Mathais 4

Dlaab Ntxwgnyoog Sim Yexus Sab

(Malakaus 1:12-13; Lukas 4:1-13)

1Dlhau ntawd Vaaj Ntsujplig tau coj Yexus moog rua tom roob mojsaab qhua kuas dlaab ntxwgnyoog tau sim Yexus sab. #Henpl 2:18; 4:15 2Tomqaab Yexus yoo mov tau plaubcaug nub plaubcaug mo, Nwg tshaib plaab heev. 3Dlaab ntxwgnyoog txawm lug rua ntawm Nwg hab has tas, “Yog Koj yog Vaajtswv tug Tub tag, Koj kuj has kuas tej coszeb nuav txa ua mov.”

4Tabsis Yexus teb tas, “Vaajtswv Txujlug sau tseg has tas, ‘Tuabneeg tsi yog yuav cajsa lug ntawm zaub-mov xwb, tabsis yog lug ntawm txhua lulug kws tawm huv Vaajtswv lub qhovncauj lug.’ ” #2Kev 8:3

5Tes dlaab ntxwgnyoog txawm coj Yexus moog rua huv Yeluxalees, kws yog lub Nroog Dlawbhuv; nwg coj Yexus moog rua sau lub ruv kws sab tshaajplawg ntawm lub Tuamtsev, 6hab has rua Yexus tas, “Yog Koj yog Vaajtswv tug Tub tag, Koj kuj cale dlha rua huv aav, ruaqhov Vaajtswv Txujlug tau sau tseg has tas:

“ ‘Vaajtswv yuav kuas Nwg cov timtswv ceebtsheej tsomkwm Koj;

puab ob txhais teg yuav fwj Koj,

kuas Koj ob txhais kutaw tsi xob ntsawm pobzeb le.’ ” #Nnkauj 91:11-12

7Yexus teb tas, “Vaajtswv Txujlug has tas, ‘Tsi xob sim tug Tswv kws yog koj tug Vaajtswv.’ ” #2Kev 6:16

8Tes dlaab ntxwgnyoog txawm coj Yexus moog rua sau ib lub roob sab-sab hab muab taagnrho tej tebchaws hab puab tej kev vaammeej huv qaabntuj nuav rua Yexus pum. 9Dlaab ntxwgnyoog has tas, “Yog Koj txhuscaug hab pe kuv, kuv yuav muab txhua yaam nuav rua Koj.”

10Yexus teb tas, “Xataas, koj cale tsiv moog! Vaajtswv Txujlug has tas, ‘Koj yuavtsum pehawm tug Tswv kws yog koj tug Vaajtswv hab tsuas ua Nwg tegnum nkaus xwb!’ ” #2Kev 6:13

11Tes dlaab ntxwgnyoog txawm tso Yexus tseg lawm. Tomqaab ntawd muaj ib cov timtswv ceebtsheej tau lug tu Nwg.

Yexus Chiv Ua Nwg Tegnum Huv Kalilais

(Malakaus 1:14-15; Lukas 4:14-15)

12Thaus Yexus nov tas Yauhaas raug kaw lawm, tes Nwg txawm moog rua peg Kalilais. #Math 14:3; Malak 6:17; Lukas 3:19-20 13Nwg tsi moog nyob huv lub nroog Naxalev, tabsis Nwg tshais chaw moog nyob huv lub nroog Kapena-us, kws nyob npuab ntug dlej havtxwv Kalilais, ntawm cheebtsaam kws yog xeem Xenpuloos hab xeem Nathalis nyob. #Yauh 2:12 14Tej nuav muaj kuas tav lawvle Yaxayas kws yog tug xwbfwb cev Vaajtswv lug tau qha tseg has tas,

15“Xeem Xenpuloos dlaim aav hab xeem Nathalis dlaim aav

kws nyob saab ntug dlej Yauladees tim u, ntawm txujkev kws moog rua havtxwv,

huv lub xeev Kalilais kws Lwmtsaav Tuabneeg nyob! #Yaxaya 9:1-2

16Cov tuabneeg kws nyob qhov tsausntuj nti

yuav pum ib lub teeb kws ci pumkev heev.

Hab qhov pumkev ntawd yuav ci rua cov tuabneeg kws nyob huv qhov tsausntuj

kws yog txuj kev tuag.”

17Txij thaus ntawd lug Yexus txawm pib qhuabqha has tas: “Mej cale tso mej tej kev txhum tseg, ruaqhov Vaajtswv lub Ntuj Ceebtsheej tub lug ze lawm!” #Math 3:2

Yexus Hu Plaub Tug Tuabneeg Ntaus Ntseg

(Malakaus 1:16-20; Lukas 5:1-11)

18Thaus Yexus taabtom taug ntug dlej Havtxwv Kalilais, Nwg pum ob kwvtij kws yog tuabneeg nrhav ntseg, kws yog Ximoos (kws hu ua Petus) hab nwg tug kwv Aanrus, taabtom xuas vaag ntaus ntseg huv havtxwv. 19Yexus has rua obtug tas, “Meb cale nrug Kuv moog, Kuv yuav qha kuas meb paub moog nrhav tuabneeg.” 20Taamsim ntawd obtug txawm tso plhuav vaag tseg hab nrug Nwg moog.

21Yexus moog tomntej mivntsiv, Nwg txawm pum dlua ob kwvtij kws yog Yakaunpaus hab Yauhaas, obtug yog Xenpedais le tub. Obtug taabtom nrug obtug txiv Xenpedais ntxiv vaag huv nkoj. Yexus txawm hu obtug, 22tes obtug txawm tso lub nkoj hab obtug txiv tseg, hab nrug Yexus moog.

Yexus Cobqha, Qhuabqha, Hab Khu Mob

(Lukas 6:17-19)

23Yexus moog thoobplawg huv lub xeev Kalilais, cobqha huv tej tsev saablaaj, qhuabqha txug Txuj Moo Zoo kws has txug Vaajtswv lub Tebchaws, hab khu cov tuabneeg kws muaj mob, tsi has yaam mob twg los Nwg khu zoo huv tuabsi. #Math 9:35; Malak 1:39 24Yexus lub moo nrov-nchaa moog thoobplawg tebchaws Xilias, tes suavdlawg txawm coj taagnrho tej tuabneeg kws muaj mob tuaj cuag Nwg, tsi has yaam mob twg le: tej tuabneeg raug dlaab, tej tuabneeg qaug dlaabpeg, hab tej tuabneeg tuagteg tuagtaw los Yexus khu txhua tug zoo huv tuabsi. 25Muaj tuabneeg coob-coob huv xeev Kalilais, cheebtsaam Dekapaulis, huv nroog Yeluxalees, huv xeev Yudas, hab huv lub tebchaws kws nyob saab ntug dlej Yauladees tim u, tuaj caum Yexus qaab.

Currently Selected:

Mathais 4: HNJ2022

Highlight

Copy