Mathais 13
13
Zaaj Lug Pevtxwv Has Txug Tug Tseb Nplej
(Malakaus 4:1-9; Lukas 8:4-8)
1Tuabnub ntawd Yexus txawm tawm huv tsev moog nyob quastsawg nraag ntug havtxwv. 2Cov tuabneeg kws tuaj nyob puagncig Nwg ntawd coob heev, Nwg txhaj nce moog nyob huv ib lub nkoj; hab ca cov tuabneeg coob-coob ntawd sawv ntawm ntug dlej. #Lukas 5:1-3 3Yexus ua lug pevtxwv qha ntau zaaj rua puab noog.
“Muaj ib tug txivneej nqaa noob nplej moog tseb. 4Thaus nwg tseb cov noob nplej rua huv dlaim teb, muaj qee lub poob rua huv txujkev, tes noog txawm yaa lug khaws noj lawm. 5Muaj qee lub poob rua ntawm thaaj aav kws muaj pobzeb ntau tabsis aav tsawg. Cov noob ntawd tuaj kaug sai-sai, ruaqhov aav tsi tub. 6Thaus lub nub tawm tuaj, tshaav kub, ua rua cov yub nplej cale qhuav lawm, vim cov caag ntsa aav tsi tub. 7Muaj qee lub poob rua huvqaab tsob xuavpaug, tes cov xuavpaug txhaj hlub tuaj laum cov nplej. 8Tabsis muaj qee lub poob rua ntawm qhov aav zoo, cov ntawd txhawv taug. Qee naab txi tau 100 npaug, qee naab 60 npaug, hab qee naab 30 npaug.”
9Yexus xaus lug has tas, “Yog leejtwg muaj qhovntsej cale noog!”
Lub Homphaj Ntawm Tej Lug Pevtxwv
(Malakaus 4:10-12; Lukas 8:9-10)
10Cov thwjtim lug nug Yexus has tas, “Ua lecaag Koj pheej ua lug pevtxwv qha tuabneeg xwb?”
11Yexus teb tas, “Lub tswvyim kws paub txug Vaajtswv lub Ntuj Ceebtsheej kws muab zais ca lawm tub muab qha meej rua mej paub lawm, tabsis tsi tau muab qha rua puab. 12Ruaqhov tug kws muaj lawm, tseem yuav muab tsaav ntxiv rua nwg, tabsis tug kws tsi muaj dlaabtsi le, txawm yog yaam nyuas miv-miv kws nwg muaj xwb los tseem yuav muab rhu tawm ntawm nwg moog. #Math 25:29; Malak 4:25; Lukas 8:18; 19:26 13Qhov kws Kuv ua lug pevtxwv qha vim ruaqhov puab saib los puab tsi pum, puab noog los puab tsi nov hab tsi totaub. 14Txhaj muaj lawvle Yaxayas tug xwbfwb cev Vaajtswv lug tej lug qhatshwm kws has tas,
“ ‘Cov tuabneeg nuav yuav noog taag noog thab, los yeej tsi totaub;
puab yuav saib taag saib thab, los yeej tsi pum, #Yaxaya 6:9-10 (LXX)
15ruaqhov puab lub sab ruag,
puab ntsaws puab tej qhovntsej,
hab puab qe puab tej qhovmuag.
Vaajtswv has tas, yog tsi ua le ntawd, puab tej qhovmuag yuav pum,
puab qhovntsej yuav nov,
hab puab lub sab yuav totaub,
tes puab yuav tig lug cuag Kuv,
hab Kuv yuav khu kuas puab zoo.’
16“Tabsis mej yog cov kws muaj moo! Mej qhovmuag los pum hab mej qhovntsej los nov. #Lukas 10:23-24 17Kuv qha tseeb rua mej has tas, cov xwbfwb cev Vaajtswv lug hab cov tuabneeg ncaajnceeg ntau leej togntsoov xaav pum tej kws mej pum los puab tub tsi tau pum, hab xaav nov tej kws mej nov los puab tub tsi tau nov.
Yexus Txhais Zaaj Lug Pevtxwv Has Txug Tug Tseb Nplej
(Malakaus 4:13-20; Lukas 8:11-15)
18“Mej ua tuabzoo noog, mej txhaj yuav paub lub ntsablug ntawm zaaj lug pevtxwv kws has txug tug tseb nplej: 19Cov tuabneeg kws nov zaaj kws has txug Vaajtswv lub Ntuj Ceebtsheej tabsis tsi totaub, tes zoo ib yaam le lub noob nplej kws poob rua huv txujkev. Dlaab ntxwgnyoog txawm lug rhu kag txujlug kws tub muab cog rua huv puab lub sab moog lawm. 20Cov noob nplej kws poob rua ntawm thaaj aav kws muaj pobzeb ntau tabsis aav tsawg, pev txug cov tuabneeg kws thaus puab nov dlheev Vaajtswv Txujlug, puab txaussab hlo txais yuav taamsim ntawd. 21Tabsis txujlug ntawd cog caag tsi tub rua huv puab, puab txhaj ntseeg ib nyuas ntu xwb. Thaus puab raug kev txomnyem lossis kev tsimtxom vim txujlug ntawd, tes puab txawm muab tsotseg taamsim. 22Cov noob nplej kws poob rua huvqaab tsob xuavpaug, pev txug cov kws nov Vaajtswv Txujlug, tabsis tej kev nyuajsab huv puab lub neej hab kev ntshaw nyaj txawm hlub tuaj laum txujlug ntawd, ua rua puab lub neej txhaj tsi tawgpaaj txitxiv. 23Tabsis cov noob nplej kws poob rua ntawm qhov aav zoo, pev txug cov kws nov Vaajtswv Txujlug es puab txawj totaub: puab cov ntawd ibtxha txi tau 100 npaug, ibtxha 60 npaug, hab ibtxha 30 npaug.”
Zaaj Lug Pevtxwv Has Txug Cov Txhauv
24Yexus qha dlua ib zaaj lug pevtxwv rua puab noog has tas: “Vaajtswv lub Ntuj Ceebtsheej pev ib yaam le ib tug txivneej kws nqaa ib cov noob nplej zoo coj moog tseb rua huv nwg dlaim teb. 25Muaj ib mos thaus suavdlawg pw tsaugzug taag lawm, txawm muaj yeebncuab coj ib cov noob txhauv tuaj tseb xyaw rua cov nplej, tes nwg txawm tsiv lawm. 26Thaus cov nplej lujhlub hab pib txhawv, uacav txawm pum muaj txhauv tuaj xyaw hab.
27“Cov tubkhai lug has rua tug tswv tas, ‘Tug tswv, koj yeej tseb cov noob nplej zoo rua huv koj dlaim teb xwb puas yog? Uacaag nwgnuav ho muaj txhauv tuaj xyaw hab?’ 28Nwg teb puab has tas, ‘Tej ntawd yog yeebncuab ua xwb.’ Cov tubkhai nug nwg has tas, ‘Koj puas xaav kuas peb moog muab cov txhauv ntawd dlob povtseg?’ 29Nwg teb tas, ‘Tsi xob muab dlob, nyobtsaam thaus mej dlob cov txhauv, tes mej yuav dlob tau cov nplej hab. 30Ca cov nplej hab cov txhauv lujhlub uake moog txug lub caij hlais nplej, kuv maam has kuas cov tub hlais nplej xub dlob cov txhauv paav ua tej teg hab muab hlawv, tomqaab ntawd puab maam sau cov nplej lug rua huv kuv lub txhaab.’ ”
Zaaj Lug Pevtxwv Has Txug Lub Noob Maxataj
(Malakaus 4:30-32; Lukas 13:18-19)
31Yexus has dlua ib zaaj lug pevtxwv rua puab noog has tas: “Vaajtswv lub Ntuj Ceebtsheej pev ib yaam le ib lub noob maxataj kws ib tug txivneej coj moog cog rua huv nwg dlaim teb. 32Txawm yog lub noob ntawd yog ib lub kws miv dlua lwmyaam noob huv tuabsi los, thaus nwg lujhlub tuaj lawm, nwg tseem luj dlua txhua yaam zaub huv tuabsi. Nwg dlhau moog ua ib tsob ntoo ua rua noog lug ua zeg rua sau tej ceg.”
Zaaj Lug Pevtxwv Has Txug Cov Keeb
(Lukas 13:20-21)
33Yexus rov has dlua ib zaaj lug pevtxwv rua puab noog has tas: “Vaajtswv lub Ntuj Ceebtsheej pev ib yaam le cov keeb kws ib tug quaspuj muab xyaw rua peb sab moov nplej, tes cale ua rua cov moov nplej ntawd su taagnrho huv tuabsi.”
Yexus Ua Lug Pevtxwv Qha
(Malakaus 4:33-34)
34Yexus ua lug pevtxwv qha txhua zaaj nuav rua suavdlawg; tsi muaj ib zaaj kws Nwg yuav tsi ua lug pevtxwv qha le. 35Nwg ua le ntawd txhaj muaj tav lawvle tug xwbfwb cev Vaajtswv lug tau qha tseg has tas,
“Thaus Kuv has rua puab, Kuv yuav ua lug pevtxwv has xwb.
Kuv yuav qha tej kws tsi muaj tuabneeg paub txij thaus tsim lub nplajteb lug rua puab noog.” #Nnkauj 78:2
Yexus Txhais Zaaj Lug Pevtxwv Kws Has Txug Nplej Hab Txhauv
36Yexus txawm tso cov tuabneeg coob-coob ntawd tseg hab moog rua huv tsev lawm. Nwg cov thwjtim lug has rua Nwg tas, “Thov Koj txhais zaaj lug pevtxwv kws Koj has txug cov txhauv huv dlaim teb ntawd rua peb noog seb yog lecaag.”
37Yexus qha has tas, “Tug kws tseb cov noob nplej zoo yog Tuabneeg Leejtub; 38dlaim teb yog lub nplajteb nuav; cov noob nplej zoo yog cov tuabneeg kws Vaajtswv kaav; cov txhauv yog cov tuabneeg kws dlaab ntxwgnyoog kaav. 39Hab tug yeebncuab kws tuaj tseb cov noob txhauv ntawd yog dlaab ntxwgnyoog. Lub caij hlais yog lub sijhawm kws nplajteb kawg, hab cov tub hlais nplej yog cov timtswv ceebtsheej.
40“Cov txhauv raug muab dlob moog pov hlawv lecaag tes lub sijhawm nplajteb kawg yuav zoo ib yaam le ntawd. 41Tuabneeg Leejtub yuav khaiv Nwg cov timtswv ceebtsheej moog sau cov tuabneeg kws ua rua lwmtug ua txhum hab cov tuabneeg ua phem ua qas huv tuabsi tawm huv Nwg lub tebchaws moog 42hab coj cov tuabneeg ntawd moog pov rua huv lub cubtawg kws cig hlub-hlub, puab yuav quaj qw qes nav qawv qhov ntawd. 43Thaus ntawd Vaajtswv cov tuabneeg yuav ci ntsaa-ab ib yaam le lub nub nyob huv puab Leejtxiv lub Tebchaws. Yog leejtwg muaj qhovntsej, cale noog!
Zaaj Lug Pevtxwv Has Txug Hub Nyaj Kws Faus Ca
44“Vaajtswv lub Ntuj Ceebtsheej pev ib yaam le hub nyaj kws luas muab faus ca rua huv ib dlaim teb. Muaj ib tug moog pum tes nwg txawm rov muab faus dlua; vim nwg zoosab kawg le, nwg txhaj moog muab nwg lub cuabtaam muag huv tuabsi hab rov moog yuav dlaim teb ntawd.
Zaaj Lug Pevtxwv Has Txug Cov Hlaws
45“Hab Vaajtswv lub Ntuj Ceebtsheej pev ib yaam le ib tug tubluam moog nrhav yuav cov hlaws muajnqes. 46Thaus nwg moog nrhav pum ib lub hlaws kws muajnqes dlua lwm lub huv tuabsi lawm, nwg txawm rov lug muab nwg lub cuabtaam muag hab moog yuav lub hlaws ntawd.
Zaaj Lug Pevtxwv Has Txug Lub Vaag Cuab Ntseg
47“Hab Vaajtswv lub Ntuj Ceebtsheej pev ib yaam le lub vaag cuab ntseg kws luas muab cuab rua huv havtxwv hab maag tau txhua yaam ntseg. 48Thaus lub vaag maag tau ntseg ntau heev lawm, cov tuabneeg cuab ntseg txawm nqug lub vaag lug rua tim ntug hab nyob quastsawg xaiv cov ntseg ntawd. Puab xaiv cov zoo ntim rua huv tawb hab muab cov kws tsi zoo povtseg. 49Thaus lub sijhawm nplajteb kawg yuav zoole ntawd ntaag. Cov timtswv ceebtsheej yuav lug muab cov tuabneeg phem cais tawm ntawm cov tuabneeg ncaajnceeg moog, 50hab yuav muab puab coj moog pov rua huv lub cubtawg kws cig hlub-hlub, puab yuav quaj qw qes nav qawv qhov ntawd.”
Tej Lug Qha Tshab Hab Qub
51Yexus nug cov thwjtim has tas, “Mej puas totaub tej nuav?”
Puab teb tas, “Peb totaub.”
52Tes Yexus txawm has rua puab tas, “Yogle ntawd, txhua tug xwbfwb qha Kevcai kws tub kawm paub txug Vaajtswv lub Ntuj Ceebtsheej lawm, puab zoo ib yaam le tug tswvtsev kws muab nwg tej khoom tshab hab qub huv nwg lub tsev ntim khoom rhu tawm lug.”
Cov Tuabneeg Huv Naxalev Tsi Txais Yuav Yexus
(Malakaus 6:1-6; Lukas 4:16-30)
53Thaus Yexus qha cov lug pevtxwv nuav taag lawm, Nwg txawm tawm qhov ntawd 54hab rovqaab moog rua huv Nwg lub zog. Nwg moog qhuabqha huv lub tsev saablaaj, hab cov tuabneeg kws nov Nwg qha xaav tsi thoob le. Puab sisnug zumzawg has tas, “Nwg tau tej tswvyim nuav qhovtwg lug? Uacaag Nwg ho ua tau tej txujci tseemceeb nuav? 55Nwg puas yog tug kws kaw ntoo tug tub? Nwg nam puas yog Malis, hab Nwg cov kwv puas yog Yakaunpaus, Yauxej, Ximoos hab Yudas? 56Nwg cov muam puavleej nyob huv lub nroog nuav puas yog maj? Nwg tau tej tswvyim nuav qhovtwg lug?” 57Puab txawm tsi leeg paub Yexus.
Yexus has rua puab tas, “Tej tuabneeg ob caag puavleej fwm tug xwbfwb cev Vaajtswv lug, tsuas yog cov tuabneeg kws nyob huv nwg lub zog hab nwg tsev tuabneeg txhaj tsi fwm nwg xwb.” #Yauh 4:44 58Yexus tsi ua tej txujci tseemceeb ntau pistsawg nyob rua qhov ntawd, vim puab tsi muaj kev ntseeg.
Currently Selected:
Mathais 13: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
Mathais 13
13
Zaaj Lug Pevtxwv Has Txug Tug Tseb Nplej
(Malakaus 4:1-9; Lukas 8:4-8)
1Tuabnub ntawd Yexus txawm tawm huv tsev moog nyob quastsawg nraag ntug havtxwv. 2Cov tuabneeg kws tuaj nyob puagncig Nwg ntawd coob heev, Nwg txhaj nce moog nyob huv ib lub nkoj; hab ca cov tuabneeg coob-coob ntawd sawv ntawm ntug dlej. #Lukas 5:1-3 3Yexus ua lug pevtxwv qha ntau zaaj rua puab noog.
“Muaj ib tug txivneej nqaa noob nplej moog tseb. 4Thaus nwg tseb cov noob nplej rua huv dlaim teb, muaj qee lub poob rua huv txujkev, tes noog txawm yaa lug khaws noj lawm. 5Muaj qee lub poob rua ntawm thaaj aav kws muaj pobzeb ntau tabsis aav tsawg. Cov noob ntawd tuaj kaug sai-sai, ruaqhov aav tsi tub. 6Thaus lub nub tawm tuaj, tshaav kub, ua rua cov yub nplej cale qhuav lawm, vim cov caag ntsa aav tsi tub. 7Muaj qee lub poob rua huvqaab tsob xuavpaug, tes cov xuavpaug txhaj hlub tuaj laum cov nplej. 8Tabsis muaj qee lub poob rua ntawm qhov aav zoo, cov ntawd txhawv taug. Qee naab txi tau 100 npaug, qee naab 60 npaug, hab qee naab 30 npaug.”
9Yexus xaus lug has tas, “Yog leejtwg muaj qhovntsej cale noog!”
Lub Homphaj Ntawm Tej Lug Pevtxwv
(Malakaus 4:10-12; Lukas 8:9-10)
10Cov thwjtim lug nug Yexus has tas, “Ua lecaag Koj pheej ua lug pevtxwv qha tuabneeg xwb?”
11Yexus teb tas, “Lub tswvyim kws paub txug Vaajtswv lub Ntuj Ceebtsheej kws muab zais ca lawm tub muab qha meej rua mej paub lawm, tabsis tsi tau muab qha rua puab. 12Ruaqhov tug kws muaj lawm, tseem yuav muab tsaav ntxiv rua nwg, tabsis tug kws tsi muaj dlaabtsi le, txawm yog yaam nyuas miv-miv kws nwg muaj xwb los tseem yuav muab rhu tawm ntawm nwg moog. #Math 25:29; Malak 4:25; Lukas 8:18; 19:26 13Qhov kws Kuv ua lug pevtxwv qha vim ruaqhov puab saib los puab tsi pum, puab noog los puab tsi nov hab tsi totaub. 14Txhaj muaj lawvle Yaxayas tug xwbfwb cev Vaajtswv lug tej lug qhatshwm kws has tas,
“ ‘Cov tuabneeg nuav yuav noog taag noog thab, los yeej tsi totaub;
puab yuav saib taag saib thab, los yeej tsi pum, #Yaxaya 6:9-10 (LXX)
15ruaqhov puab lub sab ruag,
puab ntsaws puab tej qhovntsej,
hab puab qe puab tej qhovmuag.
Vaajtswv has tas, yog tsi ua le ntawd, puab tej qhovmuag yuav pum,
puab qhovntsej yuav nov,
hab puab lub sab yuav totaub,
tes puab yuav tig lug cuag Kuv,
hab Kuv yuav khu kuas puab zoo.’
16“Tabsis mej yog cov kws muaj moo! Mej qhovmuag los pum hab mej qhovntsej los nov. #Lukas 10:23-24 17Kuv qha tseeb rua mej has tas, cov xwbfwb cev Vaajtswv lug hab cov tuabneeg ncaajnceeg ntau leej togntsoov xaav pum tej kws mej pum los puab tub tsi tau pum, hab xaav nov tej kws mej nov los puab tub tsi tau nov.
Yexus Txhais Zaaj Lug Pevtxwv Has Txug Tug Tseb Nplej
(Malakaus 4:13-20; Lukas 8:11-15)
18“Mej ua tuabzoo noog, mej txhaj yuav paub lub ntsablug ntawm zaaj lug pevtxwv kws has txug tug tseb nplej: 19Cov tuabneeg kws nov zaaj kws has txug Vaajtswv lub Ntuj Ceebtsheej tabsis tsi totaub, tes zoo ib yaam le lub noob nplej kws poob rua huv txujkev. Dlaab ntxwgnyoog txawm lug rhu kag txujlug kws tub muab cog rua huv puab lub sab moog lawm. 20Cov noob nplej kws poob rua ntawm thaaj aav kws muaj pobzeb ntau tabsis aav tsawg, pev txug cov tuabneeg kws thaus puab nov dlheev Vaajtswv Txujlug, puab txaussab hlo txais yuav taamsim ntawd. 21Tabsis txujlug ntawd cog caag tsi tub rua huv puab, puab txhaj ntseeg ib nyuas ntu xwb. Thaus puab raug kev txomnyem lossis kev tsimtxom vim txujlug ntawd, tes puab txawm muab tsotseg taamsim. 22Cov noob nplej kws poob rua huvqaab tsob xuavpaug, pev txug cov kws nov Vaajtswv Txujlug, tabsis tej kev nyuajsab huv puab lub neej hab kev ntshaw nyaj txawm hlub tuaj laum txujlug ntawd, ua rua puab lub neej txhaj tsi tawgpaaj txitxiv. 23Tabsis cov noob nplej kws poob rua ntawm qhov aav zoo, pev txug cov kws nov Vaajtswv Txujlug es puab txawj totaub: puab cov ntawd ibtxha txi tau 100 npaug, ibtxha 60 npaug, hab ibtxha 30 npaug.”
Zaaj Lug Pevtxwv Has Txug Cov Txhauv
24Yexus qha dlua ib zaaj lug pevtxwv rua puab noog has tas: “Vaajtswv lub Ntuj Ceebtsheej pev ib yaam le ib tug txivneej kws nqaa ib cov noob nplej zoo coj moog tseb rua huv nwg dlaim teb. 25Muaj ib mos thaus suavdlawg pw tsaugzug taag lawm, txawm muaj yeebncuab coj ib cov noob txhauv tuaj tseb xyaw rua cov nplej, tes nwg txawm tsiv lawm. 26Thaus cov nplej lujhlub hab pib txhawv, uacav txawm pum muaj txhauv tuaj xyaw hab.
27“Cov tubkhai lug has rua tug tswv tas, ‘Tug tswv, koj yeej tseb cov noob nplej zoo rua huv koj dlaim teb xwb puas yog? Uacaag nwgnuav ho muaj txhauv tuaj xyaw hab?’ 28Nwg teb puab has tas, ‘Tej ntawd yog yeebncuab ua xwb.’ Cov tubkhai nug nwg has tas, ‘Koj puas xaav kuas peb moog muab cov txhauv ntawd dlob povtseg?’ 29Nwg teb tas, ‘Tsi xob muab dlob, nyobtsaam thaus mej dlob cov txhauv, tes mej yuav dlob tau cov nplej hab. 30Ca cov nplej hab cov txhauv lujhlub uake moog txug lub caij hlais nplej, kuv maam has kuas cov tub hlais nplej xub dlob cov txhauv paav ua tej teg hab muab hlawv, tomqaab ntawd puab maam sau cov nplej lug rua huv kuv lub txhaab.’ ”
Zaaj Lug Pevtxwv Has Txug Lub Noob Maxataj
(Malakaus 4:30-32; Lukas 13:18-19)
31Yexus has dlua ib zaaj lug pevtxwv rua puab noog has tas: “Vaajtswv lub Ntuj Ceebtsheej pev ib yaam le ib lub noob maxataj kws ib tug txivneej coj moog cog rua huv nwg dlaim teb. 32Txawm yog lub noob ntawd yog ib lub kws miv dlua lwmyaam noob huv tuabsi los, thaus nwg lujhlub tuaj lawm, nwg tseem luj dlua txhua yaam zaub huv tuabsi. Nwg dlhau moog ua ib tsob ntoo ua rua noog lug ua zeg rua sau tej ceg.”
Zaaj Lug Pevtxwv Has Txug Cov Keeb
(Lukas 13:20-21)
33Yexus rov has dlua ib zaaj lug pevtxwv rua puab noog has tas: “Vaajtswv lub Ntuj Ceebtsheej pev ib yaam le cov keeb kws ib tug quaspuj muab xyaw rua peb sab moov nplej, tes cale ua rua cov moov nplej ntawd su taagnrho huv tuabsi.”
Yexus Ua Lug Pevtxwv Qha
(Malakaus 4:33-34)
34Yexus ua lug pevtxwv qha txhua zaaj nuav rua suavdlawg; tsi muaj ib zaaj kws Nwg yuav tsi ua lug pevtxwv qha le. 35Nwg ua le ntawd txhaj muaj tav lawvle tug xwbfwb cev Vaajtswv lug tau qha tseg has tas,
“Thaus Kuv has rua puab, Kuv yuav ua lug pevtxwv has xwb.
Kuv yuav qha tej kws tsi muaj tuabneeg paub txij thaus tsim lub nplajteb lug rua puab noog.” #Nnkauj 78:2
Yexus Txhais Zaaj Lug Pevtxwv Kws Has Txug Nplej Hab Txhauv
36Yexus txawm tso cov tuabneeg coob-coob ntawd tseg hab moog rua huv tsev lawm. Nwg cov thwjtim lug has rua Nwg tas, “Thov Koj txhais zaaj lug pevtxwv kws Koj has txug cov txhauv huv dlaim teb ntawd rua peb noog seb yog lecaag.”
37Yexus qha has tas, “Tug kws tseb cov noob nplej zoo yog Tuabneeg Leejtub; 38dlaim teb yog lub nplajteb nuav; cov noob nplej zoo yog cov tuabneeg kws Vaajtswv kaav; cov txhauv yog cov tuabneeg kws dlaab ntxwgnyoog kaav. 39Hab tug yeebncuab kws tuaj tseb cov noob txhauv ntawd yog dlaab ntxwgnyoog. Lub caij hlais yog lub sijhawm kws nplajteb kawg, hab cov tub hlais nplej yog cov timtswv ceebtsheej.
40“Cov txhauv raug muab dlob moog pov hlawv lecaag tes lub sijhawm nplajteb kawg yuav zoo ib yaam le ntawd. 41Tuabneeg Leejtub yuav khaiv Nwg cov timtswv ceebtsheej moog sau cov tuabneeg kws ua rua lwmtug ua txhum hab cov tuabneeg ua phem ua qas huv tuabsi tawm huv Nwg lub tebchaws moog 42hab coj cov tuabneeg ntawd moog pov rua huv lub cubtawg kws cig hlub-hlub, puab yuav quaj qw qes nav qawv qhov ntawd. 43Thaus ntawd Vaajtswv cov tuabneeg yuav ci ntsaa-ab ib yaam le lub nub nyob huv puab Leejtxiv lub Tebchaws. Yog leejtwg muaj qhovntsej, cale noog!
Zaaj Lug Pevtxwv Has Txug Hub Nyaj Kws Faus Ca
44“Vaajtswv lub Ntuj Ceebtsheej pev ib yaam le hub nyaj kws luas muab faus ca rua huv ib dlaim teb. Muaj ib tug moog pum tes nwg txawm rov muab faus dlua; vim nwg zoosab kawg le, nwg txhaj moog muab nwg lub cuabtaam muag huv tuabsi hab rov moog yuav dlaim teb ntawd.
Zaaj Lug Pevtxwv Has Txug Cov Hlaws
45“Hab Vaajtswv lub Ntuj Ceebtsheej pev ib yaam le ib tug tubluam moog nrhav yuav cov hlaws muajnqes. 46Thaus nwg moog nrhav pum ib lub hlaws kws muajnqes dlua lwm lub huv tuabsi lawm, nwg txawm rov lug muab nwg lub cuabtaam muag hab moog yuav lub hlaws ntawd.
Zaaj Lug Pevtxwv Has Txug Lub Vaag Cuab Ntseg
47“Hab Vaajtswv lub Ntuj Ceebtsheej pev ib yaam le lub vaag cuab ntseg kws luas muab cuab rua huv havtxwv hab maag tau txhua yaam ntseg. 48Thaus lub vaag maag tau ntseg ntau heev lawm, cov tuabneeg cuab ntseg txawm nqug lub vaag lug rua tim ntug hab nyob quastsawg xaiv cov ntseg ntawd. Puab xaiv cov zoo ntim rua huv tawb hab muab cov kws tsi zoo povtseg. 49Thaus lub sijhawm nplajteb kawg yuav zoole ntawd ntaag. Cov timtswv ceebtsheej yuav lug muab cov tuabneeg phem cais tawm ntawm cov tuabneeg ncaajnceeg moog, 50hab yuav muab puab coj moog pov rua huv lub cubtawg kws cig hlub-hlub, puab yuav quaj qw qes nav qawv qhov ntawd.”
Tej Lug Qha Tshab Hab Qub
51Yexus nug cov thwjtim has tas, “Mej puas totaub tej nuav?”
Puab teb tas, “Peb totaub.”
52Tes Yexus txawm has rua puab tas, “Yogle ntawd, txhua tug xwbfwb qha Kevcai kws tub kawm paub txug Vaajtswv lub Ntuj Ceebtsheej lawm, puab zoo ib yaam le tug tswvtsev kws muab nwg tej khoom tshab hab qub huv nwg lub tsev ntim khoom rhu tawm lug.”
Cov Tuabneeg Huv Naxalev Tsi Txais Yuav Yexus
(Malakaus 6:1-6; Lukas 4:16-30)
53Thaus Yexus qha cov lug pevtxwv nuav taag lawm, Nwg txawm tawm qhov ntawd 54hab rovqaab moog rua huv Nwg lub zog. Nwg moog qhuabqha huv lub tsev saablaaj, hab cov tuabneeg kws nov Nwg qha xaav tsi thoob le. Puab sisnug zumzawg has tas, “Nwg tau tej tswvyim nuav qhovtwg lug? Uacaag Nwg ho ua tau tej txujci tseemceeb nuav? 55Nwg puas yog tug kws kaw ntoo tug tub? Nwg nam puas yog Malis, hab Nwg cov kwv puas yog Yakaunpaus, Yauxej, Ximoos hab Yudas? 56Nwg cov muam puavleej nyob huv lub nroog nuav puas yog maj? Nwg tau tej tswvyim nuav qhovtwg lug?” 57Puab txawm tsi leeg paub Yexus.
Yexus has rua puab tas, “Tej tuabneeg ob caag puavleej fwm tug xwbfwb cev Vaajtswv lug, tsuas yog cov tuabneeg kws nyob huv nwg lub zog hab nwg tsev tuabneeg txhaj tsi fwm nwg xwb.” #Yauh 4:44 58Yexus tsi ua tej txujci tseemceeb ntau pistsawg nyob rua qhov ntawd, vim puab tsi muaj kev ntseeg.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.