Mathais 28

Yexus Sawv Huv Qhovtuag Rov Lug

(Malakaus 16:1-10; Lukas 24:1-12; Yauhaas 20:1-10)

1Tomqaab nub Xanpataus kws yog Nubkaaj thaus kaajntug txoog, Malis Madalas nrug rua ib tug hu ua Malis hab tau moog saib lub ntxaa. 2Taamsim ntawd nplajteb uazug koog, tug Tswv ib tug timtswv nqeg sau ntuj lug muab dlaim laagzeb kws npug lub rooj ntxaas dlov tawm hab nyob quastsawg rua sau dlaim laagzeb ntawd. 3Nwg lub ntsejmuag ci ib yaam le tsagligxub laim hab nwg cev rigtsho dlawbpaug ib yaam le dlaus. 4Cov faajxwm kws zuv lub qhovntxaa ntshai ua ibce tsheenyo hab txhaav taag ib yaam le cov tuabneeg kws tub tuag lawm.

5Tug timtswv ntawd has rua ob tug quaspuj tas, “Meb tsi xob ntshai; kuv paub tas meb tuaj nrhav Yexus tug kws luas muab ntsa rua sau ntoo khaublig. 6Nwg tsi nyob ntawm nuav; Nwg tub sawv lawvle Nwg tau has tseg lawm. Meb cale lug saib qhov chaw kws luas muab Nwg lub cev tso ca. 7Cale ceevnrooj taamsim nuav rov moog qha rua Nwg cov thwjtim has tas, ‘Nwg tub sawv huv qhovtuag rov lug lawm. Nwg yuav ua mej ntej moog rua peg Kalilais; mej yuav ntsib Nwg peg!’ Ncuntsoov tej kws kuv has rua meb nuav!”

8Obtug txawm rov nrawm nroog ntawm lub qhovntxaa moog, ntshai los ntshai, zoosab los zoosab, hab dlha moog qha rua Yexus cov thwjtim paub.

9Taamsim ntawd Yexus txawm lug ntsib obtug hab has rua obtug tas, “Thov kuas meb nyob kaajsab lug.” Obtug txawm moog tuav nkaus Yexus ob txhais kutaw hab pehawm Nwg. 10Yexus has rua obtug tas, “Meb tsi xob ntshai. Cale moog qha Kuv cov kwvtij kuas puab moog rua peg Kalilais, puab yuav pum Kuv nyob peg.”

Cov Faajxwm Kev Tshaabxu

11Thaus ob tug quaspuj ntawd taabtom taug kev moog lawm, tes qeeleej faajxwm txawm rov moog rua huv nroog hab qha txhua yaam kws tshwmsim ntawd rua cov thawj povthawj hlub noog. 12Thaus cov thawj povthawj hlub saablaaj nrug cov txwjlaug hab tuav tswvyim taag, puab txawm muab ib cov nyaj ntau tsawv rua cov tubrog 13hab has tas, “Mej yuavtsum has tas, ‘Thaus tsausntuj kws peb tsaugzug lawm, tes Nwg cov thwjtim txawm tuaj nyag Nwg lub cev lawm.’ 14Mej tsi xob txhawj, yog tug tswvxeev nov txug zaaj nuav, peb maam nrug nwg thaam hab yuav tsi pub mej raug teebmeem.”

15Cov tubrog txais cov nyaj ntawd, tes puab txawm ua lawvle cov thawj povthawj hlub has. Zaaj nuav tau raug xyaav nyob rua huv cov tuabneeg Yudais lug txug rua najnub nua.

Yexus Lug Tshwm Rua Nwg Cov Thwjtim Pum

(Malakaus 16:14-18; Lukas 24:36-49; Yauhaas 20:19-23; Tegnum 1:6-8)

16Kaum-ib tug thwjtim txawm nce moog rua peg lub roob kws nyob huv Kalilais, qhov chaw kws Yexus tau qha rua puab lawm. #Math 26:32; Malak 14:28 17Thaus puab pum Yexus, puab txawm txhuscaug ndlua pehawm Nwg, tabsis tseem muaj qeeleej ua xyemxyaav. 18Yexus txawm lug rua ntawm puab hab has rua puab tas, “Vaajtswv tub muab taagnrho tej fwjchim sau ntuj hab huv nplajteb nuav rua Kuv lawm. 19Yogle ntawd, mej cale moog rua txhua tsaav tuabneeg huv qaabntuj nuav hab coj puab lug ua Kuv cov thwjtim: muab puab ua kevcai rausdlej huv Vaaj Leejtxiv, Vaaj Leejtub, hab Vaaj Ntsujplig tug Dlawbhuv lub npe, #Tegnum 1:8 20hab qha kuas puab coj ua lawvle txhua yaam kws Kuv tau xaaj rua mej lawm. Kuas mej ncuntsoov tas Kuv yeej yuav nrugnraim mej, moog txug nub kws lub nplajteb nuav kawg.”

Currently Selected:

Mathais 28: HNJ2022

Highlight

Copy