Levis Kevcai 6
6
1Tug TSWV has rua Mauxes tas, #Teev 5:5-8 2“Yog leejtwg ua txhum hab ua tsi ncaaj rua tug TSWV kws yog tsi kaam thim tej khoom kws ib tug kwvtij zejzog coj tuaj rua nwg paab khaws tseg ua kev yuam nqe lossis cale nyag luas tug lossis cale txhaav luas tug 3lossis nwg tub pum luas ib yaam khoom kws pluj lawm los nwg tseem dlaag hab twv ntxhas has tas nwg tsi pum le. 4-5Yog thaus leejtwg ua txhum le has nuav, nwg yuavtsum muab tej kws nwg tau lug ntawm qhov kws ua tsi ncaaj ntawd xaa rovqaab. Nub kws paub tas nwg tau nyag lawm tag, nwg yuavtsum thim cov khoom ntawd kuas puvntoob rovqaab rua tug tswv, hab ntxiv neegnkaum feem pua rua. 6Nwg yuavtsum coj ib tug laug yaaj lossis laug tshis kws tsi muaj ib qhov phem le moog rua tug povthawj hlub muab fij rua tug TSWV dlaws nwg tej kev txhum. Tug tsaj ntawd yuavtsum ntaus nqe kuas lawvle numtswv kevcai. 7Tug povthawj hlub yuavtsum muab tug tsaj ntawd fij dlaws tug tuabneeg ntawd txuj kev txhum, sub nwg lub txim txhaj yuav raug zaam.”
Hlawv Taagnrho Tej Khoom Fij
8Tug TSWV has rua Mauxes tas, 9“Muab tej kevcai hlawv khoom fij le nraag nuav qha rua Aloos hab nwg cov tub. Yaam khoom kws muab hlawv fij ntawd yuavtsum ca nyob rua sau lub thaaj ib mos kaajntug plawg, hab lub cubtawg los yuavtsum ca cig tsi pub tuag le. 10Tes tug povthawj hlub naav nwg lub tsho ntaub maag ntev hab lub rig ntaub maag tuablu, maam moog muab cov tshauv sau lub thaaj yawm hab muab tso rua ntawm lub thaaj ib saab. 11Tes nwg maamle hloov nwg cev rigtsho hab coj cov tshauv moog nchuav rua ntawm qhov chaw dlawbhuv kws nyob saabnrau ntug yeej. 12Cov tawg sau lub thaaj yuavtsum rauv kuas cig tsi xob pub tuag le. Txhua taagkig sawvntxuv tug povthawj hlub yuavtsum tuaj muab tawg rauv ntxiv rua, hab muab tej khoom fij hab tej nqaj rog coj moog hlawv rua sau fij ua kev sis raugzoo. 13Lub cubtawg sau lub thaaj mas yuavtsum ca cig tsi xob pub tuag le.
Fij Tej Qoobloo
14“Ntawm nuav moog yog tej kevcai kws fij tej qoobloo. Aloos cov tub kws yog cov povthawj hlub yuavtsum muab tej qoobloo moog fij taabmeeg rua tug TSWV ntawm lub thaaj hauvntej. 15Tug povthawj hlub muab ib phoovteg moov nplej hab roj, hab muab moov tshuaj tswqaab nphoo rua sau cov moov nplej hab coj moog hlawv rua sau lub thaaj kuas tswqaab ntxag rua tug TSWV txaussab heev. 16-17Aloos hab nwg cov tub yuav noj cov ncuav tsi xyaw keeb kws seem nyob rua huv chaav dlawbhuv, kws yog ntawm lub tshaavloog huv lub Tsevntaub Sisntsib. Tsi xob muab keeb xyaw cov ncuav ntawd, ruaqhov yog cov kws tug TSWV muab rua cov povthawj hlub ua puab tug siv ua khoom noj fij rua tug TSWV. Nwg yog ib yaam khoom dlawbhuv le cov khoom fij dlaws txim hab dlaws kev txhum. 18Txhua tug txivneej kws yog Aloos caajceg txhaj muaj cai noj tau tej zaub-mov kws coj tuaj fij rua tug TSWV ntawd, ib tam rua ib tam moog le. Yog leejtwg moog chwv tej khoom noj kws muab fij ntawd, yuav ua rua tug ntawd dlawbhuv.”
19Tug TSWV has rua Mauxes tas, 20“Aloos hab nwg cov tub yuavtsum nqaa khoom moog fij rua tug TSWV, nub kws ua kevcai tsaa nwg ua povthawj hlub. Nwg yuavtsum nqaa 1 kilus moov nplej moog ua khoom fij rua tug TSWV (kuas sisnpaug zog le tej moov nplej kws puab najnub coj moog fij rua tug TSWV), muab ibnraab fij rua thaus sawvntxuv hab ibnraab fij rua thaus tsausntuj. 21Muab zuaj xyaw roj hab coj moog kib huv yag, thaus tawgpaaj lawm maam coj moog ua khoom fij, kuas tej paa tswqaab ntxag ua rua tug TSWV txaussab. 22Aloos caajceg txhua tug kws ua tug Tuam Povthawj Hlub yuavtsum muab khoom fij rua tug TSWV le nuav ib tam rua ib tam moog le. Tej khoom ntawd muab hlawv taagnrho fij rua tug TSWV. 23Tej qoobloo kws tug povthawj hlub muab fij ntawd yuavtsum muab hlawv kuas taag, tsi xob noj hlo le.”
Fij Khoom Dlaws Txim
24Tug TSWV has rua Mauxes tas, 25“Muab tej kevcai fij khoom dlaws txim le nraag nuav qha rua Aloos hab nwg cov tub. Tug tsaj kws fij dlaws txim yuavtsum muab tua rua ntawm lub thaaj saab peg, qhov chaw kws tua tsaj hlawv ua khoom fij taabmeeg tug TSWV. Nuav yog ib yaam khoom fij kws dlawbhuv heev.
26“Tug povthawj hlub kws fij tug tsaj dlaws txim ntawd yuav noj tug tsaj ntawd huv chaav dlawbhuv, kws yog ntawm lub tshaavloog huv lub Tsevntaub Sisntsib. 27Yog ib tug twg lossis ib yaam dlaabtsi kws moog chwv tug tsaj ntawd cov nqaj, yuav ua rua tug ntawd dlawbhuv. Yog tug tsaj ntawd cov ntshaav txaws lu tej rigtsho, yuavtsum muab tej rigtsho ntawd ntxhua rua huv chaav dlawbhuv. 28Lub laujkaub aav kws muab hau cov nqaj ntawd, yuavtsum muab tsoo povtseg, hab yog muab laujkaub tooj hau los yuavtsum muab txhuam hab muab dlej yaug kuas huv. 29Txhua tug txivneej kws yog cov povthawj hlub tsev tuabneeg muaj cai noj cov nqaj kws muab ua khoom fij nuav. Cov nqaj ntawd dlawbhuv heev. 30Tabsis tug tsaj theej txhoj kws muab cov ntshaav nqaa moog rua huv lub Tsevntaub Sisntsib fij ua kevcai dlaws txim, yuavtsum tsi xob noj, tabsis muab hlawv xwb.
Currently Selected:
Levis Kevcai 6: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
