Mathais 20
20
Cov Tubzug Huv Lub Vaaj Txivmaab
1“Vaajtswv lub Ntuj Ceebtsheej pev ib yaam le ib tug tswv vaaj kws sawvntxuv moog ndlav tuabneeg tuaj tu nwg lub vaaj txivmaab. 2Nwg nrug puab has hum has tas ib nub nwg yuav them le ibtxwm them kws yog ib lub txaj denalis, tes nwg txawm kuas cov tubzug ntawd moog tu nwg lub vaaj lawm.
3“Thaus cuaj teev, nwg rov moog tom kab, nwg pum ib cov tuabneeg sawv ncig nkuj nkuag tsi muaj num ua. 4Nwg txawm has rua puab tas, ‘Mej kuj moog tu kuv lub vaaj txivmaab hab, kuv yuav muab nqezug kuas ncaajnceeg rua mej.’ 5Tes puab txawm moog lawvle nwg has. Thaus kaum-ob teev hab thaus peb teev, nwg kuj rov moog ua ib yaam nkaus le ntawd hab.
6“Thaus yuavlaug txug tsib teev, nwg rov moog rua tom kab hab pum ib cov tuabneeg tseem sawv ncig nkuj nkuag tod. Nwg txawm has rua puab tas, ‘Uacaag mej tuaj nyob dlawb ib nub ntawm nuav tsi ua dlaabtsi le?’ Puab teb tas, 7‘Tub tsi muaj leejtwg ndlav peb le ne.’ Nwg txhaj has rua puab tas, ‘Yogle tes mej cale moog tu kuv lub vaaj txivmaab hab.’
8“Thaus tsausntuj, tug tswv vaaj has rua tug kws saib cov tubzug tas, ‘Koj moog hu cov tubzug lug hab them nqezug rua puab. Koj pib muab rua cov kws raug ndlav tuaj ua num tomqaab zujzug moog txug rua cov kws xub tuaj uantej.’ #Levi 19:13; 2Kev 24:15 9Cov tubzug kws tuaj pib ua num thaus tsib teev, puab ib leeg tau ib lub txaj. 10Yogle ntawd, cov kws xub tuaj txhaj xaav tas puab yuav tau ntau dlua cov kws tuaj tomqaab; tabsis puab ib leeg tsuas tau ib lub txaj denalis hab xwb. 11Thaus puab tau txais nyaj taag lawm, puab txawm ywg rua tug tswv vaaj has tas, 12‘Cov tubzug kws tuaj ua num thaus yuav tsausntuj ntawd, puab nyavnyuas ua tau ib txoogteev xwb; peb tiv tshaav ua num ib nub tsausntuj tabsis koj tsuas muab rua peb npaum le koj muab rua puab hab xwb!’
13“Tug tswv vaaj teb rua puab cov ntawd ib tug has tas, ‘Phoojywg, tsi yog kuv ua tsi ncaaj rua koj. Puas yog koj yeej zoosab kws yuav ua num ib nub ib lub txaj nua maj? 14Cale nqaa koj lub nyaj hab moog tsev. Kuv yeej txavtxim sab has tas kuv yuav muab rua tug kws tuaj tomqaab npaum le kws kuv muab rua koj hab. 15Kuv txawm yuav tsi muaj cai muab kuv tej nyaj siv lawvle kuv pumzoo lov? Lossis koj pum tas kuv sabdlawb, tes koj txawm khib puas yog?’ ”
16Yexus xaus lug has tas, “Cov kws nwgnuav nyob tom hauvntej yuav tau moog nyob tom tw, hab cov kws nwgnuav nyob tom tw, yuav tau moog nyob tom hauvntej.” #Math 19:30; Malak 10:31; Lukas 13:30
Zag Thib Peb Kws Yexus Has Txug Nwg Kev Tuag
(Malakaus 10:32-34; Lukas 18:31-34)
17Thaus Yexus moog rua sau lub nroog Yeluxalees, Nwg coj Nwg kaum-ob tug thwjtim nrug Nwg moog. Thaus puab taug kev moog, Nwg has tuabywv rua puab tas, 18“Mej ua tuabzoo noog nawb, peb yuav moog rua sau lub nroog Yeluxalees. Yuav muaj tuabneeg nteg Tuabneeg Leejtub coj moog cob rua cov thawj povthawj hlub hab cov xwbfwb kws qha Kevcai. Puab yuav txavtxim tuag rua Nwg, 19hab muab Nwg cob rua Lwmtsaav Tuabneeg, puab yuav ua saib tsi taug Nwg, muab Nwg nplawm, hab muab Nwg ntsa rua sau ntoo khaublig, tabsis nub thib peb Nwg yuav cajsa sawv rov lug.”
Ib Leejnam Tej Lug Thov
(Malakaus 10:35-45)
20Tomqaab ntawd Xenpedais tug quaspuj txawm coj nwg ob tug tub tuaj cuag Yexus. Nwg txhuscaug ndlua ntawm Yexus kutaw hab thov ib yaam tshwjxeeb ntawm Nwg.
21Yexus nug nwg has tas, “Koj xaav tau dlaabtsi?”
Nwg teb tas, “Thov Koj coglug rua kuv has tas, thaus Koj lug ua vaajntxwv, Koj yuav pub kuv ob tug tub nuav ib tug nyob ntawm Koj saab xis hab ib tug nyob ntawm Koj saab txhumphem.”
22Yexus teb rua ob tug tub ntawd has tas, “Meb tsi paub txug yaam kws meb taabtom thov nuav. Meb puas haus taug lub khob ab khob dlaw kws Kuv yuav haus?”
Obtug teb tas, “Wb haus taug.”
23Yexus has rua obtug tas, “Lub khob kws Kuv haus, meb yeej yuav haus taug, tabsis qhov kws leejtwg yuav nyob ntawm Kuv saab xis hab saab txhumphem ntawd, Kuv tsi muaj cai kws yuav muab rua meb. Kuv Txiv yog tug muab cov chaw nuav rua cov kws Nwg tub npaaj tseg rua lawm.”
24Thaus kaum tug thwjtim nov le ntawd, puab chim heev rua obtug. 25Yexus txhaj hu cov thwjtim txhua tug lug uake hab has rua puab tas, “Mej tub paub tas tej numtswv kws saib Lwmtsaav Tuabneeg muaj fwjchim kaav tej pejxeem ntawd, hab cov thawjcoj ntawd yeej siv fwjchim lug quabyuam tej pejxeem. #Lukas 22:25-26 26Tabsis ntawm mej tsi yog le ntawd. Yog mej leejtwg xaav ua tug luj, nwg yuavtsum ua suavdlawg tug tubkhai; #Math 23:11; Malak 9:35; Lukas 22:26 27hab yog mej leejtwg xaav ua tug thawj, nwg yuavtsum ua suavdlawg qhev. 28Ib yaam le Tuabneeg Leejtub, Nwg tsi tau lug kuas leejtwg tam Nwg, tabsis Nwg lug tam suavdlawg hab muab Nwg txujsa lug txhwv ntau leej tuabneeg.”
Yexus Khu Ob Tug Dligmuag
(Malakaus 10:46-52; Lukas 18:35-43)
29Thaus Yexus hab Nwg cov thwjtim taabtom tawm huv lub nroog Yelikaus moog, muaj tuabneeg coob-coob lawv Nwg qaab. 30Muaj ob tug txivneej dligmuag nyob quastsawg ntawm ntug kev nov tas Yexus taug kev tuaj, tes obtug txawm hu nrov-nrov has tas, “Daviv tug Tub, thov Koj taabncuab wb hab lau!”
31Cov tuabneeg coob-coob ntawd tshev obtug hab has kuas obtug nyob tuabywv. Tabsis obtug yimfuab hu nrov has tas, “Daviv tug Tub, thov Koj taabncuab wb hab lau!”
32Yexus txawm nreg hab hu obtug lug, Nwg nug obtug has tas, “Meb xaav kuas Kuv ua dlaabtsi rua meb?”
33Obtug teb tas, “Tug Tswv, wb xaav kuas wb ob lub qhovmuag rov pumkev!”
34Yexus taabncuab obtug, Nwg txawm cev teg moog kov obtug ob lub qhovmuag. Taamsim ntawd obtug txawm pumkev, hab obtug cale nrug Yexus moog.
Currently Selected:
Mathais 20: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
