Cov tuabneeg kws nyob huv lub xeev Yudas hab huv lub nroog Yeluxalees, suavdlawg tuaj noog Yauhaas qha. Puab nyag leeg nyag lub txim, hab nwg muab puab ua kevcai rausdlej huv tug dlej Yauladees.

6Yauhaas naav tej rigtsho kws muab plaub ntxhuav ua, nwg sa ib txuj hlaab tawv ntawm dluav, hab nwg tej zaub-mov yog kooj hab zib ntaab. #1Vaaj 1:8 7Yauhaas qha has tas, “Tug kws tseem yuav lawv kuv qaab lug, Nwg muaj fwjchim luj dlua kuv, txawm yog Nwg nkawm khau xwb los kuv tub tsi tsimnyog nyo moog dlaws txuj nyuas hlua. 8Kuv muab mej raus rua huv dlej, tabsis Nwg yuav muab mej raus huv Vaaj Ntsujplig tug Dlawbhuv.”

Yexus Ua Kevcai Rausdlej Hab Raug Ntxwgnyoog Simsab

(Mathais 3:13—4:11; Lukas 3:21-22; 4:1-13)

9Tomqaab ntawd tsi ntev Yexus txawm tuaj peg lub zog Naxalev kws nyob huv xeev Kalilais tuaj hab ua kevcai rausdlej ntawm Yauhaas huv tug dlej Yauladees. 10Thaus Yexus sawv kag huv dlej lug, taamsim ntawd Nwg txawm pum roojntug qheb hlo hab pum Vaaj Ntsujplig zoole ib tug nquab lug rua sau Yexus. 11Hab muaj ib lub suab has sau ntuj tuaj has tas, “Koj yog Kuv tug Tub kws Kuv hlub, Kuv txaussab rua Koj heev.”

12Taamsim ntawd Vaaj Ntsujplig coj kag Yexus moog rua tom roob mojsaab qhua. 13Yexus nyob tod tau plaubcaug nub, Nwg raug Xataas simsab. Yexus nrug tej tsaj qus nyob tabsis muaj ib cov timtswv ceebtsheej tau lug tu Nwg.

Yexus Hu Plaub Tug Tuabneeg Ntaus Ntseg

(Mathais 4:12-22; Lukas 4:14-15; 5:1-11)

14Thaus Yauhaas raug kaw lawm, Yexus txawm moog rua peg Kalilais hab qha Vaajtswv Txuj Moo Zoo. 15Yexus qha has tas, “Tub txug sijhawm hab Vaajtswv lub Tebchaws tub lug ze lawm! Mej cale tso mej tej kev txhum tseg hab lug ntseeg Txuj Moo Zoo!”

16Thaus Yexus taabtom taug kev ntawm ntug dlej Havtxwv Kalilais, Nwg pum ob tug tuabneeg nrhav ntseg kws yog Ximoos hab nwg tug kwv Aanrus, taabtom xuas vaag ntaus ntseg huv havtxwv. 17Yexus has rua obtug tas, “Meb cale nrug Kuv moog, Kuv yuav qha kuas meb paub moog nrhav tuabneeg.” 18Taamsim ntawd obtug txawm tso plhuav vaag tseg hab nrug Nwg moog.

19Yexus moog tomntej mivntsiv, Nwg txawm pum dlua ob kwvtij kws yog Yakaunpaus hab Yauhaas, obtug yog Xenpedais le tub. Obtug taabtom ntxiv vaag huv nkoj. 20Taamsim ntawd Yexus txawm hu obtug; obtug txawm tso obtug txiv Xenpedais hab cov tubqhe tseg rua huv lub nkoj, hab nrug Yexus moog.

Tug Txivneej Raug Ntsujplig Phem

(Lukas 4:31-37)

21Yexus hab Nwg cov thwjtim moog txug huv lub nroog Kapena-us, thaus txug nub Xanpataus Yexus moog qhuabqha huv lub tsev saablaaj. 22Cov tuabneeg xaav tsi thoob txug Yexus tej lug qha, vim Nwg qha le ib tug kws muaj fwjchim heev, tsi thooj le cov xwbfwb kws qha Kevcai qha.

23Taamsim ntawd muaj ib tug txivneej kws raug ib tug ntsujplig phem txawm nkaag lug rua huv tsev saablaaj hab qw nrov-nrov has tas, 24“Yexus kws yog tuabneeg Naxalev, Koj tuaj taabkaum peb ua dlaabtsi? Koj yuav tuaj ua kuas peb puamtsuaj puas yog? Kuv paub tas Koj yog leejtwg, Koj yog Vaajtswv tug tubkhai kws dlawbhuv!”

25Yexus txwv tawv-tawv rua tug ntsujplig phem ntawd has tas, “Koj tsi yoom haslug, koj cale tawm kag huv tug txivneej nuav moog!”

26Tug ntsujplig phem txawm ua rua tug txivneej ntawd fuam ib thaaj hab qw nrov-nrov, tes dlaab txawm tawm plawg lawm. 27Cov tuabneeg kws nyob ntawd xaav tsi thoob le, puab txawm sisthaam zumzawg has tas, “Tej nuav yog dlaabtsi? Puas yog ib yaam kev qha tshab kws muaj fwjchim tag-tag le? Tug txivneej nuav muaj fwjchim ntab tau cov ntsujplig phem nuav hab puab kuj noog Nwg lug!”

28Yogle ntawd, Yexus lub moo txawm nrov-nchaa sai kawg le moog thoobplawg txhua qhov huv xeev Kalilais.

Yexus Khu Ntau Leej

(Mathais 8:14-17; Lukas 4:38-41)

29Yexus hab Nwg cov thwjtim, nrug rua Yakaunpaus hab Yauhaas, tawm huv tsev saablaaj moog rua tom Ximoos hab Aanrus tsev. 30Ximoos namtais uanpaws hab pw sau txaaj, thaus Yexus moog txug ncua huv tsev, muaj tuabneeg lug qha rua Yexus txug Ximoos namtais. 31Yexus txawm moog rua ntawm nwg, tuav nkaus nwg teg hab paab tsaa nwg sawv. Tes nwg tug npaws txawm tu hab nwg sawv lug tam puab.

32Thaus nub poobqho kws yuav tsausntuj, muaj tuabneeg coj txhua tug kws muaj mob hab tej tuabneeg kws raug dlaab tuaj cuag Yexus. 33Tej tuabneeg zejzog tuaj nyob puvnkaus nrau qhovrooj. 34Yexus khu txhua tug kws muaj mob zoo huv tuabsi hab Nwg ntab ntau tug dlaab tawm. Yexus txwv tsi pub cov dlaab ntawd has ib lulug le, ruaqhov puab yeej paub tas Yexus yog leejtwg.

Yexus Qhuabqha Huv Kalilais

(Lukas 4:42-44)

35Nub tomqaab thaus tseem ntxuv-ntxuv kws tsi tau pumkev, Yexus sawv hab tawm huv tsev moog thov Vaajtswv rua tom ib qhov chaw kws nyob ntsagtu. 36Ximoos hab nwg cov phoojywg txawm moog nrhav Yexus, 37thaus puab nrhav tau Yexus lawm, puab has tas, “Muaj tuabneeg coob-coob tuaj nrhav Koj.”

38Yexus teb tas, “Peb yuavtsum moog rua lwm lub zog kws nyob ibncig nuav hab, sub Kuv txhaj yuav tau qhuabqha huv tej zog ntawd, ruaqhov Kuv yeej los lug ua tegnum nuav ntaag.”

39Yogle ntawd, Yexus txhaj moog thoobplawg huv xeev Kalilais, qhuabqha huv tej tsev saablaaj, hab Nwg ntab ntau tug dlaab tawm. #Math 4:23; 9:35

Yexus Khu Tug Txivneej Mob Ruas

(Mathais 8:1-4; Lukas 5:12-16)

40Muaj ib tug txivneej mob ruas#1:40: mob ruas: lug Kilis siv lulug nuav rua ntau yaam kaab mob kws yog mob phem-phem rua ntawm dlaim tawv nqaj, kuj yuav tsi yog kag mob ruas hab. tuaj cuag Yexus, nwg txhuscaug ndlua ntawm Yexus kutaw hab thov has tas, “Yog Koj txaussab tag, Koj yeej muaj peevxwm khu kuas kuv zoo.”#1:40: khu kuas kuv zoo: Yaam mob nuav puab suav has tas yog ib yaam kws ua rua tuabneeg tsi huv lawvle puab tej kevcai.

41Yexus taabncuab nwg heev,#1:41: taabncuab; tej phoo ntawv qub kws xuas teg sau, muaj chim. Nwg txawm cev teg moog tuav tug txivneej ntawd hab has tas, “Kuv txaussab paab koj, koj cale zoo hlo!” 42Taamsim ntawd nwg tej ruas txawm zoo taag huv tuabsi lawm. 43Uantej kws nwg yuav moog, Yexus txwv tawv-tawv rua nwg has tas, 44“Koj tsi xob qha zaaj nuav rua leejtwg. Tabsis koj cale ncaajnraim moog cuag tug povthawj hlub, kuas nwg tshuaj saib koj lub cev; hab koj nqaa khoom moog hlawv fij rua Vaajtswv lawvle Mauxes tau qha tseg, txhaj ua tau timkhawv rua suavdlawg has tas koj tub zoo lawm.” #Levi 14:1-32

45Tabsis nwg moog qha zaaj nuav thoobplawg txhua qhov huv tuabsi. Vimle nuav, txhaj ua rua Yexus moog tsi tau taabmeeg huv tej nroog lawm. Txawm Yexus moog rua tom tej qhov chaw kws tsi muaj tuabneeg nyob coob, los yeej tseem muaj tuabneeg tuaj txhua qhov tuaj cuag Nwg.

Currently Selected:

Malakaus 1: HNJ2022

Highlight

Copy