Mathais 2

Cov Tuabneeg Kws Txawj Saib Nubqub Tuaj Hawm Tug Mivtub

1Yexus tau lug yug huv lub nroog Npelehees kws nyob huv cov Yudais lub tebchaws, ncaaj rua lub sijhawm kws Helauj taabtom ua vaajntxwv. Tomqaab ntawd tsi ntev, muaj cov tuabneeg kws txawj saib nubqub txawm tuaj saab nubtuaj tuaj txug huv lub nroog Yeluxalees. 2Puab nug has tas, “Tug Mivtub kws yuav ua cov Yudais tug vaajntxwv Nwg lug yug rua qhovtwg? Peb pum Nwg lub nubqub tawm tim saab nubtuaj tuaj, mas peb txhaj tuaj pehawm Nwg.”

3Thaus Vaajntxwv Helauj nov le ntawd, nwg hab tej tuabneeg kws nyob huv lub nroog Yeluxalees nyuajsab heev. 4Helauj txhaj hu taagnrho cov thawj povthawj hlub hab cov xwbfwb kws qha Kevcai tuaj hab nug puab has tas, “Tug Mexiyas yuav lug yug rua qhovtwg?”

5Puab teb tas, “Nwg yuav lug yug huv lub nroog Npelehees kws nyob huv cov Yudais lub tebchaws. Tug xwbfwb cev Vaajtswv lug tau sau le nuav tseg has tas,

6“ ‘Lub nroog Npelehees kws nyob huv xeev Yudas,

koj tsi yog lub nroog kws miv dlua tej nroog huv xeev Yudas;

ruaqhov yuav muaj ib tug thawjcoj tshwm huv koj lug

kws yuav coj kuv tsaav tuabneeg Yixalayees.’ ” #Mikha 5:2

7Tes Helauj txawm hu cov tuabneeg kws txawj saib nubqub lug cuag nwg tuabywv. Nwg kuas puab qha meej-meej rua nwg seb lub sijhawm twg puab pum lub nubqub ntawd tawm tuaj. 8Dlhau ntawd nwg txhaj khaiv puab moog nraag lub nroog Npelehees hab has rua puab tas, “Mej cale moog hab ua tuabzoo nrhav tug Mivtub ntawd; thaus mej nrhav tau Nwg lawm, mej rovqaab lug qha rua kuv paub, sub kuv txhaj paub moog pehawm Nwg hab.”

9Tes puab txawm tawm moog lawm. Thaus puab taug kev moog, lub nubqub kws puab xub pum tim saab nubtuaj ntawd txawm coj puab kev hab moog nreg ncaaj ntawm qhov chaw kws tug Mivtub ntawd nyob lawm sau. 10Thaus puab pum lub nubqub ntawd puab zoosab kawg le. 11Thaus puab moog rua huv tsev, puab pum tug Mivtub hab Nwg nam kws yog Malis, puab txawm txhuscaug ndlua pehawm Nwg. Puab thau puab tej kub, tej tshuaj tswqaab, hab tej roj tswqaab maules huv puab cov naab lug pub rua tug Mivtub.

12Puab txawm rov lwm txujkev moog tsev lawm, vim puab tau ua npausuav pum Vaajtswv lug has rua puab kuas tsi xob rov moog qha rua Helauj.

Tsiv Moog Rua Tebchaws Iziv

13Thaus cov tuabneeg txawj saib nubqub rov moog lawm, Yauxej tau ua npausuav pum Vaajtswv ib tug timtswv ceebtsheej lug has rua nwg has tas, “Helauj yuav nrhav tug Mivtub nuav tua. Yogle, koj cale sawv hab coj tug Mivtub hab Nwg nam tsiv moog rua nraag tebchaws Iziv, hab nyob nraag moog txug thaus kws kuv kuas mej moog rua lwmqhov.”

14Yauxej txawm sawvtseeg coj tug Mivtub hab Malis tsiv montuj moog rua nraag tebchaws Iziv. 15Puab nyob nraag moog txug thaus Helauj tuag. Tej nuav muaj tshwmsim kuas tav lawvle tug xwbfwb cev Vaajtswv lug tau has tseg lawm has tas, “Kuv yuav hu Kuv tug Tub tawm huv tebchaws Iziv lug.” #Hauxe 11:1

Tua Cov Mivnyuas Yau

16Thaus Helauj paub tas cov tuabneeg txawj saib nubqub dlaag nwg lawm, nwg chim heev. Nwg txawm khaiv tuabneeg moog rua huv lub nroog Npelehees hab tej zejzog kws nyob ibncig ntawd kuas muab cov mivnyuas tub kws muaj noobnyoog ob xyoos rov huv tua huv tuabsi. Helauj ua le nuav vim nwg paub lug ntawm cov tuabneeg txawj saib nubqub has tas puab tub pum lub nubqub ntawd tshwm tau ob xyoos lug lawm.

17Tej nuav muaj kuas tav lawvle Yelemis kws yog tug xwbfwb cev Vaajtswv lug qha tseg has tas,

18“Tuabneeg nov ib lub suab huv lub nroog Lamas,

kws yog lub suab quaj tusab kawg le.

Laxees quajntsuag rua nwg tej mivnyuas;

tsi muaj leejtwg yuav nplig tau nwg lub sab le,

vim nwg cov mivnyuas tuag taag lawm.” #Yelemi 31:15

Rov Nraag Tebchaws Iziv Lug

19Tomqaab Helauj tuag lawm, tug Tswv ib tug timtswv tau tshwm rua Yauxej pum huv npausuav nraag tebchaws Iziv 20hab nwg has tas, “Cale sawv, coj tug Mivtub hab Nwg nam rovqaab moog rua peg tebchaws Yixalayees, ruaqhov cov kws yuav tua tug Mivtub nuav tub tuag taag lawm.” 21Yauxej txawm sawvtseeg coj tug Mivtub hab Malis rovqaab moog rua peg tebchaws Yixalayees.

22Tabsis thaus Yauxej nov tas Akhilaus sawv lug ua vaajntxwv kaav tebchaws Yudas hloov nwg txiv Helauj chaw lawm, Yauxej kuj ntshai moog nyob qhov chaw ntawd. Yauxej rovqaab ua npausuav pum Vaajtswv lug qha rua nwg ntxiv, tes nwg txawm moog rua peg xeev Kalilais, 23hab moog nyob huv ib lub nroog hu ua Naxalev. Tej nuav muaj lawvle tej lug kws cov xwbfwb cev Vaajtswv lug tau qha tseg txug tug Mivtub ntawd has tas, “Suavdlawg yuav hu Nwg ua tuabneeg Naxalev.” #Malak 1:24; Lukas 2:39; Yauh 1:45

Currently Selected:

Mathais 2: HNJ2022

Highlight

Copy