Tegnum 24

Cov Yudais Kom Paulus

1Tsib nub tomqaab ntawd, Ananias kws yog tug Tuam Povthawj Hlub, nrug rua ob-peb tug txwjlaug hab ib tug txivneej kws has plaubntug hu ua Tetulus, puab moog rua peg lub nroog Xixaleyas. Puab txawm moog cuag Felis kws yog tug Tswvxeev hab kom Paulus rua nwg. 2Puab txhaj hu Paulus lug, tes Tetulus txawm pib kom Paulus rua Felis has tas:

“Hawm txug tug Tswvxeev Felis. Peb nyob ywjxeeb lug tau ntau lub xyoo tub yog vim koj yog ib tug thawjcoj kws ntse heev, hab peb lub teb lub chaw muaj kev txhimkhu ntau yaam zoo vim yog koj txuj kev xaam pum dleb. 3Peb yeej txaussab rua txhua yaam kws koj ua nyob rua txhua qhov hab txhua lub sijhawm, hab peb yuav ncuntsoov koj txajntsig moog le. 4Kuv tsi xaav nkim koj lub sijhawm, yogle ntawd, kuv thov koj ua sabntev noog lu puav lug kws peb yuav has rua koj nuav.

5“Peb pum tas tug txivneej nuav yog ib tug kws nyam tsim teebmeem heev; nwg pib ua teebmeem rua cov Yudais kws nyob thoob qaabntuj, hab nwg tseem yog ib tug thawjcoj ntawm cov Naxalev paab hab. 6Tsi taag le ntawd xwb, nwg tseem yuav ua kuas lub Tuamtsev tsi dlawbhuv hab, yogle ntawd peb txhaj nteg nwg. 7#24:7: Tej phoo ntawv qub kws xuas teg sau, ntxiv nqai 6b-8a nuav rua: Peb yeej yuav txavtxim rua nwg lawvle peb txuj kevcai, 7 tabsis tug thawj tubrog pawg txheeb kws yog Lixias txawm tuaj tawmtsaam peb nyaav heev hab txeeb Paulus ntawm peb teg moog lawm. 8 Tes Lixias txawm has rua cov tuabneeg kws kom Paulus kuas tuaj has timntsej timmuag ntawm koj. 8Yog koj taug tug txivneej nuav zaaj, koj yuav paub qhov tseeb ntawm txhua yaam kws peb has txug nwg.” 9Cov Yudais puavleej koomsab kom Paulus hab has tas txhua yaam ntawd yeej muaj tseeb tag.

Paulus Has Dlaws Nwg Zaaj Taabmeeg Felis

10Thaus tug tswvxeev ncaws hau kuas Paulus has, Paulus txawm has tas:

“Kuv paub tas koj yog ib tug kws txavtxim ntawm lub tebchaws nuav lug tau ntau xyoo, kuv zoosab has dlaws kuv zaaj rua koj noog. 11Yog koj tshawb saib, koj yuav pum tas txij nub kws kuv moog pehawm Vaajtswv sau lub nroog Yeluxalees lug txug rua nubnua, tub tsi tau dlhau kaum-ob nub. 12Cov Yudais yeej tsi tau pum kuv nrug leejtwg siscaav huv lub Tuamtsev, lossis pum kuv ua rua cov pejxeem kubntxhuv tsi has huv tej tsev saablaaj lossis ib qhov chaw twg nyob huv nroog le. 13Tej lug kws puab kom kuv rua koj nuav, puab tub nrhav tsi tau ib qhov nyuas puavpheej kws yuav siv lug tawmtsaam kuv le.

14“Txawm le ntawd los, kuv thov leeg ib qho rua koj has tas, kuv yeej pehawm peb cov yawmkoob tug Vaajtswv kws yog coj lawvle Txujkev ntawd qha, qhov ntawd yog qhov kws puab has tas cuav xwb. Tabsis kuv kuj ntseeg txhua lu kws sau tseg rua huv Mauxes txuj Kevcai hab huv tej ntawv kws cov xwbfwb cev Vaajtswv lug tau sau tseg lawm huv tuabsi. 15Kuv casab rua Vaajtswv ib yaam le puab casab hab, has tas txhua tug tuabneeg, tsi has tug zoo los tug phem, puavleej yuav sawv rovqaab lug. 16Yogle ntawd, kuv txhaj muab sab rau ua kuv lub neej kuas hum Vaajtswv sab hab hum tuabneeg sab txhua lub sijhawm.

17“Tomqaab kws kuv tawm huv lub nroog Yeluxalees moog tau ntau xyoo lawm, kuv tau rovqaab lug rua huv lub nroog Yeluxalees kws yog coj mivntsiv nyaj lug pub rua kuv tsaav tuabneeg hab muab tsaj tua hlawv fij rua Vaajtswv. #Tegnum 21:17-28 18Thaus kuv ua kevcai ntxuav taag, kuv taabtom muab tsaj tua hlawv fij rua Vaajtswv huv lub Tuamtsev, tes puab txawm tuaj pum kuv. Thaus ntawd yeej tsi muaj tuabneeg coob nrug kuv nyob uake hab tsi muaj kev kubntxhuv dlaabtsi le. 19Tabsis muaj ib cov Yudais kws tuaj peg lub xeev Exias tuaj, kuj nyob rua ntawd. Yog puab muaj dlaabtsi kws tsi txaussab rua kuv, tsimnyog puab tuaj kom kuv rua koj ntawm nuav. 20Lossis kuas cov tuabneeg kws nyob ntawm nuav has seb, thaus kuv qha kuv zaaj rua cov Yudais tej numtswv noog, puab ho pum kuv ua txhum dlaabtsi. 21Tsuas tshwj thaus kuv sawv taabmeeg puab, kuv tau has ib lus le nuav has tas: ‘Nubnua mej taug kuv zaaj tub yog vim kuv ntseeg tas cov tuabneeg kws tuag lawm yuav sawv rov lug muaj txujsa.’ ” #Tegnum 23:6

22Felis yeej paub txug Txujkev ntawd zoo, nwg txhaj muab rooj plaub ntawd ncua. Nwg has rua suavdlawg has tas, “Tog Lixias kws yog tug thawj tubrog pawg txheeb tuaj txug tsaiv, kuv maamle txavtxim rua mej rooj plaub nuav.” 23Felis kuas tug thawj tubrog pawg pua zuv Paulus zoo-zoo, tabsis kuas muab qeeyaam kev ywjpheej rua Paulus, hab tsocai rua nwg cov phoojywg tuaj tu nwg lawvle nwg txuj kev cheemtsum.

Paulus Has Rua Felis Hab Nruxilas Noog

24Ob-peb nub tomqaab ntawd, Felis hab nwg tug quaspuj Nruxilas, kws yog tuabneeg Yudais txawm uake tuaj. Nwg kuas puab coj Paulus lug ntsib obtug hab kuas Paulus qha txug kev ntseeg Yexus Khetos rua obtug noog. 25Tabsis thaus Paulus qha txug txuj kev ncaajnceeg, kev tswj yug tugkheej, hab txuj kev txavtxim kws yuav muaj lug yaav pegsuab, tes Felis txawm ntshai, nwg txhaj has rua Paulus has tas, “Koj moog tau lawm lau, lwmnub kuv khoom tsaiv kuv maamle rov hu koj tuaj dlua.” 26Tuablub sijhawm ntawd Felis pheej xaav tas Paulus yuav muab nyaj rua nwg, vimle ntawd nwg txhaj pheej hu kuas Paulus moog nrug nwg thaam ob-peb zag.

27Tomqaab dlhau ob xyoos lawm, Paukius Fexatus lug ua tug tswvxeev hloov Felis chaw. Felis xaav kuas cov Yudais nyam nwg, nwg txhaj ca Paulus kaw nyob rua huv tsev lojcuj.

Currently Selected:

Tegnum 24: HNJ2022

Highlight

Copy