Malakis 3
3
1Tug TSWV kws muaj Fwjchim Luj Kawg Nkaus teb tas, “Kuv yuav khaiv Kuv tug tubkhai uantej moog khu kev tog Kuv. Thaus ntawd tug TSWV kws mej najnub tog yuav lug rua huv Nwg lub Tuamtsev. Tug tubkhai kws mej xaav pum lug ntev lawm, yuav lug hab tshaajtawm Kuv tej lug cogtseg.” #Math 11:10; Malak 1:2; Lukas 1:76; 7:27
2Tabsis leejtwg yuav muaj cuabkaav tiv taug nub kws Nwg lug? Leejtwg yuav sawv taug thaus Nwg tshwm lug? Nwg yuav zoo le cov tshuaj kws ntxhua khaubdluag kuas dlawb, hab zoo le cov nplaimtawg kws cig huv lub yeejvub nchuav hlau. #Yau 2:11; Tshwm 6:17 3Nwg yuav lug txavtxim ib yaam le tug tuabneeg nchuav nyaj kuas tau cov tseem nyaj. Luas nchuav nyaj nchuav kub lecaag, tes tug TSWV tug tubkhai yuav lug muab cov povthawj hlub ntxuav kuas dlawbhuv le ntawd, sub puab txhaj yuav coj tej khoom kws hum tug TSWV sab tuaj fij rua Nwg. 4Thaus ntawd tej khoom kws cov Yudais hab cov tuabneeg huv Yeluxalees coj tuaj fij rua tug TSWV txhaj yuav ua rua Nwg txaussab ib yaam le yaav thaus u.
5Tug TSWV kws muaj Fwjchim Luj Kawg Nkaus has tas, “Kuv yuav lug saib mej hab txavtxim rua mej. Kuv yuav ua timkhawv tawmtsaam cov tuabneeg kws txawj ua yeegsiv, cov tuabneeg kws ua nkauj ua nraug, cov tuabneeg kws ua timkhawv tsi tseeb, cov tuabneeg kws txhaav nwg tej tubzug tej nyaj yuav, hab cov tuabneeg kws ua limham rua tej pujntsuag, tej mivnyuas ntsuag, hab cov tuabneeg txawv tebchaws, hab txhua tug kws tsi fwm Kuv.
Muab Ib Feem Kaum
6“Kuv yog tug TSWV, hab Kuv yeej tsi hloov le. Yogle ntawd, mej cov kws yog Yakhauj caajceg tseem tsi tau tu noob. 7Mej zoo yaam nkaus le mej cov yawmkoob kws nyob uantej mej lawm. Mej tau tso Kuv tej kevcai tseg hab yeej tsi ua lawvle tej kevcai ntawd. Mej cale tig rov lug cuag Kuv, Kuv txhaj yuav tig lug cuag mej. Tabsis mej nug has tas, ‘Peb yuav ua lecaag txhaj tig tau rov lug cuag Koj?’
8“Kuv nug mej tas, puas tsimnyog ib tug tuabneeg twg txhaav Vaajtswv tug? Yeej tsi tsimnyog hlo le, tabsis mej txhaav Kuv tug! Mej nug has tas, ‘Peb txhaav Koj tug lecaag?’ Mej txhaav Kuv tug lug ntawm ib feem kaum hab tej khoom fij. 9Mej txhua tug puavleej raug foom phem lawm, ruaqhov taagnrho mej tsaav tuabneeg puavleej txhaav Kuv tug. 10Mej yuavtsum nqaa kuas taagnrho ib feem kaum tuaj tso rua huv lub Tuamtsev, sub txhajle yuav muaj noj nplua-mag nyob rua huv. Mej sim Kuv maj, mej yeej yuav pum tas Kuv yuav qheb roojntug nchuav koobmoov ntau nplua-mag lug rua mej. #Levi 27:30; Teev 18:21-24; 2Kev 12:6; 14:22-29; Nehemi 13:12 11Kuv yuav tsi pub kaab noj mej tej qoobloo, hab mej tej txivmaab yuav txi ncw. 12Thaus ntawd txhua tsaav tuabneeg yuav hu mej ua cov tuabneeg kws tau koobmoov, ruaqhov mej lub tebchaws yog lub kws tau zoo noj tau zoo nyob.”
Vaajtswv Coglug Yuav Taabncuab Nwg Tsaav Tuabneeg
13Tug TSWV has tas, “Mej haslug phem kawg nkaus thuam Kuv, tabsis mej tseem nug has tas, ‘Peb haslug phem thuam Koj lecaag?’ 14Mej has tas, ‘Qhov kws peb tam Vaajtswv ntawd yeej tsi muaj qaabhau dlaabtsi le. Qhov kws peb ua lawvle tug TSWV kws muaj Fwjchim Luj Kawg Nkaus has lossis pheej leeg tej kev txhum kws peb tau ua taag lug ntawd, muaj qaabhau dlaabtsi rua peb? 15Lawvle peb pum mas cov tuabneeg khaavtheeb yog cov kws muaj kev zoosab. Cov tuabneeg ua phem tsi yog muaj kev vaammeej xwb, tabsis puab txhobtxwm ua txhum sim Vaajtswv sab los puab tseem tsi raug txim le hab.’ ”
16Tes cov tuabneeg kws paub ntshai tug TSWV, puab ib leeg txawm nrug ib leeg thaam, hab tug TSWV yeej noog ntsoov hab nov tej kws puab thaam ntawd. Nyob rua ntawm tug TSWV xubndlag, muaj ib phoo ntawv kws teev txug cov tuabneeg kws paub ntshai hab fwm tug TSWV tej npe rua huv. 17Tug TSWV kws muaj Fwjchim Luj Kawg Nkaus has tas, “Puab yuav yog Kuv tsaav tuabneeg. Thaus txug nub kws Kuv txavtxim, puab yuav yog Kuv tug. Kuv yuav taabncuab puab ib yaam le leejtxiv taabncuab nwg tug tub kws tam nwg ntaag. 18Kuv tsaav tuabneeg yuav pum cov tuabneeg ncaajnceeg hab cov kws ua phem ua qas dlua ib zag ntxiv tas sistxawv lecaag, hab cov tuabneeg kws tam Kuv hab cov kws tsi tam Kuv sistxawv lecaag.”
Currently Selected:
Malakis 3: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
