Tegnum 5

Ananias Hab Xafilas

1Muaj ib tug txivneej hu ua Ananias, nwg tug quaspuj hu ua Xafilas. Obtug kuj muab obtug thaaj aav muag hab. 2Ananias tau muab ib qho ntawm cov nyaj ntawd khaws ca lawm; nwg tug quaspuj los kuj nrug nwg paub hab, tes nwg txawm nqaa hlo cov nyaj ntawd moog rua cov timthawj.

3Petus has rua nwg has tas, “Ananias, uacaag koj ca Xataas kaav koj lub sab es ua rua koj cale dlaag Vaaj Ntsujplig tug Dlawbhuv lug ntawm qhov kws koj muab koj thaaj aav muag hab cale khaws ib qho nyaj ntawd ca lawm? 4Thaus koj tsi tau muag koj thaaj aav, thaaj aav ntawd yeej yog koj le; thaus koj muab muag lawm, cov nyaj ntawd yeej yog koj le hab. Uacaag koj yuav muaj lub sab ua le ntawd? Tsi yog koj dlaag tuabneeg, tabsis yog koj dlaag Vaajtswv!”

5Thaus Ananias nov Petus has le ntawd, nwg txawm qaug ntawg hab tuag kag lawm; txhua tug kws nov zaaj nuav, suavdlawg ntshai kawg le. 6Cov tub hluas txawm lug muab Ananias lub cev qhwv hab kwv coj moog log.

7Kwvlaam le peb txoogteev tomqaab ntawd Ananias tug quaspuj txawm tuaj txug, tabsis nwg tsi paub txug tej xwm kws muaj dlhau lug ntawd le. 8Petus nug Xafilas has tas, “Koj qha rua kuv seb, koj hab koj tug quasyawg meb muag meb thaaj aav yeej tau nyaj npaum le ntawd xwb lov?”

Nwg teb tas, “Yog, yeej tsuas tau npaum le ntawd xwb.”

9Petus txawm has rua nwg has tas, “Uacaag koj hab koj tug quasyawg meb yuav koom ua ib lub sab dlaag Vaaj Ntsujplig tug Dlawbhuv? Koj saib seb, cov tuabneeg kws kwv koj tug quasyawg moog log taabtom lug txug ntawm qhovrooj, puab yuav muab koj kwv moog ib yaam nkaus hab!”

10Taamsim ntawd Xafilas txawm qaug ntawg rua ntawm Petus kutaw hab tuag kag. Thaus cov tub hluas lug txug hab pum tas Xafilas tuag lawm, puab txawm kwv nwg moog log rua ntawm nwg tug quasyawg ib saab. 11Taagnrho pawg ntseeg hab txhua tug kws nov zaaj nuav, suavdlawg ntshai kawg le.

Cov Timthawj Ua Tej Txujci Tseemceeb

12Cov timthawj ua ntau yaam txujci tseemceeb hab ua ntau yaam kws tuabneeg xaav tsi thoob rua suavdlawg pum. Taagnrho cov ntseeg tuaj nyob uake rua ntawm Xalumoos lub qaabkhaav. 13Txawm yog tej tuabneeg suavdlawg qhuas cov ntseeg kawg le los tsi muaj leejtwg muaj cuabkaav lug koom nrug puab le. 14Txawm le ntawd los pheej muaj cov quaspuj hab txivneej kws lug ntseeg Vaajtswv coob zujzug lug ntxiv rua puab. 15Lug ntawm tej dlejnum kws cov timthawj ua, tuabneeg txhajle coj cov kws muaj mob tuaj pw rua ntawm tej txaaj hab tej lev ntawm ntug kev, sub thaus Petus taug kev tuaj, nwg tug dluab txhaj yuav lug raug cov tuabneeg mob ntawd qeeleej. 16Tseem muaj tuabneeg coob-coob huv tej zog kws nyob ibncig lub nroog Yeluxalees coj tej tuabneeg kws muaj mob hab tej kws raug tej ntsujplig phem tuaj rua cov timthawj khu; cov ntawd txhua tug puavleej zoo huv tuabsi.

Cov Timthawj Raug Kev Tsimtxom

17Yogle ntawd, tug Tuam Povthawj Hlub hab taagnrho cov kws nrug nwg ua dlejnum, kws yog cov Xadukais, txhaj khib cov timthawj heev; puab txhaj tuavhuv ua phem rua cov timthawj. 18Puab txawm nteg cov timthawj coj moog kaw rua huv tsev lojcuj luj. 19Tabsis mo ntawd tug Tswv ib tug timtswv lug qheb lub tsev lojcuj tej qhovrooj, hab coj cov timthawj tawm moog. 20Nwg has rua puab has tas, “Mej cale tawm moog sawv huv lub Tuamtsev, hab qha taagnrho zaaj kws has txug lub neej tshab nuav rua suavdlawg noog.” 21Cov timthawj txawm ua le ntawd, puab txhaj sawvntxuv moog rua huv lub Tuamtsev hab pib qha suavdlawg.

Tug Tuam Povthawj Hlub hab cov kws nrug nwg ua dlejnum txawm hu taagnrho cov Yudais cov thawjcoj huv Koomhum qebsab tuaj saablaaj; puab txawm khaiv tuabneeg moog coj cov timthawj huv tsev lojcuj lug cuag puab. 22Tabsis thaus cov tuabneeg kws puab khaiv ntawd moog txug, puab tsi pum cov timthawj nyob huv tsev lojcuj lawm. Puab txawm rov lug has rua cov numtswv has tas, 23“Thaus peb moog txug ntawm lub tsev lojcuj, peb pum tej qhovrooj tseem muaj ntsugphoo ntsug khovkho, cov faajxwm los tseem sawv ntawm tej qhovrooj zuv; tabsis thaus peb qheb tej qhovrooj, yeej tsi pum ib tug tuabneeg nyob rua huv le lawm!”

24Thaus tug thawj tubrog kws zuv lub Tuamtsev hab cov thawj povthawj hlub nov le ntawd, puab xaav tsi thoob le, has tas sov cov timthawj dlua twg taag lawm. 25Taamsim ntawd txawm muaj ib tug txivneej tuaj has rua puab has tas, “Mej noog kuv has nawb! Cov tuabneeg kws mej muab kaw rua huv tsev lojcuj, taamsim nuav puab taabtom qha suavdlawg huv lub Tuamtsev!” 26Thaus ntawd, tug thawj tubrog nrug rua nwg cov tubrog txawm moog coj cov timthawj rov lug. Puab kuj tsi ua phem rua cov timthawj, ruaqhov puab ntshai nyobtsaam cov pejxeem muab pobzeb ntaus puab.

27Puab coj cov timthawj lug sawv taabmeeg cov thawjcoj huv lub Koomhum qebsab, tes tug Tuam Povthawj Hlub txawm taug puab zaaj. 28Nwg has tas, “Peb tub txwv mej tunrho lawm has tas mej tsi yoom tuav tug txivneej nuav lub npe qha hlo le los sav! Mej saib seb, tej kws mej qha tub nrov-nchaa moog thoobplawg lub nroog Yeluxalees lawm, hab mej tseem yuav muab tug txivneej ntawd cov ntshaav lug rua peb ris hab.” #Math 27:25

29Petus hab cov timthawj teb tas, “Peb yuavtsum noog Vaajtswv lug, tsi yog noog tuabneeg lug. 30Mej muab Yexus tua lug ntawm qhov kws muab Nwg ntsa rua sau tug ntoo khaublig, tabsis tomqaab ntawd peb cov yawmkoob tug Vaajtswv tub tsaa Nwg sawv huv qhovtuag rovqaab lug lawm. 31Vaajtswv tau kuas Nwg moog nyob ntawm Vaajtswv saab xis, hab tsaa Nwg ua tug Thawjcoj hab ua tug Cawmseej kuas cov Yixalayees tso puab tej kev txhum tseg, puab lub txim txhaj yuav raug zaam. 32Tej nuav peb hab Vaaj Ntsujplig tug Dlawbhuv yeej ua tau timkhawv. Vaaj Ntsujplig yog tug kws Vaajtswv pub rua cov tuabneeg kws noog Nwg lug.”

33Thaus cov numtswv nov le ntawd, puab chim heev, puab xaav muab cov timthawj tua povtseg lawm xwb. 34Tabsis cov numtswv ntawd muaj ib tug kws yog Falixais hu ua Nkamaliyees, nwg yog ib tug xwbfwb qha Kevcai kws tej tuabneeg suavdlawg fwm heev. Nwg txawm sawv huv lub Koomhum qebsab hab xaaj kuas puab coj cov timthawj tawm moog saabnrau ibplag, 35tes nwg txawm has rua cov thawjcoj huv Koomhum qebsab tas, “Cov kwvtij Yixalayees, mej yuav tau ua tuabzoo saib kuas meej-meej txug tej kws mej yuav ua rua cov tuabneeg nuav. 36Mej ncu tau has tas tsi ntev taag lug nuav The-udas tau tawm lug khaav has tas nwg yog ib tug tuabneeg tseemceeb; kwvlaam 400 leej tuaj nwg tog, tabsis nwg raug tua tuag lawm. Cov tuabneeg kws tuaj nwg tog kuj tsiv uasaab uasua hab pluj taag le lawm. 37Dlhau ntawd, thaus cov numtswv taabtom txheeb cov pejxeem tej npe seb muaj coob lecaag, muaj dlua ib tug txivneej hu ua Yudas, nwg yog tuabneeg Kalilais, nwg ntxag tau ib paab tuabneeg coob-coob tuaj nwg tog, tabsis nwg kuj raug tua tuag lawm, tes cov tuabneeg kws tuaj nwg tog txawm tsiv uasaab uasua taag lawm hab.

38“Yogle ntawd, kuv has rua mej has tas, nyob rua zaaj taamsim nuav los mej yuavtsum tsi xob ua lecaag rua puab cov nuav, ca puab nyob puab zoo dlua. Yog tas tej kws puab npaajsab yuav ua hab tej kws puab tub ua taag lug ntawd yog tuabneeg le dlejnum xwb, tes tej ntawd yeej yuav pluj moog, 39tabsis yog tas yog Vaajtswv le dlejnum, tes mej yuav kov tsi yeej puab le. Tseem ntshai nyobtsaam yog mej tawmtsaam Vaajtswv hab!”

Cov thawjcoj huv Koomhum qebsab txhaj pumzoo lawvle Nkamaliyees has. 40Puab hu cov timthawj lug, muab cov timthawj ntawd nplawm, hab txwv tsi pub puab has txug Yexus lub npe, tes txawm tso puab moog lawm. 41Thaus cov timthawj tawm ntawm cov thawjcoj huv Koomhum qebsab moog lawm, puab zoosab kawg le, ruaqhov Vaajtswv suav has tas puab yog cov kws tsimnyog raug kev txaajmuag vim Yexus lub npe lawm. 42Puab najnub qha Txuj Moo Zoo kws has txug Yexus kws yog tug Mexiyas rua suavdlawg noog nyob rua huv lub Tuamtsev hab huv tuabneeg tej vaaj tej tsev.

Currently Selected:

Tegnum 5: HNJ2022

Highlight

Copy