Chivkeeb 41

Yauxej Txhais Falaus Zaaj Npausuav

1Tau ob xyoos txwm nkaus tomqaab ntawd, Falaus ua ib zaaj npausuav has tas nwg sawv ntawm ntug Dlej Nais. 2Nwg pum xyaa tug maum nyuj rog-rog hab zoonkauj heev tawm huv dlej lug noj tej nyom kws nyob ntawm ntug dlej. 3Dlhau ntawd, txawm muaj dlua xyaa tug maum nyuj ntxaug-ntxaug tshuav pobtxhaa xwb, tawm huv dlej lug nrug xyaa tug maum nyuj rog-rog ntawd sawv uake ntawm ntug dlej. 4Tes xyaa tug maum nyuj ntxaug-ntxaug ntawd cale muab xyaa tug maum nyuj rog-rog noj nqog taag huv tuabsi lawm. Tes Falaus txawm tsim dlheev lug.

5Nwg rov tsaugzug hab ua dlua ib zaaj npausuav has tas, muaj ib tsob nplej txhawv tau xyaa naab, mas puv hab sav zoo kawg le. 6Tes muaj dlua ib tsob nplej txhawv tau xyaa naab nplej npluag hab qhuav taw nreeg, ruaqhov raug cov cua tom taj suabpuam tuaj ntsawj. 7Cov naab nplej npluag ntawd txawm cale muab xyaa naab nplej kws puv-puv ntawd nqog taag huv tuabsi lawm. Falaus txawm tsim dlheev lug, uacav yog nwg ua npausuav xwb.

8Taagkig kaajntug Falaus ntxhuvsab heev, nwg txhaj khaiv tuabneeg moog hu cov tuabneeg kws txawj saib yaig hab cov tuabneeg txawjntse kws nyob huv tebchaws Iziv tuaj huv tuabsi. Nwg txawm pav nwg ob zaaj npausuav ntawd rua puab noog, tabsis tsi muaj leejtwg txhais tau ob zaaj npausuav ntawd rua nwg le. #Dani 2:2

9Tes tug laub cawv maamle has rua Falaus has tas, “Nubnua kuv thov leeg kuv lub txim kws kuv tau ua taag lug lawm. 10Koj tau chim rua tug thawj kws saib kev ci ncuav hab kuv, koj txhaj muab wb coj moog kaw rua huv tug thawj kws saib cov faajxwm lub tsev lojcuj. 11Muaj ib mos wb nyag txawm ua nyag ib zaaj npausuav, hab wb ob zaaj npausuav ntawd nyag muaj nyag ntsablug. 12Muaj ib tug tub hluas Henplais raug kaw nrug wb nyob uake rua huv, nwg yog tug thawj kws saib cov faajxwm tug tubqhe. Wb pav wb ob zaaj npausuav rua nwg noog, hab nwg txhais wb ob zaaj npausuav ntawd rua wb. 13Mas txhua yaam txawm muaj lawv nraim le nwg has tag: koj muab kuv tso rov lug ua kuv tej num qub, tabsis koj muab tug saib kev ci ncuav txav cejdlaab lawm.”

14Falaus txhaj khaiv tuabneeg moog coj Yauxej; puab txhaj ceevnrooj moog coj nwg tawm huv tsev lojcuj lug. Tomqaab kws Yauxej chais fwjtxwv hab hloov rigtsho taag lawm, nwg txawm lug sawv ntawm Falaus xubndlag. 15Falaus has rua Yauxej has tas, “Kuv ua ib zaaj npausuav tabsis tsi muaj leejtwg txhais tau zaaj npausuav ntawd le. Kuv nov tas thaus muaj tuabneeg pav npausuav rua koj noog, mas koj muaj peevxwm txhais zaaj npausuav ntawd.”

16Yauxej teb tas, “Falaus, nyuasyau tsi muaj peevxwm txhais tau npausuav, tabsis Vaajtswv yog tug yuav txhais koj zaaj npausuav kuas tsimnyog rua koj.”

17Falaus txhaj pav rua Yauxej tas, “Kuv ua npausuav has tas kuv sawv ntawm ntug Dlej Nais. 18Thaus ntawd muaj xyaa tug maum nyuj rog-rog hab zoonkauj heev tawm huv tug Dlej Nais tuaj noj tej nyom ntawm ntug dlej. 19Dlhau ntawd, txawm muaj dlua xyaa tug maum nyuj ntxaug-ntxaug tshuav pobtxhaa xwb tawm lug hab. Kuv yeej tsi tau pum dlua tej nyuj kws phem hab ntxaug npaum le ntawd nyob huv tebchaws Iziv nuav hlo le. 20Cov maum nyuj ntxaug-ntxaug ntawd cale muab cov maum nyuj rog-rog noj nqog taag huv tuabsi. 21Txawm le ntawd los tsi muaj leejtwg yuav pum qhov txawv le, ruaqhov cov maum nyuj ntawd tseem ntxaug hab phem ib yaam le qub. Tes kuv txawm tsim dlheev lug lawm.

22“Kuv rov ua dlua ib zaaj npausuav pum ib tsob nplej txhawv tau xyaa naab nplej puv-puv hab sav zoo heev. 23Tes muaj dlua ib tsob nplej txhawv tau xyaa naab nplej npluag hab qhuav taw nreeg, ruaqhov raug cov cua tom taj suabpuam tuaj ntsawj; 24Cov naab nplej npluag ntawd txawm cale muab xyaa naab nplej kws puv-puv ntawd nqog huv tuabsi lawm. Kuv tub pav zaaj npausuav nuav rua cov tuabneeg kws txawj saib yaig noog taag lawm, tabsis tsi muaj leejtwg yuav txhais tau lub ntsab rua kuv le.”

25Yauxej has rua Falaus has tas, “Ob zaaj npausuav nuav lub ntsablug yog tuabyaam xwb; Vaajtswv tau qha rua koj txug tej kws Nwg tseem yuav ua rua yaav tomntej. 26Xyaa tug maum nyuj rog-rog yog xyaa xyoo, hab xyaa naab nplej kws puv zoonkauj los yog xyaa xyoo ib yaam nkaus hab; ob zaaj npausuav nuav puavleej yog tuablub ntsablug xwb. 27Xyaa tug maum nyuj ntxaug-ntxaug kws tawm tuaj tomqaab hab xyaa naab nplej npluag kws raug cov cua tom taj suabpuam ntsawj ntawd, yog xyaa xyoo kws yuav muaj kev tshaib kev nqhes.

28“Falaus, koj ob zaaj npausuav yeej muaj lawvle qhov kws kuv qha rua koj nuav ntaag; Vaajtswv tau qha rua koj txug tej kws Nwg tseem yuav ua rua yaav tomntej. 29Xyaa xyoo sau nuav qoobloo yuav muaj nplua-mag thoobplawg tebchaws Iziv. 30Tomqaab ntawd yuav muaj kev tshaib kev nqhes xyaa lub xyoo, ua rua suavdlawg cale novqaab txug xyaa lub xyoo kws muaj noj muaj haus nplua-mag ntawd le lawm, ruaqhov txuj kev tshaib nqhes yuav ua rua lub tebchaws nuav raug kev puamtsuaj. 31Thaus ntawd suavdlawg yuav novqaab txug lub sijhawm kws lub tebchaws nuav muaj noj muaj haus nplua-mag, ruaqhov txuj kev tshaib kev nqhes luj heev le. 32Qhov kws koj tau ua npausuav pum ob zag ntawd txhais has tas Vaajtswv tub teem ib lub sijhawm tseg ca lawm hab Nwg yuav ua kuas tej ntawd tshwmsim lug sai-sai tomntej nuav.

33“Yogle ntawd, Falaus yuav tau nrhav ib tug tuabneeg kws txawjntse hab muaj tswvyim, es tsaa nwg ua tug saib lub tebchaws nuav. 34Falaus yuavtsum tsaa dlua ib paab numtswv moog ua cov sau suavdlawg tej qoobloo ib feem tsib ntawm xyaa lub xyoo kws muaj qoobloo ntau heev nuav lug ca. 35Kuas puab cale sau txhua yaam qoobloo huv xyaa lub xyoo kws ua tau qoob tau loo ntawd tseg ca, hab tsocai rua puab moog sau tej nplej lug ntim ca rua huv tej nroog, hab tso tuabneeg zuv. 36Tej qoobloo nuav yuav muab ceev ca, txhajle tau yug lub tebchaws, thaus muaj kev tshaib nqhes lug raug cov tuabneeg Iziv xyaa lub xyoo ntawd. Ua le nuav tsoom pejxeem txhaj tsi tuag tshaib.”

Tsaa Yauxej Kaav Tebchaws Iziv

37Falaus hab taagnrho nwg tsoom numtswv puavleej pumzoo ua lawvle zaaj kws Yauxej has nuav. 38Falaus has rua puab tas, “Peb yeej nrhav tsi tau ib tug tuabneeg kws muaj Vaajtswv tug ntsujplig nrug nwg nyob zoole Yauxej nuav le lawm.” 39Falaus has rua Yauxej tas, “Vaajtswv tub qha taagnrho tej nuav rua koj paub lawm, txhais tau tas yeej tsi muaj leejtwg yuav ntse hab muaj tswvyim npaum le koj. 40Kuv yuav tsaa koj ua tug saib kuv lub vaajloog, hab taagnrho kuv cov pejxeem yuav noog koj tej lug xaaj. Yog has txug lub zwmtxwv, kuv txhaj tseem yog tug luj dlua koj xwb. #Tegnum 7:10 41Zagnua kuv tsaa koj ua tug tswj taagnrho lub tebchaws Iziv.”

42Falaus hle hlo nwg ntiv nplhaib kws yog lub homthawj ntawm nwg tug ntivteg lug looj kag Yauxej tug ntivteg. Nwg muab cev rigtsho ntaub maag kws zoo heev rua Yauxej naav, hab muab txuj saw kub lug rua Yauxej coj ntawm cejdlaab. #Dani 5:29 43Nwg muab nwg lub tsheb neeg vaajntxwv thib ob rua Yauxej caij, hab nwg cov tub faajxwm moog ua Yauxej ntej qw has tas, “Zaam kev! Zaam kev!” Yogle ntawd Yauxej txhaj raug tsaa ua tug tswvxeev kaav taagnrho lub tebchaws Iziv. 44Falaus has rua Yauxej tas, “Kuv yog Falaus, tabsis yog koj tsi tau tsocai mas cov tuabneeg kws nyob huv tebchaws Iziv nuav tsi muaj cai tsaa teg tsaa taw ua ib yaam dlaabtsi le.” 45Falaus tis dlua ib lub npe tshab kws yog npe Iziv rua Yauxej hu ua Xefanaj Paneyas, hab nwg muab Pautifelas kws yog tug povthawj hlub kws nyob huv lub nroog Oos#41:45: Oos: yog has txug lub tuamtsev huv lub nroog Heli-aupulis. tug ntxhais hu ua Axenas rua Yauxej yuav ua quaspuj. Yauxej txhaj tawm moog ncig thoobplawg tebchaws Iziv.

46Thaus Yauxej pib ua num rua Falaus kws yog cov Iziv tug vaajntxwv, nwg muaj noobnyoog pebcaug xyoo. Yauxej tawm huv Falaus lub loog hab moog ncig saib thoobplawg tebchaws Iziv. 47Xyaa lub xyoo kws qoobloo ntsu nplua-mag ntawd, cov tuabneeg huv tebchaws Iziv ua tau qoobloo ntau kawg nkaus le; 48Yauxej tau sau taagnrho tej qoobloo kws ua tau ntawm xyaa lub xyoo ntawd lug khaws ca rua huv tej nroog. Lub nroog twg kws muaj tuabneeg ua teb nyob puagncig, los nwg sau tej qoob huvsi lug khaws ca rua huv lub nroog ntawd. 49Yauxej sau tau qoobloo lug khaws ca ntau npaum nkaus le tej xuabzeb nraag ntug havtxwv; sau tau ntau heev tes nwg txhaj tsi suav vim suav tsi txheeb le lawm.

50Uantej xyoo kws muaj kev tshaib kev nqhes lug txug, Yauxej tug quaspuj kws hu ua Axenas yug tau ob tug tub rua nwg. 51Yauxej has tas, “Vaajtswv ua rua kuv novqaab taagnrho kuv tej kev txomnyem hab novqaab taagnrho kuv txiv tsev tuabneeg le lawm”; yogle ntawd, nwg txhaj muab nwg tug tub hlub tis npe hu ua Manaxes.#41:51: Manaxes: Lub npe nuav has muaj ntsiv thooj le lulug Henplais kws has tas “ua kuas novqaab.” 52Hab nwg tseem has tas, “Vaajtswv pub rua kuv muaj tubki huv lub tebchaws kws kuv muaj kev ntxhuvsab”; yogle ntawd nwg txhaj muab nwg tug tub yau tis npe hu ua Efalayees.#41:52: Efalayees: Lub npe nuav has muaj ntsiv thooj le lulug Henplais kws has tas “pub mivnyuas.”

53Xyaa lub xyoo kws qoobloo ntsu nplua-mag nyob huv tebchaws Iziv tau xaus, 54tes xyaa lub xyoo kws muaj kev tshaib nqhes txawm pib tshwm tuaj, lawvle Yauxej has tseg. Txhua lub tebchaws muaj kev tshaib nqhes, tabsis thoobplawg lub tebchaws Iziv tseem muaj mov noj. #Tegnum 7:11 55Thaus cov tuabneeg Iziv pib muaj kev tshaib plaab, puab txawm quaj thov mov ntawm Falaus. Yogle ntawd, Falaus txhaj kuas puab moog cuag Yauxej hab ua lawvle Yauxej has. #Yauh 2:5 56Thaus kev tshaib kev nqhes nthuav moog thoob lub tebchaws lawm, Yauxej txhaj qheb txhua lub txhaab nplej hab muag rua cov tuabneeg Iziv. 57Tej tuabneeg kws nyob thoobplawg txhua qhov puavleej tuaj rua huv tebchaws Iziv kws yog tuaj yuav nplej ntawm Yauxej, ruaqhov muaj kev tshaib nqhes luj heev moog thoobplawg txhua qhov chaw le lawm.

Currently Selected:

Chivkeeb 41: HNJ2022

Highlight

Copy