Mathais 22
22
Zaaj Lug Pevtxwv Has Txug Rooj Tshoob
(Lukas 14:15-24)
1Yexus rov has dlua ib zaaj lug pevtxwv rua suavdlawg noog has tas, 2“Vaajtswv lub Ntuj Ceebtsheej pev ib yaam le ib tug vaajntxwv kws npaaj ib rooj tshoob rua nwg tug tub. 3Vaajntxwv tau khaiv nwg cov tubkhai moog hu cov qhua kws nwg tub caw lawm kuas tuaj nrug nwg noj tshoob, tabsis puab tsi kaam tuaj le.
4“Nwg txhaj khaiv dlua lwmpaab tubkhai moog has rua cov kws raug caw lawm has tas, ‘Kuv rooj tshoob tub npaaj txhij lawm. Kuv tej saam nyuj hab kuv tej mivnyuas nyuj rog-rog, kuv tub tua hab ua sav taag lawm, mej cale tuaj noj.’ 5Tabsis cov kws raug caw ntawd tsi quavntsej le, nyag moog ua nyag num taag lawm: tug moog ua teb los muaj, tug moog ua luam los muaj, 6dlua le tseem muaj cov kws muab cov tubkhai ntawd nteg, muab puab ntaus hab muab puab tua.
7“Vaajntxwv chim heev; nwg txawm txhij nwg cov tubrog kuas moog muab cov tuabneeg kws tua tuabneeg ntawd, tua hab muab puab lub nroog hlawv povtseg. 8Tes vaajntxwv txhaj hu nwg cov tubkhai lug hab has rua puab tas, ‘Kuv rooj tshoob tub npaaj txhij lawm, tabsis cov tuabneeg kws kuv caw ntawd, puab tsi tsimnyog tuaj noj. 9Zagnua mej cale moog rua tom tej kev luj kws sis tshuam, mej ntsib leejtwg los hu kuas puab cale tuaj noj kuv rooj tshoob nuav.’ 10Tes cov tubkhai txawm tawm moog rua tom tej kev hab coj txhua tug kws puab ntsib, tsi has tug zoo tug phem huv tuabsi lug; ua rua chaav tsev kws noj tshoob ntawd puvnkaus.
11“Thaus vaajntxwv lug saib cov qhua kws tuaj ntawd, nwg pum ib tug txivneej kws tsi naav tsoogtsho noj tshoob. 12Vaajntxwv nug has tas, ‘Phoojywg, koj tub tsi naav cev rigtsho noj tshoob, uacaag koj ho tuaj tau rua huv nuav?’ Tug txivneej ntawd yeej teb tsi taug ib lus le. 13Vaajntxwv txawm has rua cov tubkhai has tas, ‘Mej cale muab nwg paav teg paav taw hab muab pov rua saabnrau kws tsausntuj nti. Nwg yuav quaj qw tum nav qawv nyob rua qhov ntawd.’ ” #Math 8:12; 25:30; Lukas 13:28
14Yexus xaus lug has tas, “Cov kws raug caw mas muaj coob, tabsis cov kws raug xaiv muaj tsawg.”
Nug Txug Kev Them Se
(Malakaus 12:13-17; Lukas 20:20-26)
15Cov Falixais txawm tawm moog saablaaj hab tuav tswvyim seb puas nteg tau Yexus haslug yuamkev. 16Puab khaiv puab cov thwjtim qeeleej hab Helauj cov qeeleej tuaj cuag Yexus. Puab nug has tas, “Xwbfwb, peb paub tas Koj yog ib tug tuabneeg ncaaj, Koj tsuas qha qhov tseeb txug Vaajtswv txujkev rua tuabneeg xwb, Koj tsi xaiv leejtwg ntsejmuag hab tsi tuaj leejtwg tog. 17Koj qha rua peb seb Koj xaav lecaag? Yog peb them se rua Xixas puas txhum peb txuj Kevcai los tsi txhum?”
18Tabsis Yexus tub paub txug puab tej tswvyim phem ntawd lawm, Nwg txhaj has rua puab tas, “Cov nam tuabneeg ntsejmuag ncaaj sabnkhaus! Mej tuaj sim Kuv ua dlaabtsi? 19Muab lub nyaj kws yuav coj moog them se ntawd lug rua Kuv saib seb!”
Puab txawm muab ib lub nyaj lug rua Nwg, 20tes Nwg txhaj nug puab has tas, “Lub ntsejmuag hab lub npe huv lub nyaj nuav yog leejtwg lub?”
21Puab teb tas, “Yog Xixas lub.”
Yexus txhaj has rua puab tas, “Yaam kws yog Xixas le, cale muab rua Xixas hab yaam kws yog Vaajtswv le, cale muab rua Vaajtswv.”
22Thaus puab nov le ntawd, puab xaav tsi thoob le; tes puab txawm tso Yexus tseg hab tsiv lawm.
Nug Txug Kev Sawv Huv Qhovtuag Rovqaab Lug
(Malakaus 12:18-27; Lukas 20:27-40)
23Tuabnub ntawd muaj qeeleej Xadukais tuaj cuag Yexus. Puab yog cov kws qha has tas tuabneeg yeej sawv tsi tau huv qhovtuag rovqaab lug. #Tegnum 23:8 24Puab nug Yexus has tas, “Xwbfwb, Mauxes has tas yog ib tug quasyawg twg tuag thaus nwg tug quaspuj tseem tsi tau muaj mivnyuas, nwg tug kwv yuavtsum yuav tug namtij hab muaj tubki rua tug tijlaug. #2Kev 25:5 25Zagnua, nyob huv peb nuav muaj xyaa leej kwvtij. Tug tijlaug hlub yuav quaspuj tabsis tseem tsi tau muaj mivnyuas tes nwg txawm tuag lawm, txhaj tso tug quaspuj rua tug kwv yuav. 26Thaus tseem tsi tau muaj mivnyuas tes tug kwv thib ob txawm tuag lawm hab. Tug kwv thib peb moog txug tug kwv thib xyaa los kuj ua tuabyaam nkaus le ntawd. 27Thaus kawg tug quaspuj ntawd kuj tuag lawm hab. 28Yogle ntawd, thaus txug nub kws cov tuabneeg tuag sawv rovqaab lug, tug quaspuj ntawd yuav yog leejtwg tug quaspuj? Ruaqhov puab xyaa leej puavleej tau yuav nwg huv tuabsi lawm.”
29Yexus teb tas, “Mej yuamkev lawm, ruaqhov mej tsi paub Vaajtswv tej Lug lossis Vaajtswv lub fwjchim. 30Thaus cov tuabneeg kws tuag lawm sawv rovqaab lug, puab yuav zoo ib yaam le cov timtswv kws nyob sau ntuj ceebtsheej, puab yuav tsi sisyuav lawm. 31Has txug qhov kws cov tuabneeg tuag sawv rovqaab lug, mej tsi tau nyeem zaaj kws Vaajtswv has rua mej lov? Nwg tau has tas, 32‘Kuv yog Anplahaas tug Vaajtswv, yog Ixaj tug Vaajtswv, hab yog Yakhauj tug Vaajtswv.’ Vaajtswv tsi yog cov tuabneeg tuag tug Vaajtswv, tabsis yog cov tuabneeg caj tug Vaajtswv.” #Tsiv 3:6
33Thaus cov tuabneeg coob-coob nov tej kws Yexus qha ntawd, puab xaav tsi thoob le.
Nqai Kevcai Kws Tseemceeb Heev
(Malakaus 12:28-34; Lukas 10:25-28)
34Thaus cov Falixais nov tas cov Xadukais teb tsi taug Yexus ib lus le, puab txawm tuaj sissau uake. 35Muaj ib tug xwbfwb qha Kevcai kws nyob huv puab paab ntawd, txawm thom Yexus has tas, 36“Xwbfwb, huv Vaajtswv cov Kevcai nqai twg yog nqai kws tseemceeb dlua ndlais huv tuabsi?”
37Yexus teb tas, “ ‘Koj yuavtsum hlub tug Tswv kws yog koj tug Vaajtswv, kuas kawg sab kawg ntsws, kawg plaab kawg plawv, hab kawg laajlim tswvyim.’ #2Kev 6:5 38Nqai kevcai nuav yog thawj nqai kws tseemceeb dlua ndlais. 39Nqai thib ob yog has le nuav: ‘Koj yuavtsum hlub koj tug kwvtij zejzog ib yaam le koj hlub koj tugkheej.’ #Levi 19:18 40Mauxes txuj Kevcai hab cov xwbfwb cev Vaajtswv lug tej lug qha puavleej nyob taagnrho rua huv ob nqai nuav.” #Lukas 10:25-28
Nug Txug Tug Mexiyas
(Malakaus 12:35-37; Lukas 20:41-44)
41Thaus cov Falixais tseem tuaj sissau uake ntawd, Yexus nug puab has tas, 42“Mej xaav lecaag txug tug Mexiyas? Nwg yog leejtwg le caajceg?”
Puab teb tas, “Nwg yog Daviv le caajceg.”
43Yexus rov nug puab has tas, “Uacaag Vaaj Ntsujplig txhaj tshoov Daviv sab, kuas Daviv hu nwg has tas, ‘Tug Tswv’? Daviv tau has tas,
44“ ‘Tug Tswv has rua kuv tug Tswv tas:
Lug nyob ntawm Kuv saab xis
moog txug thaus Kuv muab Koj cov yeebncuab lug tso huv Koj qaab xibtaws.’ #Nnkauj 110:1
45Yog thaus ntawd Daviv tub hu Nwg has tas, ‘Tug Tswv,’ yuav ua lecaag has tau tas tug Mexiyas yog Daviv le caajceg?”
46Tsi muaj leejtwg teb taug Yexus ib lus le. Txij nub ntawd lug, tsi muaj leejtwg muaj cuabkaav nug Nwg ntxiv le lawm.
Currently Selected:
Mathais 22: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
